Канон на утрени под Субботу Великую


Глас, 6. Творение Марка Мниха. Ему же краегранесие. И днесь же субботу пою великую.

Песнь 1. Ирмос.

Волною морскою сокрывшаго древле, гонителя мучителя, под землею скрыша, спасеных дети. Но мы яко отроковица Господеви поем. Славно бо прославися.

Запев: Слава Тебе Боже наш, слава Тебе.

Господи Боже мой, исходное пение, и надгробную Ти песнь воспоем, еже погребением Твоим жизни моея входы отверзшему, и смертию смерть разоршему, и ада умертвившему.

Слава. Горе Тя на престоле премирная, и долу во гробе подземная видяще Спасе мой, зыбляхуся умерщвением Твоим, паче ума бо виден бысть мертвец Животу Началник.

И ныне. Да Твоея славы вся исполниши, сшел еси внижняя земли и погребеся. И нескрыся убо от Тебе состав мой иже во аде, и истлевша мя, нова твориши Человеколюбче.

 

Песнь 3. Ирмос.

Тебе наводах повесившаго всю землю неодержимо, тварь видевши налобнем висяща, ужасом одержима бе, несть Свята разве Тебе Господи взывающи.

Запев. Образы погребения Твоего показал еси, видения умножив нынеже сокровенныя Твоя тайны, богомужно уяснил еси, и во аде сущим Владыко. Несть Свята разве Тебе Человеколюбче.

Слава. Простерл еси надреве длани Свои Спасе, и совокупил еси яже древле разстоящыяся, одеянием еже воплащанице и вогробе, окованныя разрешил еси. Несть Свята разве Тебе Человеколюбче.

И ныне. Гробом и печатми, невместиме содержим еси был хотением. Ибо силу Свою действы показал еси, благодетелно поющим, Несть свята разве Тебе Человеколюбче.

Седален, глас 1. Гроб Твой Спасе, воини стрегуще, мертви быша, от облистания явльшагося ангела, проповедающа женам воскресение. Тебе славим тли потребителя. Тебе припадаем воскресшему изгроба, Единому Богу нашему.

Слава, и ныне, глас той же. Плащаницею чистою Тело испросив упилата миром помазует и полагает Иосиф в новом гробе. Темже уранше мироносицы жены, возопиша, покажи нам, якоже предрекл еси Христе воскресение.

 

Песнь 4. Ирмос.

Еже на Кресте Твое божественое смотрение, предзря Аввакум, дивяся вопияаше, Ты силных ссече державу Благии, приобщаяся сущим во аде, яко Всесилен.

Запев. Седмыи день днесь освятил еси, егоже древле благословил еси упокоением дел. Преводиши бо всяческая и обновляеши, препочивая Спасе мой и назидая.

Слава. Силою лучшею одолевшу Тебе, от плоти Твоея душа разделися. Растерзающи сугубо узы смерти и аду, Слове Державою Твоею.

И ныне. Ад Слове срет Тя огорчися, человека зря обожена, уязвена же ранами, и Всесилна детелию, страшным же сим образом убиен бысть.

 

Песнь 5. Ирмос.

Богоявления Твоего Христе, еже к нам милостивно бывшаго, Исаия Свет видя Невечернии, изнощи утренюя взывааше, воскреснут мертвии и востанут иже вогробех, и вси иже наземли возрадуются.

Запев. Обновляеши земныя Содетелю, землен быв, и плащаница и гроб являют еже в Тебе Слове Таинство. Благообразныи бо советник Тебе Рождьшагося совет образует в Тебе велелепно, новотворяща мя.

Слава. Смертию смертное, и погребением тленное обновляеши, нетленно твориши боголепно безсмертно творя приятие. Плоть бо Твоя истления невиде Владыко, ни душа Твоя во аде страшнолепно неоставлена бысть.

И ныне. Из Небрачныя прошед, и прободен в ребра Содетелю мой, изних соделал еси обновление Еввино, Адам быв, уснув паче естества сном естественым. Воздвигнувся от сна и плоти тления яко всесилен.

Творение. Кир, Козмы.

Песнь 6. Ирмос.

Ят бысть, но неудержан вперсех китовых Иона, Твой бо образ нося, пострадавша и погребению дана, яко из чертога от зверя исшед. Приглашаше же кустодии, иже хранящии суетная и ложная, милости вашея оставили есте.

Запев. Убиен бысть, но неразлучися Слове, еяже приобщися плоти. Аще бо и разорися Храм во время страсти, но и тако един не бе празден состав Божества Плоти Твоея, во обоих бо Един еси Сын Слово Божие, Бог и Человек.

Слава. Человекоубийствено бысть падение Адамово, но не богоубийствено. Аще бо и пострада Твое плотьское перстное существо, но Божество безстрастно пребысть. Тленное же в нетление пременися. И не тленныя жизни показал еси Источник Воскресением.

И ныне. Царьствует ад, но невечнует родом человеческим. Ты бо Спасе положися вогробе, крепкою и живоначалною дланию, смерти ключи развергл еси. И проповедал еси иже от века ту спящим, избавление не ложное, быв мертвым Первенец.

Кондак. Глас, 6. Подобен. Рукописаннаго образа.

Иже бездну затворивыи мертв зрится, и змирною плащаницею повит. Вогробе пологается, яко мертв безсмертныи. Жены же приидоша помазати Его миром, плачюще горко и вопиюще, сия субота есть преблагословенная, внюже Христос уснув, и воскресе тридневно.

Икос. Иже содержаи концы, на Крест вознесеся, и рыдает вся тварь, того видящи нага висяща на древе, солнце лучи скры, и звезды отложиша свет. Земля же сомногим страхом поколебася, и море побеже, и камение разпадеся. Гроби же мнози отверзошася, и телеса восташа святых блистающася. Ад низу стонет, июдеи советуют оклеветати Христово Воскресение. Жены же взывааху, сия суббота есть преблагословеная, внюже Христос уснув, и воскресе тридневно.

Синоксарь во святую и великую субботу. Благослови отче.

Во Святую и Великую Суботу, Боготелесное погребение празднуем, Господа Бога и Спаса нашего Исуса Христа, и еже во ад сошествие, им же оттли наш род возван бысть, к вечней жизни прейде. Всех убо дней Святая Четверодесятница преходит, сих же паки сия Святая и Великая Седмица больши. И Седмицы сея паки больша есть Великая и Святая Субота. Глаголетжеся Великая Седмица, неяко больши суть дние ея, или часове, но зане, великая и пре естественая чудеса, и изрядная Спаса нашего дела вней содеяшася, и паче днесь. Якоже впервом миротворении, всяко дело соделав Бог, и последи Господьственейшее, в шестыи день создал человека, вседмыи почи отвсех дел Своих, и освяти его, субботу именовав, еже убо покоище толкуется; сице и воумнаго мира делании, изрядно вся соделав, и в шестыи наздав паки истлевшаго человека, и обновив Живоносным Своим Крестом и Смертию, в настоящии паки седмыи упокой совершеное делом покоище, животоестественым и спасителным уснув сном; сниде убо Божие Слово с Телом вогроб, сходитже и во ад с нетленною и Божественою Своею Душею, разделшеюся смертию оттелесе, юже и вруце предаде Отцу, Емуже и Свою Кровь принесе, непросившу, избавление наше бывшую. Нибо во аде Господня Душа, якоже и других святых души ята бысть. Како бо; ниже прародителней наносима клятве, якоже оны. Но никровиже взят враг наш диявол, аще и нас держаше еяже ради куплени быхом. Како бо аще неточию от Бога; но и Бога Его разбойник диявол яти имяше; обаче телесне с Божеством вселися во гроб Господь наш Исус Христос, крайне плоти соединившимся. Бяше же с разбойником в раи. И воаде якоже речено бысть бяше с нивидимою Его душею. Преестествене же со Отцем и Духом, бяше седяи яко Бог неописан преже Сыи. И ничтоже Божеству вогробе страждущу, якоже ниже на Кресте. И тление убо Господьское Тело претерпе, еже есть разрешение души от тела, растленияже, или истления, сиречь разрешения плоти и удес, совершеннаго погубления, никакоже бе. Но Иосиф убо святое Тело Господне снем, вогробе нове погребает, иже изсече вкамени, и возвали камень велии надвери гроба, и отиде. Бе же ту Мария Магдалыня, и другая Мария седяще прямо гробу. Воутреиже день, иже есть по пятце, собрашася архиерее и фарисее к пилату, глаголюще, Господи помянухом, яко льстец он рече, егда жив бе, потрех днех востану, мнится убо нам, добро быти твоей власти, повелети воиньству затвердити гроб. Отвеща пилат, аще убо льстец, что глаголы Его мните егда бе жив, яко исповеда Ему умрети. Когдаже рече востану; яве от Ионины притчи собираху то. Всякоже аще затвердится гроб, неукрадется. О како безумнии, елика о Нем творяху, нань деюще не разумевааху. Тому же повелевшу, сами с воинским чином, и опасным запечатлением затвердивша гроб. И се, да нечюжей суще стражи и печати, Воскресение Его оболгано будет. Но ад отселе совращается и изумевается, твердейшую силу ощущая, се изблюет помале. Не праведно поглощеным, твердейшим и краеуголным Каменем Христом, и иже от века положив, и чреву снедь сотворив. Не изреченным схожением Твоим, Христе Боже наш помилуй нас, ныне и присно и вовеки веком, аминь.

 

Песнь 7. Ирмос.

Неизреченное чюдо, иже впещи избавивыи преподобныя дети из пламене, вогробе нове бездушно пологается, на спасение нам поющым, Избавителю Боже благословен еси.

Запев. Уязвен бысть ад в сердце, прием Прободенаго копием в ребра, и воздыхает огнем Божественым снедаемь, наспасение нам поющым, Избавителю Боже благословен еси.

Запев. Богат гроб, в себе бо прием яко спяща Содетеля, и жизни божественное сокровище показася, на спасение нам поющым, Избавителю Боже благословен еси.

Слава. Законом умерших еже вогробе положение, яже всех приемлет Жизнь. И сего Источника показует востанию, на спасение нам поющым, Избавителю Боже благословен еси.

И ныне. Едино бяше не разлучно, еже во аде и во гробе и во Едеме, Божество Христово со Отцем и Духом, на спасение нам пощым, Избавителю Боже благословен еси.

 

Песнь 8. Ирмос.

Ужаснися и убойся небо, и да подвижатся основания земли. Се убо в мертвых вменяется иже в Вышних Живыи, и вогробе мале странно полагается. Егоже дети благословите, священнии пойте, людие превозносите Его вовеки.

Запев. Разрушися Пречистыи Храм, падшую же воставляет сень. Адаму бо первому, вторыи иже в Вышних Живыи сниде, даже до адовых сокровищ. Егоже дети благословите, священнии пойте, людие превозносите Его вовеки.

Слава. Преста дерзость учеником, Аримафей же побеждает Иосиф, мертва бо и нага зря еже надовсеми Бога, просит и погребает, зовыи, дети благословите, священнии пойте, людие превозносите Его вовеки.

И ныне. О чудес новых, О благости, О неизреченнаго терпения; се убо волею подземлею покрывается, иже Ввышних Живыи. И яко льстец оклеветаемь бывает Бог. Егоже дети благословите, священнии пойте, людие превозносите Его вовеки.

 

Песнь 9. Ирмос.

Нерыдай Мене Мати, зрящи вогробе, Егоже вочреве безсемене зачала еси Сына. Воскресну бо и прославлюся, и вознесу со славою, немолчно яко Бог, иже верою и любовию Тебе величающыя.

Запев. В страннем Ти Рожестве, болезней избежавши. И паче естества Блаженна бых, безначалне Сыне. Ныне же Тя Боже мой, бездыхания зрящи мертва, оружием печали растерзаюся люте. Но воскресни, яко да возвеличюся.

Слава. Земля покрывает Мя хотяща О Мати, но устрашаются адовы вратинци, одеянна видяще одеждею окровавленною отмщения. Враги бо Крестом поправ, яко Бог воскресну абие, и прославлюся.

И ныне. Да радуется тварь, да веселятся вси земнороднии, враг бо пленен бысть ад. С миром жены да сретают, Адама со Еввою оттления избавляюща всеродна, в третии день воскреснувша.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?