Канон иже во святых отцу нашему Корнилию, Комельскому чудотворцу.
Тропарь. Глас 4.
От юности горящим желанием, Божественыя Любве разжигаемь, житейския молвы оставль преподобне. Ревнитель Антонию Великому бысть, безмолвием и жестоким пребыванием последуя Христу, бдением и молитвами и постом, образ быв своим учеником. Тем же молися Господеви, Корнилие блаженне, спастися душам нашим.
Песнь 1. Ирмос.
Вооружена фараона погрузи, чюдотворяи древле, Моисейскии жезл крестообразно прорази, и раздели море, Израиля же бежаща, пеша ходяща спасе, песнь Богови возсылающа.
Запев с поклоном: Преподобне отче Корнилие, моли Бога о нас.
Слово ми даждь, Слове Божии Светодавче Христе, воспети светлое и светоносное житие Твоего угодника, преподобнаго Корнилия. Молитвами его разори мрак сердца моего, и Твоим светом души озаритися молюся.
Запев. Владычнему любостранству преподобне, подобяся. Сего ради и сам странствовати изволил еси. Тем же и Всевидящее Око видев твое благое изволение, даром чюдес обогати тя Корнилие, яко преславно.
Слава. Трисолнечным сиянием, богомудре, озаряемь, злое, блаженне, бесов шатание, и вражия прещения, ранами болезней, яко же паучину разорил еси, Божиим Духом разжигаемь Корнилие блаженне.
И ныне. Яко Божия Мати, дерзновение имущи к рождьшемуся ис Тебе, Единородному Слову, и Отцу собезначална, и сраслена Духу Святому, молящи непрестай от бед, спасти Всенепорочная, иже Тя Богородицу славящыя.
Катавасия: Избави от бед рабы своя, преподобне отче Корнилие, яко вси по Бозе к тебе прибегаем, ты бо молиши о нас Христа, Бога нашего.
Песнь 3. Ирмос.
Утвержеи небеса в начатце разумом, и землю на водах основав, на камени мя Христе Церковнем утверди. Яко несть свята, паче Тебе Человеколюбче.
Запев. Кто изрещи может землен, твоя болезни отче и подвиги, их же ради достойну мзду наследова от Бога. Был бо еси приятелище Божественому Духу, преподобен и истинен, праведен и непорочен.
Запев. Укрепль ум разумом Божественым, отче Корнилие, и премудростию духовною и словом украшен. Тем привлече многих душа во спасение. И явив иноком известно жития прописание.
Слава. Злобе началник враг, хотя тебе пакость сотворити преподобне Корнилие, лукавых человек на тя вооружает. Тебе приразився постыдевся, Христу бо тя соблюдающу.
И ныне. Херувима и серафима превышьши явилася еси Богородице. Ты бо прият невместимаго Бога, во своем чреве Нескверная. Тем же Тя вси вернии песньми Чистая ублажаем. Катавасия.
Седален. Глас 8. Подобен. Премудрости.
Христовою любовию связав свою душю. Пощения страдании утвердився, злата светлейши. Благочестием облиста. И чистое приятелище бысть Духови. Лукавых дух тму разгнал еси. Тем собрав иночествующих множества, пастырь им бысть, и светилник светел, Корнилие преподобне. Моли Христа Бога, грехом оставление даровати, чтущим любовию святую память твою.
Слава, и ныне. Богородичен. Яко Всенепорочная Невесто Творцу, яко Неискусомужная Мати Избавителя, приятелище яко сущи Утешителя Препетая. Беззакония мя суща скверное обителище, и бесом игралище в разуме бывша. Потщися, и от тех злодействия мя избави, и светлое жилище добродетелей соверши. Светоносная Нетленная, отжени облак страстей, и вышняго причастия сподоби, и Света Невечерняго, молитвами Си.
Песнь 4. Ирмос.
Ты ми Христе Господь, Ты же и сила ми, Ты ми Бог, Ты ми радование, не оставль недра Отча, но милостию Си нашу нищету посетив. Тем с пророком Аввакумом зову, Силе Твоей слава Человеколюбче.
Запев. Светлое твое житие, яко правило известно, всякоя отче добродетели показася, в молитвах и пощениих, и бдениих же и молбах, иже ко Христу Человеколюбцу.
Запев. Сна своима очима не дал еси блаженне Корнилие, ни веждома дремания, дондеже сподобися праведных селения, иже уготова Бог преподобне любящим Его.
Слава. Стеня и плача и сетуя умилением, слезами кропя землю, присно отче богомудре совершаше, дондеже обрете Божественое утешение во граде Божии, и со всеми святыми преподобне вселися.
И ныне. Бога иже ис Тебе воплощеннаго, непреложна моли, иже бе пребывша естеством равна Отцу, и Тебе рождьшей бывша единосущна, прощение согрешением, и душам спасение, поющим Тя верою даровати. Катавасия.
Песнь 5. Ирмос.
Вскую мя отрину, от лица Твоего Свете незаходяи. Покрыла мя есть чюжа тма окаяннаго. Но обрати мя, и к свету заповедей Ти пути моя направи молютися.
Запев. Погасив страсти росою подвиг твоих отче блаженне. Богатно вжегл еси, огнем любве и веры воздержания светилник, и просвещение безстрастия, и дни сын явился еси.
Запев. Исцелением тебе благодать Христос, и в недузех различных дарова, и на духи нечистыя власть мудре. Естество бо отче побеждь. Иже паче естества дарованием сподобися Духа.
Слава. Райскую доброту желая преподобне Корнилие. И тоя ради в слезах и воздыханиих, и бдениих и молитвах свою жизнь проводив. Сего ради и по смерти от Христа чюдесы прославися.
