Канон святой великомученице Екатерине

Русская вера, 2017

Святая великомученица Екатерина пострадала за Христа в IV веке в Египте. Она была дочерью правителя Александрии, обладала необычайной красотой, получила блестящее образование. Через свою мать — тайную христианку — юная Екатерина познакомилась с одним духовным старцем и через него познала Христа. Святая мученица Екатерина исповедала свою веру перед императором Максимианом, ярым гонителем христиан. Своей проповедью она обратила многих язычников ко Христу. За дерзновенное исповедание и проповедь святую Екатерину мучили, затем отсекли голову мечом.

Будем усердно молиться св. великомученице Екатерине, чтобы она в своих благодатных молитвах просила Господа укрепить нашу веру и сподобить нас избавиться от вечной муки. Память св. великомученице Екатерине 24 ноября (7 декабря по гражданскому стилю).
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 4-й

Добродетельми яко лучами солнечными просветила еси неверных мудрецов. И яко же пресветлая луна ходящим в нощи, неверия тму отгнала еси. И царицу уверила еси, богозванная невесто блаженная Екатерино. Востече в небесныи чертог, желание имущи к прекрасному Жениху своему Христу. И от Него царским венцем венчася. Ему же со ангелы предстоя, о нас молися творящих всечестную память твою. (Дважды).

Слава, и ныне. Богородичен. Иже от века утаенное, и ангелом несведомое таиньство. Тобою Богородице земным явися, Бог в неразмесне снятии воплощаемь. И крест волею нас ради восприим. Им же воскресив первозданнаго, и спасе от смерти душа наша.
 

КАНОН, глас 8-й
 

Песнь 1. Ирмос

Вооружена фараона погрузи чюдотворяи древле, Моисейскии жезл крестообразно прорази, и раздели море. Израиля же бежаща пеша ходяща спасе, песнь Богови возсылающа.

Запев: Святая великомученице Екатерино, моли Бога о нас (поклон).

Екатерины премудрыя мученицы молитвами Христе, омраченое око души моея просвети. Зарю ми дая Владыко Твоего светолития. Душетленных согрешеней моих, весь мрак потребляющю.

Запев. Направляема владычними премудрая божествеными повелении. И Того любовию разжигаема, потече к подвигом тщащися. И мучителю разум Екатерино устрашила еси, словом и мудростию и благодатию.

Запев. Окормляема дланию славная крепкою Христовою, идольския бури избегла еси мученице. Немокрено преплывши, крестным ветрилом, и божествеными ветры духовными, песнь Богови воспевающи.

Слава. Радующися девьствеными добротами, Екатерино мудрая. И божественыи разум с небесе имущи. Лжеименитому разуму, благодерзновенно и мужествено, предстателей посрамила еси. Сих державне победивши.

И ныне. Богородичен. Иже Богородицу Тя проповедает Пречистая, всякия ереси отриновение имать. Плоть бо бывша неизменно родила еси, превышьша всякой Богородительнице твари, Слово Божие присносущное.

Катавасия: Избави от бед рабы своя, святая великомученице Екатерино, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

Утверждеи небеса в начатце разумом, и землю на водах основав, на камени мя Христе церковнем утверди. Яко несть свят паче Тебе Человеколюбче.

Запев. Волными ти устремлении, вшедши ко страданию волею Христа подражающи, и победивши светло тме миродержьца, и венценосица, явися, Екатерино богоприятная.

Запев. Крепостию ума обличила еси мучителя, в безбожную глубину впадшая. Витийствующи яве богоразумия повелении, Божиею мудростию мученице украшаема всехвалная.

Слава. Равнобожие во уши Еввине пошептав, отроковицею младою ныне попран бысть. Оружием бо крестным оградившися, посрами Екатерино мученица, без меры того хвалящася.

И ныне. Богородичен. Умерщвенаго ми ума, животным действом ис Тебе явльшуся мирови воздвигни. Язвы и струпы потребляющи греховныя едина Богородителнице пренепорочная. Катавасия.

Седален, глас 4-й. Жениха своего Христа возлюбивши, свещю свою светлу уготовльши, добродетельми просиявши славная. Тем же вниде с Ним в чертог, и венец страдания от Него приемши. От бед избави нас, совершающих Екатерино память твою.

