Тропарь, глас 8. Православия наставниче, благочестия учителю и чистоте. Вселенней светилниче, архиереом богодухновенное удобрение, Кириле премудре. Учением бо своим вся просветил еси. Цевнице духовная. Моли Христа Бога, спастися душам нашим.
Канон, глас 4.
Песнь 1. Ирмос.
Моря чермнаго пучину, немокрыми стопами древле шествовав Израиль. Крестообразно Моисеовыма рукама, Амаликову силу в пустыни победил есть.
Запев: Святителю Христов Кириле, моли Бога о нас (поклон).
От Бога светоносную Кириле благодать прием. И издалеча светилник показався, словесныя облистаеши нам луча, памятию твоею. Темже достойно ублажаем тя.
Запев. Наполнился еси учения Кириле мудре духовнаго, заповедем Христовым яко хранитель. Ум же очищь, божествено бысть воистину Троицы жилище.
Слава. Яко ревности и дерзновения исполнь, Кириле славне. Богоборных всех, неложно языкоболия обличил еси, злочестивых ересей. Православие заступая.
И ныне. Исцели сокрушение Пренепорочная человечествия. Творца Рождьшия всяческих. Нас исправльшаго, преклоньшаяся падение праотец Богоневесто.
Катавасия: Избави от бед рабы своя, святителю Христов Кириле, яко вси по Бозе к тебе прибегаем, ты бо молиши о нас Христа Бога нашего.
Песнь 3. Ирмос.
Веселится о Тебе, Церкви Твоя Христе зовущи. Ты ми Крепость Господи, и Прибежище и Утвержение.
Запев. Укрепляем о Христе. Хитрости стропотнаго змия, нравом твердым Кириле, якоже пучину разорил еси.
Запев. Терние страстей от душа отряс. Низложил еси Кириле, всякого помысла возношение, на Христа возносимое.
Слава. Яко благополучен страдалец отче, заклал еси плоти мудрования. И верных возвеселил еси, светлостию учении твоих.
И ныне. Едину в женах Тя Благословеную, яко Божие Селение. Преблаголепно, вси радостию прославим. Катавасия.
Седален. Глас 3, подобен. Красоте девьства.
Столп и жертва Церкви Христовы отче быв. Сию не поколебиму от искушении лукаваго, премудро соблюл еси. Все бо несториево злодейство разорил еси. И Богоматерь Богородицу проповедал еси. Темже тя сошедшеся почитаем, Кириле богоблаженне.
Слава, и ныне. Богородичен.
Яко невозделанен Дево Виноград, Прекрасныи Грозд возрастила еси, источающь нам Вино Спасеное, всем веселящее душа и телеса. Темже яко виновну Тя добрым ублажающе, присно со ангелом вопием Ти. Радуися Обрадованная.
Крестобогородичен. Неискусобрачная Чистая и Мати Твоя Христе, зрящи Тя мертва обешена на древе матерьски рыдающи глаголаше. Что Ти воздаст, еврейскии беззаконныи собор, и неблагодарныи. Иже многих и великих Твоих Сыне Мой даров наслаждеися. Пою Твое Божественое схождение.
Песнь 4. Ирмос.
Воздвижена Тя видевши Церкви, на Кресте Солнца Праведнаго. Ста в чину своем, достойно взывающи. Слава Силе Твоей Господи.
Запев. Победивша страсти душетленныя, и помысл удержавша плотьскии богоносе Кириле. Видев Христос, божественей тя Церкви началника, отче поставил есть.
Запев. Наследовав яко внук возлюблен, отеческую Марка добродетель. И престолу бысть приемник, божественаго евангелиста стопам последуя.
Слава. От Христа убо яко овча упасен быв. И яко пастырь упасл еси стадо отче. Словесы душапитателными твоими, на травах и цветех, богатно напитая благодатию.
И ныне. Воплощенно Безплотное прежде рождьши, Слово Божие Всепетая Обрадованная, мир обновила еси. Темже Тя Богоневесто, верою православною проповедаем. Катавасия.
Песнь 5. Ирмос.
Ты Господи ми Свет, в мир пришел еси, Свет Святыи. Обращая из мрачна неведения, верою воспевающая Тя.
Запев. Потоку воистину велику, наводняему рекою, твое о Кириле подобится слово. Злославных побеждая хитрости.
Запев. Вкупе мерзское ариево разделение, о Кириле. Скверное же савелиево, из глубины смешение отвергл еси.
Слава. Словеса богатотворная, яко злато оставил еси, о Кириле. Сокровища же паче камения честнаго своя, Церкви Христове.
И ныне. Да кропит небо веселие, и благодать на земли. Воздаст бо Ей ныне веселие в высоту, Едину Богоматерь. Катавасия.
Песнь 6. Ирмос.
Пожру Ти со гласом хваления Господи, Церкви вопиет Ти. От бесовския крови очишьшися, милостию от ребр изтекшею Ти кровию.
Запев. Клещами серафим пророку угль. Церкви же Христове, рукама приношаеши священнотаинниче. Еже от божественнаго, возженое очищение.
Запев. Челюстию якоже Сампсон, иноплеменники погубил еси. Прочая же вся чужеславных отче низложи. И державу православным дал еси Кириле.
Слава. Собору богоизбранну, яве стареи сыи. Злочестивое Нестория ополчение, отче низложил еси. Ревностию дыхая, по истинней Богоматери.
И ныне. Разума Нетленнаго Плод прозябла еси Богородителнице, мирови Присноживотныи. Ходатай нетления являем, верою и любовию поющих Тя. Катавасия.
Кондак. Глас 6, подобен. Еже о нас.
Бездну нам учении богословия источил еси, яве от источник Спасов. Ереси погружающу блаженне Кириле. И стадо невредимо от треволнения спасающу. Странам бо ты преподобне еси наставник, яко божественая являя.
Икос. Красно приутрени показуется велми Солнце, сыи светоносно. Тма отгоняется, и Луна охуждает. Нощь бо несостоится. Уясняет день. Просвещает воздух. Небо красно показует нам. Землю удобряя, цветом творя изращение. Море же облистает, и вкупе весь украшает мир, еже во всем сего светлеиши Кирил. Егоже мудрая учения спасают поднебесную. Озаряет бо той верных душа, и побеждает благочестно ереси присно. Странам бо той наставник, яко божественная являя.
Песнь 7. Ирмос.
В пещи Авраамския си дети персстей, любовию благоверия паче, нежели пламенем опаляеми взываху. Благословен еси в Церкви Славы Твоея Господи.
Запев. В Синайстей горе, древле облаком покрывся, закон взят блаженне Кириле Моисей. Ты же отъемлющу писателныи, водрузил еси сокровенную доброту Духа.
Запев. Законоположения гаданием, яко младенцем первее отче, даному покрывалу нелепому. Якоже шипок разумения ты открыл еси, сказа образы явленнее.
Слава. В Несмесне Единении Божествене, и Несекоме мудре отче твоими словесы. Три убо богословуя Составы, рекл еси Кириле, непременны же в Существе Едином и Божестве.
И ныне. Видеша ангели Богомати странная, Рожеством Ти. Естество тленное рода земленаго, к нетленному паки текуще Житию, и Славе Небесней. Катавасия.
Песнь 8. Ирмос.
Руце разпростер Даниил, лвова зияния в рове затче. Огненую же силу угасиша добродетелию поясавшеся, иже благочестия любители отроцы взывающе. Благословите вся дела Господня Господа.
Запев. Яко волна морьская воистину, в тебе излияся премудрости источник. Ибо непрестанныя истекоша реки из чрева твоего отче, учении благочестивых, якоже предрече Христос. Преходят бо песка множеством, твоя богоглаголания.
Запев. Приставник и учитель мудр, Церкви показася. Оба Кириле яве водрузил еси преподобне Завета. Якоже бо основание, и духовен жребии, твоя имуща словеса вопиет. Благословите вся дела Господня Господа.
Слава. Слова Воплощеннаго нас ради Всехитреца, ты недоуменное учиши соединение Кириле. Неразделно несмесно, во обою волю равно преклонься, вопия. Благословите вся дела Господня Господа.
И ныне. Естеством Неприступныи всюду, Сын и Слово Божие в Тя вселься Чистая. И оболкся Пречистая, в наше существо яко Милосерд. Явися Благоприступен Плотию. И водворися с нами вопиющими. Благословите вся дела Господня Господа. Катавасия.
Песнь 9. Ирмос.
Евва убо недугом ослушания, клятву вселила есть. Ты же Дево Богородице, прозябением прижития Твоего, мирови благословение процвела еси. Тем Тя вси величаем.
Запев с поклоном. Возношение на Христов вознесшееся разум, и сего Богоматерь, Кириле вседержавно низложил еси. Нестория безбожное. Сыновню двоицу. Такоже и смешение безглавных, естеством.
Запев. Силою разума, и просвещением благодати. Троицу Единосущную, Сына же воплощенна Бога, богословил еси блаженне. Явльжеся Богородицы поборник, в вышних ныне прославляешися.
Слава. Свыше нас поминателей, славне назираеши отче. Милостивно царю победы крестоносцу моля. И вознося молитвами си, православных рог. И просвещая иже твою память празднующих.
И ныне. Утешняем падении многими Препетая, и лютостию бед. Ныне Тебе хвалении жертву приношаю, и прилежно взываю Ти. Святая Богородице помози ми. Тя бо славя песнь скончеваю. Катавасия.