Канон преподобному Никите Столпнику


Глас 4.

Песнь 1. Ирмос.

Отверзу уста моя, и наполнятся духа. И слово отрыгну Царице Матери, и явлюся светло торжествуя, и воспою радуяся Тоя чудеса.

Запев с поклоном: Преподобне отче Никито, моли Бога о нас.

Светом благодати озаряемь преподобне, иже верою память твою торжествующыя световидную, тмы греховныя молитвами си избави, Никито преславне.

Запев. К Богу вводящь несовратно шествовал еси путь, ко Граду Небесному Никито достиже. Ибо Святыи настави тя Дух, почиваяи в сердцы твоем.

Слава. Возносящее смирение Никито имел еси. Тем ти ся молим, ущедри преподобне смирение наше. И болезни вся облегчи сердец наших.

И ныне. Радости нам Ходатай, яко приемши исполнение всего Божества, явися Всенепорочная. Тем вси Тебе радуися ангелово согласно зовем, Богорадованная.

Катавасия: Избави от бед рабы своя, преподобне отче Никито, яко вси по Бозе к тебе прибегаем, ты бо молиши о нас Христа Бога нашего.

 

Песнь 3. Ирмос.

Не мудростию ни силою ни богатством хвалимся, но Твоею Отчею составною Мудростию Божиею, яко несть Свят, паче Тебе Человеколюбче.

Запев. Прежнее веселие измени, будущих ради благих жестостию. Добродетелно пожив блаженне. На источнице в горах, яко великии Илия пребывая.

Запев. Путь правыи его же вожделев, пощения ради удивлением брашен тебе показа Бог. Его же обрете безмездно, яко же пристанище, мудре.

Слава. Колеблемых различными страстьми, ко твоему столпу Никито приходящих, честным си ходатайством всех нас посети, моля Человеколюбца.

И ныне. Тя Мудрость Божия Всечестныи Орган обретши, от Твоих чистых кровей воплощается, и по Рожестве Нетленну показа. Катавасия.

Седален. Глас  5. Телом возшед на столп, ум же возвысив на премирная, труды ко трудом прилагаеши. Желая достигнути, уготованная ти благая на небесех. Их же получил еси, поминай нас, почитающих священную память твою.

Другии седален. Глас 4. Яко всесветлая звезда восияв, светозарными добродетельми богоносе, всю душю просветил еси духом. Тем прешел еси к Невечернему Свету, разрешая страстей наших темныя облаки, память твою присно творящих сердца правостию.

Слава, и ныне. Нечистых помысл моих множество, и безсместных мыслей обуревания, кто изрещи может Всенепорочная, настояния же безплотных враг моих кто исповесть, и сих злобу. Но Твоею мольбою Благая, сих ми всех избавление даруй.

 

Песнь 4. Ирмос.

Седяи во Славе на Престоле Божественнем. На облаце легце прииде Исус Пребожественыи, от Пречистыя Девы, и спасе вопиющыя, слава Христе силе Твоей.

Запев. Столпу богоносе сограждаему, непоколеблемою душею сам ся предал еси. Будущую жизнь предзря, еяже улучити желая, яко храбр воин.

Лавры честныя достигл еси мудре, возвысився смирением, верхи демонския смирил еси, и в ней доблествовал еси. Слава мнихом и утвержение.

Запев. Молитвами и постом вооружився, и страхом себе умертвив Господним блаженне. Отступника изсекаеши невидимаго змия, отче победник бысть.

Слава. Весь божественым духом разжжен быв отче, труды подъял еси на многа лета, в хлевине узце терпя, взыская Господа, благодатию тя божественою укрепляющаго.

И ныне. На престоле высоце страшно седяи, на Матернюю руку Младенец быв седит, низпадшии образ возводя, и обожение сущим подаваяи. Катавасия.

 

Песнь 5. Ирмос.

Удивишася всяческая, о Божественей Славе Твоей. Ты бо Браконеускусимая Девице, прият во утробе над всеми Бога. И родила еси Безлетнаго Сына, всем воспевающим Тя мир подавающа.

Запев. Ходил еси преподобне по узкому пути, божествеными восхождении сердца распространяяся. И причастием обожаяся всемудре. Тем бысть иноком светлость.

Запев. Око очистившу умное преподобне, благодать дасттися аки пророку, еже предняя предзрети и предглаголати, яко сущая далная и безвестная.

Слава. Болезнь облегчи ми грехов и скорбей, и престави сердца моего болезни, и согрешением разрешение даруй, благодателя Бога имея. Послушающаго честных ти молеб.

И ныне. Ума моего исцели превращение Пречистая, уврачуй страсти души моея, и леностную тму отжени, яко да хвалами Тя присно ублажаем Всенепорочная. Катавасия.

 

Песнь 6. Ирмос.

Божественое се и всечестное совершающе празднество, богомудрении Божия Матере, приидете руками восплещем, от Нея Рождьшагося верою славяще.

