Канон преподобному Петру царевичу, Ростовскому чудотворцу. Глас 4.
Тропарь. Глас 8.
О тебе отче Петре, известен бысть спасения образ. Восприим бо крест, последовал еси Христу. Творяше же и учаше, еже презрети плоть, преходит бо. Прилежати же о души, вещи безсмертней. Тем же и со ангелы радуется преподобне дух твой.
Песнь 1. Ирмос.
Отверзу уста моя, и наполнятся Духа. И слово отрыгну Царице Матери. И явлюся светло торжествуя. И воспою радуяся Тоя чюдеса.
Запев с поклоном: Преподобне отче Петре, моли Бога о нас.
Весь ты Творцу возложи себе, и все душевное желание излияв Тому. Сего ради духовную благодать восприял еси, светом Благодати озаряяся блаженне Петре преславне. Верою память твою торжествующая просвети, и от тмы греховныя молитвами си избави.
Запев. Из млада Христа возлюбил еси всеблаженне Петре, всечестне чюдотворче. И Пречистую Его Богоматерь. Тем просвещаеши чюдесы, яко молния всю вселенную.
Слава. Ныне преблаженне Петре, душа твоя почивает на Небесех со Христом, в Царствии Небеснем. Зде же честныя твоя мощи, дают исцеления приходящим с верою.
И ныне. Радуися Пресвятая Богородице, ангельское удивление. Пророческая проповедания. Апостолом немолчная уста. Молися Сыну Своему и Богу нашему, да сохранит место сие, и святую обитель сию, блаженнаго молением.
Катавасия: Избави от бед рабы своя, преподобне отче Петре, яко вси по Бозе к тебе прибегаем, ты бо молиши за нас Христа Бога нашего.
Песнь 3. Ирмос.
Твои певцы Богородице, живыи Нетления Источниче. Лик Себе совокупльши духовен, утверди. И в Божественей Ти славе, венцем славы сподоби.
Запев. Яко светозарное Солнце явися ты, Триипостаснаго Божества, Петре блаженне. Омраченных душа просвещаеши, молитвами си.
Запев. Из млада возраста восприял еси во орде Христово повеление, и веру и утвержение. Пришел еси в славныи град Ростов и сияеши яко Солнце, Триипостаснаго Божества преблаженне.
Слава. Креста Господня силою укрепляем блаженне Петре. Пощением бо верныя ти молитвы, стремления бесовская на земли победи, Божиею силою.
И ныне. Радуися Владычице Дево, церквам еси красота. Царем похвала, князем держава. Непрестанно молися Сыну Своему и Богу, сохранити град сей и люди, молитвами всеблаженнаго Петра. Катавасия.
Седален. Глас 8. Твердостию разума украшаяся, и плотьския тяготы отверг гордыню попрал еси. Бысть обителище Духу Пресвятому. Неуклонным разумом простираяся ко Христу Богу. Многокозненаго же стрелы притупил еси, и луки сокрушил еси, всеблаженне Петре. Моли Христа Бога, грехов оставление даровати, чтущим любовию святую память твою.
Слава, и ныне. Яко Деву едину в женах Тя, безсемене рождьшую Бога плотию, вси блажим родове человечестии. Огнь бо вселися в Тя Божества, яко Младенца доиши Зиждителя и Господа. Тем же ангельский и человеский род, достойно славим Пресвятое Рожество Твое. И согласно вопием Ти, моли Христа Бога, согрешением оставление даровати, воспевающим достойно славу Твою.
Песнь 4. Ирмос.
Седяи во славе на Престоле Божественем, на облаце легце прииде Исус Пребожественыи, от Пречистыя Девы. Спасе же вопиющая. Слава Христе Силе Твоей.
Запев. Иже на земли степень имел еси всеблаженне Петре. Своими молитвами мирное Царство восприял еси. И ныне на Небесех со Христом царствуеши.
Запев. Исцеления содевает блаженныи божественыи гроб твой Петре. Отгоняеши недуги, и духи лукавыя от человек. И укрепляеши мудрования их, восхвалити труды твоя всечестне.
Слава. Со врагом древле боришися воздержанием, ныне крепостию поставил еси победу, блаженне Петре преславне чюдотворче. Мученически претерпел еси, и низложи бесовская ополчения.
И ныне. Христа нам родила еси Пречистая Владычице, Богорадованная Дево. Спаси град и люди к Тебе уповающия, Богородице Пренепорочная. Катавасия.
Песнь 5. Ирмос.
Удивишася всяческая о Божественей славе Твоей. Ты бо Неискусобрачная Дево, прият во утробе, надо всеми Бога. И родила еси Безлетнаго Сына, всем воспевающим Тя, мир подавающа.
Запев. Законно молитвами и постом, всегда претерпел еси блаженне Петре. Безсмертно одеял еси плотьскии разум, смирив крепостию Божественаго Духа.
Запев. От юности вжадал еси образа мнишескаго. И от Христа восприял еси венец златыи, и ризу нетленну. Ныне всеблаженне Петре, со ангелы радуется дух твой.
Слава. Гроб честнаго телесе показал еси верным людем, душам освещение, и телом исцеление. Страстем избавление. От твоих мощей почерпаем.
И ныне. Всесветлым украшена светом, Богорадованная Мати. Ты бо породи всех честнейши Христа Бога нашего. Его же моли, да избавит ны от всех напастей. Катавасия.
Песнь 6. Ирмос.
Божественное се и всечестное, совершающе празднество, богомудрении Божия Матере. Приидете руками восплещем, от Нея рождьшагося верою славяще.
Запев. Удивися чюдесем твоим весь мир, преблаженне Петре. Восприял еси от Христа венца Небеснаго. Его же сподоби и нас, причаститися твоими молитвами всечестне.
Запев. Лук сильных сокрушил еси. Брань всяку неприязнену потребил еси, всеблаженне Петре. Вещание пустил еси. Во всю вселенную.
Слава. Всеблаженне Петре угодниче Христов, на Небесех предстоя Христу молишися. Зде же честныя мощи болящих исцеляют, и от грех изимают.
И ныне. Изсушила еси сады безбожия, Пренепорочная Дево Своим прозябением, прозябшую во мне злобу, искорени Богоневесто. Катавасия.
Кондак. Глас 4. Явися велие Солнце Христове Церкви, просвещая учения светлостьми всечестне. Яко черпалом златым от Кладезя Неископаннаго, чюдес почерпл еси, от Источника Неистощимаго. На память успения своего пришел еси, всеблаженне Петре. Ныне всем подаваеши грехом прощение. Слава преподобным.
Икос. Возлюбив преподобне Христовы Божественыя заповеди, и возненавидев мира сего наслаждение, прииде усердно к Тому. И бысть светилник просвещая конца, блистанием духовным. Тем припадая молю тя. Просвети ми очи душевнии, воспети твоя подвиги. Пощение и бдение и слезы, болезни и измождение тела, блаженныя ради будущия жизни. Ея же ныне наслаждаешися, Петре преблаженне, всем дая грехов прощение. Слава преподобным.
Песнь 7. Ирмос.
Непослужиша твари богомудрении, паче Зиждителя. Но огненое прещение мужески поправше радовахуся поюще. Препетыи иже отцем Господь и Бог благословен еси.
Запев. Блаженно житие твое, и кончина всечестне безсмертна, блаженне Петре. Сего ради тя Христос свыше украси венцем. И просвещаеши весь мир чюдесы преподобне.
Запев. Явился еси ныне граду Ростову Петре богоблаженне, столп непоколебимыи, и стена нерушимая, и великое прибежище. От тебе приемлюще исцелением благодать неоскудную поем, Боже благословен еси.
Слава. Хотя от мирских сладостей отлучитися, странем человеком явлься. Плоть нося, будущая и нетленная стяжа святыи. Совершив течение богоносных отец, явлься обещник Небесному Царствию.
И ныне. Без семене заченши Творца всех Христа Бога, неизреченно родила еси. Его же моли, дерзновение имущи к Нему. Да ны спасет вопиющих. Боже благословен еси. Катавасия.
Песнь 8. Ирмос.
Отроки благочестивыя в пещи, Рожество Богородиче спасло есть. Тогда убо образуемо. Ныне же действуемо, вселенную всю воздвиже пети. Господа воспевайте дела, и превозносите Его во веки.
Запев. Ликуют на Небесех чинове ангельстии, всеблаженне Петре. И верных соборы на земли твою память похваляюще поют. Господа воспевайте дела, и превозносите Его во веки.
Запев. Помолися Христу Богу преблаженне Петре, о приходящих ти верою, и хотящих от тебе почерпсти исцеления, неоскудну благодать, поюще. Господа воспевайте дела, и превозносите Его во веки.
Слава. Чюдесы святе твоими душевныя болезни исцели, твоими молитвами Петре преславне. Просящим отпуста безчисленых зол. Со безплотными силами Христови предстоя. С ними же поеши непрестанно. Господа пойте дела, и превозносите Его во веки.
И ныне. Из Пречистаго Ти чрева Богомати, Небеснаго дождя капля нам укану. На отмовение сквернам, на здравие телеси, на прогнание лукаваго. Тем же Тя блажим Чистую во веки. Катавасия.
Песнь 9. Ирмос.
Всяк земен да взыгрется Духом просвещаем. Да ликоствует же безплотных умов естество, почитая святое торжество Божия Матере. И да поет, радуися Преблаженная Богородице Чистая Приснодево.
Запев с поклоном. Удивися во всем мире, Петре твоя память чюдесы. Сияеши яко Солнце, злыя болезни исцеляя всем. Тем же моя страсти разжени молютися, прося мне отпуста грехов, чюдотворче Христов.
Запев. Да входят ныне во святыи храм сей, к честному гробу твоему блаженне Петре, цари и князи, богатии и убозии. Припадающе просят от тебе почерпсти исцеления, здравия и спасения. Тем тя вси величаем.
Слава. Ныне помолися Господу всечюдне Петре блаженне. О иже твоя честныя мощи почитающих, всегда приходяще с верою. Слепым прозрение, хромым хождение, больным всем здравие даруй, да тя вси величаем.
И ныне. Архангели, ангели, пророцы и апостоли, и весь лик преподобных отец. И священных мученик. С преблаженным Петром, ко Христу прилежно с Пречистою Его Материю, за весь мир молитеся. Да избавит ны от всех бед. Его же вси величаем. Катавасия.