Канон святому великомученику Димитрию

Святой великомученик Димитрий Солунский пострадал за Христа в 306 году. Святому молятся, прося его небесного заступничества от видимых и невидимых врагов. Память святому великомученику Димитрию 8 ноября (26 октября по старому стилю).

Канон, глас 4. 


Общее начало и конец всем канонам
Порядок чтения по уставу


Тропарь, глас 3-й

Велика обрете в бедах тебе помощника вселенная страстотерпче, поганыя побеждающа. Яко же бо Лиеву низложи гордыню, на подвиг укрепив Нестора. Тако святе Димитрие Христа Бога моли даровати нам велию милость. (Дважды).

Слава, и ныне. Богородичен. Тебе Ходатаицу спасения рода нашего, воспеваем Богородице Дево. Плотию бо, ею же ис Тебе прошед, Сын Твой и Бог наш крестную прием страсть, и избавил есть нас из истления, яко Человеколюбец.
  

Песнь 1. Ирмос

Моря Чермнаго пучину немокрыми стопами древле шествовав Израиль, крестообразно Моисеовыма рукама, Амаликову силу, в пустыни победил есть.

Запев. Святыи славныи великомучениче Димитрие, моли Бога о нас (поклон).

Божественым мучения венцем увязеся по Христе, ликуеши блистании от онудными сияя, и просвещения исполняемь, великомучениче досточюдне.

Запев. Яко суща истине мученика, и даже до крове подвигшася блаженне терпеливно. Твердо же противление к мучителем показавши тя Владыка приятова.

Слава. Злобы обретателя низложил еси на землю Димитрие, мученическим си копием убив. Божественою благодатию, иже паче ума силою всеблаженне укрепляемь.

И ныне. Богородичен. Без Матере яко же Бог первее сыи, бысть еже по нас без Отца ис Тебе Богородице всепетая, плоть прием по соединению, еже паче слова и разума.

Катавасия: Избави от бед рабы своя, святыи славныи великомучениче Димитрие, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

Веселится о Тебе Церкви Твоя Христе, зовущи, Ты ми крепость Господи, прибежище и утверждение.

Запев. Вменися яко нивочтоже мучителево тобою повеление. Слово бо Божие паче всех страстотерпче почел еси.

Запев. Свещник световиден мучения в сени был еси, божественым светом сияющь мучениче страстотерпче Димитрие.

Слава. Исцелением тя источник, священныи и чюдныи, град твой имея, и сокровище неподвижно, всякаго веселия обогатися.

И ныне. Богородичен. Исцеляя образ истлевшии земленых Пречистая, весь из Тебе облачится, пребыв яко же бе Человеколюбец. Катавасия.

Седален, глас 4-й. Яко добля страдалца, и воина крепка всецарюющаго Христа, взываем псаломски: радуися мучеником украшение и лепота, радуися светлая Церкви звездо, и стено и пристанище прибегающим к тебе, великомучениче славне Димитрие, тя поющия спасай от всякого вреда чужаго и озлобления избави.

Слава, и ныне. Богородичен. Удивися Иосиф паче естественаго зря, внимаше мыслию руновнаго дождя, в безсеменнем зачатии Твоем Богородице. Купину огнем неопалиму, и жезл Ааронов прозябшии, и послушествуя яко обручник Твой и хранитель. Священником вопияше; Девая раждает, и по рожестве Девою паки пребудет.
 

Песнь 4. Ирмос

Воздвижена Тя видевши Церкви на кресте Солнца праведнаго, ста в чину Своем, достойно взывающи, слава силе Твоей Господи.

Запев. Победивша тя лжу нечестия, мучениче Божии Димитрие, вышнии видя, славою венча славне, поюща, слава силе Твоей Господи.

Запев. На лесть победу возставив, победителныи венец праведне приял еси Димитрие. Зовыи Зиждителю своему, слава силе Твоей Господи.

Слава. Направляемь дланию живоносною, к пристанищем достигл еси тихим. Идеже ныне радуяся зовеши Димитрие, слава силе Твоей Господи.

И ныне. Богородичен. Яко тварей всех честнейши, Мати Богу быти Едина сподобися, Сего бо рождьши. И мир благодатию богоразумия просветила еси. Катавасия.
 

Песнь 5. Ирмос

Ты Господи ми свет в мир пришел еси, в свет святых обращая из мрачна неведения, верою воспевающыя Тя.

Запев. Огнь любве божественыя в сердцы прием, огнь угасил еси безбожнаго идольскаго гнева, всеславныи Димитрие.

Запев. Избавляя нас от бед явися Димитрие, молитвами си покрывая, верою и любовию восхваляющих тя.

Слава. Иже верою к твоему притичущии храму, Димитрие. Недугов и страстей душетленных вскоре изменяются.

И ныне. Богородичен. Слово Божие, иже Отцу единосущное, Твой бывает Богомати паче ума же и слова Сын, Тебе единосущен. Катавасия.
 

Песнь 6. Ирмос

Пожру Ти со гласом хваления Господи, Церкви вопиет Ти, от бесовския крове очищьшися милостию от ребр истекшею Ти кровию.

Запев. Согласно сошедшеся поем славную и светоносную твою память, чюдес полную и даровании святаго и честнаго всеблаженне Духа.

Запев. (Повторяем стих).

Слава. Разреши ми пленицы согрешении молбами си. Яко бо непобедим мученик дерзновение имаши ко Владыце, буди ми прибежище и покров Димитрие.

И ныне. Богородичен. Чисту Тя посреде терния обрет яко пречистыи крин, и удольныи цвет о Богомати Жених, во утробу Твою вселися. Катавасия.

Слава, и ныне. Кондак, глас 2-й. Кровей твоих струями Димитрие, Церковь Бог обагрил есть, давыи ти державу непобедимую. И сохраняй град твой невредим, тому бо еси утверждение.

Икос. Сего великаго воспоем сошедшеся верою, яко оружника Христова и мученика Димитрия, в песнех и пениих, взывающе Владыце и Зиждителю вселенныя, избави нас труса и нужды Человеколюбче молитвами Богородицы и всех святых мученик Твоих. На Тя бо вси уповаем, избавитися бед и скорбей. Ты бо еси нам утверждение.
 

Песнь 7. Ирмос

В пещи авраамския си дети персидстей, любовию благоверия паче, нежели пламенем опаляеми взываху, благословен еси в Церкви славы Твоея Господи.

Запев. Преукрашен божественою славою и благодатию, мучениче страстотерпче, сияеши световидно. И просвещаеши зовущыя, благословен еси в Церкви славы Твоея Господи.

Запев. (Повторяем стих).

Слава. Яко багряницею украшен своею кровию, имыи вместо скипетра славне крест, со Христом царствуеши ныне. Благословен еси зовыи в Церкви славы Твоея Господи.

И ныне. Богородичен. Препрославленая, просвещеная Мати Дево, вся чтущыя Тя всеистинную Богородицу огради. Благословена Ты в женах пренепорочная Владычице. Катавасия.
 

Песнь 8. Ирмос

Руце распростер Даниил, лвова зияния в рове затче. Огненую же силу угасиша, добродетелию поясавшеся, иже благочестия любители отроцы. Взывающе: благословите вся дела Господня Господа.

Запев. Очернил еси весь вражии гнев славне и борения, неотъемлемою силою Христа облечен, и победоносец быв мучениче, вопияше: благословите вся дела Господня Господа.

Запев. Мученик благостояние показав, их же благозвание мучениче наследова. Банею омывся святою, яже вторыми не оскверняется греховными прилоги. Копием бодом зовыи: благословите вся дела Господня Господа.

Слава. Чюдес твоих множество. Иже паче ума дарования, их же ти подаде Христос, всем показал еси славне. И благодать исцелением иже паче слова, яве твою благодать проповедает нам, вопиющим: благословите вся дела Господня Господа.

И ныне. Богородичен. Едину во всех родех Деву Матерь, и Богородицу чистую песнословим. Та бо спасению нашему Ходатаица, яко миру Избавителя Слово рождьши. Ему же вопием: благословите вся дела Господня Господа. Катавасия.
 

Песнь 9. Ирмос

Камень нерукосечныя горы, от несекомыя Тя Девицы краеуголныи отсечеся Христос, иже совокупив разстоящаяся естества. Тем веселящеся, Тя Богородице величаем.

Запев с поклоном. Раздери союзы прегрешении, тя поющим страстотерпче, и устави страстем прилоги. Молву разори ересем, и напастей утиши бурю, молитвами своими.

Запев. (Повторяем стих).

Слава. Направи к стезям правым Небеснаго Царствия, священное твое стадо венценосче. И настави на пажить спасеную, на место вечное.

И ныне. Богородичен. Яко корене источник, и вину нетления Тя Дево, вси вернии надеющеся хвалами почитаем. Ты бо составное нам беземертие источила еси. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и святаго славнаго великомученика Димитрия, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.

+

Авторизация

* *
*

Регистрация

*
*
*
*

Проверочный код Time limit exceeded. Please complete the captcha once again.


Восстановление пароля