Неделя о Фоме — это следующее воскресение после праздника Святой Пасхи.
——————————————————————
Общее начало и конец всем канонам →
Порядок чтения по уставу
——————————————————————
Тропарь, глас 7-й
Знаменану гробу, живот от гроба восиял еси Христе Боже, и дверем затвореным учеником предста, иже всех воскресение, дух правый теми обновляя нам, по велицей Твоей милости. (Дважды).
Слава, и ныне. (Повторяем тропарь).
КАНОН, глас 1-й
Песнь 1. Ирмос
Поем вси людие от люты работы фараони, люди изменьшему, и во глубине морстей, ногами немокрыми наставльшему, песнь победную, яко прославися.
Запев: Милостиве Господи, услыши молитву раб Своих, молящихся Тебе (поклон).
Днесь просвещение душам, Христос бо от гроба, яко же Солнце восияв тридневно, и мрачную бурю отгнал есть греха нашего: Того воспоем яко прославися.
Запев. (Повторяем стих).
Слава. Царь временом светоносныи день, и днем же царски явлься, дары нося украшает избранныя люди церковныя, непрестанно поющыя, воскресшаго Христа, яко прославися.
И ныне. Ни двери смертныя Христе, ни печати гробныя, ни ключи вратныя Тебе противишася. Но воскрес предстал еси другом си, Владыко, мир даруя, всяк ум преимущии.
Катавасия: Сохрани от бед рабы Своя Милостиве, яко усердно к Тебе прибегаем к милостивому Избавителю и всех Владыце Господу Исусу (поклон). Господи помилуй (трижды с поклонами).
Песнь 3. Ирмос
Утверди мене Христе, на недвижимом камени заповедей Ти, и просвети мя светом лица Твоего. Несть бо свята паче Тебе Человеколюбче.
Запев. Новая за ветхих, и в тленных место нетленная, крестом си Христе совершил еси, нам во обновлении жизни ходити достойно повелел еси.
Запев. (Повторяем стих).
Слава. Во гробе затворен еси со описанною плотию Своею, не описанныи Христе, воскресл еси, и дверем затворенным предстал еси Своим учеником Всесильне.
И ныне. Язвы Своя Христе, яже волею приял еси нас ради, предстал еси учеником Своим сохрань свидетельство Свое, и показал еси славу воскресения. Катавасия.
Седален, глас 6-й. Яко посреди ученик Своих прииде Спасе, мир дая им, прииди и к нам, и спаси нас.
Слава, и ныне. Богородичен. Иже Благословеную нарекии Матерь Себе, прииде на страсть волею Своею, просияв на кресте, взыскати хотя Адама, глаголя ангелом с радуйтемися, яко обретох изгибшую драхму. Иже вся мудре устроивыи, Боже слава Тебе.
Песнь 4. Ирмос
Велия тайна Твоего Христе смотрения: сие убо свыше предзря, прозорливыма очима Аввакум, изыде вопияше Ти, на спасение людей Твоих, Человеколюбче.
Запев. Желчь убо вкусив, древнее вкушение исцеляя. Ныне же со страдовным медом, просвещение даде Христос праотцу, и Своего сладкаго причастия.
Запев. Богатство почерп от сокровища некрадомаго божественаго, Благодателю, копием бо прободеная Ти ребра испытав, премудрости и разума наполняет мира близнец.
Слава. Рукою испытати Человеколюбче прежде всех повелеваеши Фоме простирая неверующу ребра, мирови уверяя Свое Христе тридневное востание.
И ныне. Твой всеблаженныи хвалимь есть язык, о близнече, первее убо благочестно проповеда Живодавца Исуса, Бога же и Господа, и от дуновения и прикосновения исполнися благодати. Катавасия.
Песнь 5. Ирмос
От нощи утренююще хвалим Тя Христе Боже, со Отцем собезначальна, и Спаса душам нашим, мир мирови подаждь Человеколюбче.
Запев. Представ Спас другом скорбящим, и пришествием всю отъемля скорбь, и играти воздвизает Своим воскресением.
Запев. (Повторяем стих).
Слава. О истинному похваляемому, Фомину страшному начинанию, дерзостне бо осяза ребра, божественным огнем блистающая.
