Канон в неделю мясопустную


Глас 6.

Песнь 1. Ирмос.

Помощник и Покровитель бысть мне во спасение, Се Бог мой и прославлю Его. Бог отца моего и вознесу Его, славно бо прославися.

Запев с поклоном: Слава Тебе Боже наш, слава Тебе.

Дне Страшнаго, Всенеизглаголаннаго Ти пришествия, трепещу помышляя. И ужасаюся провидя, вонь же предсядеши судити живым и мертвым, Боже мой Всесильне.

Запев. Егда приидеши Боже во тмах и тысящах ангельских небесных начал, и мене окаяннаго сподоби на облацех срести Тя Христе.

Запев. Гряди приими душе моя той час и день, егда Бог яве приидет. И рыдай вопия и плачи, обрестися чиста в час испытания.

Запев. Удивляет мя и страшит мя огнь негасимыи гееньскии, червь горкии и скрежет зубом. Но ослаби ми пощади, и стоянию мя Христе избранных учини.

Запев. Благаго Твоего Гласа, иже святыя Твоя зовуща на радость, да услышю и аз окаянныи, и обрящу Царствия Небеснаго, неизреченное наслаждение.

Запев. Не вниди со мною в суд, ношю моя деяния, словеса изыская и исправляя стремления. Но в щедротах Твоих презирая ми лютая, спаси мя Всесилне.

Слава. Трисоставная Единице, Началнейшая Госпоже всех, Свершеноначалная Преблагая, Сама нас спаси, Отче и Сыне и Душе Пресвятыи.

И ныне. Кто роди Сына несеянна Отчим законом, Сего убо ражает Отец без матере. Преславно чюдо: Ты бо родила еси Чистая, Бога вкупе и Человека.

Катавасия: Сохрани от бед рабы Своя Милостиве, яко усердно к Тебе прибегаем, милостивому Избавителю и всех Владыце Господу Исусу

 

Песнь 3. Ирмос.

Утверди Господи на камени заповедей Ти подвигшееся сердце мое, яко Един Свят еси и Праведен.

Запев. Господь грядет, и кто стерпит страх Его. Кто явится Лицу Его; но готова буди душе моя на сретение.

Запев. Предварим и плачемся, увещаимся Христу преже конца. Страшно бо судище, на нем же вси обнажени станем.

Запев. Помилуй Господи помилуй мя вопию Ти, егда приидеши со ангелы Своими, отдати всем по достоянию содеяния их.

Запев. Непостоянныи гнев како стерплю Господи Суда Твоего, преслушав Твое повеление. Но пощади мя в час испытания.

Запев. Обратися воздохни душе окаянная, преже даже жития торжество конец не приимет преже даже двери не затворит Чертога Господь.

Слава. Троице Проста Трисветлая, Началнейшая Госпоже всех, Отче и Слове и Душе Святыи, спаси нас верою покланяющихся Державе Твоей.

И ныне. Прибежище имея Тя от лица вражия, мир спасается Пречистая, и пения благодарьственая приношает Ти. Катавасия.

Седален, глас 6. Помышляю День Страшныи, и плачюся деянии моих лукавых, како отвещаю Безсмертному Царю; коим же дерзновением возрю на Судию блудныи аз; Милосердыи Отче, и Сыне Единородныи, и Душе Святыи помилуй мя.

Другии. Во удоли плачевней, на месте идеже положи, егда сядеши Милостиве сотворити Праведныи Суд, не обличи моя тайная, ни посрами мене пред ангелы; но пощади мя Боже и помилуй мя.

Слава и ныне. Богородичен. Прообразует Гедеон Зачатие, и сказует Давыд Рожество Твое Богородице Дево. Сниде бо яко дождь на руно Слово во чрево Твое и прозябе без семене. Земле Святая миру спасение, Христа Бога нашего, Богорадованная.

 

Песнь 4. Ирмос.

Услышав же пророк приход Твой Господи, и убояся, яко хощеши от Девы родитися, и человеком явитися, и глаголаше, услышах слух Твой и убояхся, слава Силе Твоей.

Запев. Наста день уже к дверем Суд, душе бодрствуй. Идеже царие вкупе и князи, богатии и убозии собираются, и приимет по достоянию содеянных от человек кождо.

Запев. В чине своем, инок и святитель, стар, и юн, раб и владыка истяжется. Вдовица и дева исправится. И всем горе тогда иже не имевшим житие неповинно.

Запев. Не умытен Суд Твой, ни утаено Твое Судище. Не хитрословии, ни витии художьство крадуще. Ни послух непщевание отражая праведное. В Тебе бо вся соосужена Богу предстоят.

Запев. Да не прииду в землю Плача, да не вижю место Тмы, Христе мой Слове. Да не связан буду рукама и ногама, вне Чертога Твоего извержен, одежду осквернену имея грехи всестрастныи.

