Преподобный Сергий Радонежский — один из величайших русских святых — является основателем знаменитого Троице-Сергиева монастыря недалеко от Москвы, подвизался в XIV веке. Его ангельская жизнь была изумительно украшена молитвой и постом, смирением и тяжелыми иноческими трудами. Еще при жизни преподобный Сергий удостоился дара чудотворений, также удостоился от Бога небесного видения, когда его посетила Матерь Божия в сопровождении св. апостолов Петра и Иоанна Богослова.
Преподобный Сергий благословил князя Димитрия Донского на сражение с татарами на Куликовом поле, пророчески предсказал победу князю над татарским игом, и во время сражения вместе с братией обители он молился, прося Бога о даровании победы русскому воинству.
Молитвенно прославляя богоугодную жизнь преподобного Сергия, будем просить этого великого угодника Божия, чтобы он непрестанно ходатайствовал перед Господом о нашем вечном спасении, прощении грехов наших и был нашим небесным покровителем на пути нашего земного странствования. Память преподобному Сергию Радонежскому 25 сентября (8 октября по гражданскому стилю).
——————————————————————
Общее начало и конец всем канонам →
Порядок чтения по уставу
——————————————————————
Тропарь, глас 4-й
Иже к добродетелем подвижник, яко воистину воин Христа Бога, на страсти велми подвизася в жизни временней. В пениих, бдениих же и пощениих, образ быв своим учеником. Тем же в тя вселися Пресвятыи Дух, его же действием светло украшен. Но яко имея дерзновение к Святей Троице, поминай стадо еже собра мудре. И не забуди яко же обещася, посещая чад своих, Сергие преподобне отче наш. (Дважды).
Слава, и ныне. Богородичен. Иже от века утаенное, и ангелом несведомое таиньство. Тобою Богородице земным явися, Бог в неразмесне снятии воплощаемь. И крест волею нас ради восприим. Им же воскресив первозданнаго, и спасе от смерти душа наша.
КАНОН, глас 8-й
Песнь 1. Ирмос
Вооружена фараона погрузи, чюдотворяи древле, Моисейскии жезл крестообразно прорази, и раздели море, Израиля же бежаща, пеша ходяща спасе, песнь Богови возсылающа.
Запев: Преподобне отче Сергие, моли Бога о нас (поклон).
Христа нас ради волею смирившагося, даже до рабия образа подражав, возлюбил еси смирение. И зельным бдением и молитвами, душегубныя страсти умертвив, на гору безстрастия возшел еси Сергие пребогате.
Запев. Яко светильник света, свою душю слезными потоки украшая. И другаго Исаака подобно, сам себе вознесл еси преподобне. И сердце свое Богови пожерл еси.
Слава. Иже во чреве матерьни, трикраты проглашением, Троице служитель показася. И трисолнечным светом озаряемь, бесовская ополчения, яко паучину разорил еси, преблаженне Сергие.
И ныне. Богородичен. Закон кроме естественных, родила еси Законодавца, Бога и Человека бывша. Того яко Блага моли Всенепорочная, наша беззакония презрети, вопиющих всегда, поем Господеви славно бо прославися.
Катавасия: Избави от бед рабы Своя, преподобне отче Сергие, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
Песнь 3. Ирмос
Утвержеи небеса в начатце разумом, и землю на водах основав, на камени мя Христе церковнем утверди. Яко несть свята, паче Тебе Человеколюбче.
Запев. Благих образ себе вдав своим учеником, и привлече многи душа во спасение, отлучившихся мирскаго пристрастия, и утешение улучившим, райское наслаждение.
Запев. Яко доброплодная маслина, в дому Божии блаженне процвел еси. И маслом умащая душа любовию тя поющих преблаженне Сергие, и верою Христови вопиющих, несть свят паче Тебе Человекелюбче.
Слава. Страсти душетленныя успил еси бодреными бдении блаженне, и сих ради в Чертог Небесныи вселися. Прием богомудре Сергие благодать исцелением.
И ныне. Богородичен. Херувим и Серафим превышьши явилася еси Богородице. Ты бо Едина прият невместимаго Бога, во чреве Своем Нескверная. Тем же Тя вси вернии песньми Чистая ублажаем. Катавасия.
Седален, глас 4-й. Яко воистину тленных оставль непостоятельное, и Христови от души последовал еси. И болезньми и труды, и зельным воздержанием, яко бесплотен пожив преблаженне Сергие. Моли Христа Бога спастися душам нашим.
Слава, и ныне. Богородичен. Херувим и Серафим превышьши еси Богородице. Небесе же и земли пространнейши. Видимыя твари и невидимыя явися преимущи, неразсудным разсуждением. Его же бо пространьствия небеса не вмещают, в Своей утробе вместила еси Чистая. Его же моли спастися рабом Твоим.
Песнь 4. Ирмос
Ты ми Христе Господь, Ты же и сила ми, Ты ми Бог, Ты ми радование, не оставль недра Отча, но милостию си нашу нищету посетив. Тем с пророком Аввакумом зову, силе Твоей слава Человеколюбче.
Запев. Духу Пресвятому храм отче был еси, и животных вод, река исполняема. Основание непоколебимо церкви, иночествующим утвержение, Сергие досточюдне.
Запев. Пророчески слезными каплями на всяк день постелю омакая Сергие славне, дондеже до конца страстей пучину изсушил еси. Тем же память твою почитаем, присно честную и священную.
Слава. Лице Христово, лицем преподобне Сергие зрети сподобися, зерцалом воистину разрешьшимся. Сие бо и от мира отлучи тя, к возлюбленному желанию.
И ныне. Богородичен. Очищение нашим даруй неведением, яко безгрешен, и умири мир Свой Боже, молитвами рождьшия Тя. Катавасия.
Песнь 5. Ирмос
Вскую мя отрину, от лица Твоего Свете незаходяи. Покрыла мя есть чюжа тма окаяннаго. Но обрати мя, и к свету заповедей Ти пути моя направи молютися.
Запев. В пощениих непреклонен пребыл еси мудре. И до отшествия своего, храня сие опасением. Им же сподобися яве нетленному блаженьству.
Запев. Остр ум имея к Богу внимати, страсти душетленныя успил еси отче. И рукояти благоплодия пожал еси, питая благочестно восхваляющих тя, преподобне отче Сергие.
Слава. Светло житие твое преподобне Сергие, и известно всем концем явися. И божественыя доброты исполнено, в молитвах же и пощениих, и любовию иже к Христу Человеколюбцу.
И ныне. Богородичен. Тя стену имуще, и заступлением Твоим соблюдаеми Твоею божественою славою хвалящеся, Тя ублажаем. Ты бо Пречистая, душам нашим источаеши веселие и радование. Катавасия.
Песнь 6. Ирмос
Очисти мя Спасе, многа бо беззакония моя, из глубины зол возведи мя молюся. К Тебе бо возвах и услыша мя Боже спасения моего.
Запев. Иже память твою творящим священную отче, не престай моля Избавителя. Даровати согрешением оставление, и Небесное Царство восприяти, идеже глас празднующих веселит вся.
Запев. О Христе укрепляемь, вся коварьствия лукаваго, твердым умом Сергие, яко же сеть расторгнул еси. И пресветло светило мирови отче показася.
Слава. Светом божественым осияемь, со ангелы ныне на Небесех водворяяся. Поминай верою чтущих память твою, преподобне Сергие приснопамятне.
И ныне. Богородичен. Вознесла еси воистину падшее человеческое существо. Иже образом божественым, и Отца равеньством, видимым Сыном неизменным Богомати без семене во чреве поносивши. Катавасия.
Слава, и ныне. Кондак, глас 8-й. Христовою любовию уязвився преподобне, Тому невозвратным желанием последовал еси. Всяко наслаждение плотьское возненавидев, и яко солнце отечеству си восиял еси. Тем и Христос даром чюдес обогати тя. Поминай нас чтущих пресветлую память твою. Да зовем ти, радуися Сергие богомудре.
Икос. Евангельскии глас отче услышав, вся оставил еси плотьская мудрования. Богатьство же и славу, яко прах вменив. И на страсти яко бесплотен подвизася, и бесплотных ликостоянием чести сподобися. Разума дарование приял еси, еже и подаждь в песнех поющим ти сице: радуися Сергие преподобне и богоносе, небесныи человече, земныи ангеле. Радуися Духа Святаго обитель. Радуися молитвами богодатен дар прият. Радуися яко прежде рождения проглашением прославив святую Троицу, Ей же из млада последова. Радуися целомудрия столпе, им же всяка страсть попрася. Радуися яко от младых ногтей последова Христу. Радуися притекающим к тебе, спасению ходатай. Радуися светильниче многосветлыи, возведыи ко Христу инок множество. Радуися похвало отечеству своему. Радуися пророчеством украшеныи, во еже прорицати яко настояща грядущая. Радуися яко молитвами твоими сопротивнии побеждаются. Радуися державе нашей похвала и утвержение. Ея же соблюди молитвами си от враг ненаветна. Да зовем ти, радуися Сергие богомудре.
Песнь 7. Ирмос
Божия схождения, огнь устыдеся в Вавилоне древле. Сего ради отроцы в пещи радованною ногою, яко во свете ликоваху, поюще, благословен Бог отец наших.
Запев. В пещи искушения разжжения, божественая благодать ороси тебе преподобне. И многосветла троическим желанием показа, зовуща, благословен Бог отец наших.
Запев. Мира преобидев славне Сергие, на земли яко бесплотен пожил еси, и ангельским ликостоянием сподобися. Тем тя верою почитаем досточюдне.
Слава. В пристанище тихое вшед богомудре, житейских плавании отбег. И волнующимся житейскими, спасительное окормление быв, воспевающим, благословен Бог отец наших.
И ныне. Богородичен. Жезл прорасте Дево от корене Иессеова, всеблаженныи плод, цвет носящи спасеныи. Верою Сыну Твоему вопиющих, отец наших Боже благословен еси. Катавасия.
Песнь 8. Ирмос
Седмь седмицею пещь, халдейскии мучитель, богочестивым люте разжже. Силою же лучшею, спасеных видев. Творцу и Избавителю вопияше, дети благословите, священнии воспойте людие, и превозносите Его во веки.
Запев. Светоносныи твой праздник преблаженне Сергие, исполнь радости и веселия духовнаго, благоухания же и просвещения. Тя имущим заступника и правило иночествующим.
Запев. Молитвою непрестанною к Богу востече, и от туду трисолнечными сиянии озарися. На враги борения поставив. Приводя постных соборы новым житием Христу, вопиющих. Дети благословите, священнии воспойте людие, и превозносите Его во веки.
Слава. В пощениих крепкое, в молитвах не леностное, терпение во искушениих Сергие на земли показа, зовыи, дети благословите, священнии воспойте людие, и превозносите Его во веки.
И ныне. Богородичен. Богородительнице чистая, души моея язвы греховныя и соблазны очисти, ко источником примешающи, яже из ребр рожества Ти, и иже от них потекшим струям. К Тебе бо взываю, и к Тебе прибегаю, и Тя призываю богоблагодатную. Катавасия.
Песнь 9. Ирмос
Удивися убо о сем небо и земли ужасошася концы. Яко Бог явися человеком плотию. И чрево Твое бысть пространнее небес. Тем Тя Богородице, ангел и человек чиноначалия величаем.
Запев с поклоном. Светоявления духовнаго исполнен быв преподобне Сергие. Светилник сияя. Издалеча явися, словесныя зари нам облистая, и пребожественей Троице жилище показася.
Запев. Воистину тя велика учителя, мудре Сергие русским странам Христос дарова. Неложным правлением, правяща отечество свое, и учения сладчаиша меда изливающа. Их же яко от окрина воды, и мы вернии почерпаем независтно.
Слава. Душетленныя страсти победив, и яко пастырь истинныи упасл еси словесное Христово стадо. Еже выну благодатию Духа, и яко цветы райскими питая преподобне.
И ныне. Богородичен. Псалмы тя воспеваем Обрадованная, и немолчно Тя еже радуяся вопием. Ты бо источила еси всем радование. Катавасия.
Отпуст: Господи Исусе Христе, Сыне Божии, молитв ради пречистыя Твоея Матере, и преподобнаго отца нашего Сергия Радонежскаго, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.