И ныне. Тя стену имуще, и заступлением Ти соблюдаеми. Твоею Божественою славою хвалящеся. Тя ублажаем. Ты бо Пречистая душам нашим источаеши веселие и радование. Катавасия.
Песнь 6. Ирмос.
Очисти мя Спасе, многа бо беззакония моя, из глубины зол возведи мя молюся. К Тебе бо возвах и услыша мя Боже спасения моего.
Запев. Главы врагом мысленым сокрушити молимся, и видимыя под нозе покорити, православному царю нашему, молися преподобне, чтущему любовию святую память твою.
Запев. Жития твоего исправления, и вещания отче, всю обтече отнюд вселенную, и в преславную достигл еси высоту. Богу тя прославльшу, и славно всем сотворшу.
Слава. Нищим строитель, вдовицам предстатель, промысленик сирым, печальным утеха, падшим исправление, обидимым заступник скор был еси, своему отче подобяся учителю.
И ныне. Вознесла еси воистину падшее человеческое существо иже образом Божественым, и Отца равенством, видимым Сыном не изменным. Богомати без семене, во чреве поносивши. Катавасия.
Кондак. глас 8. Господеви от Святыя Девы, восиявшу мирови, и Тому из млада яко ангел послужил еси блаженне. И силою Его пустыню, яко град сотворил еси. Множество же ученик в ней собрал еси, их же богодохновенными ученьми просветил еси. Тем вопием ти, радуися отче наш Корнилие, иноком божественое удобрение.
Икос. Званию Господа своего последовал еси, прилежно блаженне, вся яже в мире красная Его ради преобидев. Тем же вопием ти, радуися яко из млада Христа возлюбивыи, и силою Его претерпе пустынное озлобление усердно. Радуися яко Вышняго помощию бесовскую прелесть поправ. Радуися яко пречестен храм Божия Матере воздвигнув. Радуися яко в нем тобою Бог прославляется. Радися яко собрав ученик множество. Радуися яко с теми прилежно Господеви работал еси. Радуися яко удиви ангелы житием своим. Радуися яко тобою человецы пользовашася. Радуися крестоносному царю похвала. Радуися христолюбивому воинству утвержение. Радуися яко молитвами ти сопротивнии побеждаются. Радуися отче наш Корнилие иноком божественое удобрение.
Песнь 7. Ирмос.
Божия схождения, огнь устыдеся в Вавилоне древле. Сего ради отроцы в пещи радованною ногою, яко во свете ликоваху, поюще, благословен Бог отец наших.
Запев. Истощи тул стрел враг вселукавыи, устрашити тя невозможе. Силою бо Вышняго укрепляемь, и Того помощию вооружаемь преподобне, поя благословен Бог отец наших.
Запев. Будущия жизни взыскав, славу маловременную небрегл еси, и в пустыню вселися блаженне. Со зверми жити изволил еси, поя, благословен Бог отец наших.
Слава. Враг приразився тебе преподобне, разбойники на тя посылает. Постыдевжеся душевнаго ти храма непоколеба. Утвержен бо бе на Камени.
И ныне. Гору Тя пророк Даниил Божественым Духом нарече Дево. Из Нея же Камень без руку отсечеся, сокрушение содея, истуканней прелести. Катавасия.
Песнь 8. Ирмос.
Седмь седмицею пещь, халдейскии мучитель, богочестивым люте разжже. Силою же лучшею, спасеных видев. Творцу и Избавителю вопияше, дети благословите, священнии воспойте людие, и превозносите Его во веки.
Запев. Цареви всех и Богу со святыми предстоя, с ними же Корнилие молися, царю нашему победы на варвары даровати. И грехом оставление, твою память почитающим, и поющим выну священнии воспойте людие, и превозносите Его во веки.
Запев. Господним заповедем известен хранитель был еси. Раздробляя алчущим хлеб свой преподобне. Тающю гладом добродетелей, и душю мою насыти блаженне, поюща любовию, священнии воспойте людие, и превозносите Его во веки.
Слава. Варвар иногда нашествие, и ко обители ти устремившихся, Божественою силою устрашил еси. И ныне на нас мысленых враг устремление, молитвами си разори, поющих, священнии воспойте людие, и превозносите Его во веки.
И ныне. К Богородице все свое упование, имел еси Корнилие, и Тоя призыванием, вражия сети вся претерл еси, и лютых востание. С Нею же преподобне молися, о иже любовию честную ти память чтущих и вопиющих, священнии воспойте людие, и превозносите Его во веки.
Катавасия.
Песнь 9. Ирмос.
Удивися убо о сем Небо и земли ужасошася концы. Яко Бог явися человеком плотию. И чрево Твое бысть пространнее небес. Тем Тя Богородице, ангел и человек чиноначалия величаем.
Запев с поклоном. Бегая славы от человек в пустыню вселися, вся уметы вменив, да Христа единаго приобрящеши. Его же ради пустынная озлобления претерпе, да тленными нетленная измениши Корнилие.
Запев. От места отгонити тя враг покушается, мнихи на убиение твое поощряет Корнилие преподобне. Их же добре учением ти наказал еси, и яко же своя чада присно тех возлюбил еси.
Слава. Незабуди посещая чад своих Корнилие преподобне, иже к раце мощей ти притекающих, и любовию память твою торжествующих, от всех искушении вражиих, избавитися всех Владыце, молися блаженне.
И ныне. Зачала еси Дево без семене, иже всяческая создавшаго Слово Божие, кроме хотения плоти, и без истления родила еси без болезней матерьских. Тем Тя Богородице языком и сердцем исповедающе величаем. Катавасия.