Канон святителю Стефану Пермскому


Глас 4.

Тропарь, глас 4. Божественым желанием, от юнаго возраста Стефане премудре разжегся, ярем Христов взем. И людей оляденевшая древле неверием сердца, божественое семя в них всеяв, евангельски духовне породил еси. Тем же преславную ти память почитающе молимся, моли спастися душам нашим.

 

Песнь 1. Ирмос.

Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся Тоя чудеса.

Запев с поклоном: Святителю Христов Стефане, моли Бога о нас.

Священная ты писания от младеньства научився, богоносе Стефане. В далняя места пришел еси, и неведущим Бог тобою познан бысть.

Запев. Идеже прелесть почитаема бяше, тамо же ныне тобою Бог неведущим святителю Стефане познася. Тем же священную твою память, достодолжно ублажаем.

Слава. Богодохновенным ти учением, научил еси люди веровати во Христа. И от идольския прелести укланятися. Сего ради вси яко единоревнителя апостолом, песньми почитаем.

И ныне. Ты Единаго Богоневесто, в вышних Седящаго, на руку носила еси плоть бывша. Ты бо бысть избранна от всех век, приятелище достойно Вседержителя.

Катавасия: Избави от бед рабы своя, святителю Христов Стефане, яко вси по Бозе к тебе прибегаем, ты бо молиши о нас Христа, Бога нашего.

 

Песнь 3. Ирмос.

Твоя певцы Богородице, живыи нетления Источниче, лик Себе совокупльши духовен утверди, и в божественей Ти славе, венцем славы сподоби.

Запев. Не убоялся еси святителю людей, иже тогда нечествующих. Но тех дерзновенно кумирницу со юдолы огню предал еси. И всех научил еси вопити. Несть свят паче Тебе Господи. (дважды)

Слава. Тезоименитым мужеством, и смирения нравом, на овчю кротость убииц преложил еси. Сего ради и венцы венчася святителю Стефане.

И ныне. Тя заступление неблазнено, Богомати стяжавше. Упование на Тя возлагающе спасаемся. И к Тебе прибегающе сохраняемся вси. Катавасия.

Седален, глас 4. Подобен. Скоро вари.

Ума пречюднаго и бодренаго учителя. Священодействы Церковь украсивша. И мутным учением волхва, яко возбесневша волка, от Христовых овец словесы своими отгнавша, и невредно духовная ти чада сохраньша. Ему же вернии возопием, Стефане прехвалне. Моли Христа Бога, спастися душам нашим.

 

Песнь 4. Ирмос.

Седяи во славе на Престоле Божествене, на облаце легце, прииде Исус Пребожественыи, от Пречистыя Девы, спасе же вопиющия, слава Христе силе Твоей.

Запев. Яко Солнце, чистое житие твое возсия святителю. Тму идолобесия от людей своих отгнав, и всех научил еси взывати. Слава силе Твоей Господи.

Запев. Волшебная блядословия, яко премудр посрамил еси. И сих от Христова стада словесы своими яко пращею отгнал еси, и звати всех научил еси. Слава силе Твоей Господи.

Слава. Яко истинныи святитель, тих и кроток отче был еси. И столп благочестия Церкви явился еси. Люди своя благочестию научи вопити Христови. Слава силе Твоей Господи.

И ныне. Тя оружие на враги предлагаем. Скорби всякия лютых обьстоянии отреваем, и возмущения еретическа, Мати Божия избегаем. Катавасия.

 

Песнь 5. Ирмос.

Удивишася всяческая о Божественей славе Твоей, Ты бо браконеискусимая Девице, прият во утробе надо всеми Сущаго Бога, и родила еси Безлетнаго Сына, всем воспевающим Тя мир подавающа.

Запев. Воздвигл еси учением своим, иже древле во тме неведения люди слежащая. Чада Божия, и свету показал еси наследники. Отнюдуже тя святителю, вси любомудрено почитаем.

Запев. Премудрость Духа Святаго благодатию, во устнах твоих излиявшися самотворително, и ко Христову познанию приведе люди святителю.

Слава. Свету Великому, яко венечник ныне святителю предстоиши. Поминаи изрядное твое достояние. Их же многими труды отче стяжал еси, да вси тя ублажаем.

И ныне. Возсия из Тебе мысленое Солнце. И светлыя луча Своего Божества всем простре, Богородице Владычице. Тем Тя вси славим. Катавасия.

 

Песнь 6. Ирмос.

Божественное се и всечестное совершающе празднество, богомудрении Божия Матере, приидите руками восплещем, от Нея Рождьшагося верою славяще.

Запев. Ралом словес твоих, оляденевшая людей сердца возделал еси. Божественое семя в них всеяв, плод красныи Христови святителю привел еси.

Запев. Быстринами твоих учении, идольская разжжения премудре Стефане угасив. И божествеными ти словесы, верных сердца утвердил еси.

Слава. В Единосущную Троицу, веровати люди научив премудре Стефане. От скверны идольския к Живому Богу привел еси.

И ныне. Расторгни моих согрешении рукописание. От одержащих мя печалей и страстей, разрешение дарующи. И соблюди мя неврежена Владычице. Катавасия.

Кондак, глас 8. Подобен. Взбранной.

Самозванен неищущим тебе святителю обретеся. Люди от идольския льсти свободив, и ко Христове вере привел еси. И волхва пансотника посрамил еси. Темже и первыи епископ и учитель Перми быв. Сего ради духовная ти чада, яко тобою избавльшеся от идол, благодарная тебе зовем. Радуися Стефане учителю премудрыи.

Икос. Всякого мирскаго пристрастия кроме отче быв. От юности прилежав премудрости. И детелное художество достиже богословия. И в далния страны пришед, идеже весма Бог непознавшеся, но прелесть бесовская почитаема бяше. И тамо апостольски люди научил еси веровати во Христа. Идолы сокрушил еси, и волхва посрамив, святитель тем был еси. Темже духовная ти чада, яко тобою избавльшеся от идол, благодарная тебе зовем. Радуися Стефане учителю премудрыи.

 

Песнь 7. Ирмос.

Непослужиша твари богомудрении паче Зиждителя, но огненное прещение мужески поправше. Радовахуся поюще, препетыи иже отцем Господь и Бог благословен еси.

Запев. Злочестивыи он чародей, иже на благочестие хулу глаголивыи. Тобою премудре, яко беззаконен от Христова стада новых людей отгоним бывает. Мы же Христови зовем, благословен Бог отец наших. (дважды)

Слава. Преславно яко прешед от мира, к премирным святителю жилищем. И причастием Богови приближився, воспеваеши. Благословен Бог отец наших.

И ныне. Избавльшеся Тобою первыя клятвы, к присносущней Жизни прешедше. Радуися зовем Ти Преславная Владычице, яже Бога нам рождьшая. Катавасия.

 

Песнь 8. Ирмос.

Отроки благочестивыя в пещи, Рожество Богородичо спасло есть. Тогда убо образуемо, ныне же действуемо, вселенную всю воздвиже пети, Господа воспевайте дела, и превозносите Его во веки.

Запев. Словесы твоими наставляеми чада твоя святителю, от тмы идольския ко свету богоразумия пришедше, единогласно Христови вопием. Благословите вся дела Господня Господа, и превозносите Его во веки. (дважды)

Слава. Свет Трисолнечныя Троица, вселився в божественое твое сердце. Люди вся просвети святым крещением. И научи Творцу Избавителю вопити. Благословите вся дела Господня Господа, и превозносите Его во веки.

И ныне. Усты и разумом Богородицу Тя мудрствующе, песнословим Тя Пренепорочная. Родила бо еси Пречистая плотию обложена Бога и Господа. Тем Тя Дево поем, и превозносим во веки. Катавасия.

 

Песнь 9. Ирмос.

Всяк земен да взыграется, Духом просвещаем, да ликовствует же безплотных умов естество, почитая святое торжество Божия Матере, и да поют, радуися Преблаженная, Богородице Чистая Приснодево.

Запев с поклоном. Твоими труды святителю яже на земли, небесныи покой прият. Идеже святых ликове, и праведных всесветлое торжество. Отнюдуже и нас поминай, память твою присно славящих.

Запев. Вечных и нетленных улучити желая святителю, яже в мире мнящихся сладких оставив, и Христу последовал еси. Темже и лику архиерейскому сочетася преславне.

Слава. Догматом благочестия научився, премудре святителю. Апостолом ревнитель бысть, идольскую прелесть низложил еси. Темже твою память достойно ублажаем.

И ныне. Плоть прияти восхотев, в Тя вселися. Едину святейшу всех обрет Богородицу. Воистину яви Матерь Деву. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля