Святой великомученик Георгий Победоносец претерпел в своей жизни неистовые муки, пытки, страдания за Христа. Твердой верой он разрушал коварные козни бесов, сокрушал в прах идолов. Мужественным и бесстрастным исповеданием святой веры он обратил многие души в христианство. Земной путь святого окончился в 303 году, когда ему не было и 30 лет. Русские люди издревле благоговейно почитают святого. В его честь было построено много храмов на Руси. Иконы св. Георгия Победоносца — одни из любимых в Русской земле. Будем в своих молитвах просить святого угодника Божия великомученика Георгия Победоносца помогать нам идти по спасительному пути в Царствие Небесное, укрепляться в вере и благочестии, избегать злых наветов нечистых духов. Память св. великомученику Георгию 23 апреля (6 мая по гражданскому стилю).
——————————————————————
Общее начало и конец всем канонам →
Порядок чтения по уставу
——————————————————————
Тропарь, глас 4-й
Подвигом добрым подвизася, страстотерпче Христов Георгие, веры ради мучителем обличил еси нечестие. Жертва же благоприятна Богови принесеся. Тем же и венец прият победы. И молитвами святе твоими, всем даеши согрешением оставление. (Дважды).
Слава, и ныне. Богородичен. Иже от века утаенное, и ангелом несведомое таиньство. Тобою Богородице земным явися, Бог в неразмесне снятии воплощаемь. И крест волею нас ради восприим. Им же воскресив первозданнаго, и спасе от смерти душа наша.
КАНОН, глас 2-й
Песнь 1. Ирмос
Во глубине потопи древле, фараонитская вся воиньства, преоружена сила. Воплощьжеся Слово преспеющия грехи потребило есть, преславныи Господь, яко прославися.
Запев: Святыи славныи великомучениче Георгие, моли Бога о нас (поклон).
Теплою верою и любовию, призывающия тя мучениче Христов, венценосче Георгие, предстоя весь светел честному престолу, иже всеми владущаго, твоими молитвами и заступлении сохрани.
Запев. Благородно возделание, Христу был еси Георгие, мученическими возделан деянии. И яко богатьство одушевлено, в небесных тя сокровищих положи подвигоположник, яко множае храбровавша.
Запев. Твердо и терпеливно, устремился еси самозван к подвигом, преблаженне Георгие. Низложь сопротивное мучитель ополчение. Молитвеник о всех тебе притекающих был еси.
Слава. Блаженныя славне жизни ныне восприем, яже о Христе сокровенныя Георгие, о ней же подвизася до крове. Верою поющим тя, моли спастися от всякаго страстотерпче обстояния.
И ныне. Богородичен. Небо бысть словесно, Слово Небесное, в Свою утробу Богомати вмещьши. Им же вся быша, Небо и земля и вся яже в них. Его же со дерзновением моли, спасти поющия Тя.
Катавасия: Избави от бед рабы своя, святыи славныи великомучениче Георгие, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
Песнь 3. Ирмос
Процвела есть пустыня яко крин Господи, язычна неплодящая Церкви, пришествием Ти. О ней же утвердися мое сердце.
Запев. Венцем страдании сияя славне, благочестно призывающия тя, моли Избавителя и Бога, от всякия нужды блаженне избавити.
Запев. Богатыми просвещаемь сиянии премудре, мрачную отжени печаль, и мглу страстей от нас, иже верою восхваляющих тя.
Слава. Надежею утвержаемь и любовию, верою же ограждься Георгие. И силою укреплься Христовою, идольскую прелесть низвергл еси.
И ныне. Богородичен. Просвещающаго всяческая, Пречистая родила еси, с плотию Безплотнаго, и прежде всех Отцу собезначална. Тем же Тя Богородицу вернии чтем. Катавасия.
Седален, глас 8-й. Благочестия образы разбогатея. Нечестия льсти низлагая, мучениче попрал еси врагу шатания. И божественым желанием присно разгараемь, мучителем угасил еси безбожное шатание. Тем же достойно возмездие мукам прият венец. И подаеши исцеления верою притекающим, страстотерпче Георгие. Моли Христа Бога, согрешением оставление даровати, чтущим любовию святую память твою.
Слава, и ныне. Богородичен. Премудрости Слово во чреве еси, заченши неопално Мати Божия, мирови породила еси, мира преимущаго. И сосцы доила еси, всяческая питающаго. Тем же помолися Пресвятая Дево, в час Суда егда хощу предстати, пред лицем Создателя моего. Даровати оставление грехов, Тебе бо имею надежду раб Твой.
Песнь 4. Ирмос
Пришествовав от Девы, не ходатай ни ангел, но Ты Сам Господи воплощься, и спасе всего мя человека. Тем вопию Ти, слава силе Твоей.
Запев. Поем твоя подвиги преблаженне Георгие, ими же разсыпал еси идольския службы. Всю же упразднил еси бесовскую прелесть преславне.
Запев. Утиши напастей и бед смущение, и всяко наветие злое бесов отжени, от поющих тя Христова воина досточюдне.
Слава. Восиял еси яко звезда светоносная Георгие, душевною доблестию, и твердостию веры. Прелесть мрачную отгоня, и спасай поющыя Тя.
И ныне. Богородичен. Спасение существеное Дево родила еси. Богатьством благости, и естественою благостынею спасающа человека, и истлевшии образ назидающа. Катавасия.
Песнь 5. Ирмос
Просвещение во тме лежащим, и спасение неначаемым Христе Спасе мой, к Тебе утренюю Царю мирныи, просвети мя сиянием си. Иного бо разве Тебе Бога не знаем.
