Канон в неделю Крестопоклонную, творение Студита, глас 1.
Песнь 1. Ирмос.
Воскресения день просветимся людие, Пасха Господня, Пасха; от смерти убо к жизни и от земли на небо, Христос Бог нас превел есть, победную поюща.
Запев с поклоном: Слава Тебе Боже наш, слава Тебе.
Торжества день востанием Христовым, смерть без вести показася. Жизни восия заря. Адам востав ликует радостию. Темже воскликнем победную поюще.
Запев. Поклонения день Честнаго Креста, приидите к Сему вси, востанием бо Христа, зарю светолучныя простирает ныне. Того облобызаем, духовне радующеся.
Запев. Да восхвалят согласно небо и земля, яко предложен бысть всем Всеблаженныи Крест. На Нем же пригвождься плотию, и заклан бысть Христос. Того облобызаем духовне радующеся.
Запев. Явися великии Господень Кресте, покажи ми зрак Божествен, красоты Твоея ныне, сподобляя мя поклонника хвале Твоей. Ибо яко одушевлену Тебе возглашаю, и припадаю.
Слава. О, Троице Лицы, о Единице зраком, Отче и Сыне и Душе, Единосильная Единице, в Воли и Хотении, и в Державе Начало, мир Свой сохрани, смирение подающи.
И ныне. Искуса никако же Девая ведыи мужеска, безсеменно раждаеши Младя. Чисто носиши Рождение, миру Творца Христа Бога. Того моли умирити всяческая.
Катавасия: Сохрани от бед рабы Своя, Милостиве, яко усердно к Тебе прибегаем, к Милостивому Избавителю и всех Владыце, Господу Исусу.
Песнь 3. Ирмос.
Приидите, пиво пием новое, не от камене неплодна чудодеемое, но нетления источник, из гроба одождивша Христа; о Нем же утвержаемся.
Запев. Приидите песнь поем нову, разрушение адово торжествующе. Из гроба бо Христос воста, смерть пленив, и спасе всяческая.
Запев. Приидете почерпем вернии, не во окрин вливаем воду тленну. Но источник просвещения, Креста Христова поклонением. О Нем же хвалимся.
Запев. Древле Его же прообразоваше Моисей, дланьма Крест Твой. Сего ныне облобызающе, мысленаго Амалика побеждаем Владыко Христе, Им же и спасаемся.
Запев. Очима и устнама чистыма, поюще глас радования, Господню Кресту радостию поклонимся вернии, плещуще песньми.
Слава. Едино Существо в Трех, Бога Безначальна чту, неразделяя Существа зрак. Отца и Сына и Духа Живаго, в Них же крестихомся.
И ныне. В купине Моисей, Твое образно таинство древле Чистая виде. Яко же бо оноя пламень, тако Огнь Божества Твою утробу не опали. Катавасия.
Седален. Глас 6. Днесь пророческое сбысться слово, се бо покланяемся на месте, идеже стоясте нозе Твои Господи. И древо спасения вкусивше, греховных страстей свободу улучихом, молитвами Богородицы, Едине Человеколюбче.
Слава, и ныне. Крест Твой Господи освятися. Тем бо бывают исцеления болящим во гресех. Тем Ти припадаем, помилуй нас.
Песнь 4. Ирмос.
На Божии стражи, богоглаголивыи Аввакум да станет с нами, и явит светоносна ангела, велегласно глаголюща: днесь спасение миру, яко воскресе Христос, яко Всесилен.
Запев. Се воскресе Христос. Мироносицам женам ангел рече, не рыдайте. Шедше рцете учеником радующеся, днесь спасение миру. Мучительство врага, смертию разорися.
Запев. Живоноснаго Ти Креста, поклонную радость днесь Христе совершающе. Предсретение творим пресвятей Страсти Твоей. Еже во спасение миру содела Спасе, яко Всесилен.
Запев. Днесь бывает радость на небеси и на земли, яко Христово знамение миру является, Крест Треблаженныи. Сей бо предложен быв, источает кланяющимся Ему, радость приснотекущую.
Запев. Что Ти принесем Христе, яко Честныи Крест дал еси нам поклонитися. На Нем же Пресвятую Кровь Свою излия. Идеже и плоть Твоя гвоздьми пригвоздися. Его же облобызающе ныне благодарим Тя.
Слава. Единого Божества пою три Составы раздельны. И Естества проста проповедаю. Отца Безначальна, Сына и Духа Святаго Сопрестольна. Господьство едино и Царство. И едина Держава Присносущная.
И ныне. Едина явися в женах вещь пречюдна Чистая, слышание страшно. Естество бо Ты пресекла еси, без мужа рождьши. Пребываеши же паки яко и преже Рожества Девою, рождьши Бога из Себе Всенепорочная. Катавасия.
Песнь 5. Ирмос.
Утренюем утренюю глубоку, и вместо мира, песнь принесем Владыце, и Христа узрим Праведное Солнце, всем жизнь восияюща.
Запев. Восиял еси от гроба Незаходимыи Свете, миру облистая нетление. Потребил еси Господи смертныи плачь от конец, яко милосерд.
Запев. Приступим очищени воздержанием. Древо Пресвятое облобызающе в хвалении. На Нем же Христос распинаемь, спасе мир, яко Благоутробен.
Запев. Ликуют в веселии ангельстии чини, днесь Креста Твоего поклонением. Тем бо низложил еси бесовския полки. И спасл еси Христе человечество.
Запев. Рай другии познася Церкви, яко же прежде Древо имущи Живоносное. Крест Твой Господи. Из Него же прикосновением, безсмертию причастихомся.
Слава. Собезначалны три Ипостаси славлю, единого Существа Бога, Отца и Сына и Духа. Един Свет Трисиянен. Единодержавно Царство, в неслиянне совокуплении.
И ныне. Родила еси естевства законом, но выше естества и закона, яко Безсеменно Рожество, странно же и необычно действо, Твоего Рождения Всенепорочная. Катавасия.
Песнь 6. Ирмос.
Сниде в преисподняя страны земли, и сокруши вереи вечныя преисподния связанныя Христе, и тридневно, яко от кита Иона, воскресе от гроба.
Запев. Воскресл еси Христе смерть поправ, яко же велик Царь, от адовых сокровищь возвал еси нас, в покой Царьства Небеснаго, в Землю Безсмертия.
Запев. Плещуще песньми божествеными вернии, воскликнем Богу, Крест Господень целующе. Священия бо источает источник всем сущим в мире.
Запев. Исполняется песнописательныи глас. Поклоняембося уже, Пречистых Ног Твоих подножию Всесилне, Кресту Твоему Честному, Трилюбезному Древу.
Запев. На раме Его же изволил еси Христе носити Святыи Крест. И на Сем вознестися, и распятися Плотию. Его же облобызающе, наругаемся врагом июдеом рыдающим.
Запев. Его же видев древо, в Твой Хлеб вложено, во пророцех рыдатель. Крест Твой щедре облобызающе, воспеваем Ти узы и погребение. Копие же и гвоздия.
Слава. Единицу в триех Лицех пою. И Троицу во едином Естестве поклоняему. Бога троя пою, Свет Трисолнечныи, Отца и Сына и Святаго Духа.
И ныне. Чюдес великое чюдо, в Тебе явися Нескверная Агнице. Вземлющаго бо миру грехи, Агньца породила еси. Его же моли прилежно о поющих Тя. Катавасия.
Кондак. Глас 7. Не уже к тому пламенное оружие, хранит врат Едемских, сие бо найде преславное наитие, Древо Крестное, смертное жало, и адову победу разори. Пришел бо еси Спасе мой. Вопия сущим во аде, внидите паки в Рай.
Икос. Три кресты водрузи на Голгофе Пилат, два разбойникома, и един Жизнодавцу. Его же видев ад, и рече сущим доле, о слуги моя, и сила моя, кто водрузи гвозди в сердце мое. Древяно мя копие внезапу прободе, и растерзаюся, и внутренними болю, и утробою уязвляюся. Чювьства моя снедают дух мой, и понуждаюся изблевати Адама, и сущыя со Адамом. Древом данныя ми, Древом сих вводит, паки в Рай.
Песнь 7. Ирмос.
Отроки от пещи избавив, быв убо Человек, страждет яко смертен, и страстию умерщвеное в нетление облачит благолепие; един Благословен отцем Бог и Препрославлен.
Запев. Воскрес из гроба тридневно, яко спя Господи, адовых вратарей сокрушив Божественою Силою. И иже древле воздвиг праотца, един Благословен отцем Бог и Препославлен.
Запев. Цевницею песней ликующе, возрадуемся днесь людие, Крестным поклонением, иже на Сем Пригвоздившагося славяще, единаго Благословена отцем Бога, и Препославлена.
Запев. Показавыи умерщвения сосуд, Жизни делателя, миру любезныи, Твой Крест Всещедре. Ему же покланяющыяся освяти, единыи Благословеныи отцем Бог, и Препрославлен.
Запев. Едине Милостиве, и Благоутробне, просвети и освяти Исусе, поклоняющыяся верно Твоему Кресту, и Божественым страданием, един Благословен отцем Бог, и Препрославлен.
Слава. Единицу в трех Составех пою Божество. Свет бо Отец, Свет Сын, Свет Дух. Свету Неразделяему пребывающу, совокуплением Естества, но единому Образу в трех Лицех сияющу. Един Благословен отцем Бог, и Препрославлен.
И ныне. Всех пророк многоименитое, Ты еси проповедание, Дверь бо Божия, Ручко Златая, Земля Святая, явися Дево Безневестная, рождьши плотию Исуса Христа суща со Отцем Бога, и Препрославлена. Катавасия.
Песнь 8. Ирмос.
Сей убо нареченныи Святыи День, един суботам Царь и Господь, Праздник Праздником и Торжество есть Торжеством, в онь же благословим Христа во веки.
Запев. Сий день облагоухает миры, Божествеными вонями, Живоуханное Древо Крест Христов. Обоняим Того Богодохновенное благоухание, Тому поклаяющеся верно во веки.
Запев. Слава иже Крестом врага Низложившему, и Пленившему ада, еже к нему схождением, и Оживльшему мертвыя, их же возмогии пожрети. Воспевающих Его во веки.
Запев. Гряди и Елисею пророче, рцы яве, что древо оно еже в воду вложи. Крест Христов, Им же от глубины и тли извлекохомся. Тому поклоняющеся верно во веки.
Запев. Древле Ияков прообразуя Крест Твой Христе, Иосиф поклонися Божественаго жезла краеви, скипетр Сего Страшнаго Царствия Твоего предвидя. Ему же поклоняемся верно во веки.
Слава. Едино в трех Лицех Существо, славлю несмесно Единообразно троя. И не пресецаю Образ, Отца и Сына с Духом, един бо надо всеми Бог в Троице во веки.
И ныне. Едина в матерех явися Дева, Богоневесто Марие, без мужа родивши Спаса Христа, чистоте знамение сохранивши, Тебе ублажаем земнии во веки. Катавасия.
Песнь 9. Ирмос.
Светися, светися, новыи Иеросалиме, слава бо Господня на Тебе восия; ликуй ныне и веселися, Сионе; Ты же Чистая красуйся Богородице, о востании Рожества Твоего.
Запев с поклоном. Гроб Твой жизнь ми Христе источи. Содержаи бо Жизнь представ, возопил еси пребывающим во гробех, сущии во юзах разрешитеся, Аз бо миру Избавление приидох.
Запев. Песньми да взыграют вся древа дубравная, тезоименитое древо Креста зряще, облобызаемо днесь. Им же Христос вознесе рог, яко же пророчествует божественыи Давыд.
Запев. Древом умер, Древо Тя обретох жизни, Христоносныи Кресте. Хранителю мой не рушимая на бесы крепкая державо. Тебе поклоняющумися днесь, взываю, освяти мя Пресвятыи.
Запев. Веселися и радуися Церкви Божия, Треблаженному Древу поклоняющися днесь. Пресвятому Кресту Христову. Ему же служат чинове ангельстии, в веселииХ славяще.
Слава. Троице Лицы, и Единице Естеством, поклоняюся Тебе Божеству Святому, Отцу и Сыну со Святым Духом, Единому Началу, и Единому Царству, иже всеми Владычествующу.
И ныне. Гора Высока, в ню же вселися Христос, Ты явися Дево, яко же Давыд Божественыи вопиет. Ея же ради мы вознесохомся к Небеси. Всынившеся Духом, Всеблаженная. Катавасия.