Слава, и ныне. Богородичен. Яко Деву едину в женах, Тя без семене рождьшую Бога плотию, вси ублажаем роди человечестии. Огнь бо вселися в Тя божественыи. И яко младенца доиши Зиждителя и Господа. Тем же ангельскии собор и человеческии род, достойно славим пресвятое рожество Твое. И согласно вопием Ти: моли Христа Бога, согрешением оставление даровати, воспевающим достойно славу Твою.
 

Песнь 4. Ирмос

Ты ми Христе Господь, Ты же и сила ми, Ты ми Бог, Ты ми радование, не оставль недра Отча, но милостию си нашу нищету посетив. Тем с пророком Аввакумом зову: силе Твоей слава Человеколюбче.

Запев. Страдальческое Екатерино противление показа мученице приснопамятная, вражебнику зело терпиши противляющуся. И того поправши ногама красныма, крестною силою страстотерпице, мучеником похвала.

Запев. Невеста Христова Екатерино всебогатая явися. Божествеными красотами, световидными лучами просвещаема, и добротою сияющи. Тем же и веселящися поем Владыце: силе Твоей слава Человеколюбче.

Запев. Мучительскую гордыню низложила еси. И божественым словом премудрости твоея, яко от глубины прелестнаго бесослужения прельщаемыя исхитила еси. Научающи звати Христови поющи: силе Твоей слава Человеколюбче.

Слава. Благославное и светоносное торжество славныя памяти, всехвалныя, крепко шатание вражие поправши, яко солнце восия. В нем же велегласно Владыце вопием: силе Твоей слава Человеколюбче.

И ныне. Богородичен. Ныне крепость низложи, небрегущим образа Отроковице поклонениа, Тебе Чистыя, и паче ума ис Тебе воплощеннаго, и мира всего просвещьшаго, и всех святых. Верою же чтущих просвети Всепетая. Катавасия.
 

Песнь 5. Ирмос

Вскую мя отрину от лица Твоего Свете незаходяи, покрыла мя есть чюжа тма окаяннаго. Но обратив мя, к свету заповедей Ти, пути моя направи молютися.

Запев. Любовию распалаема мученице славная Владыки своего. И ищущи Того недомыслимую доброту видети, самовольным нравом, ранам себе вдала еси. Девьствеными сияющи благодатьми.

Запев. Страстьми священными отроковице добрая дево, украсивши себе благолепно, взыде к небесному Христову чертогу. И ныне светло своему Жениху весело сочетася всебогатая.

Слава. Отроковица всесветлая явися, возлюбивши Единаго желаемаго, и вслед Того крепкое течение совершивши. В воню мира твоего разумнаго источившагося, вопияше потеку Женише мой.

И ныне. Богородичен. Истинную Богородицу Тя вси уведевше пречистая Владычице, ис Тебе рождьшагося Бога Слова, ведяще проповедаем во двою существу. Хотении самовластными познаваема Мати богоневестная. Катавасия.
 

Песнь 6. Ирмос

Бездна греховная, и прегрешении буря мя смущает, и во глубину нуждную реет нечаяния. Но Сам крепкую руку ми простри яко Петрови, от тля Боже мой возведи мя.

Запев. Всю тя добротою сияющю девьства зарею, мученическою отроковице обагрена кровию, благое Слово пречистое, в чертозех небесных тя всели.

Запев. Возможе крестом, мучительскую разрушити державу, и мирския мудрости обличивше суетие. Богодухновеннаго учения точащи повеления велемудреная, Екатерино приснопамятная.

Слава. Лестию прежде, Адама райския пищи изгнавшаго, ранам болезни крепко терпящи, низложила еси на землю мученице преславная и венцы Царствия венчася.

И ныне. Богородичен. Милостива ми Судию Сына Своего Богородице Дево, Твоими мольбами быти в день Суда, и избавителя же лютых Мати сотвори. К Тебе бо единой упование возлагаю. Катавасия.

Слава, и ныне. Кондак, глас 3-й. Витийствующи днесь Екатерина мученица, и витиям обличи умовредную ересь. Ангел бо с Небесе к той прииде, силу от Вышняго принесе. Юже приемши мужески рече: Христос есть мучеником похвала.

Икос. Светом Твоим Христе просвети сердце мое и Духом Твоим разшири ныне уста моя, воспети достойно Твою страстотерпицу. Та бо воистину словом и благодатию, мудростию и Духом ограждьшися всем оружием Троицы честныя, множество обличи витийствующих, в суете хвалящихся. И сих приведе Тебе Богови своему, Владыце и Спасу всех вопиющи: Христос есть мучеником утверждение.
 

Песнь 7. Ирмос

Божия схождения огнь устыдеся в Вавилоне древле. Сего ради отроцы в пещи радованною ногою яко во свете ликоваху. Поюще: благословен Бог отец наших.

Запев. Мучеником похвала, благочестия мученице бысть. Светлому ти Жениху, мученик множество приводящи Христови. С ними же зовеши всехвальная, поющи: благословен Бог отец наших.

Запев. Слово твое премудрое ко спасению многия исхити, от идольския прелести. И светоносны яви мученики, велегласно с тобою зовущих: благословен Бог отец наших.

Слава. Отроковица вслед Тебе идущи приведеся, мечем усечена, Твою подражающи страсть пречистую. И Тебе Зиждителю вопиющи и глаголющи: благословен Бог отец наших.

И ныне. Богородичен. Святых Святый, в Тя священно вселися чистая Богородице Дево. Воплощен ис Тебе раждается за спасение, верою зовущих: благословен Бог отец наших. Катавасия.
 

Песнь 8. Ирмос

Седмь седмицею пещь, халдейскии мучитель богочестивым люте разжже. Силою же лучшею спасеных видев, Творцу и Избавителю вопияше: дети благословите, священнии воспойте людие, и превозносите Его во веки.

Запев. Твоими учении царица верующи, притече ко благочестию. И крепко претерпевши болезненое чювьство, и Царствию Небесному непременному явьствено сподобися. Вопиющи Владыце: священнии благословите людие, и превозносите Его во веки.

Запев. С мученики да будут верных прошения, страстотерпица бо Христови предстоит, просящи болшая, и спасению ходатайственая, всесвятую и честную ея память усердно совершающим, и верою поющым: людие превозносите Его во веки.

Запев. Отверз приемлет тя Жених премудрая двери райския, и в чертозе всесветлем жити сотвори. И Царствия причастницу, яко приобщницу страстем являет. Ему же ныне предстоящи Царева дщи, светло украшена, и нас не забуди.

Слава. Ухищреными глаголы прилежаше мучитель, и препреными словесы люто льстя, ослабити твою крепость уповав славная. Но уневеститися Христу хотящи, вопияше Владыце: священнии воспойте людие, и превозносите Его во веки.

И ныне. Богородичен. Священнейши бысть Богородице пренепорочная, премирнаго чина ангельскаго. Сих бо родила еси Содетеля и Господа, от девьственыя и неискусобрачныя утробы, в две существе, несовратно и непреложно. Единем же составом Бога воплощенна. Катавасия.
 

Песнь 9. Ирмос

Удивися убо о сем Небо, и земли ужасошася концы, яко Бог явися человеком плотию. И чрево же Твое бысть пространнее Небес. Тем Тя Богородице ангел и человек чиноначалия величаем.

Запев с поклоном. Преставися к чертогам световидным, невестными украшена одеянии. Девьственую имущи свещу в своей деснице. В другой же держащи отсеченую ти главу. И ныне предстоиши Христови своему Жениху, тебе поющыя сохрани.

Запев. Прията бысть твоя богомудрая молитва. Ибо верою твое нарицающих имя честная, спасает Владыка от искушении, и благое здравие подавает. И недуг всяческих, душам же и телом. Тем же тя веселящеся, Екатерино ублажаем.

Запев. Пристала еси тихому пристанищу благосприятно же и легко, море мирское мученице преплывши, треволнении премудрая. Богатьство многообразное, Христови приносящи дево множество мученик, Екатерино всеблаженная.

Слава. В чертозех небесных ныне внутрь с девьственым множеством ликоствующи, мученическими озаряема лучами Екатерино премудрая. Разреши согрешении моих пленицу, усердно молящи всех Благодателя. За Него же кровь свою излияла еси.

И ныне. Богородичен. Явися о Дево Мати Божия, паче естества рождьши в телеси благое Слово, еже от сердца Своего Отец отрыгну, прежде всех век яко Благ. Его же ныне и телес вышша разумевшем, аще в тело облечеся. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и святыя великомученицы Екатерины, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги