Канон мученику Уару

2017

У многих христиан есть умершие родные и близкие люди, которые при жизни не принадлежали к Церкви Христовой. Нередко задается вопрос: можно ли оказать хотя бы какую-ни­будь духовную помощь душам этих людей? По верованию нашей Святой Церк­ви, святому мученику Уару дана благодать испрашивать у Бога облег­чения страданий усопших вне Право­верия. Кроме этого святому Уару молятся о здравии младенцев и малолетних детей, а также о младенцах, умерших во чреве матери или при родах. Поэтому, если мы имеем любовь и сострадание к душам умер­ших людей, не принадлежавших к Церкви Христовой, можно молиться канон святому мученику Уару.
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 4-й

Мученик Твой Господи Уар, во страдании своем венец прият нетленныи от Тебе Бога нашего. Имея бо крепость Твою непобедимую, мучащих упраздни, и сокруши бесом немощная шатания. Того молитвами Христе Боже спаси душа наша.

Другой тропарь, глас 4-й. Воиньством святых страстотерпец страждущих законне, зря онех, показал еси мужески крепость свою. И устремився на страсть волею, и умрети вожделе за Христа. Иже приял еси почесть победы твоего страдания Уаре, моли спастися душам нашим.

Слава, и ныне. Богородичен. Иже от века утаенное, и Ангелом несведомое таинство, Тобою Богородице земным явися Бог, в неразмесне снятии воплощаемь. И Крест волею нас ради восприим, им же воскресив первозданнаго, и спасе от смерти душа наша.
 

Канон, глас 6-й
 

Песнь 1. Ирмос

Яко по суху ходив Израиль по бездне стопами, гонителя фараона видя потопляема, Богу победную песнь поя вопияше.

Запев: Святыи мучениче Уаре, моли Бога о нас (поклон).

Явися на высоте Христовы Церкви святе, яко солнце светлое. Облистанием просвещая своих борении блаженне земная исполнения.

Запев. Божественыя любве всеблаженне объят сладким рачением, отвержеся себе, ко всякой муце плотьской устремися, крепко подвизався.

Слава. Смыслено божественых подвижник юзами связав себе страстотерпче. И лестныя разори юзы, крепким терпением многих мук.

И ныне. Богородичен. Пресущественое Слово, в Твоем чреве паче слова вселися, и рождься боголепно, мученическия лики Чистая приял есть. С ними же песнословим Тя.

Катавасия: Избави от бед рабы своя, святыи мучениче Уаре, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй
(трижды с поклонами).
 

Песнь 3. Ирмос

Несть свят якоже Ты Господи Боже мой, вознесыи рог верных си Блаже, и утверждь их на камени исповедания Ти.

Запев. Вниде разумом крепким в мужественныя подвиги, утверждься надеждею будущих благ, и мученик Христовех премудрыми блаженне поучении.

Запев. Воиньство святых страстотерпец, страждущих законне зря, онех, показал еси мужескую крепость, примешался многообразным Уаре мукам.

Слава. В полце священнем Уаре яко доблии воин обретеся. Иссек множество мужеством меча мудре ратных, победами прославляемы.

И ныне. Богородичен. Дево Мати Божия, моего уныния глубокую тму, и облаки страстей, просвещением еже в Тебе благодати молюся отжени. Катавасия.

Седален, глас 1-й. Страсти честных видев мученик, и тех лобзав узы, на высоту востече свидетельства пречюдне. На древе бо повешен, раны претерпел еси, дондеже в руце Господни дух предал еси.

Слава, и ныне. Богородичен. Надежде християном Пресвятая Дево, Его же родила еси Бога паче ума и слова, непрестанно моли с Вышними силами, дати оставление грехов нам всем. И исправление жития, верою и любовию присно Тя прославляющым.
 

Песнь 4. Ирмос

Христос мне сила Бог и Господь, честная Цёркви боголепно зовет вопиющи, от совести чисты о Господе празднующи.

Запев. Святыми ти язвами удобряемь, прекрасен явися. И Богови Уаре возлюблен венчавшему твой верх, достославне.

Запев. На кресте славне растязаемь, и на земли простираемь, лютыя болезни претерпел еси. Тем неболезненыи живот наследова веселяся.

Запев. Законно видяще божествении мученицы страждуща тя блаженне, терпения словесы укрепляху. С ними же страсти долгая совершив, ублажился еси.

Слава. Хвалами венчаем Божия мученики, их же венча благодать божественая, божествеными увязении. Низложьших вражия высокая мудрования.

И ныне. Богородичен. От тины страстей Владычице возведи, и от страстных помышлении, чюжа творящих мя Бога Единаго Чистаго. Да верою ублажаю Тя. Катавасия.
 

Песнь 5. Ирмос

Божиим светом Ти Блаже утренюющих Ти душа любовию просвета молюся, Тя ведети Слово Божие Истиннаго Бога, от мрака греховнаго изимающа.

Запев. Укрепляешися манием божественым, и неослабная строгания терпиши доблим смыслом Уаре, расторгая гордаго сердце злобы содетеля.

Запев. Славный мученик, видя отпадающия своя плоти радовашеся. Вечнующее ума светлости, и божественая воздания предпрозирая.

Слава. Пою Тя Господи Боже и славословлю и поклоняюся. Благих сподобляя мя, уготованых Тебе возлюбльшим, мученик в страдании тепле взываше.