Запев. Умертвил еси страсти телесныя, яко древо видеся высоковерхо, плоды чюдес принося, Никито богоблаженне.

Запев. Иже безчисленым болезнем приближихся, телом немощен пребыв преподобне. Тем зову ти верою, болезни устави сердца моего.

Слава. От душевных немощей отче колеблемых, верою тя призывающих ныне посети, молитвами твоими яже к Богу, яко да благочестно тя славим.

И ныне. Едина Помощнице, помози ми погибающу, и руку ми простри, и ко пристанищу наведи покаяния, Дево Богорадованная. Катавасия.

Кондак. Глас 8. Христа ради от своих си нужную смерть претерпел еси, и венец нетления от Него восприял еси. Приходящим же с верою, от честнаго ти гроба подаеши целбы. О Никито преподобне, молитвениче о душах наших.

Икос. Земныи ангел, небесныи человек, был еси преподобне, постом и бдением душю просветив. Алканием и жаждею, и на земли леганием Богови угодил еси, и всяку добродетель иноческаго жития исправил еси. К сим же и нужную смерть от своих си восприим, взыде к желаемому Христу радуяся, о Никито преподобне, молитвениче о душах наших.

 

Песнь 7. Ирмос.

Не послужиша твари богомудрении, паче Зиждителя, но огненое прещение мужески попраша, радовахуся поюще, препетыи иже отцем Господь и Бог, благословен еси.

Запев. Сердце свое Троичное жилище соделав, три кресты и тяжкая железа, Никито на себе понес. От них же божественою благодатию целбы истекают, на просвещение и очищение верно притекающим ти.

Запев. Душа твоя светозарением Божественаго Духа сияющи присно, душа видящи притекающих ти верою светло блаженне, пророческими проречении. Тем тя ублажаем.

Слава. Недуг тружающих блаженне душа и телеса, твоими святыми молитвами вскоре измени, и пети сотвори. Препетыи иже отцем Господь и Бог благословен еси.

И ныне. Непременнаго рождьши, Едина Богорадованная, десницею Его Чистая, пременити ми ум на лучшее молютися, люте превращаемыи житейскими упражднении. Катавасия.

 

Песнь 8. Ирмос.

Отроки благочестивыя в пещи, Рожество Богородичо спасло есть. Тогда убо образуемо, ныне же действуемо, вселенную всю воздвиже пети, Господа воспевайте дела, и превозносите Его во веки.

Запев. Стоя на столпе выспрь, яко на свещнице свеща преподобне светящи, всем разумы верным просвещая, показуя добре словесы и деянии стезю живота, возводя сия божественым смыслом, к высоте безстрастия.

Ум безстрастием очищь, беседоваше ко Господу Вседержителю. От Него же неизреченная преподобне навыкая, пророчески предглаголаше, просвещая душа, яко великий преблаженне порок. Тем тя согласно верою воспеваем.

Запев. Наидоша ми раны тяжкия, и недузи часто тружают, тех мя измени отче молютися. Яко от Бога приим Никито благодать, исцеляти страсти, и болезни облегчати.

Слава. Со всеми горними воиньствы, Отца и Сына и Святаго Духа, Троицу Неразделну, Несозданно Божество песнословяще. Свят, Свят, Свят, возопием радостно, Едина Власть Начало и Царство.

И ныне. Иже всеми не отступен Сыи Зиждитель, горними Отроковице чинми, вселися в ложесна Твоя, неопалну соблюде Тя, и по Рожестве Нетленну. Ему же ныне присно поем, Господа воспевайте дела, и превозносите Его во веки. Катавасия.

 

Песнь 9. Ирмос.

Всяк земен да взыграется, Духом просвещаемь. Да ликоствует же безплотных умов естество, почитая святое торжество Божия Матере. И да поет, радуися Преблаженная Богородице Чистая Приснодево.

Запев с поклоном. Воздвигл еси руце свои к Богу моляшеся крепяше ум свой удержати от страстей. Аки ангел в телеси отче ты бысть. Тем со ангелы всегда на небесех живеши, и Славному Престолу предстоя, Света Невечерняго исполняемь.

Яко на небеси во хлевине узце поживе преподобне. Тем ти умиришася дивии зверие, покорившему страсти телесныя и злостремления, Никито преподобне. Сего ради верою тя чтем.

Запев.  Твоя честныя и святыя мощи во гробе лежаще, погружают недуги, и попаляют толпы бесовския всегда, преподобне Никито. Божественою благодатию источают всем исцеления, верно тя блажащим.

Слава. Уже к Богу приближаяся ясне и чисте. Помяни иже верою тя Никито поминающих. Грехов оставление нам испроси, и недугом всем избавление, и Божия Царства селение.

И ныне. Светом мя озари Твоим Непорочная, Рождьшая Свет Неприступныи. Разжени облак страстей души моея, и от тмы изми молютися. И Всебожественаго спасения сподоби Чистая, Едина Приснодевая. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?