Глас 8.
Тропарь, глас 8. От уст твоих яко светолучная заря, восия, Богом данная ти благодать вселенную просвещающая, несребролюбно мирови сокровище положи, но высоту нам смиреномудрия показа, и своими словесы наказуя отче Иоанне Златоусте. Моли Слова Христа Бога спастися душам нашим.
Песнь 1. Ирмос.
Вооружена фараона погрузи чюдотворяи древле, Моисейскии жезл крестообразно прорази, и раздели же море, Израиля же бежаща пеша ходяща спасе, песнь Богови возсылающа.
Запев с поклоном: Святителю Христов Иоанне Златоусте, моли Бога о нас.
Покаяния быв теплыи проповедник Златоусте, покаятися отче Богови, за мя молися, от всего сердца моего. И древних прегрешении исцелити острупления, твоим милосердием умоли.
Запев. Вся зари Святаго Духа отче приим, всесветел явися столп, предходя Церкви преподобне. Светел же облак всеблажене осеняющь, православных сонмища.
Слава. Христом поставлен учитель божествена повеления, златообразным языком волею богомудрою, богатно ты источая Божия реки вод исполнены духовных, явися богогласе Златоусте.
И ныне. Преукрашено различием благодати Богорадованная, Отчее Слово воплощено бывше милосердием многим паче ума и словесе, Благословеная породила еси, пребывши Девою Нескверная.
Катавасия: Избави от бед рабы своя, святителю Христов Иоанне Златоусте, яко вси по Бозе к тебе прибегаем, ты бо молиши о нас Христа, Бога нашего.
Песнь 3. Ирмос.
Утверждеи небеса в начатце разумом и землю на водах основав, на камени мя Христе Церковнем утверди, яко несть Свят, паче Тебе Человеколюбче.
Запев. Ум твой Христом обогащься, твоим чистым житием человеком спасения бысть, поспешен повеститель, содействен Златоусте, учительства источая спасения богодухновенне.
Запев. От невещественых сокровищь Духа ты обогащься. От источник спасеных почерпл еси. Приснотекущии источник ученей, и напои церковное всепреподобне отче лице.
Слава. Оляденевшая душевныя отче бразды, премудрым деланием словес очистил еси мудро. И плодоносны явил еси, небесными тучами сия напояя богоприятне.
И ныне. Порока в Тебе и скверны несть отнюд Девице, Обитель же паче явися Небесных Благ. В Тя бо вселися добродетели вся Святыня Всенепорочная. Катавасия.
Седален. Глас 8. Подобен. Премудрости.
Неизреченныя премудрости боговидно почерп богатство тайное. Всем снискал еси православныя воды. Верных убо веселяща сердца преподобне, не верных же повеления достойно погружающя. Тем по достоянию воздания твоих болезнеи прият приснопамятне, Троице поборниче Иоанне Златоусте, моли Христа Бога, грехов оставление даровати, празднующим любовию святую память твою.
Другии. Подобен, тойже.
Иже свыше премудрости навык, и благодати словес от Бога, всем восиял еси яко злато в горниле. И Святую Троицу Единицу проповедал еси. Сребролюбную лесть устрелив словесы своими. Тем же и ревностию царицу обличил еси. Ариево посрамил еси иноплеменное учение Иоанне Златоусте. Моли Христа Бога, грехов оставление даровати, чтущим любовию святую память твою.
Слава, и ныне. Богородичен. Яко Всенепорочная Невеста Творцу. Яко Неискусомужная Мати Избавителя, яко Приятелище сущи Утешителя Препетая, беззаконию мя суща скверно жилище, и бесом игралище в разуме бывша, потщися и сих злодействия мя избавити. Светло жилище добродетельми соделавши. Светоприемнице Нетленная, разжени облак страстей. И Вышняго наследия сподоби, и Свету Невечернему молитвами Си.
Песнь 4. Ирмос.
Ты ми Христе Господь, Ты же и Сила ми, Ты ми Бог, Ты ми Радование, не оставль недра Отча, но милостию Си нашю нищету посетив. Тем с пророком Аввакумом зову, Силе Твоей слава Человеколюбче.
Запев. Другаго нам апостолом единообразна, иже промышляя всех промысленик, яко благ даде Христос, тя небеснаго тайноучителя, и проповедника, и Божественаго пророка Вышних Иоанне всеблаженне Златоусте.
Запев. Златозарна и златословесна Златоустаго Иоанна, всепозлатившаго златовидными сиянии учения, и мир языком просветивша. Злата светлейшу и света полнейшу, источающа благодать Божественую.
Запев. Весь бысть Божие жилище, весь явися арган духовныи, возглашающь всяку добродетель, богодухновенных пении спасеная сказания. И доброту являя Небеснаго Царствия, Иоанне всеблаженне Златоусте.
Слава. Ты Божие милосердие распростре, покаяния образы излагая. И злых отбежания изящно поучая преблаженне и всеконечне. И дел изрядных поучение источая всечестне отче Златоусте.
И ныне. С Богом Заступницу Тя стяжахом. Ты бо Божия Мати бысть Творца и Содетеля, и наше воображение приемша Всенепорочная. И сие спасша от тля и смерти, и Славою Божественою прославльшаго. Катавасия.
Песнь 5. Ирмос.
Вскую мя отрину от Лица Твоего Свете Незаходяи, покрыла мя есть чюжа тма окаяннаго. Но обратив мя к свету заповедей Ти, пути моя направи молютися.
Запев. Церковнаго светилника вси тя свемы светодивна, и душям спасение. Исхищающаго сих из гортаня смертоносна, и к Животу наставляюща Вечнующу, отче приснословыи.
Запев. Рушиши ополчения еретичествующих треблаженне, оградився благочестия оружием, и мужеством душевным священне. Собираеши же радуяся пресветло православных лики союзом духовным.
Слава. Исполнь яко чашу божественых арамат, ланите твои вселенную, разумными благоухании веселят. Умнаго мира помазанием, и добротою словес твоих премудре.
И ныне. Яко Бога заченши Содетеля же и Творца и Господа, роди вси человечестии Чистая ублажают, и бесплотных разумная чиноначалия, яко Матерь Божию славяще. Катавасия.
Песнь 6. Ирмос.
Очисти мя Спасе, многа бо беззакония моя, и из глубины зол возведи мя молюся. К Тебе бо возвах и услыша мя, Боже спасения моего.
Запев. Премудростию духовною мира всего обогатил еси, словесныи податель быв богатыи. Богата бо свыше святителю благодать излияся во устнах твоих.
Запев. Во всю землю яко молния изыде вещание твое. И сила же твоих глагол Златоусте, яко труба велегласная вселенныя вся огласи концы.
Слава. Свыше во истканную ризу одеявся преблаженне добродетелей, и словес красотою обложився. Истины явися славное утверждение.
И ныне. Вседержителною силою носяи всяческая, в немощную плоть из Тебе одеявся Дево Пренепорочная, на благодеяние человеком, Человеколюбец. Катавасия.
Кондак. Глас 6. Подобен. Еже о нас совершив.
С небес прием божественую благодать, и своими устнами вся учиши поклонятися в Троице Единому Богу Иоанне Златоусте всеблаженне преподобне. Достойно хвалим тя, еси бо наставник яко Божественая являя.
Икос. Всех Творцу прекланяю колени, Превечному Слову руце воздеваю, слова прося благодать, да воспою преподобнаго, его же Сам прослави. Рече бо пророку Живыи вовеки, славящыя Мя верою, прославлю. Иже убо в древних Самуйла вознесыи, прослави и ныне святителя. Талант бо его же прият. Добре куплю сотворь Цареви принесе. Тем же и превознесе его Пребогатыи. Сего благодать прошю недостойныи тепле, слово прияти ми. Да возмогу благочестно воспети и аз. Концем бо той есть наставник, яко Божественая являя.
Песнь 7. Ирмос.
Божия схождения огнь устыдеся в Вавилоне древле. Сего ради отроцы в пещи радованною ногою яко во свете ликоваху, поюще, благословен Бог отец наших.
Запев. Благости бездну и благоутробия навык Божия. Поручитель явися спасению кающимся тепле, и вседушно Господеви зовущим, благословен Бог отец наших.
Запев. Вчиняеши Златоусте учении твоими все помышление, и душевныя уврачюеши немощи яко милосерд, и благотекущим споеши веселяся, благословен Бог отец наших.
Слава. Вознесеся быв избран преподобен не злобив священник Вышняго, правдою одеян светло, и веселием зовыи всебогате, благословен Бог отец наших.
И ныне. Зачала еси Пречистая надо всеми Бога и Господа, благоволившаго спасти человеческии род, от тления и смерти. Его же по достоянию поюще зовем, благословен Бог отец наших. Катавасия.
Песнь 8. Ирмос.
Седмь седмицею пещь халдейскии мучитель богочестивым люте разжже. Силою же лучьшею спасеных видев, Творцу и Избавителю вопияше, дети благословите, священнии воспойте людие, и превозносите Его вовеки.
Запев. Иже разумно словесы твоими беседующе Златоусте, богословию честному учимся. И все плодствуем благих приобретение. И злобнаго отбегаем вреда. Общии бо промысленик спасения бысть, вопия превозносите Христа во веки.
Запев. За ны моли Владыку Златоусте милосердным дерзновением, и милостивною и человеколюбною ти отче любовию. Тя бо к Спасу предлагаем вернии ходатая и предстателя, и теплейша молитвеника богомудре иерархе преблаженне Иоанне.
Слава. Юношьско противление и непреклонно мудрование, и царствующих неправду обличил еси. Тепле представ обидимым преподобне. И сирым и вдовицам и нищим отец был еси любовным предложением. Превозносите вопия Христа во веки.
И ныне. Телесными ображении, и различными гадании и образы, и законными прорицании, Твое провозвестиша богоглаголивии Рожество паче естества дивное Дево. Тем Тя веселящеся благочестно воспеваем, и превозносим Христа во веки. Катавасия.
Песнь 9. Ирмос.
Удивися убо о сем небо, и земли ужасошася концы, яко Бог явися человеком плотию, и Чрево же Твое бысть пространнее небес. Тем Тя Богородице ангел и человек чиноначалия величаем.
Запев. Воистину наслаждаяся отче жизни, о ней же подвизася елико мощно на земли житием подобно ангельским, и Христов стяжав язык, и уста тихая. Спастися богоглаголиве моли тя верою различно блажащих.
Запев. Словеса твоя преблаженне словеса жизни, живот ходатайствующа непрестанно. Тя бо источника текуща показа Христос, и реку проливающю божественыя нам токи учения. Пищи воистину поток. Оставления же струю, и покаяния светла проповедника.
Слава. Ходатай явися священноначалниче, Богу и человеком пресветлыи. Ты бо светило показася благочестия богосветлое. И божественыя бысть милостыни наставник. Тем тя Златослове сердечною любовию, ныне достойно ублажаем.
И ныне. Чистая Препрославленая Мати Богу, поющыя Тя любовию спаси. Искушении множество разрешающи милостивно, яко Бога рождьши. Вся елика хощеши совершаеши беспретыкания, и можеши Дево. Тем Тя вси величаем. Катавасия.