Канон Василию Блаженному, московскому чудотворцу

Святой Василий Блаженный, Московский чудотворец — один из величайших святых Русской Церкви. Жил он в XVI веке. Совершая подвиг юродства среди житейской суеты, он был совершенно далек от нее. В сердце святого ярким пламенем горела богоугодная молитва, он нес тяжкие телесные подвиги, презирал тленные блага. Бог сподобил его даром прозорливости, он умел предвидеть будущее. Блаженный Василий был бесконечно милостив к людям, всегда сострадал им, защищал обиженных. Будем молиться святому, чтобы он умолил Господа о прощении согрешений наших и о даровании нам Своих неоскудевающих щедрот на земле и в потусторонней жизни. Память Василию Блаженному, Московскому чудотворцу 2 августа (15 августа по гражданскому стилю).
 

——————————————————————

Общее начало и конец всем канонам →
Порядок чтения по уставу
——————————————————————
 

Тропарь, глас 8-й.

Яко истинныи и непобедимыи страдалец, в чистоте душевней и телесней явлься, Христа ради изнурив тело свое всякою нуждею. И сего ради приим от Него дар исцеления. И ныне преблаженне Василие моли о нас прославляющих святое твое успение, да избавит ны от варварскаго пленения, и междоусобныя брани, и подаст душам нашим велию милость. (Дважды).

Слава, и ныне. Богородичен. Иже нас ради рождеися от Девы, и распятие претерпев Благии, испровергии смертию смерть, и воскресение явль яко Бог. Не презри их же созда рукою Своею, яви человеколюбче Свое Милостиве. Приими Рождьшую Тя Богородицу молящуюся за ны, и спаси Спасе наш люди согрешьшия.

 

Канон, глас 8.

Песнь 1. Ирмос.

Посеченыи несекомаго пресече. И виде Солнце землю, ея же несть видело. Лютаго врага вода потопила есть, и непроходимо пройде Израиль. Песнь же воспевашеся. Господеви поем, славно бо прославися.

Запев с поклоном: Святый праведный Василие блаженне, моли Бога о нас.

Одеяися светом яко ризою, одея тя Василие чюдне ризою безстрастия. Тем же взимаяся духом к Божественному видению, и озарися благодатию Божия промысла. Странен показася от всех сродник и знаемых, и преселися к сродству небесному. И ныне живеши жизнь безконечную.

Запев. Показася Русской земли светило великое, просвещая нас светом твоих добродетелей. И кто может изчести многия подвиги и труды твоя, и всенощная стояния, и иных множества к сим добродетелей. Им же возмездие от Бога приял еси.

Слава. Ума человеча превзыде чин, дивное на земли житие пожил еси. Бдя и моляся и тружаяся. И наг на земли скитаяся. Не имея где главы подклонити, во всем животе своем. И сего ради вселися во обители небесныя. Многи бо рече Господь обители в дому Отца Моего, по мере добродетелей.

И ныне. Кое спасение ино таково яко же Ты Пречистая Богородице, крепкое поможение, и теплое заступление. Избави душу мою от сети дияволя. Ты бо еси всем земным спасение, спаси и мене люте потопляема волнами греховными, молитвами угодника Твоего Василия.

Катавасия: Избави от бед рабы своя, святый праведный Василие блаженне, яко вси по Бозе к тебе прибегаем, ты бо молиши о нас Христа Бога нашего.

 

Песнь 3. Ирмос.

Небесному кругу Верхотворче Господи, и Церкви Зиждителю. Ты мене утверди в любви Своей, желанием Си край, и верным утвержение, Едине Человеколюбче.

Запев. Дым и прах и сень вменил еси красная века сего, и ничто же от любве Христовы паче изволил еси. Сего желая насытитися славы и веселия Присносущнаго, в ня же желают ангели приникнути, и сих радости получил еси. Предстоиши во свете Святыя Троица радуяся. Ему же молися за ны преблаженне Василие.

Запев. Воцарися над страстьми великодушне Василие, одолел еси плотьскому желанию, и явися чистоты сокровище духовное. И сего ради прият тавлу белу, в ней же написано имя ново дивно неведомо. И не бысть на души твоей скверны ни враски. Убелил бо еси ю токи слез твоих, и ныне непрестанно радуешися.

Слава. Веру неоскудну в души имел еси преблаженне. Данныи ти талант трудолюбно возделал еси. И прия власть над десятию градов добродетелей. Бесы прогоняти, прокаженныя очищати, разслабленныя быстро ходити, слепыя просвещати. И усугуби дар, всем исцеления творящим святую память твою.

И ныне. Аз Дево Святая Богородице, надежу имею на Тя спасаюся. Разгони Владычице враги душа моея, и направи мя на путь жизненыи, да спасся вопию Ти. Радуися Помощнице миру, Надежа християнская. Радуися Господь с Тобою Благословенная. Катавасия.

Седален. Глас 8. Подобен. Яко Всенепорочная.

От земных на небесная помыслив, и делом соверши. Красная мира сего во уме ты вменив, Христа ради юрод бысть на земли. Терпением и жестоким подвизанием, сын Света показася. И в Царствии Небеснем светло зриши Святую Троицу, преблаженне Василие. Юже моли, согрешением оставление даровати, празднующим любовию святую память твою.

Другии седален. Глас 4. Бысть дом Божии, и жилище Святаго Духа, блаженне Василие. Церковь тела своего непорочну соблюде. И пришед вселися в тя, Отец и Сын и Святыи Дух. И дарова тебе терпение и мужество, и храбрость духовную, и несмутною мыслию по Божественому пути шествовати. И прият дар исцелении. Моли Христа Бога, спасти душа наша.

Слава, и ныне. Богородичен. Красоте Твоей Богорадованная, архангел Гавриил предстоя дивляшеся, и вопияше Ти. О Невесто Неискусобрачная, Отроковице Неблазненая, како Ти изреку преже век сокровенную тайну. Ты бо еси небесным и земным соединение. Радуися Обрадованная Господь с тобою.

 

Песнь 4. Ирмос.

Пророк Аввакум, мысленыма очима провиде Господи пришествие Твое. Тем и вопияше. От юга приидет Бог. Слава Силе Твоей. Слава Христе пришествию Твоему.

Запев. Был еси под владыкою учинен Христова повеления, и повелевая рабу своему телу, сотворити службу свою. Христови работая, и покори уму владыке страстныя помыслы. И был еси сын послушания, вопия Христови. Силе Твоей слава Человеколюбче.

Запев. Имеющим цел ум не требовати писания, рече великии Антонии. На тебе сие сбысться премудре Василие, не учився книгам вся разумел еси Божественная Писания, непрестанно поя Христови. Силе Твоей слава Человеколюбче.

Слава. Во граде яко в пустыни живыи, преблаженне Василие, и ни от чего же смущаяся. Но венчася ради трудов твоих. Посещая вдовицу якоже Илия пророк сарептяныню, и поя песнь немолчную. Силе Твоей слава Человеколюбче.

И ныне. Иже Отцу и Духу Собезначалныи, от Тебе изволи родитися, нашего ради спасения. И дарова Тя роду християньскому теплую Заступницу, и в бедах скорую Помощницу. Тем же Мати Безмужная, поклоняемся верно Рожеству Твоему. Катавасия.

 

Песнь 5. Ирмос.

Мрак души моея, отжени Светодавче Христе Боже. Зачалобытную тму изгнав бездныя. И даруй ми свет повелении Твоих Слове. Да утренюя прославляю Тя.

Запев. Процвел еси яко кипарис посреде земли Русския, угодниче Христов Василие. Принесе плоды духа во мнозе терпении, безименьство и телесное удручение, и от бесов и злых человек озлобление. Сего ради прият ныне вечное утешение.

Запев. Сила бо Моя рече Господь в немощи совершается. Се бо на тебе свершися Божие смотрение, чюдне Василие. Силою Христовою дивен явися в житии своем, зло стража и никакоже болезни чюяше. Облегчеваше ти желание будущих благ, их же получил еси.

Слава. Звание твое не от человек бысть, но от Бога премудре Василие. И яко елень жажда на источники воды живыя потекл еси, и напитавая душу Христовою любовию, и к тому никакоже от зноя греховнаго вжадася. Укрепи бо тя на се Царь Смирения.

И ныне. Ангели и архангели, херувими и серафими многоочитии. Начала и власти и господьствия. Раболепно поклоняются Рожеству Твоему Богородице, славяще Тя Владычице. Тем же и мы Мати Преблагословеная поклоняемся со страхом, и молим Тя спаси душа наша. Катавасия.

 

Песнь 6. Ирмос.

Якоже пророка избави, из глубины преисподняя Христе Боже. И мене от грех моих избави, яко Человеколюбец. И направи живот мой молютися.

Запев. Кто может изчести чюдеса премудраго Василия. Его же видяху по морю шествующа не мокрено яко посуху. И видяху невернии языцы дивляхуся, и пришедше на Русь поведаху, мы рече видехом такова человека по морю шествующа. Истинно бо свидетельство и от враг приносится. Мы же глаголем, слава Богу творящему чюдеса дивная.

Запев. Уподобися премудре Василие, всеми нравы и обычаем, Симеону юродивому Христа ради. И Андрею цареградскому. И великому отцу Макарию. И Онуфрию, и Павлу фивейскому. И Максиму чюдному. И Прокопию великому. С ними же сожитель явися во Царствии Христа Бога нашего.

Слава. О премудре Василие, чюдныи житием и разумом. Молим тя блажене. Моли Христа Бога нашего за царя православнаго, и царицу и чада их (за всех иже у власти сущих?). И всем верным спасение испроси, и мирови смирение, и от грех свобожение. И умоли Царствию быти наследником.

И ныне. Кто нас избавит от муки вечныя, и от смерти душевныя. Аще не Ты воздежеши Пречистей руце Богородице, Сыну Своему и Богу нашему. Да спасет нас неимущих помощи ни откуду же, Твоим покровом Преблагословенная. Катавасия.

Кондак. глас 4. Духом божиим водим, преблаженне Василие. Оттрясе мирскии мятеж, и жития треволнения возгнушася. Совлечеся одеянии тленных, и облечеся в ризу безстрастия. Убежа ловления льстиваго миродержьца, и был еси странен во своем языце. Паче земнаго багатьства избра богатьство небесное, и увязеся венцем терпения. И ныне преблаженне Василие, моли Христа Бога, о творящих святую память твою, да зовем ти. Радуися преблаженне Василие.

Икос. Трудолюбному житию твоему ангели удивишася, мужески бо воста на естество, разуме безпостоятельное жития сего. Совлечеся одеянии, и наг сыи ста противу кознем диявольским, якоже храбрыи ратоборец, по словеси преблаженне апостолову. Несть наша брань к крови и плоти, но к началом и ко властем, и к миродержителем тмы века сего. И сему наготою телесною сплетеся доблествене. Ни от коея же страсти победися, но всех сетей убежа гордаго Велиара. И прескочи пропасть адову, юже изры враг промежь Лазаря и богатаго. И ныне у Авраама на лоне почиваеши, отнесен святыми ангелы. Молися преблаженне Христу Богу нашему, о творящих святую память твою, да зовем ти. Радуися преблаженне Василие.

 

Песнь 7. Ирмос.

На поле молебнем, иногда мучитель пещь постави, на мучение богомудрым. В ней же трие отроцы песнословяху, единаго Бога. Трие воспеваху глаголюще. Отец наших Боже благословен еси.

Запев. День Господень всегда пред очима зря, премудре Василие. И предстоя наг якоже судищу нелицемерному Сына Божия. И послужил еси Владыце своему во мнозе терпении, воспевая во смирении мнозе. Отец наших Боже благословен еси.

Запев. Разуме блаженне Василие, яко ничтоже нужнее души, ея же ради Христос умре и воскресе. И не оскверни ризу душевную, юже приял еси от святаго крещения. И ныне предстоя Христови взываеши. Отец наших Боже благословен еси.

Слава. Ничто же разлучит мя от любве Христовы, сия преблаженныи Василии глаголаше. Ни высота ни глубина, ни ангели ни силы, ни слава ни богатьство. Ничтоже бо хощу красных мира сего, паче Исуса Сладкаго, Ему же вопия. Отец наших Боже благословен еси.

И ныне. Преже Рожества пребысть Девою Мати Сына Божия, и по Рожестве явися паки Дева. Бог бо Бе, идеже хощет побежаются естества чинове. Ты бо явися Село пространно, Сына Отча Благословеная, Ему же вопием. Благословен Бог отец наших. Катавасия.

 

Песнь 8. Ирмос.

Победители врагу и пламени, благодатию бывше. Иже по заповеди зело поборающе, дети пояху. Благословите вся дела Господа, и превозносите Его во веки.

Запев. Видя Господь труды твоя и многия подвиги. Сего ради чюдес даром обогати тя, и просиял еси на свещнице Христова сияния. И яви тя вселеннеи знаема ради чюдес исцеления, и вси вопиют с тобою преблаженне. Благословите вся дела Господа, и превозносите Его во веки.

Запев. Слыша премудре Василие Спасову заповедь, аще рече человек весь мир приобрящет, и отщетит душу свою, что даст измену на души своей. Ты же сие в сердцы своем скрыл еси. И печашеся како угодити Богови, Ему же взываеши. Благословите вся дела Господа, и превозносите Его вовеки.

Слава. Ничим же еси менши прежних святых чюдне Василие. Явися изряден многими труды и подвиги, и тайными к Богу молитвами. Аще и человеком неведома, но Богу вся зрима и ведома, Ему же вопиеши. Благословите вся дела Господа, и превозносите Его во веки.

И ныне. Благословите вся дела Господня, Господа рождьшагося от Девы Марии. И спасша всеродна Адама от падения. И вознесша паки человечество на высоту небесную, и седяща одесную Отца, Ему же вопиют вси ангели. Да благословит вся тварь Господа, и превозносит Его во веки. Катавасия.

 

Песнь 9. Ирмос.

Благословен Господь Бог Израилев. Воздвигнувыи Рог Спасения нашего, в дому Давыдове Отрока Своего. В них же посети нас Восток Свыше. И направил ны есть на путь мирен.

Запев с поклоном. Якоже рече Христос Самая Истина, внутрь вас есть Царство Небесное. Ты бо Василие чюдне был еси, сын и наследник Царствия Божия, еже скрыл еси внутрь себе добродетельми. Сего ради тя вси ублажаем, Христа величающе.

Запев. Бдите рече Господь и молитеся, не весте бо дни и часа како приидет Сын Божии. Ты же праведне Василие всегда готов сыи, ожидаше пришествия Христа Царя Небеснаго. Его же и радостно усрел еси, и прият блаженьство вечное, Христа величая.

Слава. Егда преставися преблаженне Василие, тогда стекошася царие и князи, и вси собори русстии. Юноша и девы, старцы со юнотами, твоим честным мощем поклонитися. И воскликнуша купно вси память вечную, Христа величающе.

И ныне. Возвеличим Матерь Бога нашего, юже поют вси ангели и архангели. И вси роди и колена поклоняются, и блажат от ныне и до века вопиюще. Радуися о Благодатная Господь с Тобою. Катавасия.

 

Канон, глас 2-й.
 

