Канон блаженному Николе Кочанову

Канон блаженному Николе Кочанову, Христа ради юродивому, Новгородскому чудотворцу. Глас 4.

 

Тропарь, глас 8.

Терпением своим и мужеством Христа ради, во уродство претворився блаженне Николае. Худость ризную имея, и тягость вара дневнаго понесл еси, и мразы зимныя терпя, и ныне в вышних Троице предстоя, и нам приходящим с верою, к раце мощей твоих исцеление подаваеши, твое успение честно славящим. И молиши Христа Бога, спастися душям нашим.

 

Песнь 1. Ирмос.

Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся Тоя чюдеса.

Запев с поклоном: Святый праведный Николае, моли Бога о нас.

Отверзи ми устне, подвигни ми язык, исправи смысл, вся Умудряяи Боже, да похвалю угодника Твоего Николу, урода бывшаго на земли Тебе ради.

Запев. Николае блаженне, из млада Христа возлюбил еси, и к Нему единодушно вожделев. Како тя по достоянию восхвалим, на диавола вооружившася, и сего козни победившаго, силою Христовою.

Слава. Молитвами Богу моляся, и диаволу досажая, от сего устрашився скораго его толчания, во дверех хижины твоея. Но неподвижим от него пребыл еси, силою Христовою укрепляемь.

И ныне. Красну Избранную, и Всечистую разумев Тя, Сын Божии Пренепорочная, Сын Твой бысть, сыны сотвори благодати чтущыя Тя.

Катавасия: Избави от бед рабы своя, святый праведный Николае, яко вси по Бозе к тебе прибегаем, ты бо молиши о нас Христа Бога нашего.

 

Песнь 3. Ирмос.

Твоя певцы Богородице, живыи Нетления Источниче, лик Себе совокупльши духовен утверди, и в Божественей Ти славе, венцем славы сподоби.

Запев. С ефиопом брався, и сего победил еси, от Христа дерзновение приим. Многу печаль бесом сотворил еси, святым же ангелом радость и веселие. С ними же ныне водворяешися, Николае блаженне.

Запев. Во сне Христа преже видел еси, на бесы тя укрепляюща, и венец тебе подающа, и с ефиопом братися поучающа. Ныне же не сновидением, но в Неизреченнем Свете славу Его зря. За ны молися Николае блаженне.

Слава. Бога послушал еси, повелевшаго тебе уроду быти, Царство Небесное обещавшаго тебе. И Тому последовал еси, неизреченная благая восприял еси, Николае досточюдне.

И ныне. Избавляющаго человеки от преслушания, и лютаго падения, иже всем благим Виновнаго, Чистая и Всенепорочная родила еси. Катавасия.

Седален, глас 5. Подобен. Собезначальное. Согласием Божественым озаряемь, в пути ведущыя к Жизни, Божественым сиянием ходив верно. Вражиих отбег прилог, и сын Света и Дне явился еси, Николае блаженне.

Слава, и ныне, богородичен. Недомыслено и непостижимо есть, Владычице Богоблагодатная, содеянное на Тебе, страшное Божие Таиньство. Ибо Необъемлемаго заченши родила еси, плотию обложена, от чистых кровей Твоих. Его же всегда Чистая, яко Сына Своего моли, спасти душа наша.

 

Песнь 4. Ирмос.

Седяи во славе на Престоле Божествене, на облаце легце, прииде Исус Пребожественыи, от Пречистыя Девы, и спасе вопиющия, слава Христе Силе Твоей.

Запев. Седяща на престоле Христа Царя видел еси. Горкия сея жизни образ разсмотрил еси, горчае пелыни сущи. Потом же нетленныя сладости вкус приял еси.

Запев. Тогда во сне и в восторзе Христа видел еси. Ныне же со бесплотными силами водворяяся, славу Божию видиши, Непостижиму и Неизглаголанну. Поминай нас Николае чтущих память твою.

Слава. От видения разумов уверившагося Николу похвалим вернии, на земли бывшаго урода Христа ради, на Небесех же ныне премудра духовною благодатию, со ангелы предстояща всех Богу.

И ныне. Седяи на Престоле превознесене херувимстем, яко Престол Тя имея. На руку Твоею почив, Марие Богоневесто, Препрославленыи Бог наш. Катавасия.

 

Песнь 5. Ирмос.

Удивишася всяческая, о Божественей славе Твоей, Ты бо Браконеискусимая Девице, прият во утробе надо всеми Бога, и родила еси Безлетнаго Сына, всем воспевающим Тя мир подавающа.

Запев. Удивление бысть всем видящим, Николино житие, на сметьищи легание, и посреде града хождение, и колесничное попрание. Но сия вся бысть ему пути правление, в Небесное Царствие.

Запев. Удивишася вси видящии терпение твое. Мученицы бо во едино время страсть претерпеша, ты же во вся дни живота своего злыя муки терпел еси, в Небесное Царство желая вселитися. Еже получив ныне, радуешися бесконечною радостию.

Слава. Вся сокровеная яко откровена имел еси, и вся бесплотная, яко плотьская видел еси. Ничтоже земных возлюбил еси. Тем же и Небесная Врата отверзошатися, в неизглаголанную радость Господа своего блаженне вшел еси.

И ныне. Течение преста тленное, Девая бо роди Бога Слова нетленно, выше естества и слова, Девою пребывши. Катавасия.

 

Песнь 6. Ирмос.

Божественное се и всечестное совершающе празднество, богомудрении Божия Матере, приидите руками восплещем, от Нея Рождьшагося верою славяще.

Запев. Апостола Павла сбыстся глас на тебе отче. Слово Крестное погибающим убо юродство вменися. Тебе же спасающемуся сила Божия бысть, Николае всехвалне.

Запев. Христов глас сбысться на тебе, еже рече блажени нищии духом, яко тех есть Царство Небесное. Ты бо обнища духом, Царство Небесное тебе бысть.

Слава. Ум свой весь к Богу простирая, непрестанными поучении. Плотьскую любовь непощаде, благим тебе ходатайствуя Николае присвоение.

И ныне. Усты и сердцем Пречистая, Тя Богородицу проповедуем. Тобою бо Богови примирихомся, отриновении первее преступлением праотца. Катавасия.

Кондак, глас 4. Яко Андрея блаженнаго ученик и наследник был еси. И того стопам последуя, уродивыи Николае Кочанов, и паки от мирския чади уничижение и пхание приемля. И о ихже согрешении Христу Богу моляся. И по честнем ти успении, великии Нов Град имея мощи твоя в себе, яко неистощимое сокровище, и подаеши исцеление, верою к раце мощей твоих приходящим, и успение твое честно славящим.

Икос. Иже уродство приим Христа ради, и Безсмертную Жизнь преславно наследовал еси. С плотию бо на земли безплотных житие прошед, был еси страстьми неприятен. Темже тя хвалим отче. Радуися светлая уродивым славо. Радуися ясныи целомудрия столпе. Радуися множество терпении яве показавыи. Радуися премудраго разума явление. Радуися правило правде известно. Радуися словом совершившу ти, и деянием стремление. Радуися уме наслаждаяся мыслей неизреченных. Радуися иже весь Нов Град блаженне благочестно удивль. Радуися им же всяка страсть умертвися. Радуися источниче животочивых вод. Радуися помощниче и спасителю, иже верно вопиющим ти. Радуися иже к тебе прибегающим теплыи заступниче преблаженне Николае, и верою к раце мощей твоих приходящим, и успение твое честно славящим.

 

Песнь 7. Ирмос.

Непослужиша твари, богомудрении паче Зиждителя, но огненное прещение мужески поправше. Радовахуся поюще, препетыи иже отцем Господь и Бог благословен еси.

Запев. Неизволи ничтоже на земли любити паче Зиждителя. Но посреди храмов скитаяся, блаженныи Николае радовашеся пояше, препетыи иже отцем Господь и Бог благословен еси. (Дважды с запевом)

Слава. Одержимь христоподобною отче Божественою любовию, преблаженныи Николае. Вся бо яко уметы вменил еси, вопияаше, препетыи иже отцем Господь и Бог благословен еси.

И ныне. Вышняго освященное Божие Селение радуися. Тобою бо нам радость даровася Богородице вопиющим Ти, благословена Ты в женах Всенепорочная Владычице. Катавасия.

 

Песнь 8. Ирмос.

Отроки благочестивыя в пещи, Рожество Богородичо спасло есть. Тогда убо образуемо, ныне же действуемо, вселенную всю воздвиже пети, Господа воспевайте дела, и превозносите Его во веки.

Запев. Всесветлая звезда, сущия в тине страстей, приводя к животу нетлеющему, твориши бо нечистыя целомудрено жити, и отгониши духи лукавыя, и недуги лютыя, вопия, благословите вся дела Господня Господа.

Запев. Ты цел умом, в скрове мудрых чюдес преподобне, многия уловил еси уродствовати Господа ради. Ведыи наруганым быти, вопия чистейшею душею, благословите вся дела Господня Господа.

Слава. Совершено Единыи иже Своих Си, по достоянию славя Господь, износима преподобне, и гробу посылаема, ангельскими светлословеньми почитает, вопиющих, благословите вся дела Господня Господа.

И ныне. Избавляяи нас восия ис Тебе Господь, Дево Чистая, Его же моли Владычице, просветити поющыя Тя. И обстояния нас избавити, вопиющих, благословите вся дела Господня Господа. Катавасия.

 

Песнь 9. Ирмос.

Всяк земен да взыграется, Духом просвещаем, да ликовствует же безплотных умов естество, почитая святое торжество Божия Матере, и да поют радуися Преблаженная Богородице Чистая Приснодево.

Запев с поклоном. По Христову словеси, за биющыя тя молился еси. И того ради Небесная Врата отверзошатися, в неизглаголанную радость вшел еси, Николае блаженне.

Запев. Господа Бога истинно возлюбил еси, себе отверглся еси, и Тому последовал еси, якоже он рекл есть. Хотяи душю свою спасти погубит ю. ты же душю свою в Живот Вечныи соблюл еси, святе Николае достохвалне.

Слава. Великая и преславная ныне быша ти, в Небеснем Царствии. Аще и урод бысть мирови, но Христови мудрец явися достохвалне. Презирай на ны с Небеснаго Круга, на чтущих память твою.

И ныне. Спаси мя всех рождьшая Избавителя, и Благодателя. Разори души моея облаки, Свету Облаче Святая Владычице, и силна соделай на страсти борющыя мя. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля