Святые праведные Богоотцы Иоаким и Анна имели необычайную веру, смирение, кротость, чистоту, глубокую преданность Богу, который услышал их молитву и даровал им Дочь, и Она стала Матерью Господа. Святая Церковь по достоинству прославила этих благочестивых супругов, причислив их к лику святых. Наши молитвенные обращения к святым супругам Иоакиму и Анне принесут нам обильные благословения от Господа.
Память св. богоотцам Иоакиму и Анне 9 сентября (22 сентября по гражданскому стилю).
——————————————————————
Общее начало и конец всем канонам →
Порядок чтения по уставу
——————————————————————
Тропарь, глас 1-й
Иже в законней сени праведни бывше, Младенец богоданный породиста нам, Иоаким и Анна. Тем же днесь светло торжествует, и весело празднующи божественая церкви, честную вашю память, славящи Отца, воздвигшаго рог спасения нам в дому Божии. (Дважды).
Слава, и ныне (повторяем тропарь).
КАНОН, глас 2-й
Песнь 1. Ирмос
Во глубине потопи древле, фараонитская вся воиньства, преоружена сила. Воплощьжеся слово, преспеющыя грехи потребило есть, преславныи Господь яко прославися.
Запев: Святии праведнии Богоотцы Иоаким и Анна, молите Бога о нас (поклон).
Свещю мысленое солнце облиставшую, плотию от Нея восиявша, добродетели светлостию поживше, родити сподобистася, Анно богомудрая, и Иоаким присноблаженныи.
Запев. Всеобразным зрением к Богу, воистину богоприятная Иоаким и Анна божественая, не уклонно молящася, пречистую Богородицу родиста, преболшю всея твари святостию.
Слава. Превысоку имуще жизнь жития же светлость, всех вкупе родителей быста земных превышша. Нетленну Деву яко родившая, и Богоотца воистину тоя ради бывша.
И ныне. Богородичен. Спасению всему началника, блаженныи Иоаким и Анна славная, чистую и непорочную, и пречистую Богородицу породиста, благочестия сию приемшая воздание.
Катавасия: Избавите от бед рабы своя, святии праведнии Богоотцы Иоаким и Анна, яко вси по Бозе к вам прибегаем, вы бо молите о нас Христа Бога нашего (поклон). Господи помилуй (трижды с поклонами).
Песнь 3. Ирмос
На камени мя веры утверди, разшири уста моя на враги моя. Возвеселибося дух мой, воспевати, несть свята, яко же Бог наш, и несть праведна паче Тебе Господи.
Запев. Неплодствующая и детей лишена, и слезами Содетеля молящи, едину Благословеную сподобися родити, богоприятная Анно зовущи, несть свята разве Тебе Господи.
Запев. Иже сожителницу обогатив, божественую благодать, Иоаким божественыи и богогласныи, Ходатаицу спасения человеком родити сподобися. К Ней же взываем, яко несть непорочны, паче Тебе Владычице.
Слава. Воспоем всечестная супруга, от нея же восия нам Девица, всех тварей превышьши сущи, Бога бо породи. К Нему же возопием, яко несть свята паче Тебе Господи.
И ныне. Богородичен. Неплоднаго поношения избегши, роди Анна Богородицу, Еввино поношение преславно потребльшую, к Ней же взываем, яко несть непорочны паче Тебе Владычице. Катавасия.
Слава, и ныне. Седален, глас 5-й. Иоаким и Анна торжествуета, по Бозе бо достойно благодать обретоста, и родиста плод благоприятен храм, Девую и чистую Матерь Божию, едину благословеную. Молящуся непрестанно, спастися душам нашим.
Песнь 4. Ирмос
Пришествовав от Девы, не ходатай ни ангел, но Ты Сам Господи воплощься, и спасе всего мя человека. Тем вопию Ти, слава силе Твоей.
Запев. Радуяся Девую от неплодове приемлет, Ея же ради неплодие мирьское разрешися, рожеством Девьствующую, Иоаким богомудрыи и богоприятныи.
Запев. Праотец Божии Иоаким, ныне предлагает нам трапезу духовную пребогатыи, яко Божию Матерь, и пренетленную Отроковицу родил есть.
Запев. Умерщвения и тли человеки спасшую, благодать предлагает, бывающую Матерь Божию, слово присносущное приемшую, не сказанно воплощаемое.
Слава. От корене Иессеова, супруг восия, от него же прозябе жезл цвет носящии, всего мя человека облагоухающ миром Божества.
И ныне. Богородичен. Направи мое Богородице житие, повелении божествеными наставляющи, воплощьшагося Слова ис Тебе. И к свету настави Дево Мати Марие Богоневесто. Катавасия.
Песнь 5. Ирмос
Просвещение во тме лежащим, спасение не начаемым, Христе Спасе мой. К Тебе утренюю Царю мирныи, просвети мя сиянием си, иного бо разве Тебе Бога не знаем.
Запев. Целомудреная двойце, чистоты заря сияющи, юже девьства божественым сиянием, украсившую неплодное естество человеческое, нам породи, Анна и Иоаким богоприятная.
Запев. Девическии богоукрашеныи престол, иже всех превышши дланию божественою, целомудрия честныи супруг, богомудрая двоица породи, Анна и Иоаким всехвалная.
Запев. Востоку свыше явльшуся, в наставление заблуждьшим, светоносную дверь, божественыи Иоаким и Анна, богомудрено пожившая, родити Боговидца яве сподобистася.
Слава. Закона новаго богописанную скрижаль, Ея же ради разрешение прегрешением ветхаго закона, божественое Слово прообразова прежде. Яко от камене ныне усече, мановением Вседержитель от неплодове.
И ныне. Богородичен. Зарею Твоею Богомати, уму моему озаритися, омраченному грехом, повели Девице. Не ведения мрак и прегрешении потребляющи, иныя бо паче Тебе хранителницы невем. Катавасия.
Песнь 6. Ирмос
В бездне греховней одержимь, не изследную милосердия Твоего призываю бездну, от тля Боже мя возведи.
Запев. Плодовито семя, иже древле не плоды Анна восприемши. От божественаго сияния Отроковицу родити сподобися, иже всеми тварьми владеющую.
Запев. Ныне не плоды рождьши волею Божиею, покорением прияти, Деву рождьшую кроме плотьския воли, Самому восхотевшу Богу проявленно.
Слава. Озарився Исаия Духом, Иоакима и Анны рожество, свиток нов виде, в нем же написася слово воплощаемо.
И ныне. Богородичен. Таиньству предтечет таиньство, прежде бо не плодящая благодать породи, спасения Ходатаицу, девьства рождением явльшуся нам. Катавасия.
Слава, и ныне. Кондак, глас 2-й. Веселится ныне Анна, безчадства разрешьшися соуз. И питает Пречистую созывающи всех, воспети даровавшаго, от ложесн ея земным, едину Матерь, неискусомужную.
Икос. Молитва купно и воздыхание, неплодства и безчадства, Иоакима и Анны богоприятное, и в уши Господни вниде, и прозябе плод живоносен миру. Ов бо молитву на горе творяще, ова же в саде поношение ношаше, но с радостию, не плоды раждает Богородицу, и Питательницу жизни нашея.
Песнь 7. Ирмос
Богопротивно веление беззаконнующа мучителя, высок пламень вознесло есть. Христос же простер богочтивым детем хлад духовныи, сыи благословен и препрославлен.
Запев. От корене прозябши двойца святая Давыда богомудраго, жезла священнаго, Деву чистую мирови породи, цвет священныи нам Христа, без семене восиявшую.
Запев. Свещю многосветлую Богородицу, Анна божественая, яко златозарен свещник носящи, мир весь просвети божественым светом, и девьства светлыми сияньми.
Слава. Прародителя славная, воплощьшагося за неизреченную милость, Бога Вседержителя, от Отроковицы богомудрыя ваю пребогатая, ныне ми прибегшему к вам, согрешением разрешение испросита.
И ныне. Богородичен. Яко суща пребольшая родителей, всеми владущую тварьми родила еста, Марию пречистую, рождьшую Бога, плотию обложена, нам уподобльшася, за милосердие многое. Катавасия.
Песнь 8. Ирмос
В пещь огнену к детем еврейским сшедшаго, и пламень на хлад преложьшаго Бога, пойте вся дела Господа, и превозносите Его во веки.
Запев. Богатьством кипящия добродетели, славою Божиею украшеную Царицу Деву, Иоаким честныи, и Анна целомудреная родиста, Юже вся поют яко Богородицу.
Запев. Жезл силы нам, ваю ради друга Божия послан бысть, всенепорочная Невеста. Им же посреде враг, божествене одолеваем, коварьствия тех попирающе.
Слава. Оружие нам от Бога благоволения, Тобою супруже священныи даровася. Им же ныне мы вернии красне присно венчаваемся, Бога рождьшая, чистая Дева Мати.
И ныне. Богородичен. Светолитии, из Тебе воплощеннаго нас ради, просвещенная ныне предгрядет дверь, девьства пресветлыми. Слово Ея же ради прииде к земным, воплощься не изреченным словом. Катавасия.
Песнь 9. Ирмос
Безначальна родителя Сын Бог и Господь, воплощься от Девицы нам явися, омрачныя просветити, собрати расточеныя. Тем всехвальную Богородицу величаем.
Запев с поклоном. Единомудрена и единодушна, добродетелию суща, пречистыя Девицы честная родителя, творящыя усердно, прехвальную и славную память ваю священная, спастися молитася.
Запев. Пажить разрушиста смертную славная, животу Матере светло рождьшая, потребльшую сей прилог, и безсмертныя жизни исходатаившую надежда веры ради.
Слава. Яко красное солнце Иоаким, примешаяся светоносней луне Анне, породиста девьственую лучю. Ею же заря божественаго существа, плотию по составу соединьшися, нам восия.
И ныне. Богородичен. Целомудрено поживша, и благочестно Блаженная, ныне пищи несказанней сподобистася, богоявления улучиша, иже от ваю мирови явльшагося, Его же молита, спастися душам нашим. Катавасия.
Отпуст: Господи Исусе Христе, Сыне Божии, молитв ради пречистыя Твоея Матере, и святых праведных Богоотец Иоакима и Анны, и всех ради святых, помилуй и спаси нас, яко Благ и Человеколюбец. Аминь. Господи помилуй
(трижды). Исходные поклоны.