Канон митрополиту Петру, киевскому и всея Руси чудотворцу


Глас 4.

Песнь 1. Ирмос.

Отверзу уста моя, и наполнятся Духа. И слово отрыгну Царице Матери, и явлюся светло торжествуя. И воспою радуяся Тоя чудеса.

Запев с поклоном: Святителю Христов Петре, моли Бога о нас.

Повелением Владыки своего, святителю подобяся. Кроток и смирен был еси. И отсюду ублажаемых чину быти сподобился еси. Тем же днесь преславное твое пренесение почитаем.

Запев. Благочестиваго корени пресветлая отрасль, преславно прозябл еси архиерею Петре. В добродетели свершене пожив, и сосуд чист Духу Пресвятому отче был еси.

Слава. Сопрестолник и учитель всея земля Русския отче был еси. Тем ныне сошедшеся в пречистыи храм, на пренесение честных мощей твоих, святителю Петре пречюдне. Просим грехов прощения.

И ныне. Ты Едина Богоневесто, в Вышних Седящаго на руку плотию носила еси. Тебе избра от всех родов, Приятелище достойно Вседержитель.

Катавасия: Избави от бед рабы своя, Святителю Христов Петре, яко вси по Бозе к Тебе прибегаем, ты бо молиши о нас Христа Бога нашего

 

Песнь 3. Ирмос.

Твоя певцы Богородице, Живыи Нетления Источниче, лик Себе совокупльши духовен утверди, и в Божественней Ти Славе, венцем славы сподоби.

Запев. Благословением своим вся возмогл еси, о укрепляющем тя Христе. И олядевшия иногда людем бразды душевныя, премудрыми ти ученьми святителю очистил еси, и плодоносны сотворил еси.

Запев. Фарисейское кичение, от юности отче возненавидев. И мытареву смирению поревновав, кроток и смирен ко всем был еси. Сего ради вси тя яко вину, и образ благим почитаем.

Слава. Исполни радости и веселия, иже тебе присно святителю Петре любящих. И торжественая твоему честному пренесению, в песнех всегда поющих.

И ныне. Тя Заступление Неблазнено, Богомати стяжавше. И упование на Тя возлагающе спасаемся. И к Тебе пребегающе сохранаяемся. Катавасия.

Седален. Глас 4. Подобен. Вознесыися.

Молитвам и милостыням святителю Петре присно прилежа. Милостив к требующим отче независтно был еси. Тем же тя почитающих, от сопротивных зол избавляй. Да вси твое пренесение любовию почитаем. Слава и ныне. Богородичен.

Света рождьшия Пречистаго, от Отца Возсиявшаго преже век. Просвети Отроковице душу мою и ум, далече от мене отгонящи тму страстей. Да Тя ублажаю Присноблаженную, верным Упование.

 

Песнь 4. Ирмос.

Седяи во Славе на Престоле Божествене, на Облаце легце, прииде Исус Пребожественыи, от Пречистыя Девы, и спасе вопиющыя, слава Христе силе Твоей.

Запев. Митрополита тя Русская страна преславно, святителю Петре стяжавши. Тобою красуется, с князи и архиереи, и со всенародным множеством. Христа воспевающими. Иже сих тебе присно даровавшаго.

Слава. Всея Русии первопрестолник и архиерей, святителю Петре был еси. И всех своим учением просветил еси. Тем же память твою почитаем, и пренесение твое славяще вопием. Моли о всех поющих тя.

И ныне. Крепкое Тя оружие на враги предлогаем. И скорби всякия лютых обьстоянии, отреваем вред. И еретических возмущении, Мати Божия избегаем. Катавасия.

 

Песнь 5. Ирмос.

Удивишася всяческая, о Божественей славе Твоей. Ты бо Браконеискусимая Девице, прият во утробе надо всеми Сущаго Бога, и родила еси Безлетнаго Сына, всем воспевающим Тя мир подавающа.

Запев. Многогрешнаго нерадением изживша житие, не возгнушаися святителю. Но твоими молитвами очисти, иже твое пренесение песньми, присно трудолюбно славящаго.

Запев. Пахомия иже ангельскому видению сподобившася, сего правилу навык. Многажды без сна в молитве всю нощь святителю пребыл еси. Отнуду же сподобися горняго звания.

Слава. Смирен нрав, и высоко иже по Бозе житие стяжал еси святителю. Тем же и Всевидящее Око видев, доброе твое произволение, славна тя всем концем показа, Христос Спас душам нашим.

И ныне. Едину Тебе Всенепорочная от родов избрав Пречистую, вселися в Тя, и человеки обожи. Тем же яко Матерне дерзновение к Нему стяжавши, моли о иже Богородицу Тя именующих. Катавасия.

