Канон святому великомученику Прокопию

Канон святому великомученику Прокопию. Глас 4.

 

Тропарь. Глас 4.

Мученик Твой Господи Прокопий, во страдании своем венец прият нетленныи, от Тебе Бога нашего. Имея бо крепость Твою непобедимую, мучащих упраздни, и разруши бесом немощная шатания. Того молитвами Христе Боже спаси душа наша.

 

Песнь 1. Ирмос.

Моря Чермнаго пучину, не мокрыми стопами древле шествовав Израиль, крестообразно Моисеовыма рукама, Амаликову силу в пустыни победил есть.

Запев с поклоном: Святый великомучениче Прокопие, моли Бога о нас.

Богатыми сиянии Духа облиян, иже светоносныи сей, и честныи праздник твой чтущыя, страстныя мглы избави, и напастей мучениче Прокопие.

Запев. Звание не от человек бысть твое Прокопие, но с Небесе яко Павла первее Христос улови. Страстем своим свидетеля Истинна тя содела.

Слава. Воиньством тленным премудре, вечное яко смыслен пременил еси, и мертвеным царем, безсмертна, и Царьство Нетленно тебе подающа Прокопие.

И ныне. Естеством Содетеля родила еси, нас обоживша паче ума соединением истинным, Богородице Препетая. Его же прилежно моли, просветити поющыя Тя.

Катавасия: Избави от бед рабы своя, святый великомучениче Прокопие, яко вси по Бозе к тебе прибегаем, ты бо молиши за нас Христа Бога нашего.

 

Песнь 3. Ирмос.

Не мудростию ни силою ни богатьством хвалимся, но Твоею Отчею составною мудростию Божиею. Яко несть свята паче Тебе Человеколюбче.

Запев. Креста посреде, преславно Христос тебе является. Научая яве еже к нам снитие, и тя ко страданию призывая.

Запев. Храм и образ воздвигл еси сам ся Божественому Духу. Ревностию дыхая Божиею, храмы и бездушныя истуканны бесовския низложил еси, мучениче Прокопие.

Слава. Совлечеся кожных риз строганием. Нетления же одеждею одеяся Прокопие, и многокозненаго мучениче обнажи.

И ныне. Избави мя всякаго прилога сопротивнаго змия, Мати Дево Чистая, и сердце мое просвети, верою Тя славяща Пренепорочная. Катавасия.

Седален. Глас 1. Подобен. Гроб твой.

Яко Павла первее Христос с небесе, Прокопие мудре тя зовет к вере, доброту божественую проведыи сердца твоего. Тем же пострадал еси, мужески проповедая Страсти, и Того к человеком преблаженне сошествие.

Слава. И ныне. Безневестная Чистая Богородице Дево, едина верным Предстательнице и Покрове, бед и скорбей, и лютых обстоянии, вся избави, иже на Тя надежду Отроковице имущыя. И душа наша спаси, Божествеными молитвами Си.

 

Песнь 4. Ирмос.

Воздвижена Тя видевши Церкви, на Кресте Солнца праведнаго, ста в чину своем, достойно взывающи, слава Силе Твоей Господи.

Запев. Превознесенаго державою нечестия гордаго мучителя, иже ко Владыце божествеными воззрении взывая разразил еси. Слава Силе Твоей Господи.

Запев. Является в темнице тебе затворену, Избавитель Прокопие, дерзости наполняя тя, сиянием же просвещая тя. И звание сугубо, твоему спеху подая.

Слава. Благодатию Божественою просвещено зряще твое лице, иже неверия мраком покровении, сияние веры, Божественым мановением приемлют.

И ныне. Отягчена сном уныния, к покаянию утру мя, Твоею неусыпною Владычице воздвигни молитвою, и спаси мя едина Спаса рождьшая. Катавасия.

 

Песнь 5. Ирмос.

Нечестивии не узрят славы Твоея Христе, но мы Тя Единородне Отчее зарение славы Божия, от нощи утренююще, славим Тя Человеколюбче.

Запев. Светом словес твоих, воинство богопокорно привел еси Христови, мучения кровию, наследоваша с тобою Прокопие, Царьство Недвижимое.

Запев. Величия явишася Вышняго причастницы, жены Сигклитикии, и рода гордости земленыя отрекшеся, и умрети изволиша по Тебе, Слове Безсмерте.

Слава. Огнем жгоми Божественым душа, женам нарочитым, опаляему телу небрегоша, яже Твое возжелеша Царство Многомилостиве.

И ныне. Заченши родила еси Бога Еммануила, на обновление человеком, Пресвятая Чистая, плоть бывша. Его же присно моли, спасти душа наша. Катавасия.

 

Песнь 6. Ирмос.

Пожру Ти со гласом хваления Господи, Церкви вопиет Ти, от бесовския крове очищьшися, милостию от ребр истекшею Ти кровию.

Запев. Источая твой медоточныи язык, учения медоточная, и горести безбожия воистину избави, благопокорно тебе притекающыя мучениче Прокопие.

Запев. Матерь благочестие мучениче стяжав, злочестия изимаеши, свою по плоти честную матерь, и приводиши Небесному Отцу страдания ради.

Слава. Ланиты стружа железом мучитель, помысла твоего твердости мучениче непоколеба, водружена любовию, иже страсти плотию претерпевшаго.

И ныне. Святаго святых неизреченно рождьши, Пресвятая Дево. Верныя присно освящающа, и мученическия лики со ангелы совокупляюща. Катавасия.

Кондак. Глас 2. Подобен. Вышних ища.

Христовою ревностию распаляем и образом Креста Честнаго сохраняемь, врагом шатания и дерзость и гордыню низложил еси Прокопие, и честную Церковь вознесл еси, верою преспевая, и нас утвержая.

Икос. Уста разума мне подаждь, Пребезначалныи Слове, хотящу пети Твоего оружника Прокопия. Имаши бо богатьство милосердия, неизчетно Христе мой Твоих судеб, да и аз душевнаго мрака очищюся. Ума же всяку скверну отмыв, храм священия делы Божествеными Твоими буду. И достойная пою мученику, верою преспевати и просвещати нас.

 

Песнь 7. Ирмос.

В пещи Авраамския си дети персстей, любовию благоверия паче, нежели пламенем опаляеми взываху, благословен еси в Церкви славы Твоея Господи.

Запев. Тяжестию олова твоей выи сокрушаеме мучениче нечуяше, носити бо иго навыи возжелел еси прелегкое, иже за милосердие нам Примешшагося.

Запев. Благодать свыше исцеленей прием, недуги отъемлеши мучениче, и лукавыя вопия отгоняеши духи, благословен еси Господи Боже отец наших.

Слава. Многообразныя от враг язвы приемля блаженне, и огнем опаляемь тверде, нечестие попалил еси. Благословен еси вопия Боже отец наших.

И ныне. От Девы Нетленны, паче естества раждается Слово, иже словом вся содевая, безсловесия хотя избавити, иже вольное славословящыя Того снитие. Катавасия.

 

Песнь 8. Ирмос.

Руце распростер Даниил, лвова зияния в рове затче. Огненую же силу угасиша, добродетелию поясавшеся, иже благочестия любители отроцы взывающе, благословите вся дела Господня Господа.

Запев. Свещами опаляемь люте, остны же подбодаемь, и летным ранам строгание приемля, и болезнуя зело мучениче взываше, благословите вся дела Господня Господа.

Запев. Твоею десницею темная бесов лица, блаженне заушил еси. Сию бо на углие горящее славне, опалитися положил еси. Беззконному мучителю, противляяся и взывая, благословите вся дела Господня Господа.

Слава. Каменя Христа незыблема, всеблаженне славне имея основание, камением Прокопие радовашеся сурово отягчаваемь, к не тяжцей тя радости облегчает вопиюща, благословите вся дела Господня Господа.

И ныне. Се вси Отроковице роди, яко же прорекла еси Тя ублажают. Бога Блаженнаго рождьшую, блаженны Содевающаго, иже повелением Его последующыя верно, и вопиющыя, благословите вся дела Господня Господа. Катавасия.

 

Песнь 9. Ирмос.

Камень нерукосечныя горы, от несекомыя Тя Девицы, краеуголныи отсечеся Христос, иже совокупив разстоящаяся естества. Тем веселящеся, Тя Богородице величаем.

Запев с поклоном. Возжеленныи тебе получившу конец, велемудрено преклонил еси Богу выю. Ударен же быв мечем, якоже на колесницу своею вседе кровию, и к Нему мучениче востече.

Запев. Точиши реки исцелением, источник быв чюдес. Уставляеши же пламень страстей, бесовския же погружаеши полки, всесилною Духа, Божественою крепостию досточюдне.

Слава. Иже всесвятую ти память, радостно творящыя, всякого прещения, всякого же недуга, и всякия беды спасай Прокопие, к Зиждителю Богу, священными твоими мольбами.

И ныне. Свет нам восия Отроковице, от светоносныя Ти утробы, Содетель Солнцу и звездам. И всякой твари. Его же прилежно моли, просветити поющыя Тя. Катавасия.

+

Авторизация

* *
*

Регистрация

*
*
*
*

Проверочный код Time limit exceeded. Please complete the captcha once again.


Восстановление пароля