Канон преподобному (общий)

Русская вера, 2017

Великую духовную пользу получит христианин, если будет молиться каноны святым, память которых Св. Церковь вспоминает в текущий день. Для тех верующих, у кого нет канонов тем или иным святым, можно молиться данный канон преподобному, подставляя в текст общего канона имя того святого, кому молишься канон. Каноны тем или иным святым можно молиться независимо от того, вспоминает ли Святая Церковь их память в данный день или нет. Если усердно молиться святым, они всегда будут нам помощниками в достижении спасения.
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 8-й

О тебе отче (имя рек), известен бысть спасения образ. Восприим бо крест последовал еси Христу. Творяше же и учаше, еже презрети плоть, преходит бо, прилежати же о души вещи безсмертней. Тем же и со ангелы радуется преподобне дух твой. (Дважды).

Слава, и ныне. Богородичен. Иже нас ради рождеися от Девы, и распятие претерпев Благии, испровергии смертию смерть, и воскресение явлеи яко Бог. Не презри их же созда рукою Своею, яви человеколюбие Свое Милостиве. Приими рождьшую Тя Богородицу молящуюся за ны, и спаси Спасе наш люди согрешьшыя.
 

КАНОН, глас 8-й
 

Песнь 1. Ирмос

Воду прошед яко по суху, из египетска зла избежав, израильтянин вопияше, Избавителю Богу нашему поем.

Запев: Преподобне отче (имя рек), моли Бога о нас (поклон).

Благими нравы украсився, Христови прилепился еси от юности, плотьския страсти умертвив воздержанием. И к животу преподобне преставися.

Запев. Глаголом и законом Божиим исполнитель был еси, исполнися отче премудре, божественых даров и чюдес. И всем лучи богатно испустил еси.

Запев. Крепостию Христа возмогл еси, державу низложил еси и силу вражию. И похвалу победную почести прият преподобне чюдесными сиянии.

Слава. Совесть имел еси благу, и око сердечное взирающее к Богу, тем же внят молитве твоей премудре, и со преподобными сочтал тя есть.

И ныне. Богородичен. Страсти плоти моея, и ума моего двизания неподобная утоли, молю Тя пречистая Дево. И исправи мя заблуждьшаго умом.

Катавасия: Избави от бед рабы своя, преподобне отче (имя рек), яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

Ты еси утвержение притекающим к Тебе Господи. Ты же свет омраченым, и поет Тя дух мой.

Запев. Весь прилежа Вседержителеви, преподобне отче премудре, всея бесовския злобы избегл еси.

Запев. Высотою смирения украшаемь, свергл еси на землю велехвальнаго, изрядными делы твоими.

Запев. Плотию обложен отче премудре, смирил еси превзятую выю нечестиваго, смирением словес твоих.

Слава. Имея поспешествующу ти Божию силу премудре. Яко чюден чюдеса источаеши, и отгониши недуги.

И ныне. Богородичен. В ложесна Твоя воплощаемь Всенепорочная, вселися Зиждитель, на благодеяние верно поющим Тя. Катавасия.

Седален, глас 4-й. Страстное покорил еси плотьское мудрование, и горшее поработил еси лучшему, отче (имя рек) преславне. Сокрушил еси бесовския козни постом, восия в мире яко луча солнечная сиянии твоих добродетелей. Сего ради тя воспеваем.

Слава, и ныне. Богородичен. Стена непобедимая нам христианом еси Богородице Дево. К Тебе бо прибегающе невредими пребываем. И паки согрешающе, имамы Тя молитвеницу. Тем благодаряще вопием Ти, радуися Обрадованная Господь с Тобою.
 

Песнь 4. Ирмос

Услышах Господи смотрения Твоего таиньство, разумех дела Твоя, и прославих Твое Божество.

Запев. Содеяв преславне душу свою храм Святому Духу, и бысть наследник Горнему Царствию с вышними силами.

Запев. Многоболезненыя страсти всегда врачуеши, приступающым к тебе. Благодать бо преподобне приим от Господа, содевати знамения и чюдеса.

Слава. Краснейши прозябением отче в дому Божии прозябл еси, добродетельми украшен и плоды чюдесными облагоухаемь.

И ныне. Богородичен. Нива духовная, яко же из бразды клас изнесла еси, всю тварь питающаго, всяческих Бога присно Дево. Катавасия.
 

Песнь 5. Ирмос

Утренююще вопием Ти, Господи спаси ны. Ты бо еси Бог наш, разве бо Тебе иного не знаем.

Запев. Умом очищеном, преславне зриши доброту неизреченную Христа, всяческим Бога нашего.

Запев. Яко же Илия на колеснице отче добродетельми своими возшел еси на небо, Духом облегчеваемь.

Слава. Стягнув тело свое воздержанием, и чистотою, в вышняя селения к широте отче достигл еси.

И ныне. Богородичен. Исцели недугующаго ума моего омрачение, врача рождьшая Христа, всенепорочная Владычице. Катавасия.
 

Песнь 6. Ирмос

Молитву пролию ко Господу, и Тому возвещу печаль мою, яко зол душа моя наполнися, и живот мой аду приближися. Но молюся яко Иона, от тли Боже мой возведи мя.

Запев. Лукавыи умертвися змий, священными твоими молитвами богоблаженне. И от того разрешаются злобы, иже знамения от тебе испросившии. Еси бо угодник Божии всесветел, познан бысть верен.

Запев. Обновив прилежным ралом душу свою, священныи отче, добродетельная в ня ввергл еси премудрено, многоплодная семена. И пожал еси, многоразличных исцелении богатыя класы.

Слава. Крепостию духа отче возмог, державу вражию и силу низложил еси. И похвалу победную почести приял еси преподобне, чюдесными сиянии.

И ныне. Богородичен. Господь с Тобою Пречистая, яко же изволил есть быв Отроковице, всех нас от области льстиваго, ходатайством Твоим избавил есть. Тем же Тя ныне по долгу родове родов ублажаем. Катавасия.

Слава, и ныне. Кондак, глас 2-й. Чистотою душевною божествено вооружився, и непрестанныя молитвы, яко копие вручив крепко, пробол еси бесовская ополчения, (имя рек), отче наш, моли непрестанно о всех нас.

Икос. Возлюбив преподобне Христовы божественыя заповеди, и возненавидев мира сего наслаждение, прииде усердно к Тому, и бысть светильник просвещая концы, блистанием духовным. Тем припадая молю тя, просвети ми очи душевнии, воспети твоя подвиги. Пощение и бдение и слезы, болезни и измождение тела, блаженныя ради будущия жизни. Ея же ныне наслаждаешися, моли непрестанно о всех нас.
 

Песнь 7. Ирмос

Иже от Июдеи дошедше отроцы в Вавилон древле, верою утвержени, пламень пещныи попраша глаголюще, отец наших Боже благословен еси.

Запев. Прошед подвиги постныя отче, умом крепким, ума прегордаго, божественным смирением смирил еси поя, благословен Бог отец наших.

Запев. Краснейше прозябление отче, в дому Божии прозябл еси, добродетельми украшен, и плоды чюдесными облагоухал еси.

Слава. Просветив свое сердце, начальник бысть священнаго состава отче. Наказая и уча. И вся возводя к Божиим волям, поя, отец наших Боже благословен еси.

И ныне. Богородичен. Ново Отроча рождьши пребезначальнаго Слова, обетшавших ны грехом, обновила еси Девице. И пети укрепила еси, отец наших Боже благословен еси. Катавасия.
 

Песнь 8. Ирмос

Богозрачныя дети в пещи, со огнем и лесть поправше, пояху, благословите дела Господня Господа.

Запев. Наследниче божественых селении, ангельски отче пожил еси. Тем со ангелы ликует дух твой.

Запев. Невозвратно шествовав, отче премудре и досточюдне, ведущими к небеси божествеными стезями, от зле ведущих до конца уклонился еси.

Слава. Всельшаяся благодать в душу твою отче, лукавно живущии в человецех нечистии дуси отгоними бывают.

И ныне. Богородичен. Вода еси неизчерпаемая Девице, от Нея же вси пиющии благодати исполняемся, душею и телом освящаеми. Катавасия.
 

Песнь 9. Ирмос

Устрашися всяк слух, неизреченнаго Божия схождения, яко Вышнии волею сниде и до плоти. От девическаго бо чрева быв убо человек. Тем же Тя пречистую Богородицу вернии величаем.

Запев с поклоном. Исцеление источает богатно, честная твоя рака Божиим Духом. И страсти многовременныя исцеляет отче, приходящим к тебе, и прогонит лукавыя духи лютыя. И воздвизает верных, восхвалити твоя светлыя подвиги.

Запев. Яко великое солнце нам, величием подвиг твоих восиял еси, и озарил еси богомудре вся земныя концы. Умер прешел еси от света, к Свету восиявшему. Тем вопием ти, просвети наша помышления отче преподобне (имя
рек)
.

Запев. Тело твое блаженне терпеливое связавшееся веригами, страсти неисцельныя прикосновением исцеляет. Богу и Спасу тя вельми прославльшу, отче богомудре и досточюдне (имя рек), яко делы своими добрыми прославльшуся преподобне.

Слава. Процвел еси в постнических удолиих, прехвальне отче наш, яко шипок благоуханен. И яко же крин объюхал еси совести верных, добродетельми и чюдесы. Тем же преподобне отжени от нас страсти смердящия.

И ныне. Богородичен. Просвети чистая Дево сетующее сердце мое присно преступленьми, и житейскими многими молвами, не остави мене врагом быти в радость яко да славлю Тя, и любовию пою Препетая. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и преподобнаго (имя рек), и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги