Канон преподобному Александру Свирскому

Глас 4.

Песнь 1. Ирмос.

Моря Чермнаго пучину, не мокрыми стопами древле шествовав Израиль. Крестообразно Моисеовыма рукама, Амаликову силу в пустыни победил есть.

Запев с поклоном: Преподобне отче Александре, моли Бога о нас.

Божественаго и Пресвятаго Духа блистаяся благодатию, иже светоносное Александре, и честное совершающих твое успение. Светлою молитвою си, страстей мглу очисти.

Запев. От юности преподобне, ярем Господень восприем. И в браздах своего сердца пшеницу сеял еси духовну. Клас пожал еси утвержающ душа богоблаженне.

Слава. Светоносная память твоя нам днесь возсия, яко солнечныя луча Александре исправлении твоих. Страстей наших отъемлющи облак. Еяже сотворяюще, верою тя и любовию ублажаем.

И ныне. Зачала еси Пречистая неизреченным словом, Содержащаго земленая конца. И Сего родила еси. Его же моли прилежно помиловати нас.

Катавасия: Избави от бед раб своих, преподобне отче Александре, яко вси по Бозе к тебе прибегаем, ты бо молиши о нас Христа Бога нашего.

Господи помилуй, трижды с крестным знамением и поклонами.

 

Песнь 3. Ирмос.

Веселится о Тебе, Церкви Твоя Христе зовущи. Ты ми крепость Господи, и Прибежище и Утвержение.

Запев. Жезлом воздержания, страстное море отче разделив. Прешел еси неистоплен. И предел достигл еси истиннаго безстрастия, и Богови предстоя беседовал еси, ума чистотою.

Запев. Кто твоя подвиги, Александре, по достоянию изрещи возможет. Ты бо пути жестокия в пустыни шествуя, сурово былие ядяше. Вкушение же отлагаше пища, болезньми воздержания.

Слава. Яко маслина плодовита в дому Господни прозябл еси. Маслом труд твоих Александре, умащая наша лица, поющих тя преподобне и богоблаженне. Вся ны посети, моляся Человеколюбцу.

И ныне. Из Тебе Чистая Цвет Неувядаемыи, благоухая все человечество, божественым миром Естества Своего. Иже Отцу Собезначальныи, из Тебе быв под летом Дево Всенепорочная. Катавасия.

Седален. Глас 8, подобен. Премудрости.

От юности вся оставль житейская. Красная же и лепотная. И в пустыню вселися, усердно последовал еси звавшему тебе преподобне. В трудех же и постех отче тело свое изнурил еси. Отнуду же тя пастыря своим овцам, добре устрояет Всебогатыи Господь, Александре блаженне. Моли Христа Бога, прегрешением оставление даровати, чтущим любовию святую память твою.

Слава и ныне. Богородичен.

Яко Деву Едину в женах, Тя безсемени рождьшую Бога плотию, вси ублажаем родове человечестии. Огнь бо вселися в Тя Божественыи, яко Младенца доиши Зиждителя и Господа. Тем же ангельскии и человеческии род, достойно славим Пресвятое Рожество Твое. И согласно вопием Ти. Моли Христа Бога, согрешением оставление даровати, воспевающим достойно славу Твою.

 

Песнь 4. Ирмос.

Воздвижена Тя видевши Церкви, на Кресте Солнца Праведнаго, ста в чину своем, достойно взывающи. Слава Силе Твоей Господи.

Запев. Ветрилом отче Креста, душевныи свой корабль окормив, благоутишно же и легко житейское лютое потопление избегл еси. И к тишине божественых извлече пристанищ радуяся.

Запев. Обретая отче сам себе всеблаженне, всю нощь стояше яко безплотен. Недреманно око имел еси, и чисто якоже зерцало духовною зарею. И божественаго явления, чистым помыслом приемля.

Слава. Яко божественыи зрится рай премудре Храм, имея в себе твоих мощей раку. Цветы принося чюдесныя, ими же сердца наслажаются, верою Александре присно хвалящих тя.

И ныне. Святая Богородице освяти нас, яже Пресвятаго Бога рождьши плотию, уподобитися восхотевша человеком. И небеснаго жития вся покажи Пречистая, причастники молитвами Си. Катавасия.

 

Песнь 5. Ирмос.

Ты Господи ми Свет, в мир пришел еси, Свет Святыи. Обращая из мрачна неведения, верою воспевающая Тя.

Запев. Просвещаем зарею отче невечернею, и божественым блистанием. Бесовскии мрак, и страстную мглу отгнал еси. И явися столп светозарен, и лествица воистину, к Богу верныя возводящи.

Запев. Бодр ум всегда принося, отче богомудре Александре. Страсти успил еси душетленныя. К Божественому Светозарению ведыи. Достигнути к Незаходимаго Света Светлости, идеже есть веселящимся жилище.

Слава. Яко очистившу помышления преподобне, благодать тебе дастся яко пророку. Яко настоящая глаголеши будущая. Зрети же дальняя яко ближняя, Александре Божие обителище.

И ныне. Рождьши Пренепорочная Бога Еммануила, и человека яве за милосердие бывша. Его  же моли яко Человеколюбца Чистая, ущедрити люди согрешьшая. Катавасия.

 

Песнь 6. Ирмос.

Пожру Ти со гласом хваления Господи, Церкви вопиет Ти. От бесовьския крове очищьшися, милостию от ребр изтекшею Ти кровию.

Запев. Неболезненую жизнь, в болезнех восприял еси. И болезнем лютым уставляеши озлобления, иже верою просящим прияти исцеление, Александре всечестне. Тем же разреши болезни наша, душевныя и телесныя.

Запев. Раце твоей священней приступающе, благоухания божественаго разума исполняемся, преблаженне Александре. Смрада избавляющеся страстей, иже любовию тя чтущая отче преподобне.

Слава. Исправляеши отче хромых. И очи просвещаеши слепым. Ходити же твориши разслабленым о Христе. И отгониши духи лукавыя, Александре преподобне.

И ныне. На Тя яко дождь на руно сшед Богородице Спас, изсуши яве потоки безбожия. Душа же наша напаяя всегда, присно чтущая Тя. Катавасия.

Кондак. глас 8, подобен. Взбранной.

Яко многосветлая звезда, днесь во странах Русских возсиял еси отче. Вселився в пустыню, и Христовым стопам последовати усердно вожделел еси. И Того святое иго на рамо свое взем Честныи Крест, и умертвил еси труды подвиг твоих, телесная взыграния. Тем вопием ти. Спаси стадо свое, еже собра мудре, да зовем ти. Радуися преподобне, Александре отче наш.

Икос. Како восхвалю твоя подвиги и борения, преподобне Александре. Яко невеществен разум стяжав смирением. Житие свое препроводил еси зельным воздержанием трудов своих. Аще убо и человек был еси естеством, но Вышняго Иерусалима явился еси согражанин. С плотию бо на земли поживе, но ангельское пребывание прошед. И бысть столп страстьми непотрясом. Тем вся Русская земля тобою обогащьшися хвалит тя, и верою величает, взывая тебе таковая. Радуися  Отечеству си похвала, великому же Новуграду, и всей стране Русстей пресветлыи светилниче. Радуися иже благочестива отца преславная отрасль. И благоговейны матере ветвь многоплодна. Радуися целомудрия непреклонныи столпе, и иноком пресветлая слава. Радуися пастыре Христовы ограды словесных овец, их же к Божию приводя разуму. Радуися ты бо многочадну пустыню возделал еси высотою смирения своего. Радуися иночествующим всем образ добродетели, и единообразным Лавры спасение. Радуися красное добродетелей хранилище, и всем в печали унывающим утешение. Радуися яко вся мира сего мудрования презрев, страсти плотьския умертвил еси. Радуися яко ангелом собеседник быти сподобися, и вся бесовския полки посрамил еси. Радуися ты бо во всех странах прославлен бысть, о Христе бо многа чюдеса сотворил еси. Радуися яко воистину обрете Божию благодать, и со ангелы присно зрети сподобися лицем к Лицу Святую Троицу. Радуися яко второе Солнце сияя чюдесы, всем даруеши благодать исцелении. Радуися преподобне Александре отче наш.

 

Песнь 7. Ирмос.

В пещи Авраамския си дети персидьстей, любовию благоверия паче, нежели пламенем опаляеми взываху. Благословен еси в Церкви Славы Твоея Господи.

Запев. Освящься от младеньства доброгласною трубою молитвы твоея. И неплодныя утробы многоплодны сотворил еси. Слепым подаеши прозрение. И хромым благотечение, Александре преблаженне.

Запев. Слезными излиянии погасил еси страстей раждежения, Александре блаженне. Чюдесем источил еси струя присноживотны, ими же омываются, душам же и телом недузи преславне.

Слава. Терпение стяжав много премудре, воздержание веру и любовь истину. Явися отец сирым. Вдовицам заступник, милостив и смирен Александре, мнихом слава и похвала.

И ныне. Како доиши млеком Сына Чистая без отца, Питающаго всяко дыхание, Мати Пречистая. Како на руку носиши Всясодержащаго. Паче ума чюдо Твое. Тем поем величия Твоя. Катавасия.

 

Песнь 8. Ирмос.

Руце разпростер Даниил, львова зияния в рове затче. Огненую же силу угасиша, добродетелию поясавшеся, иже благочестия любители отроцы взывающе. Благословите вся дела Господня Господа.

Запев. Умом безстрастия очищен, беседоваше Господеви Вседержителю. От Него же неизглаголанна преподобне научаем, пророчески предглаголаше просвещая душа. Яко велик всеблаженне пророк. Тем тя согласно, Александре премудре, вернии похваляем. Поюще благословите вся дела Господня Господа.

Запев. Подавая тебе, яже противу любве Зиждитель, от юности соблюдая тя десницею. И малым былием самовозрастшим от земля, питает тя боголепно. Яко от младеньства всяко похотение поправша и поюща. Благословите вся дела Господня Господа.

Слава. Яко струя божествена исцелений, происходит от раки твоея вся исцеляет и омывает скверны страстей. И гноение лютых очищает. И верных, напаяет всех сердца, Александре премудре. Иже любовию поющих. Благословите вся дела Господня Господа.

И ныне. Воплощься Безплотныи из Тебе боголепно. Его же моли Пречистая, страсти плоти моея умертвити. И оживити мою умерщвеную душу грехми. Катавасия.

 

Песнь 9. Ирмос.

Камень Нерукосечныя Горы, от несекомыя Тя Девица, Краеугольныи отсечеся Христос. Совокупив разстоящиися естества. Тем веселящеся, Тя Богородице величаем.

Запев. Твоя священныя и святыя мощи, во гробе лежаще, многоразличныя недуги исцеляют. И попаляют полки бесовьския всегда, мудре Александре. Божиею благодатию, точиши всем исцеления, верно тя присно блажащим.

Запев. Струя нам всегда честная твоя рака явися, исцелением отче. Страстем излияние всяческим изсушающи. И вся напаяющи душа ко благоплодию Божественому, премудре Александре, Христов угодниче.

Слава. Память твоя днесь, яко Солнце возсия Александре преблаженне. Яже благочестивых сердца озаряющи. Болезней твоих, и чюдес сиянием, яко воистину просвещающи отче. В ню же вся ны помяни, верно чтущая тя.

И ныне. Глас приносим Ти Гавриилов радующеся. Радуися глаголюще Место Священия. Радуися преподобным Славо, и всем верным Спасение. Еяже ради обожихомся, Богородице Приснодево. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?