Канон святым благоверным князьям Петру и Февронии

0

8 июля (25 июня по старому стилю) Церковь чтит память святых чудотворцев муромских благоверного князя Петра, нареченного во иноках Давыда, и благоверной княгини Февронии, нареченной во инокинях Евфросинии. Святых Петра и Февронию считают покровителями семейного очага. Также им молятся о замужестве или рождении ребенка.
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 8-й

Яко благочестиваго корене, пречестная отрасль был еси, добре во благочестии пожив, блаженне Петре. Тако и со супружницею своею, премудрою Феврониею, в мире Богу угодивше, и преподобных житию сподобистеся. С ними же молитеся, Господеви, сохранити без вреда отечество ваше, да вас непрестанно почитаем. (Дважды).

Слава, и ныне. Богородичен. Иже нас ради рождеися от Девы, и распятие претерпев Благии, испровергии смертию смерть, и воскресение явль яко Бог, не презри их же созда рукою Своею. Яви человеколюбие Свое Милостиве, приими рождьшую Тя Богородицу молящуся за ны, и спаси Спасе наш люди согрешьшыя.
 

КАНОН, глас 8-й
 

Песнь 1. Ирмос

Воду прошед яко посуху, из египетска зла избежав, израильтянин вопияше, избавителю Богу нашему поем. 

Запев: Святии чудотворцы Петре и Февроние молите Бога о нас (поклон). Песнь твоему угоднику, иже на земли тебе прославльшему Петру принести Боже даруй ми. Яко да смыслодавца песньми возвеличу тя. 

Запев. Вас преблаженнии, отечеству вашему, яко пресветлое Солнце Христос показа. Чудесы всех озаряюще, иже верою к вам приходящих. 

Слава. Яко о телесных небрегше, и земная яко тленная возненавидевше, и сего ради мира отрекшеся, преподобных чести сподобистеся. С ними же о мире молитеся. 

И ныне. Богородичен. Пречистая Богородице, Рождьшая плотию Присносущное Слово, безначалнаго Отца, Присно Дево. Ему же ныне взываем, Избавителю Богу нашему поем. 
 

Другии канон, чудотворцем. Творение господина Михаила мниха 
 

Глас 1. Песнь 1. Ирмос 

Песнь победную воспоем вси Богу, сотворшему дивная чудеса, мышцею высокою, и спасшу Израиля, яко прославися. 

Запев с поклоном. Благочестиваго и венценоснаго Петра, вкупе с Феврониею, сошедшеся по достоянию восхвалим, чудес подателя обилных, и спасающаго душа наша. 

Запев. Песньми и пеньми духовными восхвалим блаженных вкупе, сице глаголюще, радуйтеся прехвалнии, отечеству своему пресветлии светильницы, и твердии заступницы. 

Слава. Аще и последи лет, новопросвещенная русская земля, сих блаженных израсти. Но древних чести сподобишася, даровании бо чудес, обилно подают приходящим к ним. 

И ныне. Богородичен. Ума моего Всенепорочная омрачение, светом Си отжени, и тмы избави мя вечнующия, яко да пою величия Твоя.
 

Песнь 3. Ирмос 

Небесному кругу верхотворче Господи, и церкви Зиждителю, Ты мене утверди в любви своей, желанием си край, и верным утвержение, Едине Человеколюбче. 

Запев. Беспомощным буди помощник, блаженне Петре, и печалным милостивное утешение. Да твоими молитвами избавляеми, почитаем тя. 

Запев. Якоже иногда змия убив, конечному безвестию предал еси. Тако и ныне твое отечество борющих победи треблаженне, да тя прославляем. 

Слава. Виждь уныние, виждь печаль, виждь беду, юже на ны нападающю от противных. Темже молитвою си ко Господу премени Петре, да благочестно тя почитаем. 

И ныне. Богородичен. Тебе вси стяжахом християне, прибежище и стену, и Тебе славословим немолчно Безневестная.
 

Ин. Ирмос 

Да утвердится сердце мое, в воли Твоей Христе Боже, иже над водами небо утвержеи второе, и основавыи на водах землю Всемогии. 

Запев. Тебе в чудесех славна, русским странам показа Бог, Петре преблаженне, и украси тя небесными дарми. Того ныне моли, помиловати всех нас. 

Запев. Светилницы пресветлии, якоже солнце второе сияете, нас озарите совершающих память вашю, преблаженнии Петре и Февроние. 

Слава. Веселия ходатай наста нам, светоносныи день Петра и Февронии премудрых, иже верою воспевающым их, даруют велию милость. 

И ныне. Богородичен. Избави нас от всех напастей, и от многих соблазн змиевых, и тмы Всенепорочная, яже свет порождьшая нам невечернии. 

Седален, глас 4-й. Благословеному и светоносному торжеству, якоже солнцу возсиявшу, Петра и Февронии во всем мире. к нимже стецемся вернии, и непрестанно вопием сице, аще и преидосте от земли преславнии, но нас не отлучистеся. и тамо со ангелы Троице предстоите. Ея же молите, спасти душя наша (Дважды)

Слава, и ныне, Богородичен. Слово Отчее Христа Бога нашего, ис Тебе воплотившееся разумехом Богородице Дево, едина Чистая, едина Благословеная. Его же ради непрестанно Тебе величающе воспеваем. 
 

Песнь 4. Ирмос 

Услышах Господи, смотрения Твоего таиньство. Разумех дела Твоя, и прославих Твое Божество. 

Запев. Яко ходатай и заступник отечеству своему, яко сопротивных решитель, буди заступая люди своя, иже тебе Петре славящыя. 

Запев. Яко в небесных обителех, с преподобными и праведными веселяся, преблаженне Петре, купно с Феврониею, непрестай моля о людех своих. 

Слава. Тебе молимся преблаженне, сопротивных шатание низложи, и недуги человеком облегчи, яко да вогласех хваления тебе величаем. 

И ныне. Богородичен. Очищение нашим даруй прегрешением, яко преблаг. И умири мир свой Боже, молитвами рождьшия Тя. 
 

Ин. Ирмос 

Духом предзря пророк Аввакум, Словесе воплощение, проповедаше глаголя, егда приближатся лета, познан будеши. Егда приидет время, явишися. Слава силе Твоей Господи. 

Запев. Змия убо иногда убив блаженне, конечней того пагубе предал еси. Тако и ныне Петре, отечество свое сохраняй ненаветно, вкупе с Феврониею молитвами си. 

Запев. Зарею трисолнечныя благодати сияя, светлыи ваю праздник блаженнии. Страстнаго омрачения бесовскаго избавляйте, творящих верою память вашю. 

Слава. Днесь день святыи праздничныи, иноки созывает стада, на веселие и трапезу духовную, и на пищю нетленныя жизни, и божественаго наслаждения чудотворцев. 

И ныне. Богородичен. Разумев пророк духом Божиим, гору Тя присенну преднаписа Чистая. Истаявшую зноем многих прегрешении, душу мою прохлади, ходатайством Си Дево. едина бо Ты человеком исправление. 
 

Песнь 5. Ирмос 

Вскую мя отрину от лица Твоего свете незаходяи, покрыла мя есть чужа тма окаяннаго. но обрати мя, и к свету заповедей Ти пути моя направи молютися. 

Запев. Земля освятися, приемши честная телеса ваша, богоблаженнии Петре и Февроние. Человецы же приемлюще вами исцеление, Христа славят, иже искренно вас прославльшаго. 

Запев. Аще и преидосте от земли, но к небесным доспесте, и тамо со ангелы Троице предстасте. Юже молите, спасти любовию вас почитающих блаженнии. 

Слава. Яко звезды пресветлыя, и яко незаходимое солнце, стяжавше вас отечество ваше хвалится, почитающе память вашю пречестную, Петре и Февроние. 

И ныне. Богородичен. Девою поем Тя по рожестве Богородице, Ты бо плотию Бога Слова нам родила еси. Емуже вси сице зовем, пути наша направи, молимтися.
 

Ин. Ирмос 

Светлыи нам возсияй свет вечныи, утренюющым о судбах, заповедей Твоих, Владыко Человеколюбче, Христе Боже наш. 

Запев. О предобрая двоице. О пресветлая светила. О благосопряжение, един свет во двою телесе сущь. О светилницы блазии своему житию бывше, ярем бо Господень вземше, и тому от души последовасте верою. 

Запев. Досточюдная и преславная память ваша, восия в русстей земли блаженнии. и радостно верных веселит собор, иже искренно вас в песнех святии славящих. 

Слава. Цари и священницы, князи и вельможи, и старцы со юнотами, и всяк возраст светло пред играйте, память преславных Петра и Февронии, в песнех величающе. 

И ныне. Богородичен. Светообразныи Христов храм Отроковице, молитвами Си, Отцу и Сыну и Святому Духу, и нас храмы сотвори, преподобныя содевающи Пречистая.
 

Песнь 6. Ирмос 

Очисти мя Спасе, многа бо беззакония моя, и из глубины зол возведи мя молюся. К Тебе бо возвах и услыша мя Боже спасения моего. 

Запев. О пречестная двоице, О велицыи светилницы, осветите и прославите, иже любовию вас в песнех славящих чудотворцы. 

Запев. Яко пресветлая двоице, и яко пречестная верста, и благосочетание, ярем Господень вземше, и тому от души поработаста. 

Слава. Яко советницы добрии своему житию, едину мысль во двою телу имуще, мир чудесы просвещаете. темже и нас озарите молитвами си. 

И ныне. Богородичен. Уясняют пророчестии гласи, Божию Тя Дево Родителницу. Поем же Тя и мы, видяще сбытие честных прорицании, девьству воистину, и чистоте вместилище.
 

Ин. Ирмос 

Пророку Ионе подобяся вопию, живот мой блаже свободи ис тли, и спаси мя спасыи мира зовуща слава Тебе. 

Запев. От пречестна корене израсте ветвь преславная, и благочестно на земли пожив Петре, приятелище чисто духу святому был еси, просвещай поющих ныне память твою. 

Запев. Веселия днесь исполнися русская земля, в нарочитыи день праздника вашего, преславнии чудотворцы, и поющи сице глаголет, молите Христа, сохранити отечество ваше от языка чужаго. 

Слава. Сиротам и вдовицам заступницы, и в бедах не оборимии помощницы, и всем притекающым к вам пристанище небурное, и нелестное утишие сущым во гресех. 

И ныне. Богородичен. Величия Тебе Чистая сотвори Христос Бог наш. Егоже моли присно, возвеличити и в нас богатую Его милость, Пренепорочная Владычице. 

Кондак, глас 8. Подобен. Возбранной. Мира сего княжение и славу, яко временно помышляя, и сего ради благочестно в мире Петре пожил еси, купно и с супружницею своею премудрою Феврониею, милостынею и молитвами Богу угодивше. Темже и по смерти неразлучно во гробе лежаще, исцеление невидимо подаваете. И ныне Христу молитеся, сохранити град же и люди, иже вас славящих. 

Икос. Уясни язык мой Спасе, и умили сердце мое, разшири уста моя, и наполни духа, и премудрости. да ими же возглаголю и воспою сице, Твоих чудотворец, радуися Петре блаженне, с прехвалною Феврониею вкупе. Радуйтеся земли русстей заступницы, и князем православным помощницы. Радуйтеся отечеству своему хранители, и граду нашему утвержение. О пречестная двоице, и благое сопряжение. Христови молитеся, сохранити град и люди, иже вас славящих.
 

Песнь 7. Ирмос 

Иже от иудеи дошедше отроцы в Вавилон древле, верою утвержении пламень пещныи попраша глаголюще, отец наших Боже благословен еси. 

Запев. В болезни к тебе прибегающих, избавляй преблаженне Петре, купно с Феврониею, Христови вопиющих, отец наших Боже, благословен еси. 

Всем пристанище будите преблаженнии, и небурное отишие сущим во гресех, да и мы с вами Христови возопием, отец наших Боже, благословен еси. 

Запев. Прибежище да ми будите в день гнева богоблаженнии, яко посреди хожду сетей многих. Темже избавите мя от них, да возмогу воспети вас. 

Слава. Днесь преславная память Петра и Февронии, яко солнце восия в мире. В нюже сшедшеся вси воспоем сице, отец наших Боже, благословен еси. 

И ныне. Богородичен. Капля Боготочная, иже от Тебе рождьшаяся, мир освяти Богородице Дево. Капли мне милости источи, освящающя душя, и помышления земных.
 

Ин. Ирмос 

Отроцы воблазей вере воспитании, нечестива веления небрегше, огненаго прещения не убояшася. Но посреди пламене стояще пояаху, отцем Боже благословен еси. 

Запев. Во всех странах пройде вещание, яко граду Мурому явишася чудотворцы преславнии, дарующе множество исцелении всем приходящым к ним, и верою поющым их. 

Запев. Се ныне стекошася от всех град и стран, вси царие и священницы, и князи и велможи, богатии и убозии, вси радующеся вкупе, хвалу воздати вам, богоблаженнии. 