Запев. Внегда отлучиши грешных от праведных, Судяи миру, единаго от овец мя Своих познай, от козлищь разлучая мя Человеколюбче, услышати гласа оного Благословенаго Твоего.

Запев. Слыша богатаго в пламени муки, плачевная словеса, плачюся и рыдаю окаянныи, того же сыи осуждения. И молюся, помилуй мя Спасе мира, во время Суда.

Запев. Испытанию бывшу, и книгам отверзаемым содеянных, что сотвориши, о душе окаянная, что отвещаеши на судищи, не имущи правды плоды, принести Богу и Содетелю си.

Слава. Сына иже от Отца и Духа славлю, яко от Солнца Свет и Лучю. Ового Рожествене, за не и Рождение. Ового же Происходне, за не и Происхождение. Собезначалну Божествену Троицу, покланяемую от всякия твари.

И ныне. Девая Младенца родивши, и Чистоту соблюдши, Чистая Ты явися, Бога рождьши и Человека Единаго Того во Обою Естеству. Чюдо Твое Дево Мати, ужасает всяк слух и помысл. Катавасия.

 

Песнь 5. Ирмос.

Из нощи утреннюющих Человеколюбче, просвети молюся, и настави нас на повеления Твоя, и научи нас Спасе, творити волю Твою.

Запев. Трепет не исповедим и страх тамо. Приидет бо Господь, и дело с ним когождо от человек. И кто зде прочее себе не восплачет.

Запев. Река огнена смущает мя, и тает мя и стужет скрежет зубом, и тма бездонная. И како или что соделаю, да Бог милостив будет ми.

Запев. Пощади, пощади Господи раба Своего, да некогда предаси мя горким мучителем, ангелом напрасным, в них же несть тамо покоя обрести.

Запев. Князь и воевода, тамо вкупе, богат и не славен, велик купно и мал, исправится равно. Горе комуждо прочее не уготовленому.

Запев. Ослаби отпусти Господи и прости, елика Ти согреших. И не покажи мя пред ангелы во осуждении огня и студа нескончаема.

Слава. Единицу Естеством Тя Троице воспеваю, Безначалну Непостижну, и Безсмертну, Пресовершено Единьство, Бога, Света, Живота, и Содетеля миру.

И ныне. В Рожестве Твоем иже паче естества Чистая, закони естества о Тебе разоришася яве. Ибо без семене раждаеши Превечнаго Бога от Отца рождена. Катавасия.

 

Песнь 6. Ирмос.

Возопих всем сердцем моим, к Щедрому Богу, и услыша мя. И от ада преисподняго возведе из истления живот мой.

Запев. В страшнем Христе Пришествии Твоем, егда явишися с Небесе, и поставятся престоли, и книги разгнутся, пощади, пощади тогда Спасе создание Твое.

Запев. Тамо ничтоже помощи может, Богу сущу Судии, ни тщание ни хитрость, ни слава ни дружба, разве яже от дел крепость, о душе моя.

Запев. Тамо вкупе князь и вождь, нищь и богат, душе, ни отец возможет ни мати помогающи, ни брат избавляяи осуждения.

Запев. Страшное душе истязание помышляющи Судии, ужаснися отнуду, уготови Слово, да не осудишися во узах вечных.

Запев. Возми Свое да не услышю Господи, отсылаемь от Тебе, ни еже пойди во огнь проклятых, но кроткаго гласа праведных.

Слава. Троичнаго Единьства Божество пою, Отца и Сына и Божественаго Духа, Единаго Начала Державу, Разделяемаго в Трех Лицех.

И ныне. Дверь Ты еси, Ею же Един пройде Вшедыи, и Изшедыи, и ключа нерешивыи Чистая девьства Исус, создавыи Адама Сын Твой. Катавасия.

Кондак, глас 1. Егда приидеши Боже на землю со Славою, и трепещут всяческая, река же огненая пред Судищем течет, книги разгибаются, и тайная обличаются. Тогда избави мя от огня негасимаго, и сподоби мя одесную Тебе стати Судие Праведныи.

Икос. Страшнаго Судища Твоего, помышляя Преблагии Господи, и Дне Суднаго трепещу и боюся, от совести моея обличаемь, егда хощеши сести на Престоле Твоем, и творити Испытание, тогда отврещися от грех никто же возможет, Истине обличающи, и страху обдержащу. Вельми убо возшумит огнь гееньскии, грешницы же восплачются. Тем же мя помилуй и спаси Судие Праведныи.

 

Песнь 7. Ирмос.

Согрешихом и беззаконновахом, не оправдихомся пред Тобою, ни соблюдохом, ни сотворихом, яко же заповеда нам, но не предаждь нас до конца, отеческии Боже.

Запев. Припадем и возплачемся прежде Суда оного вернии вси, егда небеса погибнут, и звезды спадут, и вся земля поколеблется, да милостива Господа обрящем до конца: отец наших Боже благословен еси.

Запев. Неумытное истязание, страшен есть тамо Суд, идеже Судия Неутаен есть. Идеже лице несть в дарех прияти. Тогда пощади мя Владыко, и избави мя всякого гнева Твоего страшнаго.

Запев. Припадаю Ти и приношю Тебе яко же слезы глаголы моя. Согреших, якоже не согреши блудница. И беззаконновах, якоже ин никтоже на земли, но ущедри Владыко творение Свое и призови мя.

Запев. Негасимыи огнь смущает мя, и горкии скрежет зубныи, ад душетленныи страшит мя, благоумилен никогда же бываю. Но Господи, Господи преже конца утверди мя страхом Твоим.

Слава. Три Едино, Существом, и Три в Лицех пою Сия, Отец и Сын и Дух. Едина Сила, Хотением и Действом. Един Бог Трисвятыи. Едино Царство, Единоначальнейшее.

И ныне. Происходит Краснейшии, от чистых ложесн Твоих Христос, яко же Царь одеян, Богоявленною багряницею обагрився Тайною, от Пречистых кровей Твоих Безневестная, и Царствует землею. Катавасия.

 

Песнь 8. Ирмос.

Его же воиньства Небесная славят, и трепещут Херувими и Серафими, всяко дыхание и тварь, пойте благословите, и превозносите Его во веки.

Запев. Страшнаго втораго Твоего Господи пришествия помышляя сретение, трепещу прещения Твоего, боюся гнева Твоего. От сего мя часа зову, спаси во веки.

Запев. Тебе Богу судящу всяческим, кто стерпит земнороден сыи, и страстен, негасимыи бо огнь тогда и червь скрежещущь вельми, осуженыя приемлет во веки.

Запев. Всяко дыхание егда призовеши разсудити Христе вкупе, велик страх тогда, велия беда, единем помогающим деянием добродетелным во веки.

Запев. Всех Судие, Боже мой и Господи, да услышю тогда Твой Глас кроткии, да узрю Свет Твой Великии, да вселюся в Кровы Твоя, да пою Твою Славу радуяся во веки.

Запев. Правосуде Спасе помилуй, и избави мя огня и прещения, его же хощу на Суде праведно подъяти. Ослаби ми преже конца, добродетели ради и покаяния.

Слава. Единаго Бога по Существу чту, Три Составы пою разделно. Едина и Та же, понеже Божество Едино, и Едина в Трех Держава: ибо Отец и Сын и Дух.

И ныне. Из Светлейшаго чрева Твоего Чистая, изшед Христос, яко Жених ис чертога, восия Свет Велии сущим во тме. Ибо правды Солнце облистав просвети мир. Катавасия.

 

Песнь 9. Ирмос.

Безсеменна Зачатия, Рожество Несказанно, Матере безмужны, безсеменно Прижитие. Божие бо Рожество обновляет естество. Тем Тя вси роди Богоневестную Матерь, православно величаем.

Запев с поклоном. Господь грядет грешники мучити, праведники же спасти. Плачемся воздыхаем, и приимем чювство оного Дне, вонь же безвестная и тайная Открывыи человеком отдаст по достоянию.

Запев. Пристрашен и трепетен бысть Моисей, видев Тя от задних. Кто же постоит Лице Твое видя; тогда, аз окаянныи что сотворю, егда приидеши с Небесе. Но пощади мя Щедре, Милостивным Си воззрением.

Запев. Даниил убояся часа Суднаго, аз же окаянныи что постражду Господи, в той пришед День Страшныи. Но даждь ми прежде конца благоугодно Тебе послужити, и улучити Царьствие Твое.

Запев. Огнь готовится, и червь не усыпаяи, Веселие, Слава, Покой, Свет Невечернии, и Радость праведных: и кто блаженыи избегнути не восхощет мучения первых, наследити имеяи вторая.

Запев. Да мя не отвратит от Лица Твоего Господи, ярость Гнева Твоего, ни да услышю Глас проклятыи, во огнь отпущающи. Но да вниду в Радость и аз тогда, нетленнаго Ти Чертога, со святыми Твоими.

Слава. Едине Единаго Сына Единороднаго Родителю Отче, и Едине Единаго Света, Сияние Сыне, и Единыи, Единаго Бога Отца Святыи Душе, Истиннаго Истинныи Сыи. О Троице Единице Святая, спаси мя благословяща Тя.

И ныне. Чюдо Рожества Твоего дивит мя Всенепорочная, како зачала еси безсемене, Необъемнаго; рцы како Девьствуеши Рождьши яко Мати; еже паче естества верою прием, Рожденому поклонися: елико бо хощет, и может. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?