Канон преподобному Пафнутию Боровскому


Творение ученика его Инокентия, инока тоя же обители. Глас 1.

Песнь 1. Ирмос.

Песнь победную воспоем вси, Богу сотворшему дивная чудеса, мышцею высокою, и спасшему Израиля, яко прославися.

Запев с поклоном: Преподобне отче Пафнутие, моли Бога о нас.

Ново тебе пение привнести молебно, во отверзение уст моих, Пафнутие богомудре, подаждь ми твоими молитвами благодать, яко да воспою тя.

Запев. Страстей омрачением порабощена отче, светлыми ти молитвами, преподобне Пафнутие ныне свободи. Да яко Христова тя раба, божествеными воспою песньми, яко прославися.

Слава. Христови прилепляяся от юности блаженне, умом очищеном. Чистотою и целомудрием телесным, душю просветил еси. Яко безплотен на земли поживе. И ныне в вышних Богови предстоя, нас чтущих тя поминай.

И ныне. Явися вышши ангел, Бога воплощьши, рождьшагося. И погребена, и мертым нетление Дево Чистая подавшаго. Его же моли спасти нас, верно славящих Тя.

Катавасия: Избави от бед рабы своя, преподобне отче Пафнутие, яко вси по Бозе к тебе прибегаем, ты бо молиши о нас Христа Бога нашего.

 

Песнь 3. Ирмос.

Да утвердится сердце мое, в воли Твоей Христе Боже. Иже над водами небо, Утвержеи второе, и Основавыи на водах землю, Всемогаи.

Запев. Божественым светолитием богомудре, просвещаемь отче преблаженне, светлое и светоносное твое честное успение, любовию чтущыя преподобне, твоими молитвами просвети.

Запев. Ума твоего око преподобне отче, от страстей мглы очистив, Пресвятому Духу приятно чистым блистанием, соделал еси богоблаженне.

Слава. Твердостию разума укрепляемь всеблаженне, различная мечтания врагов обличил еси мудре, и гордыню тех возвышенную низложил еси преподобне.

И ныне. Иже прежде век Рождеися от Отца, и напоследок неизреченно, из утробы Ти пройде. И обожи наше естество Мати Дево, иже преподобных лики яве изводяи. Катавасия.

Седален. Глас 8. От юности блаженне вся оставль житейская. Красная же и лепотная, и усердно последовал еси Христу, звавшему тя преподобне. Постом отче тело изнурил еси, и в молитвах безпрестани бдя. Темже тя Всеведыи Господь, добре устраяет, пастыря Своим овцам словесным, Пафнутие богоносе. Моли Христа Бога, грехов оставление подати, чтущым любовию святую память твою.

Слава, и ныне. Богородичен. Яко Деву едину в Женах, Тя безсемене рождьшую Бога плотию, вси блажим роди человечестии. Огнь бо вселися в Тя божественыи, и яко Младенца доиши Зиждителя и Господа. Тем же ангельский и человеческии род, достойно славим Пресвятое Рожество Твое. И согласно вопием Ти, моли Христа Бога, согрешением оставление даровати, воспевающим достойно славу Твою.

 

Песнь 4. Ирмос.

Духом предзря пророк Аввакум, Словесе воплощение, проповедаше глаголя. Егда приближатся лета, познан будеши. Егда приидет время, явишися. Слава Силе Твоей Господи.

Запев. Закон Божии сохраняя невредимо преподобне, чистоту и смиреномудрие, ты от младенства имел еси, и житие нескверно, и нрав милостивен досточюдне.

Запев. Возвысил еси к Богу сердечное желание, и смирил еси пагубныя страсти. И лукавствия бесом низложил еси преподобне, иночествующым недвижимое основание.

Слава. В нищете пожив блаженне, добродетельми обогатился еси, и жития светлостию быв исполнен. Преставися к вышнему граду отче Пафнутие, и молишися избавитися от бед стаду твоему.

И ныне. Святых Святаго, паче смысла и естества породила еси Богородице. Освящение и избавление, и оставление грехом, верным ходатайством Ти подающи, иже Его славящым Воскресение. Катавасия.

 

Песнь 5. Ирмос.

Твой мир даждь нам, Сыне Божии, иного бо разве Тебе Бога не знаем. Имя Твое именуем, яко Бог живым и мертвым еси.

Запев. Отец сирым был еси, и питатель вдовицам. Скорбящым утешение, обидимым помощник. Пастырь и наставник стаду твоему, преподобне Пафнутие. И ныне прилежно молися Владыце о нас.

Запев. Инок истинен был еси, пространнаго пути удаляяся, тесныи предпочитая, достигл еси широты райския. И Древу Жизненому причащаешися. Но и нас верою чтущих тя поминай.

Слава. Сердце твое скрижаль чисту нашедши, благодать святаго духа отче Пафнутие обрете, дарова тебе совершено безстрастие, веру тверду, и любовь не лицемерну.

И ныне. Священия Сень являешися Марие, оскверненую сластьми окаянную ми душю освяти, и Божественыя Славы причастника мя сотвори. Катавасия.

 

Песнь 6. Ирмос.

Пророку Ионе подобяся вопию, живот мой Блаже свободи ис тля, и спаси мя Спасе мира, зовуща, слава Тебе.