И ныне. Богородичен. Явльшися Херувим и Серафим яко воистину святейши Пренепорочная. Всех верно Тя ныне освящающих освяти, и спаси ходатайством Ти. Катавасия.
 

Песнь 6. Ирмос

Житейскаго моря воздвизаема зря напастей бурею, в тихое пристанище притек вопию Ти: возведи из тля живот мой Многомилостиве.

Запев. Глагол небрегл еси беззаконнаго врага. И пламы претерпел еси нестерпимых болезней терпеливно, многострадалне Уаре, молебниче о хвалящих тя.

Запев. Непресташе мучитель безумныи ранами немилостивно сдробляя тя, дондеже в руце Божии святую ти душу предал еси, добротами просвещьшюся подвиг твоих.

Слава. Воздвижеся подобяся на древе Христу, и на том вися твою душу предал еси Богу, тя венчавающу страстотерпче, законно доблествовавша.

И ныне. Богородичен. Окорми Владычице в пучине лютых обуреваемую всегда убогую душу мою, и к тихому пристанищу направи, несуменном разумом Тя ублажающю. Катавасия.

Слава, и ныне. Кондак, глас 4-й. Христу последуя мучениче Уаре Того испив чашу, и мучения венцем увязеся. И со Ангелы ликовствуя, моли непрестанно за душа наша.

Икос. Вспомяни наша глаголы светлыи жителю небесныи, Христов славныи великомучениче Уаре, вечному покою тезоимените, и великими ти страдании непреходимое и светлое покоище приобретши. От непреходимыя темницы и томления непрестаннаго и нужды, потщися Богоприятными ти молитвами избавите рабы умиленью, за них же молим тя предстояще, и во усердии взывающе, исполни наше прошение святе, и Христа Бога моли непрестанно за душа наша.
 

Песнь 7. Ирмос

Хладодателну убо пещь сотвори Ангел преподобным детем, халдея же опали велением Божиим. Мучителя увеща вопити: благословен Бог отец наших.

Запев. Просвещена тя подвиг приложением, предобрая Клеопатра Уаре, скутала есть обретши славу тобою веры достойну яве. Юже показа тепле в твое скончание.

Запев. Изливающи на тя слезы, и миром честным помазающи, сокрывает тя под землею всечестная жена, погребшаго прелесть лукавую, и грибными блистании просвещающа нас.

Слава. Не престааше преподобне угождающи тебе Христову угоднику приснопамятная, дондеже явися ходатай си мудре Царству Небесному. Ему же сподобися тобою с возлюбленым своим.

И ныне. Богородичен. Сокрушена мя безчислеными согрешении Дево, ходатайством Ти обнови, уврачюющи ми душу, и слово подающи вопити: благословена яже Бога плотию порождьши. Катавасия.
 

Песнь 8. Ирмос

Из пламене святым росу источи, а праведнаго жертву и воду попали, вся бо твориши Христе елика хощеши, тем Тя превозносим Господа во веки.

Запев. Матерьских послушав мучениче молеб, небесному воиньству светло воиньствуя. Отрока честнаго не отвержена показал благославна, неизреченным милосердием.

Запев. От Египта тя богатьство, яко многоценное принесе мучениче, разбогатящи многоценными дарми Клеопатра целении всю Палестину, любовию тя почитающю.

Слава. Веселяся подвиги своя совершил еси, воине доблии Вседержителя, и яко победитель от Него венчася, Уаре всеблаженне мучеником великая славо.

И ныне. Богородичен. Грехи прилагаю на согрешения, и будущаго не боюся Страшнаго Суда. Победи Чистая души моея ослепление, и мол бою Твоею возвративши мя спаси. Катавасия.
 

Песнь 9. Ирмос

Бога человеком неудобь видети, Нань же не смеют чини ангельстии зрети. Тобою бо Пречистая явися нам Слово воплощено. Его же величающе с небесными вои, Тя величаем.

Запев с поклоном. Крепость низложил еси ратоборца, в Божию яве силу оболкся страдалче доблии Уаре. Тем тя хвалим, исцеления неоскудно от твоих мощей верно почерпающе.

Запев. Яко свет яко утро, яко великое солнце в земленыя простреся память твоя концы. Светоносными просвещающи сияньми твоих честных подвиг всех прехвалне. И мрак сердечныи отгонящи.

Запев. С тобою сияюща видевши славою многою Своего Сына Чадолюбивая, всех Бога величааше. Тебе же прилежно мучениче славит велика заступника, явствено обогатившися.

Слава. Земля, на ней же терпеливое тело твое мудре лежит, божествене освятися. Но даждь молитвами ти нам разрешение прегрешении, житию исправление Уаре, и всем неудобезным избавление.

И ныне. Богородичен. Явлься Дево из Тебе Господь светлаго облака, египетския кумиры всяческой пагубе предаст. Множеством же страстотерпец сего сподоби, терпети подобящихся честная Его страдания. Катавасия.

Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.

Отпуст: Господи Исусе Христе Сыне Божии, молитв ради пречистыя Твоея Матере и преподобных и богоносных отец наших, и святаго мученика Уара, и всех ради святых, помилуй и спаси нас, яко Благ и Человеколюбец. Аминь.


Обзор книги