Канон святой мученице Татиане

Русская вера, 2017

Святая мученица Татиана пострадала за Христа в Риме в III веке. Она происходила из знатной семьи. Достигнув совершеннолетия, решила не выходить замуж и отдала все свои силы на служение Церкви Христовой. Ревностно служила Господу святая подвижница. Во время гонений от язычников ее много раз склоняли принести жертву идолам, подвергали тяжким истязаниям. Видя непоколебимость ее веры в Господа Исуса Христа, язычники отсекли св. мученице Татиане голову мечом. Будем усердно молиться святой угоднице Божией, прося ее укреплять нас и наших ближних в христанской вере, чтобы достигнуть вечного спасения. Память св. мученице Татиане 12 января (25 января по гражданскому стилю).
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 4-й

Агница Твоя Исусе Татияна зовет велиим гласом, Тебе Женише мой любящи, и ищущи стражду и сраспинаюся, и спогребаюся крещением Твоим, и муки приемлю Тебе ради, яко да царствую с Тобою, и умираю надежду имея на Тя, яко да живу у Тебе. Но яко жертву непорочну приими мя с любовию пожершуютися. Тоя молитвами Христе Боже спаси душа наша. (Дважды).

Слава, и ныне. Богородичен. Иже от века утаенное, и ангелом несведомое таиньство, Тобою Богородице земным явися, Бог в неразмесне снятии воплощаемь. И крест волею нас ради восприим. Им же воскресив первозданнаго, и спасе от смерти душа наша.
 

КАНОН, глас 2-й
 

Песнь 1. Ирмос

Грядите людие, поем песнь Христу Богу разделшему море, и проведшему люди яже испусти, из работы египетския яко прославися.

Запев: Святая мученице Татияно, моли Бога о нас (поклон).

Мученическими украшена светлостьми, чистому предстоиши Жениху своему. Душетленных согрешении, молящи избавитися хвалящим тя.

Запев. Богатства тленнаго мученице до конца отречеся, на Небесех нетленное и пребывающее, ищущи усердно. И радующися пройде мученическое страдание.

Слава. К ранам и болезнем и биением многовидным, без боязни мученице пойде. Споспешницу бо имяше благодать Спасову, и укреляющу тя.

И ныне. Богородичен. Иже источник безстрастия рождьши, уязвена страстьми Отроковице исцели. И огня вечнаго исхити мя, едина Богоблагодатная.

Катавасия: Избави от бед рабы своя, святая мученице Татияно, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

На камени мя веры утверди, разшири уста моя на враги моя. Возвеселибося дух мой воспевати Ти, несть свят яко же Бог наш, и несть праведен, паче Тебе Господи.

Запев. Не поколеба столп твоего сердца, возвеявши мучное треволнение. Утвердибося на камени любве Христовы, всехвалная. К Нему же взываше, яко несть свят паче Тебе Господи.

Запев. В человеческую немощь облекиися, впери силою немощь твою на немощнаго змия. Тем же мученице, на землю низвергла еси, верно зовущи яко несть свят паче Тебе Господи.

Слава. Потоки изсушила еси беззакония, струями кровей твоих блаженная. Пищи же потока наслаждаешися, и во свете невечернем живеши. Зовущи, яко несть свят, паче Тебе Господи.

И ныне. Богородичен. Зачатие и рожество Ти паче слова, веки бо создавшаго словом, родила еси. Избавльша безсловесия миру концы, Отроковице неискусомужная. Его же моли всегда, спасти нас. Катавасия.

Седален, глас 4-й. Сугуб прошедши мученице подвиг на земли, сугуб и венец сподобися прияти от руки Жениха своего. Постибося, страсти плотския обуздавши. Пострада законно, врага низложивши. Тем же молбами си, спаси нас от напасти.

Слава, и ныне. Богородичен. Яко Деву едину в женах, Тя без Семене рождьшую Бога плотию, вси ублажаем роди человечестии. Огнь бо вселися в Тя Божественыи. И яко младенца доиши Зиждителя и Господа. Тем же ангельскии собор и человеческии род, достойно славим пресвятое рожество Твое. И согласно вопием Ти, моли Христа Бога, согрешением оставление даровати, воспевающим достойно славу Твою.
 

Песнь 4. Ирмос

Пою Тя, слухом бо Господи услышах и убояхся. До мене бо прииде, мене ища заблуждьшаго. Тем же многое Твое смотрение, еже на мя прославляю обновление.

Запев. Красно душевное устроение, благолепием благочестия, Татияна носящи. Еще же мучения светом преславно сияющи, к чистому Жениху вселяется.

Запев. Железом твое лице стружущым беззаконным, не видимо небеснии ангели прихождаху, посылаеми к твоей от Бога мученице помощи. Иже твоему терпению удивишася.

Слава. Законно Христа проповедающи, победила еси беззаконнующих. Жертва же непорочна благоприятна, свершена Тому принесеся. Взывающи, Тебе любящи Спасе закалаема есмь.

И ныне. Богородичен. Ко пристанищу тихому мя направи, Богоневесто пречистая, буря бо мя труждает, и смущение греха люте. Ветры колеблемь лукавых духов, оскорбляющих мя. Катавасия.
 

