Канон, кир Андрея Критскаго, глас 8.
Песнь 1. Ирмос.
Истрясшему в мори мучительство фараоне, и посуху Израиля наставльшу, воспоем Богови. Яко прославися во веки.
Запев: Святый великий Иоанне Предотече Господень, моли Бога о нас.
Пустыни красное овча, Захариин плод, Елисаветино безнадежи прозябение. Предповелевает верным торжествовати, честную его память.
Запев. О рожению исполнь крове, о пиру мерзску. Убийством бо пияньство Ирод раствори. Трапеза же его убийства горкаго исполнися.
Слава. Обличившаго Ирода беззаконнующа вернии, и отсечение главе претерпевша, воспоем Крестителя. Яко за ревность Божию умерщвена.
И ныне. Неописаннаго Бога Слова, всего всельшася в Тебе. Родила еси Чистая Богородительнице, сугуба Того же. Яко Едина суща Сына, воплощена из Тебе неизреченно.
Катавасия: Избави от бед рабы своя, святый великий пророче Иоанне, Предотече Господень, яко вси по Бозе к тебе прибегаем, ты бо молиши о нас Христа Бога нашего.
Песнь 3. Ирмос.
Несть свята яко Господь, и несть праведна яко же Бог наш. Его же поет вся тварь. Несть бо пресвята, паче тебе Господи.
Запев. Болии не воста в роженых женами Иоанна, взываше Христос Истина. Во утробе бо позна создание Создавшаго. Проповедаше матерним гласом.
Запев. Перстом первее показав Агньца. И языком второе Ирода обличил еси. Главою же третие источаеши чюдеса, от здана сосуда нам.
Слава. Рожение славно, Крестителю Христов. И житие твое непорочно. И предизшествие честно, и показание странно. Смерть честна, и погребение славно.
И ныне. Бог сыи, Сам Себе истощил еси Единородне. Да спасеши ихже созда. Ихже ради вочеловечися воплощься от Девы. И все мое премени естество, и приведе своему Родителю. Катавасия.
Седален. Глас 8. Подобен. Премудрости.
От неплодове просияв волею Божиею, и узы разтерзав языку отчу. Показал еси Солнце, денницу озаряющу. И людем в пустыни Зиждителя проповедал еси, Агньца вземлющаго мира согрешения. Тем же ревностию царя обличил еси. Славную главу твою отсече славне, Иоанне всехвальне. Моли Христа Бога, согрешением оставление даровати, празднующим любовию святую память твою. Дважды.
Слава и ныне. Богородичен. Яко Деву едину в женах, Тя безсемени рождьшую Бога плотию, вси ублажаем родове человечестии. Ибо огнь вселися в Тя Божества. И яко Младенца доиши Зиждителя и Господа. Тем же ангельскии и человеческии род, достойно славим Пресвятое Рожество Твое, и согласно вопием Ти. Моли Христа Бога, согрешением оставление даровати, воспевающим достойно славу Твою.
Песнь 4. Ирмос.
Из горы присенныя Слове пророк, из Единыя Богородицы, хотящу Ся воплотити, боговидно разсмотрь. И со страхом славословяще силу Твою.
Запев. Уяснил еси нам Христово царство. Показал еси людем пути покаяния. И Ирода обличил еси беззаконнующа, великии проповедниче Иоанне мудре.
Запев. Не терпя Крестителю Ирод обличения, победися гневом и завистию и горестию. И соблюдаше время рожения, в не же усече главу твою, проповедниче Христов.
Веселися Крестителю, да играет дух твой. Обличаеши бо и тамо безбожнаго Ирода. И сущим во аде проповедуеши душам глаголя, спасение наше приближися.
Слава. Чюдится земля твоему житию Иоанне. Проповедует небо, неправедное твое заколение. И сказует множество добродетелей твоих, Церкви воспевающи.
И ныне. Родися от Матери Девыя Непорочныя. Сохранил еси Чисту по Рожестве, иже в мое существо весь облекся, греха кроме. Катавасия.
Песнь 5. Ирмос.
Иже от нощи неведения, богоразумием просвещеи конца. Просвети мя утром, славословия Твоего Господи.
Запев. Пустынное овча, и вселенней стяжание Предотеча. Днесь готовит духовную трапезу нам.
Запев. Сластем раба, и обетом преступника, обличил еси Иоанне. Ирода, Иродияды горкаго рачителя.
Слава. Иродияда пляшет. Иоанн вяжется и закаляется. О пияньству Иродову, о несмысльству душа его.
