Глас 6.
Тропарь, глас 8. От уст твоих яко же светолучная заря возсия, Богом данная ти благодать, вселенную просвети. Несребролюбно мирови сокровище положи, но высоту нам смиреномудрия показав, и своими словесы наказуя. Отче Иоанне Златоусте, моли Слова Христа Бога, спастися душам нашим.
Песнь 1. Ирмос.
Сеченом пресечено бысть море Чермное, волнами же питаемая изсше глубина. Таже купно безоружным бывши прошествие, и всеоружным гроб. Песнь же Богу красна воспевашеся, славно бо прославися Христос Бог наш.
Запев с поклоном: Святителю Христов, Иоанне Златоусте, моли Бога о нас.
Невечерния преподобне Зари исполняемь, и Престолу Божественому предстоя присно, со всеми избранными. Нам верно чтущим тя, и божественое творящим возвращение, даровати молимся, мир и велию милость.
Запев. Земля ликует, и небо с человеки радуется, с нами боголепно, в твой мудре святыи праздник. Вонь же священное твое тело, возвратися к твоему стаду, славне Златоусте Духу Святому честно жилище.
Запев. Ума твоего божественая блаженне блистания, многокозненыи не терпя, искушение воздвизает на тя, якоже древле Иову. Но убо омрачися множае. Се бо по заточении, светлейши в стадо свое вниде похваляемь.
Слава. Златыми словесы своими, помышления Златослове позлатил еси верным. И заточен быв от стада завистно, Божиим же мановением паки к сему по погребении возвратился еси, светло восхваляем преблаженне Златоусте.
И ныне. Святейши явися Херувим, Пресвятаго рождьши Бога. Его же моли яко всех Творца Чистая, освятити вся, иже святыми Тя гласы славящыя. Отцем Похвало, человеком Помоще.
Катавасия: Избави от бед рабы своя, святителю Христов, Иоанне Златоусте, яко вси по Бозе к тебе прибегаем, ты бо молиши о нас Христа Бога нашего.
Песнь 3. Ирмос.
Господь Сыи всему и Зиждитель и Бог, за созданных Безстрастныи обнищав, Себе причта. И Пасха в нюже хотя умрети, Сам Себе преди пожре. Ядите вопия Тело Мое, и верою утвердитеся.
Запев. Был еси жилище Божие чисто, и учением испытал еси глубину, блаженне Златоусте, зломыслящим потопляя умы, верным же напаяя сердца. Тем же ти честное днесь празднуем возвращение.
Запев. Златыи орган, возглашающии нам неизреченная, был еси ты блаженне Златоусте. Сего ради поем тя верно, в возвращение твоих мощей, ангеле Божии земныи, и Небесныи человече.
Слава. Глаголы Жизни отрыгнул еси верным, и неправедно заведен бысть всеблаженне. В далняя заточен бысть изгнания, и в скорби многи. Но вседетельным мановением, паки по кончине преподобне, своему стаду подаваешися.
И ныне. Высоту Неизреченнаго, и Глубину Твоего Рожества, кто сказати имать Отроковице. Бога бо родила еси паче слова и ума всего, избавльшаго от тля человеки. Тем же по долгу вси вернии, Тя ублажаем. Катавасия.
Седален, глас 8. Подобен. Премудрости.
Иже свыше мудрость уведевыи, благодатию словес обогащься, всем просиял еси яко злато в горниле. И Святую Троицу Единицу проповедал еси. Сребролюбную лесть устрелив словесы своими. Тем же и ревностию царицу изобличил еси. Ариево посрамил еси иноплеменное учение, Иоанне Златоусте. Моли Христа Бога, грехов оставление даровати, празднующым любовию всечестную память твою.
Слава и ныне. Богородичен. От Троицы Единаго, паче естества заченши Дево, и чюдно Сего породила еси, паче естества и слова. И обьщно Божественаго Естества, устроила еси человеческое естество, еже иногда заточеное. Тем же сшедшеся, иже Рожеством Ти вси спасшиися Пренепорочная. Твоим словесем последующе, должно Тя ублажаем. Моляще Христа Бога, согрешением оставление даровати, верою Тя славящым Матерь Его.
