Канон святому благоверному князю Георгию


Канон святому благоверному великому князю Георгию, глас 4.

Тропарь, глас 8. На высоте великаго княжения седя, явися благочестием и верою сияя отечеству своему яко Солнце. По Святей Троице ревностию разжегся, и за веру крепко пострадав, кровь свою пролия. Тем и отсеченая ти за Христа глава сведетельствует яве о тебе, прилепшая по смерти к телеси твоему. С нею же и до днесь нетленны пребывают мощи твоя, от них же источаеши исцеления, душям и телесем нашим. Но яко дерзновение имея ко Христу, страстотерпче Георгие, непрестанно моли, державу твою, и сродник твоих безвредну сохранити, молитвами твоими.

 

Песнь 1. Ирмос.

Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся Тоя чудеса.

Запев с поклоном: Святый благоверне княже Георгие, моли Бога о нас.

Новоявлен мученик блаженне Георгие, вселенней напоследок явися. Темже ми подаждь слово твое Божиею благодатию, твоя подвиги воспети по достоянию.

Запев. Воинством досточюдным, твоего сопротивления победная прияхом, на мучителя естеству. Совершене бо посрамлен бысть, не к тому мучительская дерзати начинает.

Слава. Одеявся во броня исповеданием веры. И шлем возложив благодати светлейшии. И языком же Георгие благовещанным, якоже мечем ссече окаяннаго Батыя.

И ныне. Гора Превысокая, юже виде Даниил, камень от горы же отсечеся мужески, рук кроме, Тебе прообразова Богородице. Без мужа бо нам плотию родила Еммануила.

Катавасия: Избави от бед рабы своя, святый благоверне княже Георгие, яко вси по Бозе к тебе прибегаем, ты бо молиши о нас Христа, Бога нашего.

 

Песнь 3. Ирмос.

Твоя певцы Богородице, Живыи Нетления Источниче, лик Себе совокупльши духовен утверди. И в Божественей Ти Славе, венцем Славы сподоби.

Запев. Муками яко злато честное искусися, страдалче славне, и Цареви Силам принесеся, всеплодие Словеси истинно, в место огня олтарнаго, мечем истнеемо.

Запев. С варваром брався, и сего победил еси, от Христа дерзновение приим, многу печаль бесом сотворил еси. Святым же ангелом веселие и радость, с ними же водворяешися.

Слава. Маслина плодовитая, в Церкви Живаго Бога, твоих мощей рака ныне явися. От нея же приемлем различная недугом исцеления, иже тобою обогащьшиися, и чюдесы твоими красящиися.

И ныне. Рече божественыи Иезекииль, и будет Дверь Затворена, и сие на Тебе исполнися Владычице. Вниде бо несказанно в Тя Отчее Слово. И мирови явися Плотоносец ис Тебе Дево, сохранив Тя во обоих. Катавасия.

Седален, глас 8. Подобен. Премудрости.

Премудрости рачитель быв, сокровище добродетелем, от онуду же и почерпе Божественая разумения. Тем же и времени пришедшу, к подвигом усердно подвигся, приемля мученическия раны, главе усечение, и крови истечение. И ныне живеши в Неизреченнем Свете с мученики. Тем же вопием ти, моли Христа Бога, грехов оставление даровати, поклоняющимся верою святым мощем твоим.

Слава и ныне. Богородичен. Помышляю Суд и испытания страшная, трепещу, и ужасаюся мук, и огня болезнь, и тму же и Тартар, увы что сотворю. Студ како претерплю, егда книги разгнутся, и деяния обличатся. Сего ради припадаю Ти Богородице Пречистая, тогда предстани ми нужды оноя изимающи. Тебе бо имам прибежище Владычице.

 

Песнь 4. Ирмос.

Седяи во славе на Престоле Божествене, на Облаце Легце, прииде Исус Пребожественыи, от Пречистыя Девы, и спасе вопиющыя, слава Христе Силе Твоей.

Запев. Наступив на варварское стремление, и поправ сего мучениче. Росою с небес божествено обагатися взывая Христу, слава Силе Твоей Господи.

Запев. Паче смысла страстотерпца Твоего любы, превосходит вся помышления Слове. Борения и мужественыя подвиги, и натрижнения, яже подаст законно ему пострадати.

Слава. Яко добр воин, яко непобедим мученик, яко Христови храбор, и яко благочестия поборник, Небесная Селения наследовав, ликом ангельским всегда свеселяся.

И ныне. Изообразоваше в Чермнем, прошествие древле Израилево, безмужное Твое Рожество Всецарице. Яко же бо он тогда прейде немокрено, тако и Христос безсеменно, от Твоих Пречистых кровей произыде Дево. Катавасия.

 

Песнь 5. Ирмос.

Удивишася всяческая, о Божественей славе Твоей, Ты бо Браконеискусимая Девице, прият во утробе надо всеми Сущаго Бога, и родила еси Безлетнаго Сына, всем воспевающим Тя мир подавающа.

Запев. Ранам тело твое, великии княже Георгие примесися. И узами многообразных мук, миро благовонно. Тем источает нам благоухающи душя, верою несуменною тя почитающим всегда.

Запев. Кроплением крове твоея, погасил еси углие суровьства Батыева, страстотерпче. Божественых чюдес огнем премудре, тину страстную лютых пожигая, великою благодатию Спасовою Георгие.

Слава. Коль страшно же и славно о Христе сопротивление твое, ему же почюдишася племена обретшаяся на подвизе. И похвалиша терпение. Варвари же посрамишася студом облекшеся.

И ныне. Горе бяше Соприсносущен Отцу, и Богу Бог Слово. И с нами Бог и Человек Богородице. Тобою сшед к нашему смирению, свобождая от клятвы прадедния. Тебе бо виде патриарх Ияков Лествицу Небесную. Катавасия.

 

Песнь 6. Ирмос.

Божественое се и всечестное совершающе празднество, богомудрении Божия Матере, приидите руками восплещем, от Нея Рождьшагося верою славяще.

Запев. Никако же поколеба столпа благочестия, свирепьство варварское. Ниже прещение Батыево, ниже мечное усечение, ни раны ни смерть нужнейшая.

Запев. Взыграшася светло мученичестии тогда ликове, видевше твое дерзновение, и приникше совокуплено, со ангелы невидимо укрепляху тя в подвизе.

Слава. Телес страсти неисцельныя, Божиею благодатию исцелил еси, великии княже Георгие. Миро благоухающее источая убо, твоим честным мощем прикасающимся.

И ныне. Образне руно Гедеон прият орошено, Твое предвозвещая чюдо. Сниде бо яко дождь на руно Богородице, Единыи от Троицы во утробу Твою воплощаемь. Катавасия.

Кондак, глас 8. Христове смерти подобяся, и Того испити чашю возжелев яко живота. За Него же мужески подвизався, презрев земное царство. От безбожных варвар пострадав до смерти, Гергие богомудре. Тем моли спастися, христолюбивому царю нашему, молитвами твоими.

Икос. Кто изглаголет силы Господня; или кто исповесть страдания твоя, и добродетели мучениче; или кии язык воспети возможет по достоиньству. Тем же и аз не достойныи покушаюся, хвалити же и славити Владыку Жизнодавца, давшаго тебе на варвары дерзость, злочестиваго Батыя не убоятися. Исповедающу тебе Истиннаго Бога. Сего ради тя чтем верою и любовию, страстотерпче Георгие. Тем моли спастися христолюбивому царю нашему, молитвами твоими.

 

Песнь 7. Ирмос.

Не послужиша твари, богомудрении паче Зиждителя, но огненое прещение мужески поправше, радовахуся поюще, Препетыи иже отцем Господь и Бог благословен еси.

Запев. На камени Божественаго разума, утвердив сердца своего, стопы славне. Врагов же ухищрения непревратишя тя воспевающа, отец наших Боже благословен еси.

Запев. Свет Невечернии страдавшу кровию, восия тебе, и веселие яве тебе прият, великомучениче, воспевающа, отец наших Боже благословен еси.

Слава. Истинен мученик, истиннаго Христа Бога нашего страдалец взывааше, мучения бо, цветы благовония вменяю, и кровныя струи баню крещения.

И ныне. Риторствующии язык, безгласен же и недвижимь, о Тебе зрим Богорадованная. Не имать бо постигнути, Непостижимаго зачатия, неизреченное Рождение. Катавасия.

 

Песнь 8. Ирмос.

Отроки благочестивыя в пещи, Рожество Богородичо спасло есть. Тогда убо образуемо, ныне же действуемо, вселенную всю воздвиже пети, Господа воспевайте дела, и превозносите Его во веки.

Запев. Ублажиша тя царие, благословиша святителие, слышаще твое мужественое терпение. И ко Христу ходатая стяжавше тя. И ныне приходяще честным ти мощем покланяются.

Запев. Божественыи Георгии, источает миро благодати, повелевая верным почерпати, на просвещение и чистоту, взывая, Господа пойте дела, и превозносите Его во веки.

Слава. Хваляся язвами Христовыми, к вечным востече. Яже от крове твоея обагрену плоть. И светло Цареви Силам предстоиши с мученики ликуя.

И ныне. Исаии угль древле послан бысть, клещами носимь от серафима, и касаяся кому, грехи оставляет. Клеща же Ты еси Дево, Божественыи Угль носившая, во оставление грехов человечеству. Катавасия.

 

Песнь 9. Ирмос.

Всяк земен да взыграется Духом просвещаемь, да ликовствует же безплотных умов естество, почитая святое торжество Божия Матере, и да поют, радуися Преблаженная, Богородице Чистая Приснодево.

Запев с поклоном. Воин истинныи Христова проповедания бысть Георгие, и льсти потребитель безбожия. Темже и ныне молитвами си потреби, варварское востание царю нашему поднозе славне тех низложи.

Запев. Аще и отсечена бысть глава твоя, и кровь излияся, но прилпе верно и победительная тобою совершишася. Темже и на нас востающих силою си посрами, и царя нашего яви победителя.

Слава. Лук сокруши нечестивых, страстотерпче непобедиме, не праведно движимыи на твое достояние. Еже себе избрал еси возлюбив. И царю нашему скипетр утверди. Да и мы тихо препроводим жительство.

И ныне. Егоже пророцы провозвестиша вси многообразне, и воплощьшася нас ради от Тебе видехом Богородице, Бога и Человека совершена, избавляюща человеки от клятвы прадедния, Твоими молитвами, и вечныя муки свобождающи. Катавасия.

+

Авторизация

* *
*

Регистрация

*
*
*
*

Проверочный код Time limit exceeded. Please complete the captcha once again.


Восстановление пароля