И ныне. Радуися Божественая Гора, от Нея же Камень отсечеся безруку. Пречистая усырившися Богу и Слову, Всенепорочная плотию. Катавасия.
Песнь 6. Ирмос.
Якоже пророка избави, из глубины преисподняя Христе Боже. И мене от грех моих избави, яко Человеколюбец. И направи живот мой молютися.
Запев. Усечение честныя и всехвальныя ти главы Предотече Христов почитающе. Славим твою приснохвальную, и всемирную память преблаженне.
Запев. О сквернаго гощения. О горкое рожение. О пияньство скверное, Ирода беззаконнаго. Содержим бысть к беззаконию. И обличаем пророка убити поучевается.
Слава. Плясавши новая египтяныня, посреди пира сквернено. Главу испроси, сея обличившую родительницу, и Иродову наложницу.
И ныне. Иже ныне Сын Девыя, первее Сын Отечь показася. Не Ин разумеваем, от видимаго. Аще и пребысть Един во обою совершен. Катавасия.
Кондак. глас 5, самогласен.
Предотечи славное усекновение, смотрение бысть некое Божествено. Да и сущим во аде Спасово проповесть пришествие. Да рыдает убо Иродия, беззаконно убийство просивши. Не закон бо Божии, ниже живыи век возлюби, но лесть временную.
Икос. Рожение Иродово, всем явися непреподобно. Егда посреди питеющихся, глава постящагося предложеся якоже снедь. Радости совокупися печаль, и смеху растворися горкое рыдание. Яко главу Крестителеву на блюде нося, пред всеми вниде якоже рече отроковица. И клятвы ради, рыдание нападе на вся возлежащая тогда с царем. Небо обвесели онех, ни Ирода самого. Рече бо оскорбеша печалию неистинною, но лестию временною.
Песнь 7. Ирмос.
Иже в начатце Основавыи землю. И небеса Словом Утвержеи. Благословен еси Господи Боже отец наших.
Запев. Закон Божии проповедуя Иоанн, злочестиваго не убояся, Ирода беззаконующаго целомудрити. Огнь бо бяше в нем греха его.
Запев. О главе ясно законополагающи. Недостоит тебе беззаконующу, багряницу носити, яко мучительскую одежу.
Слава. Оружии скверными, беззаконныи Ирод вооружився. С клятвою исполняше беззаконие. Гощения пьяньство имея тамо, с воиньствующее тому.
И ныне. Безплотен Сыи, непреложно воплотися. Безлетен Сыи, в лето познан бысть от Девы, всех Зиждитель. Несмесно пребыв якоже Бе, и Быв якоже не бе. Катавасия.
Песнь 8. Ирмос.
Иже на горе святей проявленнаго. И в купине огнем Девыя Моисеови тайну показавшаго Господа, пойте и превозносите Его во веки.
Запев. Проповедавыи Христово пришествие, сущим во аде. Верою возвещая, иже болезни решаяи приходит Господь Славы. Его же превозносим во веки.
Запев. В темнице тя затвори Ирод Иоанне, втораго Илию. И железными ужи оковав уби. Иже покаянию и царствию веровати проповедавшаго.
Слава. О трапеза крови исполнена. О брашна убийством растворена. О пиру исполнь суетства. О безчеловечна и сквернена убиения, Ирода беззаконнаго.
И ныне. Горе весь, и доле весь Слове. В недрех Отчих и Матере Твоея. Весь Бог, и весь естеством Человек. Един составом, и сугуб Естеством еси Милостиве. Катавасия.
Песнь 9. Ирмос.
Проявленнаго на горе законодавцу, огнем и купиною, Рожество Приснодевыя, в наше верных спасение. Песньми немолчными величаем.
Запев. Паки Иезавель ликует на Илию. Паки египтяныня Иосифа ищет. Пророка же и Крестителя Спасова, ныне явльшаяся Иродияда сквернавая.
Запев. Во главу усечен быв Иоанне от Ирода. Сущим во аде душам послася, проповедати грядущаго. И тех спасти всех, прежде скончавшаяся верныя от Адама.
Слава. Светилник Света, и глас Слову сыи. Проповедник Агньцу Божию, пустынное овча. Иоанне честныи мучениче Господень, моли спастися поющим тя.
И ныне. Едина в женах по Рожестве явися Дева. Едина в женах Ты Богородительница показася. Едина разрешила еси от болезни Евву. И первородителную изсушила еси клятву. Катавасия.