Запев. Мученическое дерзновение яко имея ко Владыце, проси усердно спасения тя поющим, душевных недуг изменяя. Твоими молбами мучениче страстоносе, преблаженне Георгие.
Запев. Со ангельскими ликуя, яко мученик ликостоянии, и безсмертныя и блаженныя венценосче, насыщаяся славы. Иже покрову твоему прибегающия, всякаго треволнения и бури исхити.
Слава. Избави нас всякия нужи, яко Милостив, греховное и бедное отгоня многоразличное смущение, Георгия Твоего угодника, молитвы Христе приемля.
И ныне. Богородичен. Долг праматере Еввы, Богомати отдала еси. Плотию бо обложила еси, из Тебе рожденна Спаса миру. Тем же Тя вси блажим, обрадованная Дево всенепорочная. Катавасия.
Песнь 6. Ирмос
В бездне греховней одержимь, неизследную милосердия Твоего призываю бездну, от тли Боже мой возведи мя.
Запев. Паче естества и слова и помысла, доблести твоея храбрования, непрестанно певаема, преблаженне мучениче Георгие.
Запев. Воиньству небесному собеседник блаженне быв, и божественое явление, елико достижно зря, иже тя верою чтущия спасай.
Слава. Всеми образы Богови возложен, и блистания чюдес приемля. Дарования требующим, раздаваеши преблаженне Георгие.
И ныне. Богородичен. Ныне к тебе прибегаю Пречистая, спаси мя молитвами си и соблюди. Елико бо хощеши можеши, яко Мати Всемогущаго. Катавасия.
Слава, и ныне. Кондак, глас 4-й. Возделан Богом ты показася, благочестия делатель честен, добродетелей рукояти собра себе. Сеяв бо со слезами, веселием жнеши. Пострадав же кровию, Христа прият. И молитвами святе твоими, всем даеши согрешением прощение.
Икос. Иже за мирскии живот, душу свою положившаго, Христа Царя желая воин, тщится умрети зань. Ревность же велию божественую в сердцы имея, себе самого приведе. Того убо и мы вси Георгия, яко тепла предстателя восхвалим верою, яко славна суща Христу раба, подобящася яве своему Владыце, и всякому молящуся приходяща. Спешит бо присно и молит Спаса, всем подати согрешением прощение.
Песнь 7. Ирмос
Богопротивное веление, беззаконнующа мучителя, высок пламень вознесло есть. Христос же простре богочестивым детем, хлад духовныи, сыи благословен и препрославлен.
Запев. Своему подобяся мучениче Владыце, волею потекл еси к подвигом славне. И победу взем, церкви Христове сохранитель был еси. Сию присно сохраняй заступлением си.
Запев. Яко мученик непобедим, яко страдалец, яко подвижник вере и поборник. Ныне столп непоколебим восхваляющим тя, премудре Георгие буди, огражая молитвами си.
Слава. Мудре возделав божественое семя, и сие умножил еси. И кровми твоих течении напаяя блаженне, и болезней тщанием, и различными ранами. Ими же свирепство мучителей угасил еси.
И ныне. Богородичен. Девою пребыла еси и по рожестве, Бога бо родила еси питающаго всяческая, за неизреченную милость, и милосердие много, человека бывшаго Чистая. Его же ныне моли, спастися всем нам. Катавасия.
Песнь 8. Ирмос
Пещь огнена иногда в Вавилоне, детели разделяше, Божиим велением. Халдеи опаляющи, верныя же прохлаждающи поюща, благословите вся дела Господня Господа.
Запев. Поток страстей, лютых же и бедных, и напастна обстояния, и болезнем падение, и бесовьския козни, и врагов стремления, престает твоими молитвами, венценосче Георгие.
Запев. Весь светом блаженне троическим чисто облистаем, яко мученик непобедим. Яко благочестия поборник, яко победитель боговенчанен. Спаси небесныи жителю, тя чтущия молитвами ти.
Слава. Венцем разумным различно украшен, и царьствия диадимою, и скипетром удобрен, и багряницею обложен, твоею обагрен кровию блаженне, сцарьствуеши Цареви силам.
И ныне. Богородичен. Иже от Отца безлетно рожденнаго, и прежде век восиявша, всяческая сотворшаго, видимая же и невидимая, Дево Мати родила еси. Тем же Тя Богородице вси языцы славим. Катавасия.
Песнь 9. Ирмос
Безначална Родителя Сын Бог и Господь, воплощься от Девицы нам явися, омраченыя просветити, и собрати расточеныя. Тем же всехвалную Богородицу величаем.
Запев с поклоном. Непрестанно Господа моли о нас, поющих тя блаженне, яко Христова мученика, яко победивша мучителя. Яко лукавых духов отгонителя, яко хранителя неусыпна, яко заступника непостыдна.
Запев. Страданием воздания, богатно тебе дарова всех Владыка. Ему же предстоя со дерзновением преблаженне мученическим и с веселием, призывающыя тя, объем сохрани.
Слава. Земля тя не скры, но небо прият. И отверзетися дверь райская яве. В нем же радостно страстотерпче ликуя и играя, верно, поющыя тя, твоими молитвами соблюди.
И ныне. Богородичен. Тя свидения сень прообрази Пречистая, в ней же скрижали и ручка и златыи ковчег. Яко же бо та она, тако и Ты безначалное Слово во утробе вместила еси, Богородице воплощаема. Катавасия.
Отпуст: Господи Исусе Христе, Сыне Божии, молитв ради пречистыя Твоея Матере, и святаго славнаго великомученика Георгия, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.