Канон святителю Арсению, епископу Тверскому


Канон, глас 2.

Тропарь, глас 8. Благочестно пожив во святительстве, люди просветил еси учением своим. И о храме Пречистыя вельми подвизався, и любитель иноком бысть. Сего ради от Христа, паствы своея венец приим. Тем же яко апостольскаго престола наместника, и святителя великаго чтуще тя молим чада твоя блаженне, от всех бед избави нас, еже ко Христу молитвами ти, святителю Христов Арсение отче наш.

 

Песнь 1. Ирмос.

Грядите людие, поем песнь Христу Богу, раздельшему море и проведшему люди, яже испусти из работы египетьския, яко прославися.

Запев с поклоном: Святителю Христов Арсение, моли Бога о нас.

Свете от Света Христе Боже, от Отца преже век Рождеися, и искони Сыи со Отцем и с Духом, мрак души моея отгнав, озари ум мой молюся, яко да возмогу пети Твоего угодника, Арсения священнаго.

Запев. Аще и человек еси естеством отче, но ангельски на земли пожил еси. Деснаго пути от юности емся, целомудрия рачитель быв. Духа Святаго честное обителище Арсение всесвященне явися.

Слава. В мудрости главизну, страх Божии возлюбив, и заповедем Его присно поучаяся, древо насадися приисходящих Вод Духовных. От Них же отче напаяемь, плод Христу Арсение принесеся.

И ныне. Услыша Евва первомати, Чистая, в печалех родиши чада. Ты же Дево услыша, Господь с Тобою радуися. И радованным гласом Богоневесто, печаль праматере потребльши.

Катавасия: Избави от бед рабы своя, святителю Христов Арсение, яко вси по Бозе к тебе прибегаем, ты бо молиши о нас, Христа, Бога нашего.

 

Песнь 3. Ирмос.

На камени мя веры утверди, разшири уста моя на враги моя. Везвеселибося дух мой воспевати, несть свят яко же Ты Бог наш. И несть праведен паче Тебе Господи.

Запев. Презрев нижняя, яко попираема. И любовь родителю преобидев, Христа взыскал еси. Его же любовию, душю свою уязвил еси. Того любя, и Того ища красоты.

Запев. Светилник сыи, свою душю украшая слезами, рано ко Христу утренюя. Руку же простертием в молитвах, Амалика тело умертвил еси. И на гору безстрастия возшел еси.

Слава. Благородием высок, и благодушием изящен. Разума мудростию удивлен бысть. Цвет яко прекрасныи чистотою сияя, и светлым смирением Арсение отче украсися.

И ныне. Мати Божия Пречистая, Благословеная и Пренепорочная, души моей струпы исцели, и страсти плотьския умертви. Умири ум мой, от всякого вреда, и вражия напасти изми мя Владычице. Катавасия.

Седален, глас 4. Великии Христов святитель да воспоется, столп светлыи, просвещая нас чюдес светлостьми, богоносныи отче наш Арсение, пастырю и учителю земли нашей. Христа моли о стаде своем, и о всех иже верою и любовию чтущих святую память твою.

Слава, и ныне. Богородичен. Поем Тя Богоневесто Мати Христа Бога, славяще Рожество Твое Непостижимое. Им же избавихомся льсти дияволи, и всяческих бед Владычице Богородице. И верно Ти вопием, помилуй стадо Свое едина Благословеная.

 

Песнь 4. Ирмос.

Пою Тя, слухом убо Господи услышах и убояхся. До мене бо прииде, мене ища заблуждьшаго. Тем многое Твое сошествие, еже на мя прославляю обновление.

Запев. Вельми украсил еси престол свой святителю Арсение. Великими бо чюдесы преспел еси, и житием светлым. Сего ради Превеликии Бог наш, вельми тя прославил есть.

Запев. Милости подателя Господа, сведыи блаженне, тепле Его умолил еси, на исцеление и спасение многим, с верою к тебе притекающим, и покланяющимся честней раце твоей.

Слава. Врача изрядна, различно недугующим, и наставление всем прельщеным злым советом, Христос тя дарова чюдотворца земли нашей, святителя Арсения. Тем же тя ублажаем.

И ныне. Исцелила еси сокрушение Всенепорочная, древняго окаяньства земленых, порождьшая Господа и Царя Христа, понесшаго недуги наша. За благосердие неизглаголанное Дево Мати. Катавасия.

 

Песнь 5. Ирмос.

Просвещение во тме лежащим, и спасение неначаемым Христе Спасе мой, к Тебе утренюю Царю Мирныи, просвети мя сиянием Си. Иного бо разве Тебе Бога не знаем.

Запев. Славныи пастырь, не истощимыи источник исцеления, Церковныи столп. Верным утвержение, великии светилник многосветлыи, святителю Арсение.

Запев. Яко светозарно житие. Яко зело чюдно. Яко красни трудове твои. Яко велика благодать свыше дана ти мудре. Сего ради верою почитаем тя, святителю Арсение.

Слава. Пресветлая твоя память простирается в мире, и просвещает человеческия души, светом благодати. Юже свершающих любовию, от бед нас избави молимся святителю Арсение.

И ныне. Се Одр Соломонь, Его же обстоят сильнии. Богодухновенных писании ныне прорицания. На Нем же Христос Бог воплощением почил есть, Благословенная, Обрадованная. Катавасия.

 

Песнь 6. Ирмос.

