Канон преподобному Саве Вишерскому


Творение священноинока Пахомия. Глас 4.

Песнь 1. Ирмос.

Отверзу уста моя и наполнятся Духа, и слово отрыгну Царице Матери, и явлюся светло торжествуя, и воспою радуяся Тоя чудеса.

Запев с поклоном: Преподобне отче Саво, моли Бога о нас.

Смирился еси Христа ради отче. И крест взем, от отечества и сродник яко от змия бегал еси. Отнюду же в пустыню вшед, и в ней трудолепно подвизался еси преподобне.

Запев. От юности своея, отче Саво, ум к Богу вперив, и тленными нетленная, яко добрыи купец искупил еси тем же ныне сшедшеся память твою почитаем.

Слава. Христовым рачением, отче Саво, паче огня распалаемь, настоящая яко ничтоже сущая прозрел еси. И сего ради в покоища вселися, идеже праведных душа веселятся.

И ныне. Боляща исцели душею и телом Владычице раба Твоего, блаженнаго Савы молением. Тебе бо Предстателницу вси сущии в печалех стяжахом. Яко Рождьшую Спасение наше.

Катавасия: Избави от бед рабы своя, преподобне отче Саво, яко вси по Бозе к тебе прибегаем, ты бо молиши о нас Христа Бога нашего.

 

Песнь 3. Ирмос.

Твоя певцы Богородице, Живыи Нетления Источниче, лик Себе совокупльши, духовен утверди, и в Божественей Ти славе венцем Славы сподоби.

Запев. Сна своима очима недал еси блаженне Саво, ни веждема дремания, дондеже сподобися праведных селения, иже уготова Бог, преподобне, любящим Его.

Запев. Бодреными си молитвами, отче Саво, и жестоким воздержанием, Богу на земли добре угодил еси. Сего ради страшен врагом, и славен человеком был еси.

Слава. Райскую жизнь, и тамо святых селение, всегда во уме своем поминая преподобне. Тем же в слезах и в воздыханиих всю свою жизнь отче Саво прешел еси. Сего ради и по смерти Христос, чюдесы тя прослави.

И ныне. Источаеши исцелением струи болящим Дево всюду. Тя бо Источника показа милосердия Владычице, иже Милости Источник из Тебе Рождеися паче ума. Катавасия.

Седален. Глас 4. Подобен. Вознесыися.

Юность свою преподобне, воздержанием увядил еси. Страсти телесныя яко пленника худа связав, духови повинул еси. И сего ради, отче Саво, Христос чюдесы преславно тебе венчает, Един Прославляяи святых Своих.

Слава, и ныне. Богородичен. Умертвися вся крепость моя, от множества безмерных моих зол. И многими скорбьми одержимь уже отчаяхся. Но помози ми Владычице Савы блаженнаго предстательством, яко Радость Рождьшая, плачущим Утешение.

 

Песнь 4. Ирмос.

Седяи во Славе на Престоле Божествене, на облаце легце, прииде Исус Пребожественыи, от Пречистыя Девы, и спасе вопиющия, слава Христе силе Твоей.

Запев. Житие свое, отче Саво, чюдно на земли показал еси, велико пощение и смирение. И сего ради Тамошняго жития величество наследил еси. Моли спастися от бед поющим тя.

Запев. Симеону великому, и на столпе жившему житию, последуя преподобне. Тем же тому елико мощно именование, от жития стяжал еси Саво пребогате.

Слава. Постом и молитвами тело свое, отче Саво изнурил еси. И сего ради сподобися видети, не изреченная благая, яже святым уготованна. С ними же, отче Саво, о нас молися.

И ныне. Кров и Заступление, и Прибежище буди ми Дево рабу Твоему. Исцели мя от безмерных зол, воспевати Пречистая, слава Рожеству Твоему. Катавасия.

 

Песнь 5. Ирмос.

Удивишася всяческая о Божественней Славе Твоей. Ты бо Браконеискусимая Девице прият во утробе надо всеми Сущаго Бога, и родила еси Безлетнаго Сына, всем воспевающим Тя, Мир подавающа.

Запев. Чисто житие свое от юности потщался еси преподобне сохранити. Тем же чистоту твою видев Пресвятыи Дух, в тя вселися.

Запев. Яко преобидев тленная, вечная отче сподобился еси прияти, по неложному словеси, просите и приимете. Тем же яко просил еси сия, по достоиньству приял еси.

Слава. Место иже сподобися прияти честныя мощи твоя преподобне освятися, и по многим странам прославляемо есть, яко в себе мощи твоя имущи.

И ныне. Не престай молящи Его же роди Богоневесто, яко Спаса и Владыку разрешение ми подати скорбем, и болезнем облегчение, яко да приму прощение, песнословя Тя во веки. Катавасия.

 

Песнь 6. Ирмос.

Божественое се и всечестное, совершающе празднество богомудрении Божия Матере. Приидите руками восплещем, от Нея Рождьшагося верою славяще.

Запев. Твое великое житие и чистоту, к сим же безмерное смирение провидев Пресвятыи Дух, славна тя всем отче показа. Тем же от сего жития ко оному прешед, получил еси с праведными иже тамо веселия.

Запев. Днесь наставши священная память твоя преподобне Саво. Веселит ученики твоя, воспевающыя любовию подвиги твоя. И честное твое успение славяще торжествуют. Их же молитвами твоими отче соблюди.

Слава. Разбойницы первие пришедше тебе оскорбити преподобне. Но тех разумев лукавьство, воздвигнути тем древо рекл еси, немогущим же многим тебе единому противитися. Тем же яко посрамлени прочее со страхом отбежаша. Паче побеждени бывше, нежели победиша.

И ныне. Твою помощь даждь ми, и избавити мя от бед и скорбей и прегрешении моих, яже всех Рождьши Избавление. Катавасия.

Кондак. Глас 8. Подобен. Возбранной.

Отечества преподобне удалився, и в пустыню вселився. И тамо на столп вшед, идеже жестоко житие показал еси. И многи житием удивил еси. Отнюду же дарования чюдесем от Христа приял еси. Поминай нас чтущих память твою. Да зовем ти радуйся, Саво отче наш.

 

Песнь 7. Ирмос.

Не послужиша твари богомудреннии паче Зиждителя. Но огненное прещение мужески поправше, радовахуся поюще, Препетыи иже отцем Господь и Бог благословен еси.

Запев. Источает чюдеса честная рака твоя преподобне, преизобилующи благодатию, верою приходящим здравие дарует, иже Христу от души вопиющим, благословен Бог отец наших.

Запев. Древним онем и великим отцем, иже в посте просиявшим житию подобяся преподобне, в пустыню вселися. И тамо в пощениих многа лета пребыл еси, Саво, отче наш.

Слава. Яко Истиннаго и Кроткаго Пастыреначалника Христа, незлобивое овча, отче Саво, был еси. Тем же незлобив хотящим тебе озлобити был еси Христови вопияше, благословен Бог отец наших.

И ныне. Обощрены болезни ранам моим от безмерных ми прегрешении, Владычице, ведут в смерть душевную и телесную. Но исхити, яко Силна, всяких скорбей и недуг. Катавасия.

 

Песнь 8. Ирмос.

Отроки благочестивыя в пещи, Рожество Богородиче спасло есть. Тогда убо образуемо, ныне же действуемо. Вселенную всю воздвиже пети, Господа воспевайте дела, и превозносите Его во веки.

Запев. Из детска преподобне отче потщался еси свою совесть и сердце с душею чисто Господеви представити. Тем и Христос чюдесы тебе прославляет, Тому вопиюща, Господа воспевайте дела, и превозносите Его во веки.

Запев. Ныне пустыня веселием красуется отче, имущи мощи твоя в себе Саво преподобне. Ученицы же твои, твоему житию ревнующе, о твоей памяти радующеся Творцу вопиют, Господа воспевайте дела, и превозносите Его во веки.

Слава. В пустыни преподобне идеже селение имел еси, тамо пречестен храм в славу Христу воздвигл еси, в нем прославлятися Пречистому Того Имени. И всем вопити, Господа воспевайте дела, и превозносите Его во веки.

И ныне. Свещниче Света Трисолнечнаго сущи, зарею благоутробия Твоего, тму отъими. Прегрешении моих Богородителнице, избавление нужным болезнем подающи, верою превозносящему Пречистое Твое Рожество. Катавасия.

 

Песнь 9. Ирмос.

Всяк земен да взыграется, Духом просвещаемь. Да ликовствует же безплотных умов естество, почитая святое торжество Божия Матере, и да поет, радуися Преблаженная Богородице Чистая Приснодево.

Запев с поклоном. От пустыннаго жития, к Премирному и Вечному Животу, яко прешед  блаженне, не престай моля Избавителя, от различных напастей и бед избавити. Иже любовию честное твое успение, ныне песньми славящих.

Запев. Певцем иже искреною любовию поющим, и верою тебе пение хваления приношающих треблаженне Саво, от всяких бед и скорбей избавляй. Да тя вси величаем.

Слава. От рук недостойных, малое сие песнем хваление приносящему ти приими, блаженне Саво. Не бо возмогох противу твоего величества украсити. Но малое сие, яко велико приими. Да тебе всегда в песнех величаю.

И ныне. Пение с песнию и хваление и сплетеное от болезненыя души приношаю с любовию, Тебе рождьшей Христа, естеством Бога. Его же иже благоприятно приемши, прошения наша Богородице исполни. И молитвами Твоими мя соблюди. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?