Канон на Боготелесное погребение


Общее начало и конец всем канонам →
Порядок чтения по уставу


Канон на Боготелесное погребение Господа Бога и Спаса нашего Исуса Христа, и на плач Богородицы, творение Симеона Логофета, со ирмосом, на 6, ирмос, 2-жды, глас 6.

 

Песнь 1, Ирмос.

Волною морскою сокрывшаго древле, гонителя мучителя, под землею скрыша, спасеных дети. Но мы яко отроковица Господеви поем. Славно бо прославися.

Запев. Слава тебе Боже наш, слава Тебе.

Хотя Свое создание Спасе мой оживити, на Кресте повешен бысть, и гвоздьми уязвися, Твоя же Непорочная Мати предстоящи, распалашеся сердцем Владыко, зрящи Твоих кровей токи.

Запев. Преклонив Си Божественую выю Спасе мой, Соестественожизнен на древе уснул еси. Вся же тварь колеблется, и зыблются небесных ангел чинове, зряще Тя плотию стражуща.

Слава. Хотящи Мати приступи в тайне, к таящемутися ученику Иосифу, и тайно плачющи моляшеся, Пречистое испросити Тело Твое, у пилата беззаконнаго судии.

И ныне. Приступи к пилату надеющися неусумняся, и испроси Пречистое Тело Христа Бога, и снем от древа во гробе Твоем скрый Е, да не како паки прободут ребра не милостивии. Катавасия.

 

Песнь 3, Ирмос.

Тебе на водах повесившаго всю землю неодержимо, тварь видевши на лобнем висяща, ужасом одержима бе, несть Свята разве Тебе Господи взывающи.

Запев. Никтоже смеет испросити Пречистое Тело Учителево, висимое на древе, бездушно мертво и уязвено, и поношеньми стреляемо, паче же ребра ископаваема.

Запев. Отвержеся первыи ученик Петр, и оставиша Учителя вси, умилися благообразне, испросив снеси Тело Владыки моего, и Едина да оплачю яко любезнейшее ми чадо, любимое матери.

Слава. Плачющу Твою Матерь яко виде Иосиф, о Христе мой, слыша глаголы болезнены умилися, и плачь сподвиже. И скоро потщася испросити Тело Твое Пречистое.

И ныне. Твоему изволению призрев, дарует Твое Божественое Тело пилат, и снем от древа с Никодимом, в землю Иосиф всклони, и земля потрясеся, и мертвецы из ада отдаваше скоростию. Катавасия.

 

Песнь 4. Ирмос.

Еже на кресте Твое Божественое смотрение, предзря Аввакум, дивяся вопияаше, Ты силных ссече державу благии, приобщаяся сущим во аде, яко Всесилен.

Запев. Обьемши Тебе Всенепорочная, лобызаше заклания Пречистых уд Твоих, с Тобою умру глаголющи, лияние бо Твоих Всепречистых Кровей не терплю Чадо зрети.

Запев. Приемши Тя Рождьшая и на колену Тя Христе Своею возложивши, плачющи облобызаше Ти руце, и ни из ребр отирающи, каплющую Божественую Кровь Твою Владыко.

Слава. Безгласная Уста целующи Рождьшая Тя Христе, и к Себе приложивши, плачющи облобызаше, Твое еже на земли глаголно животно, поживша человека яко Бога.

И ныне. Дары принесоша Ти Владыко персьтии цари, яко Богу поклоняющеся. Ныне же погребению помазания, Чадо, яко смертну Никодим несет глаголя, како Тя погребу, Боже мой. Катавасия.

 

Песнь 5. Ирмос.

К Тебе утренюю, милосердия ради в Самого падшаго, преложьшуся непреложно, и до страсти безстрастием преклоншуся слове Божии мир подаждь ми Человеколюбче.

Запев. Нетерплю Чадо бездушна Тя держати, Егоже доях Младя на руках Моих играюща, аще убо сходиши ко Адаму во ад, сниду и Аз и возвещу Евве Твоя таинства.

Запев. Не рыдай мати, Христос рече Божествене рождьшей, узриши бо Мя паки воскресша, и светло Тебе еже радуися вещающа, и Адама с Еввою воздвигнувша.

Слава. Како терплю Чадо утробою болезни, очи Твои лобызающи угаснувшии на древе, их же прежде зрях яко красны добротою сияющя, и слепых просвещающя, манием Ти Божественым.

И ныне. Сниду ли паче видети Ти Славу во аде Сыне Мой, и паки совзыду. Не терплю бо и бездыхания Тело держати недвижимо, и уязвена удеса облобызовати. Катавасия.

 

Песнь 6. Ирмос.

Ят бысть, но неудержан вперсех китовых Иона, Твой бо образ нося, пострадавша и погребению дана, яко из чертога от зверя исшед. Приглашаше же кустодии, иже хранящии суетная и ложная, милости вашея оставили есте.

Запев. Како отречеся Петре Спаса, Его же исповедал еси Христа, Сына Богу Живому, и оставил еси на древе Единаго распята, бездыхания и безвида. Ниже гробом тело скутати потщался еси скоро, Чистая Матерьски рыдающи вещаше.

Запев. Даждь Ми слово, от сладчайших Слове устен, Чистая с плачем Ти вопияаше, нетерплю Тя бездыхания положити во гробе Сыне мой, иже в мертвых свободна. Виждь Владыко Свою Матерь рыдающю беспрестанно, сердце бо Мое пройде оружие попаляющи.

Слава. Приидите вся силы небесныя, видите Тело Христово оставлено, от другов и знаемых всех, и изящных ученик, и устрашитеся, Едина бо плачюся рыдающи о Чаде Закланном Ми со единем учеником возлюбленным посланником Его.

И ныне. Созываше другини мироносицы Слове, Нескверная Чистая, и сподвизаше в рыдание, приидите другини и оплачите вопиюще, Учителево Тело многострадалное. Приидите и видите безгласна уста, устне недвидиме, сомнеже очи, Емуже в руце дыхание живым есть. Катавасия.

Кондак, глас,6. Иже бездну затворивыи, мертв зрится измирною и плащаницею обвит, во гробе полагается, яко мертв безсмертныи. Жены же приидоша помазати Его миром, плачюще горко и вопиюще, сия субота преблагословеная, внюже Христос уснув воскресе тридневно.

Икос. Иже содержаи концы, накрест вознесеся, рыдаше вся тварь, Того видящи висяща нага на древе. Солнце лучи скры, и звезды свет отложиша. Земля же со многим страхом поколебася, и море побеже, и камение распадеся. Гробы же мнози отверзошася, и телеса восташа святых человек. Ад низу стонет, июдеи советуют, оклеветати Христово Воскресение. Жены же взываху, сия субота есть преблагословеная, в ню же Христос уснув воскресе тридневно.

 

Песнь 7. Ирмос.

Неизреченное чюдо, иже впещи избавивыи преподобныя дети из пламене, во гробе нове бездушно пологается, на спасение нам поющым, избавителю Боже благословен еси.

Запев. С небес ангельстии собори приникше дивляахуся, видяще мертва на лоне Матерне. Емуже предстояще и стрепетом зрят, у Отца в недрох суща, и мертвых из гробов воздвигша.

Запев. Течаху вси горе и долу зыблющеся ангельстии чинове, видети тело Христово бездыхания лежащо Матери на лоне, и чюдом содержими бывше, возвращахуся сострахом ужасающеся вопияаху, избавителю Боже благословен еси.

Слава. Тайнословнику Твоего Рожества Владыко, Девая глаголющи, плакаше горко, увы Мне Гаврииле, где благовестие; где Ми еже радуися; где еже Благословеная; из утробы бо Моея свет, угасе на кресте.

И ныне. Како беззаконнии людие Чадо Сладчайшее непощадеша, нага на древе зряще Тя висяща, но якоже зверие суровии прободоша божественая ребра Твоя; како не растаяся тварь колеблющися, но вся веде яко рукою Твоею Слове содержащася. Катавасия.

 

Песнь 8. Ирмос.

Ужаснися и убойся небо, и да подвижатся основания земли. Се убо в мертвых вменяется иже ввышних Живыи, и вогробе мале странно полагается. Егоже дети благословите, священнии пойте, людие превозносите Его вовеки.

Запев. Ужаснися небо и земле, и скрый солнце света своего зарю, се бо иже свет в тебе положивыи, из боку Моею восиявыи Бог, Един яко весть на древе зайде, хотя Адама воскресити. Бездыхания же держащи, не терплю болезни.

Запев. Како Ти Сыне Мой и Боже, Тело Пречистое во гробе темне покрыю, иже гробы истощившаго, и возвращуся тщима рукама не зрящи Тя Чадо, не терплю отступити от Тебе о Сыне Мой, паче же умру, и во ад сниду.

Слава. Слыши небо и земле, и внушите Матерняя Моя рыдания, се бо Содетель ваш от беззаконных рук распяся, и се явися безвида и бездыхания наматерьних лонех, от распенших заклан быв Создатель.

И ныне. Егда вопияше Чистая, гласа Твоего слышала бых сладчайшаго Исусе, и устне боголепне движиме, и очи Твои светло сияющии, красны добротою, яко да бых Сыне Мой паки воскресша Тя видела, и радости исполнилася вместо горких слез. Катавасия.

 

Песнь 9. Ирмос.

Нерыдай Мене Мати, зрящи вогробе, Егоже вочреве безсемене зачала еси Сына. Воскресну бо и Прославлюся, и вознесу со славою, немолчно яко Бог, иже верою и любовию Тебе величающыя.

Запев. Вместо пелен Сыне мой, в поняву Тя повиваю. Вместо же яслей Свете Мой, во гробе Тя полагаю темне. Вместо же млека, слезами окропляю пречистеи Ти устне. Вместо же животных и красных Ти глагол, мертву беседую.

Запев. Не рыдай Мене Мати яко смертна во гробе, Егоже в пеленах суща яко Бога видела еси, и благоговейно от волхв персских поклоняема, воинством же ангел возопившим, слава Воскресшему, Тебе бо первее явлюся.

Слава. Иди Чадо во ад, яко Бог воскресити со Адамом, яже из Адама падшия в тлю. Аз же матерни слезы точащи пред враты прямо гроба Твоего сежю Боже мой, дондеже воскреснеши.

И ныне. О Всеблаженная Мати, не у пред враты гроба рыдающи слези прочее. Востану бо и прославлюся, и светло Тебе еже радуися провещав, радость не изглаголанную послю на небеса возшед. Катавасия.

Таже, за достойно, ирмос, Не рыдай Мене Мати.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?