В бездне греховней одержимь, неизследную милосердия Твоего призываю бездну. От тля Боже мой возведи мя.

Запев. Светилника тя иже во тме прелести, нелестно наставляюща обретше, к путем живота, богоблаженне Арсение, и ныне по смерти врачь явился еси болящим, Духа Божественою благодатию.

Запев. Законом повинуяся Владычним, заблуждьшия взыскал еси. И во ограду покаяния приведе, яко пастырь истинен показася стаду своему, отче святителю Арсение.

Слава. Священия храм отче, Божественаго Духа верою быв. Создал еси храм Пречистыя Матере Божия, и Ея угодник Антония и Феодосия. И обитель пречюдну сотвори и украси. В ней же тело твое положено бысть.

И ныне. Закони о Тебе преславно Дево обновляются. Раждаеши бо без семене Бога, Спаса, и пребываеши девьствующи паки, странно чюдо. Тем Тя Матерь Еммануилеву благочестно исповедаем. Катавасия.

Кондак. глас 8. Восприимши радостно твоя мощи честныя, Пречистая Церкви. В Ню же честно носими множеством священноинок. И князи благоверными. И тя приимши яко сокровище многоценное. Тем же мы ныне твоея ограды словесныя овцы, окрест раки твоея предстояще, любезно вопием ти. Незабуди чад своих отче, их же мудре собра и возлюби. Яко да зовем ти. Радуися святителю Арсение, пастырю и учителю наш.

Икос. От скверных устен, от нечиста сердца, како ти принесу хваления окаянныи, ужасаюся и терпещу. Но надеяся на твой благосердыи нрав отче, хвалу ти приносим гаголюще. Радуися пастырю наш добрыи святителю Арсение, упасыи стадо Христово. Радуися дивныи чюдотворче, притекающим к тебе с верою, не оскудно исцеление подавая. Радуися церквам воздвижение, и иноких любителю, сирым и нищим подателю. Радуися и ты богохранимыи граде Тверь, яко такова име в себе поживша святителя. Радуися и веселися Божия Матере Церкви, яко любимыи Тобою в Тебе почил есть, богомудрыи Арсении. Но о богоблаженныи отче, аще и телом прейде от нас, но духом пребывая с нами. И молися за ны Христу, и Пречистей Его Матери, с Ея угодники Антонием и Феодосием. И спасай поющих тя. Да зовем ти, радися святителю Арсение, пастырю и учителю наш.

Песнь 7. Ирмос.

Богопротивное веление, беззаконующа мучителя, высок пламень вознесло есть, Христос же простре Богочестивым детем, хлад духовныи. Сыи Благословен и Препрославлен.

Запев. Вышнии Всецарю Великодержавне, молитвами Твоего угодника, жизнь умири всем Слове християном, пособьствуя на варвары, державе нашей. Да Тебе Христе зовем, Благословен Бог отец наших.

Запев. Престолу предстоя Божию святителю Христов Арсение, молити прилежно непрестай о нас твоих рабех. До огня вечнаго избавимся, и всякого озлобления от враг находящаго, твоими молитвами.

Слава. Исцеления подаваеши всюду, верою к тебе притекающим святителю Арсение. Тем же молим тя твои раби, печаль нашу в радость преложи, и от всякия избави скорби, твоими молитвами.

И ныне. Страсти моего сердца исцели, милостию Си Всепетая. Ум мой умири, и душу мою просвети, и ходити мя направи на стезю спасеную, яко да пою Тя Препетая. Катавасия.

 

Песнь 8. Ирмос.

Иже в пещь огненую к детем еврейским сшедшаго, и пламень на хлад преложьшаго Бога, пойте вся дела Господа, и превозносите Его во веки.

Запев. Устроив свою жизнь боголепно, святителю Арсение, строитель изряден показася своей обители, и светло приятелище Божие.

Запев. Чюдесем глубина, и исцелением река, источник непрестанен. Струя никако же оскудеваема, твоя рака показася отче.

Слава. Иже к Богу молитвами си, очисти нас от всякия скверны, теплою си молитвою, и скорбей и болезней, и всякия нужи святителю Арсение избави.

И ныне. Пресвятая Дево Ты мя спаси, и немощи моей буди Помощь. Скорбей многих и лютых мя избави. Да Тя славлю едину Богородицу. Катавасия.

 

Песнь 9. Ирмос.

Безначална Родителя Сын, Бог и Господь воплощься, от Девы нам явися, омраченыя просветити, собрати расточеныя. Тем же Всепетую Богородицу величаем.

Запев с поклоном. Чюдеса бо твоя многа, и исцеления безчислена, независтно подаваеши, с теплою верою приходящим, Арсение святителю похвала земли нашей.

Запев. Постави тебе Христос, матере Своея церкви, столпа крепка и неподвижима. Соблюдающа и назирающа град свой неподвижим, и святую обитель свою.

Слава. Святителю убо, и князи благочестивии, священницы и иноцы, и вси людие, мужи и жены, и старцы со младенцы, и всяк возраст, и всяко достояние, святителю нашему Арсению светло празднуем.

И ныне. Моли Своего Сына Госпоже Пречистая Богородице, избавити мя в день лют страшнаго осуждения. Да радуяся песньми величаю Тя. Катавасия.

+

Авторизация

* *
*

Регистрация

*
*
*
*

Проверочный код Time limit exceeded. Please complete the captcha once again.


Восстановление пароля