Канон святым Двенадцати Апостолам

Русская вера, 2017

Невозможно найти такие слова, чтобы описать величие духовного подвига, который совершили святые двенадцать апостолов Христовых, огласившие вселенную Евангельской проповедью. Господь удостоил их весьма великой благодати. Св. апостолы, имея жалость и сострадание к нам, грешным, не перестают ходатайствовать за нас перед Богом. Будем и мы, в свою очередь, иметь тесное молитвенное общение со святыми апостолами, умолим их быть нашими небесными заступниками, чтобы нам избежать вечного осуждения в аду. Память св. двенадцати апостолам 30 июня (13 июля по гражданскому стилю).
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 3-й

Апостоли святии молите милостиваго Бога, да грехов оставление подаст душам нашим. (Дважды).

Слава, и ныне. Богородичен. Тебе Ходатаицу спасения рода нашего, воспеваем Богородице Дево. Плотию бо, ею же из Тебе прошед, Сын Твой и Бог наш крестную прием страсть, и избавил есть нас из истления, яко Человеколюбец.
 

КАНОН, глас 4-й
 

Песнь 1. Ирмос

Моря Чермнаго пучину, немокрыми стопами древле шествовав Израиль, крестообразно Моисеовыма рукама, Амаликову силу в пустыни победил есть.

Запев: Святии апостоли, молите Бога о нас (поклон).

Лик апостольскии пети ми, усердьствующу Христе, мольбами сих яко Бог, зарю Духа Пресвятаго даруй, и свещю премудрости Твоея.

Запев. Укрепльшеся силою Твоею и благодатию Христе, силу сопротивных ссекоша враг, честнии Твои апостоли, боговидцы бывше, непрестанными к Тебе мановенми. Исцеления творяще Владыко Твоим именем, языческая совокупления, Твоим познанием уловиша, славнии апостоли. И светом Твоим просветиша.

Слава. Мудростию небесною научьшеся, Христови славнии апостоли, всепроявленномудрых обуисте, многословие непотребное, силою проповедания.

И ныне. Богородичен. От Троицы пребожественыя чистыя, Единого родила еси, из Тебе плотию явльшагося по нас, благоволением рождьшаго, и действом Духа Пресвятаго, Мати Дево.

Катавасия: Избавите от бед рабы своя, святии апостоли, яко вси по Бозе к вам прибегаем, вы бо молите о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

Веселится о Тебе церкви Твоя Христе зовущи, Ты ми крепость Господи, и прибежище и утвержение.

Запев. Небесная и честная, богогласяще на земли учения, языки огнеными вещающе, проповедницы Христовы предаете.

Запев. Показал еси небеса, ученики своя словесны Владыко, славу Твою поведающыя, всем концем.

Слава. Написавшеся на небесех, и явльшеся Христу сожители. Иже ныне вас премудрии, чтущыя усердно соблюдите.

И ныне. Богородичен. Вселися в Тя, иже в вышних живыи Чистая. Без семене бо плоть из Тебе приим явися. Катавасия.

Седален, глас 8-й. Мрежею словес божественых, рыбы уловляюще словесныя, и сия приведосте исперва Богу нашему. И во Христовы раны желающе облещися, подобницы страстем Его явистеся. Тем же сошедшеся подолгу почитаем, апостоли славнии, всепразднественую память вашу. И согласно вопием вам, молите Христа Бога грехов оставление подати, празднующим любовию святую память вашу.

Слава, и ныне. Богородичен. Яко Деву едину в женах, Тя без семене рождьшую Бога плотию, вси ублажаем роди человечестии. Ибо огнь вселися в Тя божества, и яко Младенца доиши Зиждителя и Господа. Тем же ангельскии и человеческии род, достойно славим пресвятое рожество Твое. И согласно вопием Ти, моли Христа Бога, согрешением оставление даровати, воспевающим непрестанно славу Твою.
 

Песнь 4. Ирмос

Воздвижена Тя видевши церкви, на кресте Солнца праведнаго, ста в чину своем, достойно взывающи, слава силе Твоей Господи.

Запев. Глагол божественых апостол вещание, огнесиянно пройде вселенную всю, льсти убо вещь опаляя, просвещая же благодатию, благочествующих совокупления.

Запев. Почерневшии мраком безбожия, богосияннии светилницы, ученицы явльшеся. Мир просветиша зарею благодатною, и лучами проповедания. Священными свещами украшени, мысленаго Солнца. Яко солнце в мире сияете прехвалнии, светом божества, прелести мглу отгоняще.

Слава. Жезл силы имуще крест Твой, сланое жития, самовидцы Твои Слове, море пресецаху. Яко кони смущающе многобожия воды.

И ныне. Богородичен. Украшено пестрым светолитием, Небо одушевленое Твое, царя царствующих Христе, Девая пречистая, ныне яко Богородица славится. Катавасия.
 

Песнь 5. Ирмос

Ты Господи ми свет, в мир пришел еси, свет святыи, обращая из мрачна неведения, верою воспевающыя Тя.

Запев. Божественыя Твоя Христе, и премудрыя служители, свет показал еси в мире, Тя незаходимаго сияния всем возвещающыя.

Запев. Иже всю добродетель, проявленно удержаша апостоли. Пестротою бесовския злобы, связанныя разрешисте.

Слава. Явиша нам тройческое сияние, божества во единьстве, огненными языки вещающе апостоли.

И ныне. Богородичен. Тя оружие непобедимо, на враги предлагаем, Тя державу и надежу нашего спасения, Богоневестная имамы. Катавасия.
 

Песнь 6. Ирмос

Пожру Ти со гласом хваления Господи, церкви вопиет Ти, от бесовския крове очищьшися, милостию от ребр истекшею Ти кровию.

Запев. Утверждь ученики мудростию и чюдесы, силнейша содела еллинскаго Спасе любомудрия, и сих лестная упраздниша учения.

Запев. Божественыя реки премудрости, наполниша спасеных вод, удолия вся церковная, от источник спасения, струи обогащьше.

Слава. Явльшеся яко звезды живы и пребогаты, разористе всемрачную лесть, светолучными сиянии, богоразумия свет облиставше.

И ныне. Богородичен. Всю Тя голубицу предобру, и светел обрете крин, и удолия цвет о Богомати, Жених мысленыи в Тя вселися. Катавасия.

Слава, и ныне. Кондак, глас 2-й. Петра вернии камень веры похвалим ныне, и Павла богомудраго. Созывают бо всех праздньствовати верою, соборне вкупе вся два надесяте, яко проповедники вере, просяще грехов оставление.

Икос. Воистину нам наста всем ближним и далним, праздновати светло, и воспевати проповедники и ученики слова, Петра и Павла, Иоанна и Андрея Первозваннаго. Филиппа же и Матфея, и Марка, Луку вкупе и Симона Зилота, Июду и божественаго Иякова, с сими и Фому, премудрыя апостолы, похвалити потщимся вси, просяще прощение грехов оставления.
 

Песнь 7. Ирмос

В пещи авраамския си дети персстей, любовию благоверия паче, нежели пламенем опаляеми взывааху, благословен еси в церкви славы Твоея Господи.

Запев. Сыны сотворь ученики Своя, иже первее естеством Бог. Любовию наследники показал еси, отеческому жребию Преблагии, и последовати Тебе яко Богови и Владыце, благоизволил еси.

Запев. Премудрости излияние, сердца ширину, языка благоглаголание слове, подав божественым си учеником, послал еси проповедающа Евангелие царьствия, всем языком.

Слава. Явльшеся яко облацы, исполнены божественаго света, всем одождяют воду животворну, апостоли зовуще, благословен еси в церкви славы Твоея Господи.

И ныне. Богородичен. Преиспещрена божественою славою явися Чистая, едина от века Слово Божие приемши Дево Мати. Благословена Ты в женах, всенепорочная Владычице. Катавасия.
 

Песнь 8. Ирмос

Руце распростер Даниил, Львова зияния в рове затче. Огненую же силу угасиша, добродетелию поясавшеся, иже благочестия рачители отроцы взывающе, благословите вся дела Господня Господа.

Запев. Божественыи и премудрыи лик апостол Христовых, огнем Духа, яко вещь палимую попали, бесовския службы. И сердца верных просвети, вопиющих, благословите вся дела Господня Господа.

Запев. Согласно божественыя ученики, и апостолы Христовы, иже небесная нам возгремеша учения, пристанища веры, благодателя общая, человечеству Спасителя, и служителей слова почтем.

Слава. Всечестная и вместная вместилища добродетелем, человеческия начатки, проповедания трубы, потоки нетленныя жизни, богоносныя молнии, исцелением источники, красныя ноги Евангелия почтем.

И ныне. Богородичен. Полныи истощавается нас ради, да исполнения его причастимся. Вшед бо во чрево Твое пречистое Непостижимыи, отеческих не отступль недр воплощается. Тем же Тя благословим Марие Богоневесто. Катавасия.
 

Песнь 9. Ирмос

Камень нерукосечьныя горы, от несекомыя Тя Девицы, краеуголныи отсечеся Христос, иже совокупив разстоящаяся естества. Тем веселящеся, Тя Богородице величаем.

Запев с поклоном. Решати пленицы согрешении, власть приемши от Владыки боговидцы. Грехи воспевающих вас, милостивно очистите, и спасению сподобите.

Запев. Всю духовную зарю, существене вам явльшуюся, вси приясте честнии. Выспрь тайно научаеми, высоким учением. И ныне достойно ублажаетеся.

Слава. Вам Христос ныне другом почившем, подавает не увядаемыя венцы, и видения божественаго исполняет. Его же ныне молите церкви спасати.

И ныне. Богородичен. Плотию приити восхотев, украсивыи вся. Слово в Тя вселися, Едину святеишую всех обрет, и Богородицу показа истинную Мати Дево. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и святых славных и всехвальных апостол, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги