Канон святому и праведному страстотерпцу благоверному царевичу Димитрию, глас 2.
Тропарь. Глас 4.
Царскою диадимою одеян богомудре мучениче. За скипетр крест в руку прием. Явися яко победоносец. И всесожжения жертву священну себе принесл еси Димитрие. Показася изряден врачь Русскому царствию, образ в себе чюдотворения нося. Яко агнец непорочен, от раба заколение прият, убивающаго тело, души же коснутися не могуща. Да плачется убо злыи властолюбец. Ты же радуяся предстоиши Святей Троице. Молися о державе сродник твоих, благоугодне быти, и сыновом русским спастися.
Другии тропарь, глас 3. Страстотерпче Христов Димитрие, моли милостиваго Бога, да грехов оставление подаст душям нашым.
Песнь 1. Ирмос.
Во глубине потопи древле, фараонитская вся воиньства, преоружена сила, воплощьжеся Слово, преспеющия грехи потребило есть. Преславныи Господь, яко прославися.
Запев с поклоном: Святый страстотерпче царевиче Димитрие, моли Бога о нас.
Мученика Твоего Христе Димитрия, пети ми желающу, молитвами его, яко Благ, осияние Пресвятаго Духа даруй ми. Да воспою светло, Твоего угодника торжество.
Запев. Умертвившему крепость смерти подобяся, мучениче Димитрие, от раба заколение претерпе. Преславно в Небесныя Обители вселися, трудом воздаяние приял еси прехвалне.
Слава. Честная твоя память мучениче, освящающи мира приспе. Радуется днесь преславныи град Москва, твоего благаго получив заступления. И благодаря Спасу вопиет, преславныи Господь яко прославися.
И ныне. О Тебе ныне пророчество совершися, Богородителнице Владычице Чистая. Его же бо провозвестиша высокогласно вси пророцы, Того Невместимаго преславно во чреве вместила еси. Во двою естеству совершена Бога же и Человека.
Катавасия: Избави от бед рабы своя, святый страстотерпче царевиче Димитрие, яко вси по Бозе к тебе прибегаем, ты бо молиши о нас Христа, Бога нашего.
Песнь 3. Ирмос.
Процвела есть пустыня яко крин Господи, язычна неплодящая Церкви, пришествием Ти, о ней же утвердися мое сердце.
Запев. Егда оставль земнаго мира темность, страдалчески обагрено кровию, тело свое скрыв на Углече, душю же в небесныя обители Димитрие вселил еси прехвалне.
Запев. Нощи и тмы сынове нарекошася, убиицы беззаконнии. Яко агньца тя непорочна ножем збодоша, ходатаи твоему венцу божественому Димитрие бывше.
Слава. Исцеления струи источаеши, ко гробу твоему мучениче Димитрие верою притекающим благодарно радование подаваеши поющым, несть свята якоже Бог наш.
И ныне. Марие златая кадилнице, страстей моих отжени смрад. И утверди мя колеблема прираженьми лукаваго ратоборца. Катавасия.
Седален. Глас 4. Подобен. Скоро предвари.
Наста празднолюбцы светлое торжество, память славная страстоносца Христова, веселящи всяческая. Сияющи в мире зарями чюдес, непрестанную благодать твоими молитвами у Христа испроси мучениче Димитрие, душям нашим, и велию милость.
Ин седален. Слава, глас 8. Подобен. Скоро предвари.
Яко от младенства лишен еси земнаго царства, благородне Димитрие. И в того место в небесное преселися. И тамо сподобися, Небесных Благих видети. И ныне ясно зриши Святую Троицу, и молишися о державе своих сродник, и за вся верныя люди, во еже бы им получити вся благая и полезная.
И ныне, богородичен. Дево Всенепорочная, яже пребогатаго Бога рождьшая, со мучеником того непрестанно моли, оставление прегрешением, и исправление житию, дати нам прежде конца. Иже верою и любовию поющим Тя подолгу, едина Препетая.
Песнь 4. Ирмос.
Пришествовав от Девы не ходатай ни ангел, но Ты Сам Господи, воплощься и спасе всего мя человека. Тем вопию Ти, слава Силе Твоей.
Запев. Кровию страдания, тленнаго смрада избежав богомудре. И вместо земнаго, Небесному Царствию наследник быв страстотерпче. Тем вси чтуще тя ублажаем.
Запев. Ангельскаго селения во дворех пребываеши. В Русстей земли благодать источаеши, к раце мощей твоих любовию припадающим страдалче, и вопиющим, слава Силе Твоей Господи.
Слава. Двери Небесныя светло отверзошася, приемше тя мучениче. И Церковь тя ныне имеет ликоствующи со избранными, поя Богу, Силе Твоей слава Человеколюбче.
И ныне. Священнии провозвестиша древле гласи, прижития Твоего глубину. Их же сбытие видехом Чистая, поем, Силе Твоей слава Владычице. Катавасия.
Песнь 5. Ирмос.
Ходатай Богу и человеком бысть Христе Боже, Тобою бо Владыко, к Светоначалнику Отцу Ти, от нощи неведения, преведение обретохом.
Запев. Мучениче Димитрие, яко звезда пресветлая, в Русстей земли восиял еси. Церковь Христову светом богоразумия озарив, тму же от нея отгнав неведения, и просвещая ту преславных чюдес явлением.
Запев. Имеяи к Богу дерзновение, божественое твое торжество мучениче творящыя, и честное твое страдание верою чистою хвалящих, поминай преблаженне. И от бури и бед, и от напастей спаси.
Слава. Ты яко крин благоцветущь, течением крове своея показася блаженне. И грозд мысленыи винограда Христова, благовонием чюдес мир облагоюхал еси, верою тя мучениче славящих.
И ныне. Ново яко Младенца нам, Превечное Слово родила еси. Двема волема и действы суща сугуба яко Человека, купно же и Бога Всенепорочная. Катавасия.
Песнь 6. Ирмос.
В бездне греховней одержимь, неизследную милосердия Твоего призываю бездну, от тля Боже мя возведи.
Запев. Разжегся завистию раб убиица, побежден властолюбием, и к зависти убийство приплете, закла тя яко агньца непорочна мучениче. Отмщения же праведнаго не убежа.
Запев. Истинную чашю от своих кровей страдальческих, почерпл еси прехвалне мучениче. И сию всегда предлагаеши Церкви, и питаеши своими чюдесы Димитрие, вопиющих Христу, от тля Боже избави нас.
Слава. Яко пречестна жертва, Тайней Трапезе принесен бысть заколением мучениче, и в Небесных Обителех преславно водворяешися, зря славу Божию. И приемля болезней своих почести и страдания.
И ныне. На Тя сошедши Роса Небесеная, и олядевшую землю, Приснодевая богоразумия водами напоив, и многоплодну яви. Катавасия.
Кондак, глас 8. Восия днесь благоцветущая отрасль, благочестиваго корене, от скипетродержавных Русийскаго царствия, доброрасленыи грезн израсте, и Христови красен плод прозябе. Тем же от земли возвавыи тя к вечным обителем, соблюдает и по убиении твоем невредимо тело твое, страдальчески обагрено кровию. Благородне святе Димитрие, соблюдай отечество свое, и град твой невредим. Тому бо еси утвержение.
Икос. Яко агнец непорочен кровь свою излиял еси, богомудре Димитрие, и от Благодателя всех Бога чюдес дар приял еси, вместо тленнаго обрете богатьство нетленное. Предстоиши престолу славы всех Царя. Ему же о нас мучениче молися, да твоими молитвами от бед свободившеся, радостно возопием глаголюще, радуися верным правителю. Радуися вере твердое забрало. Радуися чюдо чюдесем преславное, и пристанище тихое притекающым к тебе. Радуися кореню веры, и молебниче о молящихтися. Радуися отечеству своему похвала, сохраняй град свой невредим, тому бо еси утвержение.
Песнь 7. Ирмос.
Богопротивно веление, беззаконнующа мучителя, высок пламень вознесло есть. Христос же простер богочестивым детем, хлад духовныи. Сыи Благословен и Препрославлен.
Запев. Соблазн лукаваго раба, и того хитростей превыше, яко победитель изряден мучение быв. И прославися зовыи, Боже благословен еси.
Запев. Лучами яко звезда, соборную церковь чюдесы просветил еси, верою притекающым к раце мощей твоих, исцеление неоскудно подаваеши преблаженне, зовущым Боже благословен еси.
Слава. Аки агнец непорочен, и кадило благоприятно, Агньцу Истинному и Пастырю мучениче принесеся, в приношение всебогатно. И приятно всесожжение. Ему же поем. Благословен Бог отец наших.
И ныне. Невещественнаго Света вселение Твое чрево бысть, светлостьми Божественаго разума, безбожие отгнавшаго, Пречистая Богоневесто Отроковице. Ему же поем взывающе, благословен Бог отец наших. Катавасия.
Песнь 8. Ирмос.
Пещь огнена иногда в Вавилоне, детели разделяше, Божиим велением. Халдея опаляющи, верныя же прохлаждающи поющя, благословите вся дела Господня Господа.
Запев. Вшед мучениче в небеснаго круга течения, на добродетельныи воздух, страданьми препоясан, крест за скипетр в десную руку имея, сцарствовати Христови сподобися Димитрие царевиче. Моли спастися нам поющым, благословите вся дела Господня Господа.
Запев. Украшен разумом, красному Владыце предстоиши светел присно, яко победоносец богоприятен. Укроти молитвами твоими, варварская нахождения, и низложи мучащее нас искушение, согнетающее злом во глубину погибели, страстотерпче Димитрие поющих, благословите вся дела Господня Господа.
Слава. Пречестная память, освящающи мира приспе, всехвалне страстоносче. В ню же молимся, получити тобою заступление Димитрие, поющым славу благаго угодника. Благословите вся дела Господня Господа.
И ныне. Священных пророк честныи лик, Тя прописует, Киот, и несекомую Гору. Жезл, и Дверь, еюже яко весть пройде Вышнии. И паки затворену остави Тя Деву.
Песнь 9. Ирмос.
Безначальна Родителя Сын, Бог и Господь, воплощься от Девицы нам явися, омраченыя просветити, и собрати расточеныя. Тем Всехвалную Богородицу величаем.
Запев с поклоном. Обрете от Христа возмездие мудре мучениче, правды венец приим, и радость некончаемую. Небеснаго Селения во дворех пребываеши. Державу отчечества твоего поминай, мучениче Димитрие.
Запев. Егда принесени быша честныя твоя мощи, страстотерпче Димитрие, тогда святители обстояще одр. Царь же и князи, и вси русстии народи, воскликнуша купно память вечную, Христа величающе.
Слава. Мученик днесь сословие, святых и праведных душя, яко победоносца тя и соликовника прияша, мучениче Димитрие. С ними же поеши радуяся Бога в Троице, спасающаго душя наша.
И ныне. Разумевше издалеча прозорливыма очима пророцы, Тя яве провозвестиша, хотящую Матерь быти Вседетелю и всех Владыце. Тем Тя поем Всепетая Богородице, и исповедаем яко воистину сущую Богородицу. Катавасия.