Песнь 1. Ирмос

Во глубине потопи древле, фараонитская вся воинства, преоружена сила. Воплощьжеся Слово, преспеющия грехи потребил есть, преславныи Господь, яко прославися.

Запев: Святыи блаженныи Василие, моли Бога о нас (поклон).

Возлюбивыи усердно Господа, и желательно подвизаяся достигнути Царства Небеснаго, и просветися божественою благодатию. Темныя облаки души моея разгони, и ум ми озари. И отверзи ми устне к пению, восхвалити тя преблаженне Василие.

Запев. Антонии великии рече, имеющим здрав ум нетребовати писания. На тебе же сбысться премудре Василие, главу свою всегда имея к небеси возведену, очима же горняя зря. Ума чистотою тщася ко Адаму, и к верному Аврааму.

Запев. Странен еси сродник своих был, и ближних любве чуждь. И во своем языце яко иноязычен, во ином же в разуме седяи. И ничтоже от земных одеянии на теле своем ношаше яко же Адам, дондеже не виде обнажения души своея, ниже безобразие плоти своея позна.

Слава. Иже себе познавыи, постиже страх Господень, разжжение плотьное хладом Святаго Духа угаси. Всегда душевныма очима на умныя силы взирати изволил еси. И преплыл еси великую сию житейскую пучину, жестоким путем богоблаженне.

И ныне. Богородичен. Владычице Мати Божия пречистая, благословеная и пренепорочная, души моея струпы исцели, и страсти плотьския умертви. Ум мой от всякого вреда вражия и напастей, изми Богородице.

Катавасия: Избави от бед рабы своя, святыи блаженныи Василие, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
 

Песнь 3. Ирмос

На камени мя веры утверди. Разшири уста моя на враги моя. Возвеселибося дух мой воспевати, несть свят яко же Бог наш, и несть праведен паче Тебе Господи.

Запев. Любовию Божиею угасил еси любовь родителей. Мечь же духовныи всегда воздвизая, им же волю хотения своего отсецая. И утвердил еси стопы разума своего, на камени любве Христовы.

Запев. Иже о своей плоти непечашеся, жизнь мира сего возненавидел еси, и о плотьских небрегл еси. Всегда подвизаяся, ум чист к Богу представити. И принесе себе, яко непорочну и благоприятну великому священнику жертву.

Слава. Еже стяжал еси от младенства, верою несуменною смиреномудрие, и совершеную к Богу любовь. И вси чювства поработив, яко безстрастен был еси. Ум от твари возвысив, лицу же Господню душу представи.

И ныне. Богородичен. Спаси мя Мати Божия, спасения начало мирови явльшися. И избави молвы, и нечистых страстей, и всякия противныя скорби, да славлю Тя Богородице. Катавасия.

Седален, глас 8-й. От земных на небесная помыслив, и делом соверши, красная мира сего во уметы вменив, Христа ради юрод бысть на земли. Терпением и жестоким подвизанием, сын света показася, и в Царствии Небеснем светло зриши Святую Троицу, преблаженне Василие. Юже моли, согрешением оставление даровати, празднующим любовию святую память твою.

Седален другой, глас 4-й. Бысть Дом Божии, и жилище Святаго Духа, блаженне Василие. Церковь тела своего непорочну соблюде. И пришед вселися в тя, Отец и Сын и Святыи Дух. И дарова тебе терпение и мужество, и храбрость духовную, и не смутною мыслию по божественому пути шествовати. И прият дар исцелении. Моли Христа Бога спасти душа наша.

Слава, и ныне. Богородичен. Красоте Твоей Богорадованная, архангел Гавриил предстоя дивляшеся, и вопияаше Ти. О Невесто неискусобрачная, Отроковице неблазненая, како Ти изреку прежде век сокровенную тайну; Ты бо еси небесным и земным соединение. Радуися Обрадованная Господь с Тобою.
 

Песнь 4. Ирмос

Пришествовав от Девы, не ходатай ни ангел, но Ты Сам Господи воплощься, и спасе всего мя человека. Тем вопию Ти, слава силе Твоей.

Запев. Мира сего вся возненавидел еси, плоть духови поработив. И удалившутися телесныя любьве, в юродство претворился еси. Добре разсмотрив преити тяжкую пучину, и успех прияти сподобился еси, чюдне Василие.

Запев. Омрачение возненавидев греховное, пламенем чистоты пресекшу пламень, терпением и мудрейшим юродством, яко златыма крилома на небеса возшел еси. И равноангельную достиже степень.

Слава. Любовию Христовою сродник отречеся. И над страстьми царь показася, скорбным путем шествуя, и достиже пространнаго жилища. И нас плененых греховными страстьми свободи преблаженне.

И ныне. Богородичен. Кров и заступление и прибежище, буди ми Дево рабу Твоему. И исцели мя от безмерных зол, да пою Пречистая, слава рожеству Твоему. Катавасия.
 

Песнь 5. Ирмос

Просвещение во тме лежащим, и спасение неначаемым Христе Спасе мой, к Тебе утренюю Царю мирныи, просвети мя сиянием си, иного бо разве Тебе Бога не знаем.

Запев. Иже до третияго небесе возшедыи рече, мы юроди Христа ради. Ты же преблаженне по благодати в таковое юродьство преложися. Досаждение неразумных людей претерпев, и козни бесовския попрал еси. И яко ангел на земли явися нам.

Запев. Бога ради, житие славы мира сего от младеньства возненавидел еси, возлюбив нищету и терпение. Огнем печали очныя слезы изсушил еси, и вся скорбная претерпе, преблаженне Василие.

Слава. Премудростию Божиего просвещен еси, огнь вещественыи невещественым угасив, и чистотою жития своего, безтелеснаго воиньства усвоению сподобися.

И ныне. Богородичен. Источаеши исцелением струи болящим Дево всюду. Тя бо источника показа милосердия Владычице, иже милости Господь, из Тебе рождеися паче ума. Катавасия.
 

Песнь 6. Ирмос

В бездне греховней одержимь, неизследную милосердия Твоего призываю бездну, от тля Боже мой возведи мя.

Запев. Остр ум всегда к Богу имев, и яко нечувьствен ко всем житейским был еси. Вся же коварства лукаваго, яко сеть разторгнул еси. И пресветлое светило мирови показася, богоблаженне Василие.

Запев. Духом Божиим наставляемь благоюродиве, чистота естества твоего паче естествена. Небесоподражательное житие имел еси, и ангелолепно видение. Моли спастися нам, от враг наших.

Слава. Ангел житием на земли показася, и на безсмертную гору возшед добродетельми, ангельския полки удивил еси, и на враги храборник чюден показася. И ныне пособьствуй державе нашей преблаженне, да твоими молитвами противнии побеждаются.

И ныне. Богородичен. Руце Свои пречистеи Дево Мати простерши, покрыи на Тя надеющихся, и Сыну Твоему зовущих, всем подаждь Христе милости Своя. Катавасия.

Слава, и ныне. Кондак, глас 4-й. Божественым убо светом озаряемь, чювьственыя страсти победил еси чистотою святе. От младости бо удаляяся земнаго мудрования, и последствова Христу Богу скорбным путем юродства. Тем же тя и Он на земли чюдесы обогати присно. И ныне преблаженне Василие молися выну о творящих честную память твою.

Икос. Трудолюбному житию твоему ангели удивишася, мужески бо воста на естество, разуме безпостоятельное жития сего. Совлечеся одеянии, и наг сыи ста противу кознем диявольским, яко же храбрыи ратоборец, по словеси преблаженне апостолову. Несть наша брань к крови и плоти, но к началом и ко властем, и к миродержителем тмы века сего. И сему наготою телесною сплетеся доблествене. Ни от коея же страсти победися, но всех сетей убежа гордаго Велиара. И прескочи пропасть адову, юже изры враг промежь Лазаря и богатаго. И ныне у Авраама на лоне почиваеши, отнесен святыми ангелы, молися преблаженне Христу Богу нашему, о творящих святую память твою. Да зовем ти, радуися преблаженне Василие.
 

