Св. Филипп, митрополит Московский, был бесстрашным защитником правды и за это претерпел мученическую кончину. Будем прославлять в своих молитвах угодника Божия святителя Филиппа за его твердую решимость до конца своей жизни быть непоколебимым борцом за правду. Будем просить в молитвах святого мученика, чтобы он научил нас жить по правде Божией, и когда потребуется нам доказать перед людьми свою правду, чтобы святой страстотерпец Филипп неотступно помогал нам в этом. Память святителю Филиппу, митрополиту Московскому 23 декабря (5 января по гражданскому стилю).
——————————————————————
Общее начало и конец всем канонам →
Порядок чтения по уставу
——————————————————————
Тропарь, глас 8-й
Первопрестолником приемниче, столп православия, истине поборниче, новыи исповедниче, святителю Филиппе, положивыи душу за Христово Евангелие. Тем же яко имыи дерзновение к нему, моли за державу нашу, за град же и люди, почитающих достойно святую память твою. (Дважды).
Слава, и ныне. Богородичен. Иже нас ради рождеися от Девы, и распятие претерпев благии, испровергии смертию смерть, и воскресение явлеи яко Бог, не презри их же созда рукою Своею, яви человеколюбие Свое Милостиве, приими рождьшую Тя Богородицу молящуюся за ны, и спаси Спасе наш люди согрешьшыя.
КАНОН, глас 8-й
Песнь 1. Ирмос
Посеченыи несекомаго пресече, и виде солнце землю, си же несть видело, лютаго врага вода потопила есть. И непроходимо пройде Израиль. Песнь же воспевашеся, Господеви поем, славно бо прославися.
Запев: Святителю Христов Филиппе, моли Бога о нас (поклон).
Агньче Божии и слове, светозарением Святаго твоего Духа, мрачному уму моему светоносную лучу подаждь. И слово ми вдохни восхвалити, иже сам избра и прият, верх страдания священнаго Филиппа.
Запев. Благодать святе божественую рабу своему подаждь, и радости ми исполни душу, похвалити житие твое Филиппе святителю. Им же вся возвесели подвизався. Господеви воспевая, славно бо прославися.
Слава. Великих добродетелей, светозарением сияюща твоя детели преподобне. Постыдешася царие крепкаго ти разума, и предел языка твоего не поколебася. Господеви поя, славно бо прославися.
И ныне. Богородичен. Глаголы богогласных проповедник, о Тебе Богомати исполнишася. Се бо роди Дево младо Отроча, Адама древняго старейша, и сопрестолна родителю. Миру всему на спасение, и тлению изменение.
Катавасия: Избави от бед рабы своя, святителю Христов Филиппе, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
Песнь 3. Ирмос
Утвердися сердце мое о Господе, вознесеся рог мой о Бозе моем. Разширишася на враги моя уста моя. Возвеселихся о спасении Твоем.
Запев. Добродетелей на гору востече, и в мрак видения вниде святителю Филиппе. И разуме елико вместил еси, не постижимаго естеством. Просвещения исполни быв отче, прием божественую благодать.
Запев. Единаго Бога добротою искии. Едину Его получити славу желая блаженне. Славу же и честь земнаго пребывания, яко преходящую оставил еси, яко угодник просия всех Владыки Христа.
Слава. Желанием Духа, плоти желание увядил еси. И семя блаженне обручил еси, сожителницу чистоту. От нея же чада тебе родишася, вся добродетели приснославне, чадо тя содевающе не вещественому свету.
И ныне. Богородичен. Змия разумнаго умертвила еси, умертвившаго Адама в породе, и Евве праматери составльшаго печаль. Живота прозябши Дево чистая, и от истления нас свободи. Бог бо из Твоих ложесн прошед неизреченно. Катавасия.
Седален, глас 8-й. Яко апостолу избранному, тезоименит отче и подражатель. Беды претерпел еси и гонения. Ревность воображая пророка Илии, и крестителя. Мужески изобличил еси беззаконнующия. И престол божествене управил еси, равно течение скончав. Яко милоть тело свое на земли оставль, испущаеши миро благоухания арамат. И яко дождь изливаеши духовно напояя тайно бразды сердец наших, Филиппе святителю. Моли Христа Бога, грехов оставление даровати, чтущим любовию святую память твою.
Слава, и ныне. Богородичен. Яко всенепорочная Невеста Творцу, яко неискусомужная Мати Избавителя, приятелище, яко сущи Утешителя Всепетая, беззаконию мя суща скверно жилище, и бесом игралище в разуме бывша, потщися сих злодейства мя избавити, свету жилище добродетелми управивши, светоприемнице нетленная. Отжени облак страстей, и вышняго причастия сподоби, и свету невечернему, молитвами си.
Песнь 4. Ирмос
Пророк Аввакум, мысленыма очима провиде Господи, пришествие Твое. Тем и вопияше от юга приидет Бог. Слава силе Твоей, слава Христе пришествию Твоему.
Запев. Злобою живущии, на тя незлобиваго агньца яко дивии зверие восташа. Словесы твоими яко осном стречеми не терпяще. Завистию поощряеми, святителю богомудре.
Запев. Имея тя заступника мир весь и помощника во бранех, яко поборника верна и скораго предстателя. К твоей бо пастве пририщущих, напастей и бед изимаеши, священными ти молитвами.
Слава. Исполнив добрыя подвиги тезоимените. Нетленнаго богомудре сподобися безсмерьтия. Идеже радуяся венца победе взял еси. Тем вопияше, слава силе Твоей, слава Христе пришествию Твоему.
И ныне. Богородичен. Крепость всем врагом низложи Мати Божия, оскорбляющих воспевающих Тя, яко рождьши Господа славы. Невредимо Твое стадо спасай от злых приражении, яко да подолгу Тя ублажаем. Катавасия.
Песнь 5. Ирмос
Мрак души моея отжени светодавче Христе Боже. Зачалобытную тму, изгнав бездныя. И даруй ми свет повелении Твоих Слове, да утренюя прославляю Тя.
Запев. Луча праведнаго солнца явися мирови. Светлостьми добродетелей, предстательство твое святителю Филиппе, разоряя облак нашедших бед. Тя и ныне поющия в мире сохрани, и прослави я красотою и просвети.
Запев. Мечь обоюду остр язык твой показася, в Христов страх вооружився блаженне, разумно изообличив начальствующия. Во свидетельство Христа всех Царя, виновна на среду приводя, и божественых его ученик.
Слава. Нов явился еси ревностию, яко же вторыи Моисей. Не знамении страшными удивляя, но божественых словес учении наставляя к тихому пристанищу новаго Израиля, страстнаго Египта изводя.
И ныне. Богородичен. Облак разумныи Тя именуем, ис Тебе бо Христос восия Непорочная, и пространнейшу Тя небес показа. Сего не искусомужно родила еси Чистая, воплощенна за милосердие неисповедимое. Катавасия.
Песнь 6. Ирмос
Иону в ките Господи единаго вселил еси. Мене же связаннаго во мрежах вражиях, яко от тля того спасл еси.
Запев. Промышление общее творя, иже бе душа и сердце единославне взываше, во Христове вере пребывающим. Языческая же со отъятием, отреваше предания. И разделения бежати мудре научил еси.
Запев. Ревностию Христовою ярость поострив, яко непреклонен слышанию речение о таковых. Свидетельство велие известуя, от апостольских речении и пророк, яко Христовым заповедем делатель.
Слава. Светоносную лучю иже во мраце жития сущим, святителю Филиппе. Видим тя яко свещю неугасимую. С невещественым бо беседова светом, вся освещающа концы. И пияньство лютых отъемлюща.
И ныне. Богородичен. Тя иногда написа скрыжаль богообразне, во пророцех Моисей. Свещник же света и сень, и жезл процветшии Всенепорочная. И ручку манну носящу, ею же возведохомся от земли к высоте. Катавасия.
Слава, и ныне. Кондак, глас 3-й. Православию наставника, и истине согласника. Златоустаго ревнителя, русскаго светилника, Филиппа премудраго восхвалим. В пищи словес своих разумно чада своя питая. Языком убо хваление поя, устнама же пение вещая, яко таинник Божия благодати.
Икос. Приидите любострадальцы, пением и песньми духовными память совершающе, божествене возвеселимся. Время нашего веселия, большее и пребывающее трижнение наста. И приемлюще страстем разрешения дар. Новыи бо столп огнен явися, попаляя беззаконнующия главы. Верных же просвещая душа, к вере богоразумия. И в божественыи град вышнии Иеросалим, яко другаго Израиля вводя. Яко ученик Божия благодати.
Песнь 7. Ирмос
На поле молебне иногда мучитель пещь постави, на мучение богомудрым. В ней же три отроцы песнословляху единаго Бога. Трие воспевааху глаголюще, отец наших Боже благословен еси.
Запев. Украшен боголепно Господеви предста, добродетельными подвиги. Венец же нося страдания испещрен кровными каплями, святителю Филиппе. Тем же совершающих светоносную память твою присно поминай, и поющих. Отец наших Боже благословен еси.
Запев. Фараонит мысленых враг ополчения блаженне избег, легко пришел еси к горним. Тамо водворяяся идеже почесть славы получив терпения, во свете праведных, в радовании святых. Воспевая, отец наших Боже благословен еси.
Слава. Хвалят тя блажаще любовию, иже притичущии к раце твоей блаженне, тоя бо целующе независтно благодать приемлем. Яко прикосновением болезнь очную исцелил еси, и терзание зубом облегчи. Поющим, отец наших Боже благословен еси.
И ныне. Богородичен. От любве душевныя вопию Ти Владычице, пресветлаго солнца облаче, спасеная двери, небесная врата, лествице мысленая, всех християн мольбу приими Тебе блажащих, надежду душам нашим. И Сыну Твоему зовущих, отец наших Боже благословен еси. Катавасия.
Песнь 8. Ирмос
Покрываяи водами превыспреняя Своя, полагаяи морю предел песок, и содержаи землю. Тя поет солнце, Тя славит луна, Тебе приносит хвалу вся тварь, яко Содетелю всем во веки.
Запев. Целиши независтно, верно призывающия Тя. Яко представ абие разслаблена воставил еси. И страждущему ятро прикосновением ручным исцелил еси. Унынием скорбяща явлением своим в радость претворил еси. Присно действуя блаженне всем во веки.
Запев. Честь многоценную твоему верху страдания венец, яко победоносцу живоносною десницею Зиждитель возложи всебогате. Тело же твое соблюде невредимо от боку земленую, испущающе благоухания арамат. Сице тя прослави подвигоположник, во вся веки.
Слава. Шатания брани межеусобныя укроти. И разсвирепеющия волки на стадо твое блаженне, молитвеною си палицею далече отжени. И державе нашей скипетры державно устрой. И востания язык во смирение покори. Да яко предстателя тя воспеваем во веки.
И ныне. Богородичен. Щитом веры храм Твой святыи, Богородице Дево сохрани. И в нем славословящих Тя купно славы Своея сподоби. И нахождения варварскаго и томления их избави. Ума нашего волнения укроти, молитвою си Препетая. Катавасия.
Песнь 9. Ирмос
Благословен Господь Бог Израилев, воздвигнувыи рог спасения нашего, в дому Давыдове отрока Своего. В них же посети нас восток свыше. И направил ны есть на путь мирен.
Запев с поклоном. Едино естество Троицы, безмерную силу богословил еси. И суетных служения дерзновенно всемудре изобличил еси. И божествеными наказании укрепль. Ангелом сожителниче святителю Филиппе, память твою празднующих в мире соблюди.
Запев. Юношам немование сродно присвоение бывает, не яко достойно суще. Приими и от нас нынешнее благодарение о страстотерьпче. Подейству убо не наше, но ангельско есть, и в лепоту восхвалити тя. Мы же от усердия дерзнухом, елико возмогохом.
Слава. Яко апостолом сопрестолен, и мучеником сликовен, святителем равночестен, страстотерпче Филиппе, предстательством твоим поющих в мире сохрани. И державу нашу рог возвыси. Варварская же шатания низложи. Да радуяся поем величия ти.
И ныне. Богородичен. О света приятелище, богорадованная Владычице. Святителем воистину утверждение. И преподобным всем похваление. Спаси и нас от бед и обстоянии, и язык нашествия, воспевающих Тя Многопетая. Катавасия.
Отпуст: Господи Исусе Христе, Сыне Божии, молитв ради пречистыя Твоея Матере, и иже во святых отца нашего Филиппа, митрополита Московскаго и всея Руси, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.