Запев. Страхом Христовым утвердився преподобне, тело и душю и ум очистив от всякия скверны, ими же Зарю прият Трисолнечную, богомудре отче Пафнутие всеблаженне.

Запев. Весь распялся еси мирови отче Пафнутие. Крест Христов на рамо взем блаженне, и Того страстем подобяся, причастник бысть Воскресению, и Славе лучшей. В ней же нас поминай.

Слава. Храм тя вси вернии Святому Духу свемы. Храм бо благолепен воздвигл еси Богови. И Того Рождьшей именовал еси и ограду велию устроил еси, и инок множество совокупил еси. И ныне молитвами твоими, всяк недуг отгоняется.

И ныне. Видевши Его же родила еси Бога, от мертвых воставша, радости исполнена явися, Дево Мати Марие. Того убо моли всяку печаль Чистая, нашего сердца до конца потребити. Катавасия.

Кондак. Глас 8.

Божиим светолитием просвещен отче, постническое стяжав жительство преподобне, иноком предобрыи наставниче, и постником благое украшение. Сего ради Господь труды твоя видев, даром чюдес обогати тя. Источаеши бо исцеление, и молишися о стаде твоем. Мы же радующеся вопием ти, радуися отче Пафнутие.

Икос. Песнь от устен скверных, к похвалению подвиг твоих отче приносится. Не имам бо сердце мое чисто, яко сие срамными деяньми оскверних, и душю лукавыми помыслы осмрадих. Но ты подаждь ми слово, преподобне, чистое твое воспети житие, взывающу тебе таковая, преблаженне. Радуися преподобным всем похвало. Радуися постником подражателю, и пустыни насадителю, радуися яко в ней пречестен храм Богородице воздвиже. Радуися яко в нем тобою Бог славится, радуися иже добре пасыи стадо свое от навет вражиих. Радуися яко смирил еси злоначалнаго врага, радуися яко посрамил еси бесом полки. Радуися иночествующым светилниче пресветлыи, и столп терпения. Радуися яко собрал еси инок множество во спасение, радуися о нем же хвалимся вси. Радуися его же ради избавляемся от бед. Радуися отче Пафнутие.

 

Песнь 7. Ирмос.

Иже в пещи отроки Твоя спасе, неприкоснуся ни вреди их огнь. Тогда трие яко едиными усты пояху, и благословяху глаголюще, благословен Бог отец наших.

Запев. Смотряя будущую жизнь блаженне, мирови умертвися воистину. Яко солнце восияв, страх божии восприим в сердцы своем. Вселенную всю возвеселил еси ученьми, вопия, благословен Бог отец наших.

Запев. Зряше мучения тамошняя, мысленыма очима, и сердцем болезнуя, выну. Чисто житие поживе богоблаженне, к Нестареющейся преставися Пищи. В ней же нас чтущих тя поминай.

Слава. Украсив добродетельми свое житие, свято скончав свою жизнь, уснул еси преподобне сон мирен. Тем же спасай стадо свое всегда, твою память празднующыя, вопиющих, благословен Бог отец наших.

И ныне. Премудрость составную, и Слово Присносущное, Врача душям и телом порождьшая, язвы и гноения души моея уврачюй. Лютая и летная сердца моего исцели болезни Дево.

Катавасия.

Песнь 8. Ирмос.

Его же ужасаются ангели, и вся воиньства, яко Творца и Господа, пойте святители, прославите отроцы, благословите людие, и превозносите Его во веки.

Запев. Подвизався на земли законно, и ныне радуешися преподобне со святыми, небесныи обрете покой. И сопричастник бысть веселию тех и радости, взывая, людие превозносите Господа вовеки.

Запев. Постом ум очищая, кроток и незлобив явлься, на земли кротких живеши богомудре. Со всеми праведными и избранными поя. Людие превозносите Господа во веки.

Слава. Оледеневшую страстьми душю мою очисти, твоими к Богу священными молитвами. И содержащаго мя, греховнаго пленения избави, отче Пафнутие богоносе. Да радуяся пою, людие превозносите Господа во веки.

И ныне. Пощади нас поющих Твое Господи, еже от Девы не изреченное Рожество. И избави от страстных бед и скорбей рабы своя, мольбами Пречистыя Ти Матере, яко Милосерд, и един Человеколюбец. Катавасия.

 

Песнь 9. Ирмос.

Живоносныи Источник, приснотекущии, светоносныи Свещник всезлатыи, Храм освященныи, Сень чистую, небесе и земли пространнейшу, Богородицу Чисту величаем.

Запев. Яко утро яко солнце, восия память твоя преподобне, верных сердца просвещая, и тму отгоня душетленных страстей. Юже свершающе, благочестно восхваляем тя, радостными песньми.

Запев. Яко в раи отче воздержания процвел еси.  И яко маслина псаломски явися лица и сердца нашя помазуя маслом трудов твоих, отче Пафнутие, благочестно чтущих, священную память твою.

Слава. Днесь нам восия, честная память твоя преблаженне, просвещая душя и телеса, и страстей мглу отгоня преподобне. Подаждь молитв твоих Пафнутие отче, и настави на стезю жизни. Тем же достойно чтуще тя величаем.

И ныне. Приемли Пречистая Отроковице божественую песнь, воздающи благодать на Тя надеющимся. И мир испроси церквам присно подати. И стране нашей послати одоления и победы. Да всяк язык християньскии Тя величает. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?