Слава. Чудесы убо своими яко цвет процвел еси, преславне Петре. якоже рече пророк, праведник яко финик процветет. Сего ради вси тя ныне славим блаженне. 

И ныне. Богородичен. Тебе Всесвятая Чистая, раби Твои всегда водни и внощи молим, сокрушенною мыслию, просяще избавление подати грехом нашим, Твоими молитвами.
 

Песнь 8. Ирмос 

Царя небеснаго, Егоже поют вои ангельстии, хвалите и превозносите Его во веки. 

Запев. Очисти и прости согрешения наша безгрешне, молитвами Твоих угодник, Петра и Февронии, да поем Тя Христе во веки. 

Запев. Иже от сердца рукою недостойною, приносимое вам хваление, блаженнии приимите, и мольбу сотворите о нас ко Христу Богу. 

Троичен. Певцем иже Тебе поющим Троице пресвятая, согрешения остави яко преблага, молитв ради Петра и Февронии, да Тя поем во веки. 

И ныне. Богородичен. Божества сосуд бывши Чистая, просвети мя в повелении света ходити всечистая, иже от Чрева Твоего возсиявшаго, и просветившаго верных сердца.
 

Ин. Ирмос 

Егоже ужасаются ангели, и вся воинства, яко Творца, и Господа, пойте святители, прославите отроцы, благословите людие и превозносите Его во веки. 

Запев. Ангельстии чинове хвалят ваю преславнии, и человечестии роди поют непрестанно, творяще верно память вашю. 

Запев. Достойными похвалами воспети преславных чудотворец, ум и смысл даруй ми Христе Боже, яко да пою радуяся память их. 

Слава. Победа именита, воистину верным людем, в бедах крепцыи помощницы явишася, Петр купно с Феврониею. 

И ныне. Богородичен. Уврачюй Пречистая страсти сердца моего, рождьшая всех Царя Бога, и праведных части яви мя причастника Богородице дево, Христа Сына си умоливши.
 

Песнь 9. Ирмос 

Воистину Богородицу Тя исповедающе, иже Тобою спасении Дево Чистая, с небесными вои Тя величаем. 

Запев с поклоном. От юности своея чистую совесть имуще к Богу. Сего ради благочестно поживше, к вышним преидосте. Молите Христа о нас, да вас любовию почитаем. 

Запев. Яко предстояще Святей Троице, с преподобными и праведными, молитеся блаженнии, избавити нас всякаго прещения и гнева, да вас непрестанно величаем. 

Слава. Людие твои молят тя, богоблаженне Петре, купно моли Христа с премудрою Феврониею, с нею же в мире богоугодно пожил еси, избавити нас от всяких зол. 

И ныне. Богородичен. О чудеси великому, како вместися во утробу Твою Христос Бог, никако же вместимый. Его же за хвалящыя Тя умоли Девице, от бед избавити нас, и от беззаконных человек всегда.
 

Ин. Ирмос 

Светоносныи облак, вонь же всех Владыка, яко дождь с небесе на руно сниде, и воплотися нас ради, быв убо Человек, Безначалныи. Величаем вси, яко Матерь Бога нашего чистую. 

Запев с поклоном. Красен душею и телом, и благочестием сияя славне Петре, божественаго исполнен разума и премудрости. Орган Святаго Духа был еси, по смерти убо к безсмертней жизни, и некончаемому блаженству прешел еси радуяся. 

Запев. Яко утро, яко день светлыи, ваю праздник явися славнии, аки струя происходит от раки вашея, исцелении всяких, и верных сердца напаяет, иже любовию вас почитающих. 

Слава. Велик щит, и велика крепость земли русстей обретеся блаженныи Петре вкупе с Феврониею, царю православному похваление, и слава во всех языцех. И ныне молим вы, сохранити отечество свое, от варварскаго нахождения. 

И ныне. Богородичен. Яже Свет Рождьшая Божественныи, омраченаго мя всеми прилоги лукаваго, и во унынии живущаго, и прогневающаго Бога, Всенепорочная просвети, и настави к добрым делом, яко вина всем благим. 

Отпуст: Господи Исусе Христе, Сыне Божии, молитв ради пречистыя Твоея Матере, и святых чудотворец муромских, благовернаго  князя Петра, нареченнаго во иноцех Давыда, и благоверныя княгини Февронии, нареченныя  во  инокинях Евфросинии,  и всех ради святых, помилуй и спаси нас, яко благ  и  человеколюбец. Аминь. Господи помилуй (трижды). Исходные поклоны.


Обзор книги