Канон преподобному отцу нашему Евфросину, Псковскому чудотворцу, творение Василиево. Глас 1.
Тропарь. Глас 4.
Житейскую печаль, и всяк мятежь мира сего любве ради Христовы, со дерзновением отвергл еси блаженне. И повеленная распятым Господем Исусом Христом, вся исправил еси. И Того ярем взем, во всем воли Его повинулся еси. И благочестив делатель животным заповедем Христовым, благотрудно прилежал еси. И сего ради Бог прослави тя, и по преставлении чюдеса показа от честнаго гроба твоего. Тем же и неоскудно угобзися обитель твоя. И нищим бысть богатное пристанище и покров. Отче наш преподобне Евфросине, моли Христа Бога, да спасет душя наша.
Песнь 1. Ирмос.
Песнь победную воспоем вси Богу сотворшему дивная чюдеса, мышцею высокою, и спасшу Израиля, яко прославися.
Запев с поклоном: Преподобне отче Евфросине, моли Бога о нас.
Ново тебе пение приношю молебно, во отверзение уст моих Евфросине богомудре, подаждь ми твоими молитвами благодать. Яко да воспою тя.
Запев. Страстей омрачением порабощена, светлыми молитвами твоими, преподобне Евфросине ныне свободи. Да яко Христова раба тя божествеными воспою песньми.
Запев. Авраамову страннолюбному образу, ты уподобився преподобне, всем обители своея врата отверзл еси, и всем всяк был еси. И утешая сущыя в печалех. И обитель твоя отче Евфросине, якоже некое имя честно ношаашеся, и во иных обителех блаженне.
Слава. Христови прилепляяся от юности отче Евфросине, чистым умом, и целомудрием телесным, душю просветил еси. Яко бесплотен на земли пожив. Ныне в вышних Богови предстоя, нас поминай.
И ныне. Явися вышьши ангел Бога воплощьши, рождьшагося и погребена, и мертвым нетление Дево Чистая подавшаго. Его же моли, спастися верно славящим Тя.
Катавасия: Избави от бед рабы своя, преподобне отче Евфросине, яко вси по Бозе к тебе прибегаем, ты бо молиши о нас Христа, Бога нашего.
Песнь 3. Ирмос.
Да утвердится сердце мое, в воли Твоей Христе Боже, иже над водами Небо утвержеи второе. И основавыи на водах землю Всемогаи.
Запев. Божественым светолитием богомудре просвещаемь, отче преблаженне Евфросине, светлое и светоносное честное успение твое. Любовию чтущих преподобне, твоими молитвами просвети.
Запев. Ума твоего око преподобне отче, от страстей мглы очистив, Пресвятому Духу приятно селение явися, чистым блистанием соделал еси, богоблаженне Евфросине.
Запев. Твердостию разума укрепляемь, всеблаженне Евфросине, различная мечтания врагов обличил еси мудре. И гордыню тех возвышеную низложил еси преподобне.
Слава. Рачитель сыи Милостиваго Христа своего отче Евфросине. Некоему иноку в раскаяние впадшу, о даннем сребре на соружение обители твоея, ты же повелел еси отдати. И взем отъиде во ину обитель и ослепе. И приводимь с верою. Ты же отче милостивно показуя, Божиею благодатию даруеши ему прозрение, якоже при купели.
И ныне. Иже прежде век рождеися от Отца, и напоследок не изреченно из утробы Ти пройде. И обожи наше естество Мати Дево, иже преподобных лики яве изводяи. Катавасия.
Седален. Глас 8. Подобен. Премудрости.
От юности блаженне вся оставль, красная же и лепотная. Усердно последовал еси Христу звавшему тя, со сверьстником своим. Постом отцы преподобнии тело свое изнурили есте, в молитвах безпрестани бдяще. Темже тя отче Всеведыи Господь, добре устраяет пастыря Своим овцам словесным. Евфросине и Серапионе отцы богоноснии, молите Христа Бога, грехом оставление подати, чтущим любовию святую память вашю.
Слава, и ныне. Богородичен. Яко Деву едину в женах, Тя без семене рождьшую Бога плотию, вси блажим роди человечестии. Огнь бо вселися в Тя божественыи, и яко младенца доиши Зиждителя и Господа. Тем же ангельскии собор и человеческии род, достойно славим Пресвятое Рожество Твое. И согласно вопием Ти, моли Христа Бога, согрешением оставление даровати, воспевающим достойно славу Твою.
Песнь 4. Ирмос.
Духом предзря пророк Аввакум Словеси воплощение, проповедаше глаголя. Внегда приближатся лета, познан будеши. Внегда приидет время, явишися. Слава Силе Твоей Господи.
Запев. Закон Божии сохраняя невредно преподобне, чистоту и смирение ты от младеньства имел еси. И житие нескверно, и нрав милостивен, отче досточюдне Евфросине.
Запев. Возвысил еси к Богу сердеченое желание. И смирил еси пагубныя страсти, и лукавьствия бесом низложил еси преподобне Евфросине. Иночествующим недвижимое основание.
Запев. Якоже другии Илия отче Евфросине явися, распалаемь ревностию. Он бо царя обличи беззаконие творяща, и безстудныя пророки закла. Ты же молитвою своею, о неведомей тайне Божии, аллилуии, Столпа философа, мнением превозносящагося посрамил еси. И того Божию суду предал еси.
Слава. В нищете пожив преподобне, добродетелми обогатился еси. И жития светлостию быв исполнен, преставися к Вышнему Граду отче Евфросине, и молишися избавитися от бед стаду твоему.
И ныне. Святых Святаго паче смысла и естества породила еси Богородице. Освящение и избавление, и оставление грехов верным, ходатайством Ти подающа, иже Его славящым Воскресение. Катавасия.
Песнь 5. Ирмос.
Твой мир даждь нам Сыне Божии. Иного бо разве Тебе Бога не знаем, Имя Твое именуем, яко Бог живым и мертвым еси.
Запев. Отец сирым был еси, и питатель вдовицам. Скорбящим утешение, обидимым помощник. Пастырь и наставник, стаду своему преподобне Евфросине. И ныне прилежно молися Владыце о нас.
Запев. Инок истинен был еси, пространнаго пути удаляяся, тесныи предпочитая, достигл еси широты райския, и древу жизненому причащаешися. Но и нас верою чтущих тя поминай.
Запев. Сердце твое скрижаль чисту нашед Святыи Дух, отче Евфросине обрете, дарова тебе свершеное безстрастие, веру тверду, и любовь нелицемерну.
Слава. Место еже сподобися прияти честныя мощи твоя, преподобне Евфросине освятися. И по многим странам прославляемо есть, яко в себе мощи твоя имущо.
И ныне. Священия сень явльшися Марие, оскверненую сластьми окаянную ми душу освяти, и Божественыя славы причастника мя сотвори. Катавасия.
Песнь 6. Ирмос.
Пророку Ионе подобяся вопию Ти, живот мой Блаже свободи из тли. И спаси мя, Спасыи мира милосердием Си.
Запев. Страхом Христовым утвердися преподобне. Тело и ум и душу очистив от всякия скверны. Ими же Зарю прият богомудре Трисолнечную, Евфросине отче блаженне.
Запев. Весь распялся еси мирови отче Евфросине, Крест Христов на рамо взем блаженне. И Того страстем подобяся, причастник бысть Воскресению и славе лучшей, в ней же нас поминай.
Запев. Иоанна Златаустаго ревности последуя, преподобне отче Евфросине. Он бо винограда ради от царицы заточен бысть. Ты же от Столпа философа многа претерпе уничижения. И досаждения от неразумных человек, о пречистей аллилуии. И того Божиею благодатию посрамил еси.
Слава. Храм тя вси вернии Святому Духу свемы. Храм бо благолепен воздвигл еси Богови, в том вселенских учителей именовал еси, и инок множества совокупил еси. И ныне молитвами твоими, всяк недуг отгоняется.
И ныне. Видевши Его же родила еси Бога, от мертвых воставша, радости исполнена явися Дево Мати Марие. Того убо моли, всяку печаль Чистая нашего сердца до конца потребити. Катавасия.
Кондак, глас 8.
Божиим Светолитием просвещен отче, постническое стяжав жительство преподобне. Иноком предобрыи наставниче, и постником благое украшение. Сего ради Господь труды твоя видев, даром чюдес обогати тя, источаеши бо исцеления. Мы же радущеся вопием ти, радуися отче Евфросине, иноком удобрение.
Икос. Евангельскии глас услышав отче, вся оставил еси плотьская мудрования. Богатьство же и славу, яко прах ни во что же вменив. И на страсти яко безплотен подвизася. И безплотным ликостоянием чистоте уподобися, разума дарование от Господа приял еси. Тем же и аз недостойныи и грешныи, надеюся прияти молитвами твоими преподобне, милость в День Судныи, и о содеянных мною зол прощение получити. Но ты подаждь ми слово святе, воспети житие твое преблаженне. Радуися Евфросине преподобне и богоносе, небесныи человече, земныи ангеле. Радуися яко кроме мира суетнаго пустыню сотворил еси, и обитель в ней составив, и храм пречестен трем святителем воздвигл еси, и в нем тобою Бог славится. Радуися яко из млада Богу послужил еси. И множество инок собрав, от них же слышиши сицевая тебе глаголющих. Радуися спасению нашему ходатай, иже добре пасыи стадо свое от навет вражиих. Радуися посрамивыи Столпа философа, молитвами своими, о божественней песни аллилуии. И того Божию суду предал еси. Радуися посрамивыи бесом полки. Радуися иночествующим пресветлыи светилниче, и столп терпения. Радуися отечеству своему граду Пскову похвала и утвержение. Радуися всем скорбящим милость и благоутробие отверзл еси, и нищим заступниче и кормителю, и унывающим утешение. Радуися приходящим с верою к раце твоей от навет вражиих избавителю. И помыслы злыя от них отгоняеши, и скорбящым сладкое утешение. Радуися радости божественыя подателю, и чюдес источниче к тебе притекающым. Радуися предстателю наш отче Евфросине, иночествующым удобрение.
Песнь 7. Ирмос.
Иже в пещи отроки Твоя спасе, неприкоснуся ни вреди их огнь. Тогда тии трие, яко едиными усты пояху, и благословяху глаголюще, благословен Бог отец наших.
Запев. Сматряя будущую жизнь блаженне Евфросине, мирови умертвися воистину. Яко Солнце восияв, страх Божии восприим в сердцы своем. Вселенную всю возвеселил еси ученьми, вопия, благословен Бог отец наших.
Запев. Зряше мучения тамошняя мысленыма очима, и сердцем болезнуя выну, чисто житие пожив богоблаженне, к Нестареющейся Пищи преставися. В Ней же чтущих тя поминай отче Евфросине, вопия, благословен Бог отец наших.
Запев. Украсив добродетельми свое житие, и свято скончав свою жизнь, уснул еси преподобне сном мирным. Тем же спасай стадо свое всегда, твою память празднующыя, вопиющих, благословен Бог отец наших.
Слава. По божественем ти преставлении отче Евфросине, списателю пишущу твое житие и чюдеса, еже ты сотвори о Христе, и в недоумении ему бывшу, о Божественей аллилуии. Вы же отцы богоноснии, с Пречистою Богородицею, и со архангелом в видении явистеся. И повелевающе без сумнения писати Христову тайну, вопиюще, благословен Бог отец наших.
И ныне. Премудрость составную, и Слово Присносущное, Врача душам и телом порождьшая, язвы и гноения души моея уврачуй лютыя, и летныя сердца моего исцели болезни Дево. Катавасия.
Песнь 8. Ирмос.
Его же трепещут ангели, и вся воинства, яко Творца и Господа, пойте священнии, прославите отроцы, благословите людие, и превозносите Его вовеки.
Запев. Подвизався законно на земли, ныне радуешися преподобне Евфросине со святыми. Небесныи обрете покой. Спричастник бысть веселию тех и радости, взывая, благословите людие Господа, и превозносите Его во веки.
Запев. Слезами своими отче Евфросине, лице свое умывая, житие прошел еси. И теми множество бесов потопил еси. Верных же мысли возвесели поющих, благословите людие Господа, и превозносите Его во веки.
Запев. Богохранимыи град Псков, иже тебе стяжавыи, радостию радуется преподобне Евфросине. Тебе бо яко стену имея тверду, и столп необорим. И Христа воспевает, иже тебе Сему даровавшаго, поя, благословите людие, и превозносите Его во веки.
Слава. Постом ум очищая, кроток и незлобив явлься. На земли кротких живеши, богомудре Евфросине. Со всеми преподобными и избранными поя Господа, благословите людие, и превозносите Его во веки.
И ныне. Пощади нас поющих Твое Господи иже от Девы неизреченное Рожество. Избави от страстных бед и скорбей рабы своя, молбами Пречистыя Ти Матере, яко Един Милосерд и Человеколюбец. Катавасия.
Песнь 9. Ирмос.
Живоносныи Источник присно текущь, Светоносное Светило благодати, Церковь душевную, Покров славныи, небесе и земли пространнейшю, Богородицу Чистую величаем.
Запев с поклоном. Яко утро, яко Солнце восия память твоя, тму отгоня душетленных страстей. Юже свершающе, благочестно восхваляем тя, радостными песньми.
Запев. Яко в раи отче воздержания процвел еси. И яко маслина псаломски явися, лица и сердца наша помазуя, маслом труд твоих, отче Евфросине, благочестно чтущих священную память твою.
Запев. Днесь нам восия честная память твоя преблаженне, просвещая душа и телеса, и страстей мглу отгоня преподобне. Подаждь молитв твоих Евфросине отче, и настави на стезю жизни. Тем же достойно чтуще тя величаем.
Запев. Рукою моею недостойною, приносимое тебе с трудом хваление, отче Евфросине не презри, но приими. И моли Творца своего Владыку и Господа, тамошняго избавити вечнаго мучения, тебе верою почитающа.
Слава. Певец иже тебе блаженне искрено воспевающих, и твою память честную преподобне Евфросине верою прославляющих, освяти и прослави. И от бед избавляй и напастей, и иже тамо вечнаго отче мучения. Да тебе всегда воспевают.
И ныне. Приими Пречистая Отроковице божественую песнь, воздающи благодать на Тя надеющимся. И мир испроси церквам присно подати, и царю нашему послати одоления и победы. Да всяк язык християньскии Тя величает. Катавасия.