И ныне. Неверие Фомино, вере родительно нам показал еси, Ты бо мудростию Своею промышляеши полезное Христе, яко Человеколюбец. Катавасия.
Песнь 6. Ирмос
Пророка спасл еси от кита Человеколюбче, и мене из глубины греховныя возведи, молютися.
Запев. Фомы не оставил еси Владыко, погружаема глубиною неверия, длани простерл на испытание.
Запев. (Повторяем стих).
Слава. Спас наш глаголаше, осязавше Мя видите кости и плоть носяща, Аз не пременихся.
И ныне. Ребра осязав неверовавыи Фома, несущу Ему в первый вход Твой Человеколюбче, Спасе наш. Катавасия.
Слава, и ныне. Кондак, глас 8-й. Любопытною десницею, жизноподательная Твоя ребра, Фома испытал есть Христе Боже: затвореным бо дверем яко вниде, с прочими апостолы вопияше, Господь еси и Бог мой.
Икос. Кто сохрани ученичу длань тогда не опалиму, егда ко огненым ребром приступи Господним; кто даде ей дерзость, и возможе осязати пламенную кость, всеми не осязаемую; аще бо не бы ребро силу подало бренней деснице, како имяше осязати, страстию поколебавшаго вышния и нижния; сия благодать Фоме дадеся, еже сия осязати, Христови же вопити, Господь еси и Бог мой.
Песнь 7. Ирмос
Телу служити мусикийскому согласию созывающу люди: от песней сионских поюще отечески отроцы Давыдовы, мучителево разориша злочестивое веление, и пламень в росу преложше, песнь воспевающе, превозносимыи отцем Бог благословен еси.
Запев. Яко первыи есть днем и начальныи, светоносныи сей, вонь же радоватися достойно, новым и божественым людем с трепетом: приносит бо века образ, яко осмицы совершая будущаго. Вонь же воспеваем, превозносимыи отцем Бог благословен еси.
Запев. Един дерзнувыи, и неверною верою облагодатив нас Фома близнец, решит убо мрачное неведение всем концем верным неверием. Себе же венец плетет яве, глаголя, Ты еси Господь, превозносимыи отцем Бог, благословен еси.
Слава. Не туне усумневся Фома, востание Твое не видев, но верно, явствено тщашеся показати то Христе, всем языком. Тем же убо неверием увери всех, и научи глаголати Тебе, Господь превозносимыи отцем Бог, благословен еси.
И ныне. Со страхом руку Фома в ребра Твоя живоносная Христе, внутрь с трепетом положи, и действом Спасе сугубым, обою естеству, иже в Тебе совокупленою несмесно уверяяся, и верою взываше глаголя, Ты еси Господь превозносимыи отцем Бог, благословен еси. Катавасия.
Песнь 8. Ирмос
В пламени огнене горящия пещи, сохраньшаго дети, и во образе ангела сшедшаго к ним, пойте Господа, и превозносите Его во веки.
Запев. Вожделев Твоего радостнаго видения, прежде неверовавыи Фома, сподобльжеся Того, Бога и Господа Тя нарицаше Владыко, Его же превозносим во веки.
Запев. (Повторяем стих).
Слава. Укрепльшаго Фомино неверие, и показавшаго ребра, и Того дланию осязаема, пойте Господа, и превозносите Его во веки.
И ныне. Твое тайное сокровенное сокровище, нам отверзе Фома: богословит бо языком богоносным, пойте Господа глаголаше, и превозносите Его во веки. Катавасия.
Песнь 9. Ирмос
Тебе светлую свещу, и Матерь Света, всекоренную славу, и вышшую всех тварей, песньми величаем.
Запев с поклоном. В Твой светлыи день и пресветлыи Христе, в всесветлей благодати, в ней же красен добротою учеником си предста, в песнех величаем.
Запев. (Повторяем стих).
Слава. Твоя бренною дланию осязаема ребра, и не опаливша сию огнем невещественаго Божественаго Существа, в песнех величаем.
И ныне. Тя иже яко Бога из гроба восиявшаго Христа, не очима видевше, но сердечною любовию веровавше, песньми величаем. Катавасия.
Отпуст: Вшедыи ко учеником дверем затвореным, и Фому уверивыи, Господи Исусе Христе, Сыне Божии, молитв ради пречистыя Ти Матере, святых славных и всехвальных апостол, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.