Песнь 4. Ирмос.
Провидя пророк Тайны Твоея неизреченное Христе, провозглашаше, положи тверду любовь крепости Отец Щедрыи. Единороднаго бо Тя Сына Благии Очистника в мир послал есть.
Запев. Уста богодохновенна, и язык стяжав отче преподобне, писательнаго сказания разширил еси яве. И умерл еси в неправедне заточении, днесь нам блаженное подастся яко дар тело твое.
Запев. Сказатель Неизглаголанным, да возвеличится ныне Златоуст. Сей бо по временней смерти, добре Божиим мановениемь, паки приходит к царьскому граду. Священно песньми божествеными почтем.
Запев. Ум облистаем зарею Пресвятаго Духа имея, просвещаеши подсолнечную божествеными учении. И тму отгоняеши нечестия, отче священне Златоусте, святым ангелом собеседниче.
Слава. Блажен явился еси правды ради преподобне, от стада отгнан завистию лукавою. И ныне возвращься, и от всех песньми священными почитаемь мудре, святителю Господень Златоусте.
И ныне. Из Тебе Дево, Спасение мирови прииде и явися, из Тебе Избавление восия Христос. Тем же подолгу песнословим, всем священным похвало Чистая, и верным священное Очистилище. Катавасия.
Песнь 5. Ирмос.
Соузом любве связаеми апостоли, Владущему всеми себе Христу предавше, красны ноги омыти, благовествующе всем мир.
Запев. Светилник явися всем сияя, иже в нощи жития сущим, облистая луча Божественых словес, отче Златоусте, и озаряя помышления наша. Тем же и подолгу тя песнословим.
Запев. Богатьство словесное раздал еси, обогатив умы преподобне алчющым Златоглаголиве. И неправедно заточен, судом праведным паки возвратися к своему стаду, радующуся твоим величием.
Слава. Якоже лоза многоплодна, умиления вино принесл еси. И царицу обличая, виноград вдовицы восхитивьшую, заточен бысть отче Златоусте. Тем же возвращение твое почитаем.
И ныне. Воиньства безплотных, Его же не могут видети Пречистая. На руку якоже Младенца Воплощьшася носила еси, за милосердие Плотию обнищавша. Яко да обнищавшаго мира обогатит. Катавасия.
Песнь 6. Ирмос.
Бездна последняя грехов обыде мя, и волнения уже не терпя, яко Иона ко Владыце вопию Ти, из истления мя возведи.
Запев. Источи язык твой преблаженне Златоусте, струи всезлатыя Церкве. Алчющыя сердца обогащает, священно славящих тя.
Запев. Честна преблаженне смерть твоя, пред Богом явися нашим. Ея же прославляется, паки пришествием твоим отче, ко престолу твоему Златоусте.
Слава. Якоже богатьство гроб, твое честное держит тело, яко обогащая чюдодействии, притекающыя верою преблаженне, святителю Златоусте.
И ныне. Вышняго рождьши Пресвятая Богоневесто, долу лежащее естество наше, к Небеси возводиши, тем же Тя подолгу славим. Катавасия.
Кондак, глас 6. Подобен. Еже о нас.
С Небес прием Божественую благодать, своими устнами вся учиши покланятися в Троице Единому Богу, Иоанне Златоусте всеблаженне преподобне. Достойно хвалим тя, еси бо наставник, яко Божественая являя.
Икос. Всех Творцу преклоняю колена, Превечному Слову руце воздеваю, слова прося благодать. Да воспою преподобнаго, его же Сам прослави. Рече бо пророком, Живыи во веки, славящыя Мя верою прославлю. Иже убо в древних Самуйла вознесыи, прослави и ныне святителя. Талант бо его же прият, добре куплю сотворь, Цареви принесе. Тем же превознесе Его пребогатыи. Сего благодать прошю недостойныи тепле, слово прияти ми. Да возмогу благочестно воспети и аз. Концем бо той есть наставник, яко Божественая являя.
Песнь 7. Ирмос.
Отроцы в Вавилоне, пещи пламенныя не убояшася, но посреди огня ввержени, прохлаждаеми пояху, благословен еси Господи Боже Отец наших.
Запев. Чюдодействии сияя, богословием украшен, златозареньми мудре. Заточением лютым предастся. От них же возвратився, от всех прославился еси.
Запев. Посекаеши корения злобе, секирою божественых учении твоих. И насаждаеши душам божественыи разум, святителю Златоусте. Тем же твоего возвращения мощей прославляем.
Слава. Преподобно возвращься, настоящая умирил еси. И положен бысть, в раце премудрых апостол Златоусте. Их же ради обогатился еси, областию прехвалне.
И ныне. Пресущныя Троицы Единого, родила еси Пречистая Исуса Христа. Его же моли, премногая моя согрешения, за милосердие неизреченное, простити Пренепорочная. Катавасия.
Песнь 8. Ирмос.
По законе отчи преблаженнии, в Вавилоне юнии, беду приемлюще, царюющаго небрегоша повеления безумнаго. И совокуплени в нем же не изваришася огни, Держащему достойно возсылаху песнь, Господа воспевайте дела, и превозносите Его во веки.
Запев. Решити же и вязати преподобне имея власть, вся разреши прегрешения, иже божественое твое возвращение светло празднующыя. И Царствия сподобитися Небеснаго умоли, поющыя во умилении сердца, Господа пойте и превозносите Его во веки.
Запев. В заточении претерпел еси, отче богомудре болезни, в нем же прием блаженную Златоусте, и славную кончину. Хотением Божественым, паки возвращаешися к своему престолу, почитаемь от поющих, Господа воспевайте дела, и превозносите Его во веки.
Запев. Глаголом стрелы терпети преподобне твоих не могии, змий льстивыи. Испрашает искусити тя, яко же Иова добляго. Но побежден бысть твоим, иже Христа ради терпением. Велик явлься смех тебе вопиющу, Господа пойте дела и превозносите Его во веки.
Троичен. Безначальне Отче, и Собезначальне Сыне, и Божественыи Душе, Троице Нераздельная, Едино Естество, и Едина Власть, Тя поющыя исполни всяческих благ, и мучения избави непрестанно поющих, Господа воспевайте дела, и превозносите Его во веки.
И ныне. Разумети не может ум человеческии, еже паче ума и слова Отроковице Таиньства, Неизреченнаго Рожества. Бог бо Плотоносец из Тебе явися, спасая падшая в тление. И на первое достояние возводя поющыя, Господа пойте дела, и превозносите Его во веки. Катавасия.
Песнь 9. Ирмос.
Недоумеет всяк язык хвалити Тя достойно, низумеет же ум премирныи, пети Тя Богородице. Обаче Блага сущи, веру приими, ибо любовь веси божественую нашу. Ты бо християном еси Предстательница, Тя величаем.
Запев с поклоном. Священьства был еси правило боголюбиве. Одеян правдою, якоже божественою одеждею. И обогатив словесы своими Церковь, и писания обнажив ум духовно. Тем же твое возвращение отче торжествуем.
Запев. Красен якоже славии отче явися, Божественую весну покаяния сказуя, иже зиме греховней работающим. Заточен же быв, наветом льстиваго мудре. Паки притекаеши радуяся, к желающему тя стаду, блаженне Златоусте.
Запев. Играют всех днесь сердца, зряще чистаго тя преподобне жениха, твоя невеста церкви подаема благодатию. И Дателя Благим, поют непрестанными гласы. Тебе же восхваляют достойно, и ублажают.
Слава. Прииде светилник на свещнице положитися от Коман, приспе украшение Божия Церкве. Воспойте Господеви, пойте с веселием. И сретение творяще ему духовно, вси возопием, отче молитвами твоими спаси нас.
И ныне. Светлейшим Отроковице блистанием, рождьшагося ис Тебе неизреченно. Просвети Святая Богородице душю мою, всяцеми преступленьми Всечистая омраченную, и нехотящую сотворити добрая. Яко да непрестанно возвещаю, величия Твоя. Катавасия.