Тропарь, глас 8.
Егда славнии ученици, на умовении вечери просвещахуся, тогда Июда злочестивыи, сребролюбием недуговав помрачашеся, и беззаконным судиям Тебе праведнаго Судию предает. Виждь имением любителю, иже сих ради несытство стяжавша, и удавлению вдавшася. Бежи несытыя души, иже Учителю таковая содеявшия иже о всех благии, Господи слава Тебе. (Трижды).
Песнь 1. Ирмос.
Яко по суху ходив Израиль по бездне стопами, гонителя фараона видя потопляема, Богу победную песнь поя вопияше.
Запев: Слава Тебе Боже наш, слава Тебе (поклон).
Повешена яко виде на кресте, Сына и Господа, Девая чистая, терзающеся вопияше горце, с другими женами стенющи глаголаше.
Запев. Вижу Тя ныне возлюбленное Мое Чадо и любимое, на кресте висяща, и уязвляюся горце сердцем, рече Чистая. Но даждь Ми слово благии Рабе Твоей.
Слава. Волею Сыне Мой и Творче, терпиши на древе лютую смерть, Девая глаголаше предстоящи у креста, с возлюбленным учеником.
И ныне. Ныне Моего чаяния, и радости и веселия, Сына Моего и Господа лишена бых. Увы Мне болезную сердцем, Чистая плачущи глаголаше. Катавасия.
Песнь 3. Ирмос.
Несть свята якоже Ты Господи Боже Мой, вознесыи рог верных си Блаже, и утверждь их на камени исповедания Ти.
Запев. Страха ради жидовска Петр скрыся, и вси отбегоша вернии, оставльше Христа, Девая рыдающи глаголаше.
Запев. О страннем Ти рожестве, и страшнем Сыне Мой, паче всех матерей возвеличена бых Аз. Но увы Мне, ныне Тя видящи на древе, распалаюся утробою.
Слава. Хощу утробу Мою на руку, има же яко младенца держах с древа прияти вещаше Чистая, но увы мне, ни кто же Сего даст.
И ныне. Се Свет Мой сладкий, Надежда и Живот Мой благии, Сын и Бог Мой угасе на кресте, распалаюся утробою, Девая стенющи глаголаше. Катавасия.
Песнь 4. Ирмос.
Христос мне сила Бог и Господь, честная церкви, боголепно зовет вопиющи, от совести чисты, о Господе празднующи.
Запев. Солнце не заходяи Боже превечныи, и Творче всем тварем Господи, како терпиши страсть на кресте? Чистая плачущи глаголаше.
Запев. Плачущи глаголаше браконеискусимая, к благообразному, потщися Иосифе, к Пилату приступити, и испроси сняти со древа Учителя си.
Слава. Видев пречистую горце слезящу, Иосиф смутися, и плачася приступи к Пилату, даждь ми вопия с плачем тело Бога моего.
И ныне. Уязвена Тя видящи и без славы, нага на древе, Чадо Мое, утробою распалаюся рыдающи, яко Мати девая провещавааше. Катавасия.
Песнь 5. Ирмос.
Божиим светом Ти Блаже, утренюющих Ти душа любовию, просвети молюся, Тя ведети Слово Божие истиннаго Бога, от мрака греховнаго изимающа.
Запев. Растерзаяся и рыдая, и дивяся в купе с Никодимом Иосиф снят, пречистое тело целоваше Учителево, рыдаше и стеняше, и поя Его яко Бога и Господа.
Запев. Приимши Сына Своего с плачем Мати неискусомужная. И положи на колену, молящи со слезами, и лобызающи Его, горце же рыдающи кричаше.
Слава. Едину надежду и живот, Владыко Сыне Мой и Боже, во очию свет Раба Твоя имех, ныне же лишена бых Тебе, сладкое Мое Чадо и любимое.
И ныне. Болезни и скорби, и воздыхания обретоша Мя, увы Мне, Чистая горце рыдающи глаголаше, видящи Чадо Мое возлюбленое, нага уединена, Тя и вонями помазана мертвеца. Катавасия.
Песнь 6. Ирмос.
Житейскаго моря воздвизаема зря напастей бурею, в тихое пристанище притек вопию Ти, возведи от тли живот мой Многомилостиве.
Запев. Мертва Тя зрю Человеколюбче, ожившаго мертвыя, и содержаща вся, люте уязвляюся утробою, хотела бых с Тобою умрети, Пречистая глаголаше. Не терплю бо без души мертва Тя видети.
Запев. Дивлюся зрящи Тя преблагии Боже, и прещедрыи Господи, без славы и без души, и без образна Господа, и плачуся держащи Тя, яко не надеяхся увы Мне, видети Тя Сыне Мой и Боже.
Слава. Не изглаголеши ли рабе Своей слова, Слове Божии, не ущедриши ли Владыко Тебе рождьшую, глаголаше Чистая. Рыдающи и плачущи, и облобызающи Тело Господа Своего.
И ныне. Помышляю Владыко, яко к тому сладкаго Ти гласа не услышу, и ни доброты лица Твоего узрю, якоже прежде Раба Твоя. Ибо зайде Сыне Мой от очию Моею. Катавасия. Господи помилуй (3 раза). Слава, и ныне.
Кондак. Глас 8-й. Нас ради распеншагося, приидите вси вернии воспоем. Того бо виде Мария на древе, и глаголаше, аще и распятие терпиши, Ты еси Сын и Бог Мой.
Икос. Своего Агньца зрящи, к заколению влекома, последоваше Мария скорбящи, с другими женами сия вопиющи, камо идеши Чадо. Что ради скоро течение твориши? Еда другии брак паки есть в Кане Галилейстей, и тамо ли ныне тщишися, да воду в вино им преложиши. Иду ли с Тобою Чадо, или пожду Тебе паче. Даждь Ми слово Слове, не молча мимо иди Мене, иже чисту соблюдыи Мя, Сыне и Боже Мой.
Песнь 7. Ирмос.
Хладодателну убо пещь сотвори ангел, преподобным детем. Халдеи же опали, велением Божиим, мучителя увеща вопити, благословен Бог Отец наших.
Запев. Где Сыне Мой и Боже благовествование, еже Ми Гавриил глаголаше, Царя Тя вышняго и Сына и Бога нарицааше. Ныне же Тя вижу, Свете Мой сладкии, и нага и уязвена мертвеца.
Запев. Избавляя от болезни, и ныне приими Мя с Собою Сыне Мой и Боже да снийду во ад Владыко с Тобою и Аз. Не остави Мене едину еще жити, ибо не терплю не видящи Тебе, сладкаго Моего Света.
Слава. Со другими женами мироносицами, рыдающи Непорочная горце, носима видящи Христа, и глаголаше, увы Мне что вижу, и камо идеши ныне Сыне Мой, а Мене едину оставляеши.
И ныне. Изнемогающи рыдаше Непорочная, мироносицам глаголаше, срыдайте со Мною, и плачите горько, се бо Свет Мой сладкии, и Учитель ваш гробу предается. Катавасия.
Песнь 8. Ирмос.
Ис пламене святым росу источи, а праведнаго жертвы и воды попали, вся бо твориши Христе, елико хощеши. Тем Тя превозносим Господа во веки.
Запев. Деву рыдающу Иосиф видев, растерзашеся весь, и вопияаше горько, како Тя о Боже мой, ныне погребу раб Твой. Кацеми плащаницами обвию Тело Твое.
Запев. Паче ума превзыде странное Тебе видение, носящаго тварь всю Господа. Сего Иосиф яко мертва на руку своею с Никодимом, носит и погребает.
Благословим Отца и Сына и Святаго Духа Господа.
Странну и преславну вижу тайну Девая вопияаше Сыну и Господу, како в худом гробе полагаешися, мертвыя повелением воставляя из гроб.
И ныне. Ни от гроба Твоего востану Чадо Мое, ни слезы престану точащи Раба Твоя, донде же и Аз сниду во ад. Не могу бо терпети разлучения Твоего Свете Мой. Катавасия.
Песнь 9. Ирмос.
Бога человеком неудобь видети, Нань же не смеют чини ангельстии зрети. Тобою бо Пречистая явися нам, Слово воплощенно, Его же величающе, с небесными вои, Тя величаем.
Запев с поклоном. Радость Мне ни како же отселе прикоснется, рыдающи глаголя Непорочная, свет Мой и Радость Моя во гроб зайде. Но не оставлю Тебе единаго, зде же и умру и спогребуся с Тобою.
Запев. Душевную Ми язву ныне исцели Чадо Мое, Пречистая вопияаше слезящи, воскресни и престави Ми болезнь и печаль. Можеши бо Владыко елико хощеши, и твориши, аще и погребеся волею.
Слава. О како утаилася Ти есть бездна щедрот, Матери и тайне изрече Господь. Тварь бо Мою хотящу Ми спасти, изволих умрети. Но воскресну, и Тебе возвеличу, яко Бог небеси и земли.
И ныне. Воспеваю милосердие Твое Человеколюбче. И поклоняюся богатьству милости Твоея Владыко. Создание бо Свое хотя спасти, смерть прият рече Пречистая, но воскресением Своим, Спасе помилуй всех нас. Катавасия.