 

Песнь 6. Ирмос.

Божественное се и всечестное, совершающе празднество богомудрении Божия Матере, приидите руками восплещем, от Нея Рождьшагося верою славяще.

Запев. На смирение наше свыше милостивно назирай, иже верно тебе присно славящих. И молися всякия скорби избавити, тебе тепла предстателя к Богу, святителю, стяжавших.

Слава. Селение явился еси прекрасно Духу Святому. Бого дохновенными учении твоими, обилно питая словесная ти чада отнуду же и по преставлении спребываеши, любящим тя святителю.

И ныне. Поем Дево Богомати, паче естества Рожество Твое, и Твою Нетленную Чистоту. Ибо из Тебе дивно сочтася, Девьство и Рожество нетленно, Богоневесто. Катавасия.

Кондак. Глас 8. Яко врача преизрядна, источника чюдесем обильна. Днесь любовию сшедшеся духовная ти чада, в пренесении честных мощей твоих, архиерею Петре молим тя. Моли Христа Бога, даровати честным ти пренесением, благоверному царю нашему на враги победительная. Да твоими к Богу молитвами, находящих зол избавльшеся. Радостною душею и веселием сердца, благодарная ти воспоем глаголюще. Радуися отче Петре, архиереом и всея Русския земли удобрение.

Икос. От юности божественое свое житие, святителю добре исправль. Внимательным оком всегда к вышним зря, и тамошних непрестанно желая. Отнуду же великия ради добродетели, и премудрости языка, архиерейства саном украшен быв. Церковь и люди своими учении обогатил еси. Тем же и течение благочестно совершив, к Богу преславно духом прешел еси. Нам честныя мощи в память оставль, их же ныне честное и преславное пренесение празднующе молимся. Победительная на враги верному царю даровати. Яко да в тишине богоугодно поживше, тебе радостною душею благодарная воспоем глаголюще. Радуися отче Петре, архиереом и всея Русския земли удобрение.

 

Песнь 7. Ирмос.

Непослужиша твари богомудреннии паче Зиждителя. Но огненное прещение мужески поправше, радовахуся поюще, препетыи иже отцем Господь и Бог благословен еси.

Запев. Свыше от Бога дар тезоименитому граду, и всей земли дан бысть святителю Петре. Удивляя учением всех, Христови вопиющих. Благословен Бог отец наших.

Слава. Архиереом пресветлая доброта, отче Петре был еси. И Христове Церкви столп и утвержение. Тем же поминай честное твое пренесение славящих, преславне.

И ныне. Всем человеком Ходатаица, Едина явися Божественаго избавления. Избавителя всех рождьши Всенепорочная, Ему же поем. Препетыи отец наших Боже благословен еси. Катавасия.

 

Песнь 8. Ирмос.

Отроки благочестивыя в пещи, Рожество Богородичо спасло есть. Тогда убо образуемо, ныне же действуемо, вселенную всю воздвиже пети, Господа воспевайте дела, и превозносите Его во веки.

Запев. Божественое пребывание Святому Духу отче был еси. Тем же и в житии сем яко вне мира быв, к тамошним всегда рачение имыи. Тем же и всех научил еси Христови пети. Господа воспевайте дела, и превозносите Его во веки.

Слава. По Бозе заступника тя превелика святителю, духовная ти чада стяжавше. Всякия сопротивныя вещи, тобою да избавимся. И в тишине поживше, Христови поем. Господа воспевайте дела, и превозносите Его во веки.

И ныне. Глаголом пророческим последующе Дево, Богородицу Тя возвещаем. Роди бо Отроча всех древнеише, Еммануил нарицаемо, Ему же ныне зовем. Господа пойте дела, и превозносите Его во веки. Катавасия.

 

Песнь 9. Ирмос.

Всяк земен да взыграется Духом просвещаемь, да ликовствует же безплотных умов естество, почитая священное торжество Божия Матере. И да поют, радуися Преблаженная, Богородице Чистая Приснодево.

Запев с поклоном. Светел честныи праздник преставления твоего, архиерею Петре. Светлеише же пренесение твое, его же вси славяще тебе величаем.

Запев. Источник благочестия явился еси святителю, Церковная ти чада напояя. Тем же сошедшеся, благочестно священное твое пренесение любовию почитаем.

Слава. Словес твоих сладкое вещание, верных сердца к любви Божии привлече. Чюдес же светлостию, вся человеки удиви. Тем же тя вси благочестно величаем.

И ныне. В Плоть из Тебе Всенепорочная одеявся, и в мире яко человек поживе. И древле всех мучащаго, Божественою своею силою низложи. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?