Песнь 5. Ирмос

Просвещение во тме лежащым, и спасение неначаемым, Христе Спасе мой. К Тебе утреннюю Царю мирныи, просвети мя сиянием Своим. Иного бо разве Тебе Бога не знаю.

Запев. Твоей честней и блаженней страсти подобящися, яже безстрастием Тебе сочтавшися, стражет усердно, на уды ссекаемая. Живодавче Христе, зовущи, иного разве Тебе Бога не знаю.

Запев. Страх Божии во утробе мыслию приемши, дух спасения исповедания и мучения, родила еси преславно доблемудрая, твердым страданием. И сопротивныя началники, посрамила еси.

Слава. Светлыми сияеши зарями, уяшняема Духа Святаго свещею, и озаряеши верных сердца. Греховныи мрак разоряющи, мученице страстотерпице Христова досточюдная.

И ныне. Богородичен. Светлыи солнца облаче, осияй ми зарю, решащу мрак моих согрешении. Даждь ми руку, впадшему в тину греховную. Воздвигни мя лежаща, едина падшаго Адама исправление. Катавасия.
 

Песнь 6. Ирмос

В бездне греховней одержимь, не изследную милосердия Твоего призываю бездну. От тля Боже мой возведи мя.

Запев. На древе яко уведе пропята Тя, мученица честная, терпит повешение, и строгания телесная, за любовь Твою Всесилне.

Запев. Свирепии звери усумнешася, посреди судища мужески страждущи ти. Яко же Фекла первие первомученица, ея же ревность стяжала еси славная.

Слава. Представше небеснии ангели посреди темницы, тебе светом просветлиша. От ран изимающе, и яко Божию агницу прославляюще.

И ныне. Богородичен. От всех родов избра Тя доброту Ияковлю, Ея же возлюби Творец, Всенепорочная. И ис Тебе восияв явися. Катавасия.

Слава, и ныне. Кондак, глас 4-й. Светле во страдании своем восия страстотерпице, от кровей своих преиспещрена. Яко красная голубица, к небеси возлете Татияно. Моли присно за чтущыя тя.
 

Песнь 7. Ирмос

Богопротивное веление беззаконнующа мучителя, высок пламень вознесло есть. Христос же простер богочестивым детем, хлад духовныи. Сыи благословен, и препрославлен.

Запев. Крепко непобедимая биема, сосцема отрезание претерпела еси пожданно. Огнем же небесным мученице попалила еси, чтити нехотящия Бога. Его же вся тварь поет, славящи во веки.

Запев. В сердцы си носящи огнь божественыя любве непорочная, пламень попра. Огня подоборавнаго неужасеся, отроком изобразивши древним, и мужество и крепость.

Слава. Зверей свирепьство тебе повинуся, лвом зияния невредно премину, Богу тя прославльшу. Его же прославила еси, Ему же страдания своею исполнивши плотию, всехвалная.

И ныне. Богородичен. Жизнь составную нам рождьши, смертию смерть яве потребльшую. Страсти умертви плоти нашея, верою чтущих Тя Чистая, яко Богородицу и Преславную. Катавасия.
 

Песнь 8. Ирмос

Иже в пещь огненую к детем еврейским сшедшаго, и пламень на хлад преложьшаго Бога, пойте вся дела и превозносите Его во веки.

Запев. Удобрившися добродетельми, украсися добротами мучения, и Жениху обручися, иже паче всех человек краснейшему, добротою сияющу безсмертия, Татияно Богомудрая.

Запев. С бесплотными слугами, в темнице Творца славословяше. Сияющи славою божественаго блистания, и всем неприступна пребывающи, держимым тмою прелести.

Слава. Сокрушение твоих удов, истни врагов коварьства. Крови течение, нечестия лютыя потоки честная изсуши, пучина чюдес, нам явльшися.

И ныне. Богородичен. Спаси и ущедри нас, щедраго Бога нам рождьшая, паче естества и слова. Огнепалных помышлении, и страстей изимающи и зноя Твоими молитвами Чистая и Препрославленая. Катавасия.
 

Песнь 9. Ирмос

Иже от Бога Бога Слова, неизреченною мудростию, пришедшаго обновити Адама, ядию тления падшаго зле, от святыя Девицы, не изреченно воплощаема нас ради, вернии единомудрено, песньми величаем.

Запев с поклоном. По многих муках, мечным тя судом лютыи осужает судия. Ея же восхождением, восплескаша небеснии чини. Христос же всесилною десницею венча тя мученице, законно пострадавшую.

Запев. Сочтася с мученическими светлейшими стады, яснейши приближившися Богу. Видиши яже видят ангели, яко девица в чертозе водворяешися, Жениха своего честная молящи, спастися любовию тя чтущим.

Слава. Запечатленныи источник тя, затворен виноград, возложение честно и священно, невесту Христову нетленную, заколение и жертву, агницу и добрую голубицу, Владыки всяческих, Татияно проповедаем.

И ныне. Богородичен. Иже гласы прекланяема, иже тепле Тя молящих, едина верным прибежище, спаси и ущедри Владычице, соблюди от вреда, и всякого язык нашествия, иже верою и любовию, присно Тя величающыя. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и святыя мученицы Татияны, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги