Канон Апостолу (общий)

Русская вера, 2017

Великую духовную пользу получит христианин, если будет молиться каноны святым, память которых Св. Церковь вспоминает в текущий день. Для тех верующих, у кого нет канонов тем или иным святым, можно молиться данный канон Апостолу, подставляя в текст общего канона имя того апостола, кому молишься канон. Каноны тем или иным святым можно молиться независимо от того, вспоминает ли Святая Церковь их память в данный день или нет. Если усердно молиться святым, они всегда будут нам помощниками в достижении спасения.
 

------------------------------------------------------------------

Общее начало и конец всем канонам →
Порядок чтения по уставу
------------------------------------------------------------------
 

Тропарь, глас 3-й

Апостоле святыи (имя рек), моли милостиваго Бога, да грехов оставление подаст душам нашим. (Дважды).

Слава, и ныне. Богородичен. Тебе Ходатаицу спасения рода нашего, воспеваем Богородице Дево. Плотию бо, ею же ис Тебе прошед, Сын Твой и Бог наш, крестную прием страсть, и избавил есть нас из истления, яко Человеколюбец.
 

КАНОН, глас 8-й
 

Песнь 1. Ирмос

Песнь возслем людие, чюдотворцу Богу избавльшему Израиля от работы, песнь победную поюща и воспевающа. Воспоем Тебе единому Владыце.

Запев: Святыи апостоле (имя рек), моли Бога о нас (поклон).

В вышних Владыце предстоя, (имя рек), апостоле славне, тебе прославльшему, и ученика себе светло показавшему, просвети душу мою, да воспою божественую ти память.

Запев. Всяко исполнение благих тебе Христос даровал есть, и изящна благих даров апостоле показав тя, судом и правдою боговидче, Един праведныи.

Слава. Вседуховную зарю приим апостоле, сошедшюю на тя с Небесе. Огнедухновен бысть, всю попаляя прелесть многобожия.

И ныне. Богородичен. Ты мое мертвеное и тленное, безсмертно и нетленно Спасе показа, во утробу вселися Святыя Девы пречистыя, неискусобрачно, вообразився в человеческое естество.

Катавасия: Избави от бед рабы своя, святыи апостоле (имя рек), яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

Несть свята яко Господь, и несть праведна яко же Бог наш. Его же поет вся тварь, несть бо пресвята паче Тебе Господи.

Запев. Божественое таиньство воплощения познал еси воистинну, апостоле боговидче (имя рек), от Самого Спаса лучю приим премирную.

Запев. Слово безначалное и присносущное, Своего служителя тя апостоле славне, лучами пресветлыми богатно озарив божественыя благодати.

Слава. Зарею разжжен и детелию духовною, яко стрела боговидная послан бысть от Христа апостоле преславне, и мир просвети блаженне учением си.

И ныне. Богородичен. Свещник Тя всезлатыи, пророк пронаписа Богородице, носящую свет неприкосновенныи Христа Бога нашего, просвещающаго мир лучами Божества. Катавасия.

Седален, глас 3-й. Божия Духа светозарение, тму разрушил еси многобожия, и верных сердца просветил еси. Воспев спасеная повеления апостоле (имя рек), премудре. Христа Бога моли, даровати нам велию милость.

Слава, и ныне. Богородичен. Кождо иде же спасается, в правду тамо прибегает. И кое ино таково прибежище, яко Твое Богородице, покрывающее душа наша.
 

Песнь 4. Ирмос

Из горы присенныя Слово, из единыя Богородицы, хотящася Тя воплотити, пророк боговидно раземотреи, со страхом славословяше силу Твою.

Запев. Весь еси сокровище божественых даровании, и евангельския заповеди исполнен, свет миру, и соль Церкви ты бысть, (имя рек), преблаженне.

Запев. Бреннаго и мрачнаго смрада отвратися, невещественыи же свет видети сподобися, Божества сосуд примешен к брению человека достохвалне.

Слава. Ты яко ученик Живота нетленнаго, умертви наш живущии грех, живоносною силою Живодавца. Его же прият действие.

И ныне. Богородичен. Равен быв Отцу Своему по существу. Равен же и земным бысть по естеству, от пречистыя Девы, в наше Владыко естество оболкся кроме греха. Катавасия.
 

Песнь 5. Ирмос

От нощи неведения, богоразумием просвещеи концы, просвети мя утром славословия Твоего Господи.

Запев. Со огнем духовным боговидче, твой смесися язык, его же восприят любовию на горнице седя.

Запев. Яко высок сыи, в высоких водворялся селениих, (имя рек), высокая и великая деяния нам принесл еси.

Слава. Ум чист имея к Богу во светлости, и сердце чисто стяжал еси. Воплощеннаго Бога видел еси, непостижимаго разумом.

И ныне. Богородичен. Закон иже первыи Дево рожеством Твоим преста, процвете же благодать, и правда восия. Катавасия.
 

Песнь 6. Ирмос

Ризу ми подаждь светлу, одеяися светом яко ризою, многомилостиве Христе Боже наш.

Запев. Яко ученик и друг Христов, апостоле славне, ревностию поревновал еси, по Господе Бозе Вседержители.

Запев. Тебе божественых чюдес самовидителя Спас показа, подав тебе власть и действие Своея благодати.

Слава. Преукрашен божественою благодатию учения, благовествуеши миру общее спасение сущаго надо всеми Бога, апостоле Христов (имя рек), прехвалне.

И ныне. Богородичен. Заграждаются ныне уста нечестивых, не мудрствующих Тя Богородицу Всенепорочная. И лица их в срам да облачатся. Катавасия.

Слава, и ныне. Кондак, глас 4-й. Яко звезду пресветлу Церкви всегда стяжа тя апостоле (имя рек), чюдес твоих многоподаванием просвещаема, тем же зовем Христу, спаси чтущих верою память Твоего апостола, Многомилостиве.

Икос. Струю слова подаждь ми Господи, водное естество содеявыи. И сердце мое укрепи Благоутробне, иже землю утвердивыи словом Своим. И просвети мое помышление, светом яко ризою одеваяися. Да глаголю и пою подобная, достойно почести Твоего апостола, Многомилостиве.
 

Песнь 7. Ирмос

Дети еврейския в пещи, попраша пламень дерзнувше. И на росу огнь преложьшу вопияху, благословен еси Господи Боже во веки.

Запев. Странну ревность воистину имыи, ныне Престолу предстоиши Владычнему, (имя рек), яко слуга Христов венчан бысть богопроповедниче.

Запев. Вкупе с Словом Божиим водворяяся, сожитель зде быв. И Царствие тамо наследова вышнее вопиеши, благословен еси Господи Боже во веки.

Слава. Мудростию обложен, благодатию озарен, мирною красотою украшен богоглаголиве апостоле святе, вопиеши, благословен еси Господи Боже во веки.

И ныне. Богородичен. Лестию древнею праотца изгнал есть змий из наследия. Ты же Мати Божия сего возведе, благословен глаголюща Пречистая плод Твоего чрева. Катавасия.
 

Песнь 8. Ирмос

Мусикийским органом согласящим, и людем без числа кланяющимся. Телу сущу на молебнем, трие отроцы песнословляху, Господа пойте, и превозносите Его во веки.

Запев. Яко красне нозе твои явистеся, благолепен же ти есть язык глаголющ славу Христову. И научи пети, благословите вся дела Господа, и превозносите Его во веки.

Запев. В добротах пребывая светозарных и чюдес испущая лучи, познася людем воистину семя благословеное. Уверяя взывати, Господа пойте, и превозносите Его во веки.

Слава. Свят ученик, небесным учен тайнам воистину. Прошел еси вселенную, уча велегласно, слово веры Христовы ты апостоле. И неизреченную исповедая благодать, вопия, Господа пойте, и превозносите Его во веки.

И ныне. Богородичен. Ум не может сказати Богородице рожества Твоего, и слово изрещи не может, Бога бо заченши родила еси Дево. Ему же вси зовем, Господа пойте, и превозносите Его во веки. Катавасия.
 

Песнь 9. Ирмос

Воистину Богородицу Тя исповедающе, спасении Тобою Девице чистая, с небесными вои, Тя величаем.

Запев с поклоном. Явьствен бысть концем апостоле, божественым сияя светом. И огнь духовныи приим, светозарен показася, (имя рек). Тем же тя величаем.

Запев. Весь еси Богови возложен, и Тому прилепися. Его же моли ныне богоявленне о нас, иже верою и любовию хвалящих тя.

Слава. Твою преблаженне память празднующе, молимся всегда. Треволнения избыти ходатайством дерзновения ти. Его же яко Христов апостол имаши, боговидче всечестне.

И ныне. Богородичен. Спасения всех ходатаицу явльшуюся человеком, и мира просвещьшую лучами светозарныя чистоты, песньми Тя величаем. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и святаго апостола (имя рек), и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.


Обзор книги