Тропарь, глас 5. Многоскорбную пучину мученических подвиг добре преплывше, достигла еси в Небесное Царство, исповеднице божественная Феодоро, молися о нас Господеви, да не будем потоплены душетленными волнами грехов и беззаконии, но да сподобимся жизни вечныя со святыми (дважды).
Слава, и ныне, богородичен. Радуйся Двери Господня непроходимая, радуися Стено и Покрове прибегающим к Тебе, радуися заветреннее Пристанище Неискусобрачная, рождьшая плотию Творца Своего и Бога, молящи не презри о воспевающих и кланяющихся Рожеству Твоему (поклон).
Канон, глас 7.
Песнь 1. Ирмос.
Манием Ти на земен образ преложися, первие разливаемое водное естество Господи, темже немокренно шествовав Израиль, поет Тебе песнь победную.
Запев с поклоном: Святая преподобномученице и исповеднице Феодоро, моли Бога о нас.
Святую Феодосию восхвалити по достоянию не возмогаю недостойныи аз, но Ты Христе, подаждь ми Свою всемогущую благодать молитвами ея.
Запев. Всею душею и всею мыслию возлюбила еси Христа Бога, и служаше Ему вся дни живота своего, верою и добродетельми.
Слава. Яко ревностная исполнительница Евангелия, нищих миловаше, странных приимаше, и всем требующим помощи служаше, Феодосие любвеобильная.
И ныне. Евву прельсти искуситель снедию краснаго плода, и нас ныне обольщает. Тобою избавляемся искушении его Владычице, всепетая и неискусобрачная.
Катавасия: Избави от бед рабы своя, святая преподобномученице и исповеднице Феодоро, яко вси по Бозе к тебе прибегаем, ты бо молиши о нас Христа Бога нашего (поклон).
Господи помилуй (трижды, с поклонами).
Песнь 3. Ирмос.
В начатце небеса всесильным словом Си утвержеи, Господи Спасе. И всетворящим Духом Божиим, всю силу их на недвижимом камени исповедания Твоего утверди.
Запев. Твердо исполняя заповеди Божии, Феодосие, всех наставляше пребыти в вере православней, и творити дела добрая нелицемерно.
Запев. Уметы вменила еси благородие рода, и богатство и честь, прияв ангельскии образ, и наречена Феодорою, в нем же и поживе богоугодно.
Слава. Юности взыграния умертвила еси воздержанием, молитвою и богомыслием, и явися избранныи сосуд благодати Божия, Феодоро преподобная.
И ныне. Твоим вседержавным покровом сохраняемся от бури вражиих нападании, Владычице Пресвятая, християном верное прибежище. Катавасия.
Седален, глас 5. За лишение богатства гибнущаго получи Царство Небесное блаженная, за поругание временное восприя славу вечную, за смрадную темницу наслаждаешися неизреченною светлостию и благоуханием, и молишися Христови спастися всем, верно торжествующим святую память твою.
Слава, и ныне, богородичен. Погружаем треволнении страстей лютых, прибегаю к Тебе Пречистая, воздвигни мя от них вскоре, и спаси мя от всякаго навета лукаваго, и порази борющих мя силою от Тебе Рожденнаго.
Песнь 4. Ирмос.
Отча недра не оставль, и сошед на землю Христе Боже, тайну услышав смотрения Твоего, и прославих Тя, Человеколюбче.
Запев. Феодору преблаженную чту с любовию и благоговением, яко святую и преподобную, яко мученицу и исповедницу, яко великую угодницу Божию, и молитвенницу о душах наших.
Запев. Еретицы, не терпяще твоея ревности и любви к Богу, нощию емше тя, сковаша узами железными, и вринуша в подклеть на томление.
Слава. Отречеся преподобная прияти обычаи Православию противнии, и ввергоша ю мучители в темницу, идеже досаждения и беды терпяше, поя Богови, прославляя Тя. Человеколюбче.
И ныне. Невместимыи небесы во чрево Твое, Присно Дево, вместися неведомым образом, и родися неизреченно, спасая мир от работы вражия. Катавасия.
Песнь 5. Ирмос.
Нощь не светла неверным, верным же просвещение в пищи, словес Твоих, и сего ради к Тебе утренюю, и воспеваю Твое Божество.
Запев. Делы показала еси, яко пребываеши в Церкви истинней, сподобившись, и во узах причаститися тела и крови Христовы от благочестиваго священноинока Иова.
Запев. О болезни сына своего единороднаго вельми скорби, не предпочла еси его Христу, якоже жадаху противницы, взываше бо со многострадальным Иовом: Господь даде, Господь и отъя.
Слава. Разреши неплодие супружества, и сохрани здравие младенцем, своими предстательствы пред Богом, молимтися, Феодоро великоименитая.
И ныне. Тобою потребися клятва и умертвися смерть, Тобою благословение процвете, и жизнь мирови даровася, Богородице Марие, рождьшая спаса всем. Катавасия.
Песнь 6. Ирмос.
Плавающаго в молве житейских суетии, и с кораблем потопляема грехи, и душетленну зверю приметаема, яко Иона, Христе, вопию ти: от смертныя глубины возведи мя.
Запев. Увещаху тя еретичестии начальницы, соединитися с ними в вере, ты же препрела их Писании Священными, Феодоро премудрая.
Запев. Человецы свирепии тако яростно влечаху тя с увещания за чепь железную, ею же бе окована выя твоя, яко глава твоя бияшеся о ступени до крове.
Слава. Тебе ругающеся суемудреннии, возяху тя на дровнях по стогнам градским, но ты и зде исповедаше древлее Православие, истинным крестным знамением.
И ныне. Не лиши нас грешных Твоея помощи и заступления, не имамы бо вернии, иныя надежды и прибежища по Бозе, разве Тебе, Владычице. Катавасия.
Слава, и ныне. Кондак, глас 1-и, подобен: Лик ангельский.
Благочестно проходя путь жизни, прияла еси иноческии образ, в нем же Богу угоди, и люди утверди в Вере истинней, преподобномученице Феодоро прехвальная, с пострадавшими с тобою благоверными женами, молися Господеви, подати нам велию милость.
Икос. Возсия днесь светоносная память твоя, великоименитая исповеднице Феодоро, пострадавшая от рук беззаконных, и победившая полки бесовские терпением мук, изгнанием в заточение и кончиною мученическою от глада, тем же славим Христа Бога, твоими молитвами подающаго нам велию милость.
Песнь 7. Ирмос.
Иже в пещь огненную ввержени преподобнии отроцы, и огнь на хлад преложиша воспеванием, сице пояху: благословен еси Господи Боже отец наших.
Запев. Ужасно бе зрети, егда преподобную Феодору подъяша на дыбу, и ломахуся составы ея, растягахуся жилы и кожа, она же взываше: благословен Бог отец наших.
Запев. Сослаша тя мучители во град Боровск, идеже вринуша в подземную темницу, и томяху мразом, гладом и жаждею, ты же глаголаше: благословен Бог наш, изволивыи тако.
Слава. Лютыя муки претерпевшая великая в женах Феодоро, исцеляеши болезни естества женскаго своими молитвами, тем тя благодарно воспеваем.
И ныне. От сосцу питавыися Матере Своея, яко младенец, Исусе Христе, сохрани от болезней младенцев, и спаси их молитвами рождьшия Тя. Катавасия.
Песнь 8. Ирмос.
Неопальна огнем в Синаи причащьшися купина, Бога показа, медленноязычну и гугниву Моисеови, дети рвением Божиим вметаемыя во огнь певцы показа, вся дела Господня Господа пойте, и превозносите Его во веки.
Запев. Юдуже ни свет, ни глас, ни воздух не проницаше, во оной смрадней темнице, тлею исполненней, гладом томима, мученически скончалася еси.
Запев. Боровску граду похвала еси, и покров и заступление, исповеднице Феодоро, в нем бо предала еси душу свою в руце Божии, и на небесех молишися о всем мире.
Слава. О тебе хвалится земля русская, тобою украшается Церковь Божия, в ней бо ты процвете, яко цвет благоуханныи, и просия, яко камень многоценныи.
И ныне. Возгрей в сердцах наших любовь нелицемерную ко всем человеком, и истреби ненависть от людей, да сподобимся вси Царства Небеснаго Твоим ходатайством, Богомати. Катавасия.
Песнь 9. Ирмос.
Выше естества Матерь, и по естеству Деву, едину в женах благословенную, песньми вернии Богородицу величаем.
Запев с поклоном. В Церкви воинствующей мученически пострадала еси, в Церкви торжествующей ныне водворяешися со ангельскими чинми, яко исповедница достохвальная.
Запев. Избави преподобномученице державу нашу от междоусобныя брани и от всякаго зла, развевая мрак безбожия и беззакония, и водворяя мир и тишину молитвами своими.
Слава. Юже получила еси радость неизглаголанную на небесех, тоя сподоби и мене многогрешнаго, сию убогую песнь тебе воспевшаго, Феодоро преименитая.
И ныне. Седяи на херувимех престол Себе Твое чрево содела Богородице, тем же явилася еси вышши херувим, и всех сил небесных. Катавасия.