Песнь 7. Ирмос

Богопротивное веление, беззаконнующа мучителя, высок пламень вознесло есть. Христос же простре богочестивым детем, хлад духовныи, сыи благословен и препрославлен.

Запев. Твердыи душею адамант показася блаженне, воистину житие твое выше естества, яко же в кающихся обители. И осязанием и сластьми мира сего, безстрастен пребывая. Велии же от видения пребыв без вреда.

Запев. Исполнися Святаго Духа благодати, разумев Господне благовестие. Широкии и пространныи путь вводяи в пагубу возненавидел еси, и возлюбил еси безмолвие. Тесным и прискорбным путем Христу последова, и от земных к небесным обителем преславно возшел еси.

Слава. Благодарное сие пение, приносимое тебе не презри преблаженне. Но милостивно приими, и радости духовныя исполни нас. Умоли Господа подати людям нашим лет умножение, и миру устроение.

И ныне. Богородичен. Яже благоутробия двери, смиреную ми душу да не презриши, верно молю Тя Отроковице, но ущедри вскоре, и спаси мя от пучины согрешении моих. И обновльши благодать Твою на мне, просвети Дево чистая. Катавасия.
 

Песнь 8. Ирмос

В пещь огнену, к детем еврейским сошедшаго, и пламень на хлад преложьшаго Бога, пойте вся дела Господа, и превозносите Его во веки.

Запев. Огнь страшныи разумевая, земных ничто же возлюбил еси. Печалию душевною, и глубоким сетованием, ум во глубину смирения погрузив, желая вселитися в Небесное Царьство, еже и получив. И ныне радуешися радостию безконечною.

Запев. Равноангельскую честь достойно получил еси, преблаженне Василие. И со безплотными Богови предстоя, призирай на ны с небеснаго круга, радости подателю. И восияй свет твой нам, яко да видим твоя чюдеса.

Слава. Им же образом желает елень палимь на источники, сице и ты преблаженне всегда подвизаяся, желая божественаго хотения, и вся благоугодно Господеви свершил еси. И ныне со святыми поеши непрестанно, пойте вся дела Господа, и превозносите Его во веки.

И ныне. Богородичен. Лукаво время живота моего, и всякия злобы исполнено, сатане лукавому люте мя смущающу, Ты мя исторгни того Богородителнице пакости. На Тя бо все возложих чаяние мое, спаси мя Своими бодрыми молитвами. Катавасия.
 

Песнь 9. Ирмос

Безначална Родителя Сын, Бог и Господь воплощься, от Девицы нам явися, омраченыя просветити, и собрати расточеныя, тем всехвалную Богородицу величаем.

Запев с поклоном. Святым Духом утешение стяжав, умных сил имел еси жительство преблаженне. Тем светоносную твою память похваляюще молим, исполни нас радости и веселия духовнаго.

Запев. Умом и душею украшен преблаженне. И многострадалным житием светло просия память твоя. И благодатными твоими лучами просвещающеся, бед и недуг избавляемся.

Слава. Благая восприял еси на небесех, и обрел еси радость неизреченную, и нас просветил еси чюдесы. И ныне пребываеши со святыми ангелы, во свете Святыя Троицы, преблаженне Василие. Сего ради тя величаем.

И ныне. Богородичен. Ангельстии собори Тя Богородителнице славят, и человечестии роди песньми Тя почитают непрестанно. Ты бо божественым рожеством, земныя с небесными совокупила еси, тем Тя почитаем. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и святаго блаженнаго Василия, Христа ради юродиваго Московскаго чюдотворца, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?