Канон, глас 6.
Тропарь, глас 6. Ангельския силы на гробе Твоем, стрегущия омертвиша. И стояше Мария при гробе, ищущи Пречистаго Тела Твоего. Испроверже ада не искушься от него. Срете Деву, даруяи живот, Воскрес из мертвых, Господи слава Тебе.
Песнь 1. Ирмос.
Яко по суху ходив Израиль, по бездне стопами, гонителя фараона видя потопляема. Богу победную песнь, поя вопияше.
Запев с поклоном: Слава Тебе Боже наш, слава Тебе.
Притчами приводя всех Христос к жития исправлению. Мытаря возвышена от смирения показав. Фарисея же возвышением отриновена.
Запев. От смирения честь высокотвореную, от возношения же падение видя люто. Мытаря ревнуй добрым, и фарисейскую злобу возненавиди.
Слава. От возношения испражняется всяко благо. от смирения же потребляется всяко зло. Еже облобызаем честне, гнушающеся вернии, образа тщеславна.
И ныне. Нрав и волю и чаяние, тело и душу и дух Владычице возлагаю к Тебе: Лютых враг и напастей Богородице благая избави и спаси мя.
Катавасия: Сохрани от бед рабы Своя Милостиве, яко усердно к Тебе прибегаем, Милостивому Избавителю и всех Владыце, Господу Исусу.
Песнь 3. Ирмос.
Несть свят, яко же Ты Господи Боже мой, вознесыи рог верных Си Блаже. И утверждь их на камени исповедания Ти.
Запев. От гноища убо страстей, смиреныи возношается. От высоты же добродетелей, низпадает люте, всяк высокосердыи. Его же образа злобы бегаем.
Запев. Тщеславие истощает богатьство правды, страстей же расточает смирения множество. Ему же подобящемся нам, части сподоби мытареве Спасе.
Слава. Яко же мытарь и мы биемся в перси, умилением вопиюще, очисти Боже нас грешных яко да сего ради приимем оставление.
И ныне. На Тебе едино Прибежище надеявся, да не отпаду добрыя надежды, но огражденьми мя Твоея помощи Чистая, всякого вреда злых избави. Катавасия.
Седален, глас 4. Подобен. Скоро вари.
Смирение вознесе, одержимаго злыми мытаря воздыхающа. И еже очисти к Зиждителю зовуща. Возношение низложи от правды окаяннаго фарисея велеречующа. Тем же ревнуем добрым от злых отступающе.
Слава и ныне. Многими прегрешении аз блудныи, ум омрачив, вопию Твоему крепкому заступлению, просвети Богородице души моея зеницы. Восияй ми покаяния светлую зарю, и облецы мя во оружие Света, Богородителнице Чистая.
Песнь 4. Ирмос.
Христос мне Сила Бог и Господь, честная Церкви боголепно зовет вопиющи. От совести чисты о Господе празднующи.
Запев. Изряден показа путь возношения смирение Слово Отчее, смирився даже и до зрака рабия. Ему же подобяся всяк возвышается смиряяся.
Запев. Вознесеся праведник, и низпаде фарисей. Во множество же зол впадся, смирися мытарь. Но вознесъся, ненадежно оправдася.
Слава. Нищете ходатай от богатьства добродетелей, возношение явися, и богатьство абие, смирения оправдания от крайния нищеты, еже стяжа им.
И ныне. Яко Свет Неприкосновенныи Дево рождьши, души моея тму, светлою зарею разори. И к спасению стезям живот мой направи. Катавасия.
Песнь 5. Ирмос.
Божиим Светом Ти Блаже, утренюющих Ти душа любовию просвети молюся, Тя ведети Слово Божие, Истиннаго Бога, от мрака греховнаго изимающа.
Запев. Фарисея добродетелем, потщимся уподобитися, и поревнуем мытареву смирению. Обою ненавидяще безместное мнение, и пагубу падения.
Запев. Правде течение тщетное обличися, припряг к нему мнения кичение. Неправде же бремя упразднися, стяжав спутника смирение.
Слава. На колеснице добродетелей, мняшеся тещи фарисей. Но пеш шествуя мытарь на колеснице смирения, добре предвари, припряг милостыни смирение.
И ныне. Жезл силы Благая всем посли нам, иже к Тебе прибегающим, обладати посреде всех враг подающии, и всякаго вреда изимающии. Катавасия.
Песнь 6. Ирмос.
Житейскаго моря воздвизаема зря, напастей бурею. В тихо пристанище притек вопию Ти. Возведи от тля живот мой, Многомилостиве.
Запев. В житейстем море, мытарь и фарисей течаста. Но ов убо возношением сведся, зле потопися. Ов же смирением спасеся.
Запев. Житие проидоста фарисей добродетельми, мытарь же во гресех. Но ов убо от премнога умовредия отступи смирения. Ов же возношается, смиреномудр явлься.
Слава. Жития нужное проходяще мы течение, уподобимся мытареву смирению. Бегаем же кичения мерзскаго фарисеова, и живи будем.
И ныне. Нага простотою, нехитростною жизнию создана, преступления же ризою одея мя враг, плоти дебельством. Ныне же Твоим ходатайством Отроковице спасаюся. Катавасия.
Кондак. Глас 2. Подобен. Вышних ища.
Мытаря иногда щедре оправда Спасе Благии, очисти возопивша, и мене окаяннаго презрев безмерная прегрешения, спаси, Долготерпеливе, иже един Сыи Благопременитель.
Икос. Высокомудреному фарисею уподобихся Спасе, вознесся добродетельми, падением на землю падохся. Яко же мытаря Благоутробне Слове смирив мя спаси возносливаго, и высокою мыслию, хвалящася суетно. И даждь в сокрушение души, и сердцу зовущу Тебе, очищение едине Человеколюбче Боже, и подаждь ми оставление, един Сыи Благопременитель.
Песнь 7. Ирмос.
Хладодавицу убо пещь сотвори ангел, преподобным детем. Халдея же опали, велением Божиим. Мучителя увеща вопити. Благословен Бог отец наших.
Запев. Оправдания множествы возношаем, сетьми тщеславия, люте превознесеся фарисей, безмерно хваляся. Мытарь же легкими крилома смирения вознесся Богу приближися.
Запев. Смирения лествицы приемля образом, мытарь к небесней высоте возвысися. Гордынею же гнилою безумием окаянныи вознесся фарисей, сниде до ада преисподняго.
Слава. Праведных ловит убо лукавыи, образы тщеславия украсти, грешных же сетьми отчаяния связати. Но убо от обоих зол, мытаря ревнителие, избавитися потщимся.
И ныне. Ияковлю Тя доброту, и Божествену Лествицу долу ея же виде перве простерту к высоте вемы Чистая, низводящу свыше Бога Воплощенна, и земныя абие возводяща. Катавасия.
Песнь 8. Ирмос.
Ис пламени святым росу источи, а праведнаго жертву и воду попали. Вся бо твориши Христе елика хощеши. Тем Тя превозносим Господа вовеки.
Запев. Смиреномудреным нравом, милостива Господа мытарь воздохнув обрете, и спасен бысть. Образом же лютым и языком велеречивым, правды отпаде фарисей.
Запев. Фарисеова кичения самохотнаго и именования чистоты, бежим вернии, ревнующе мытареву добре, милостивному смирению и нраву.
Слава. Гласы мытаревы верою вещаем, в Церкви Святей, Боже очисти, да с ним улучим прощения прощения, пагубы велехвалнаго избавившеся фарисея.
И ныне. Невем паче Тебе другое заступление. Тя предлагаю Молитвеницу и Предстательницу Чистая. Тя ко ис Тебе Рожденому, Ходатаицу движу. Всех оскорбляющих мя свободна покажи. Катавасия.
Песнь 9. Ирмос.
Бога человеком не удобь видети, Нань же не смеют чини ангельстии зрети. Тобою бо Пречистая явися нам, Слово Воплощенно. Его же величающе, с небесными вои, Тя величаем.
Запев с поклоном. Путь возношения смирение, от Христа вземше спасения образ. Мытареву обычаю поревнуем, кичения возношения далече отмещем. Нравом смиреномудрия Бога умоляюще.
Запев. Душевную гордыню отвержем, нрав молитвы в смиреномудрии стяжем. Себе оправдати непоспешаем. Тщеславия кичение возненавидим, и с мытарем Бога умолим.
Слава. Молитвы Содетелю Милости принесем мытаревы. Фарисейския отвращающеся неблагодарныя молитвы, и велехвалнаго гласа, иже на ближняго суд возводят, да Божествену Милость и Свет привлечем.
И ныне. Пети славити и блажити Ти, давай нам, достойно чтущим Тя Пречистая, и Рожество Твое величающим, едина Благословеная. Ты бо еси похвала християном, и к Богу Молитвеница благоприятна. Катавасия.