Канон святителю Евфимию, архиепископу Новгородскому


Канон иже во святых отцу нашему Евфимию, архиепископу Великаго Новаграда, чудотворцу. Творение Пахомия, иже от Cвятыя Горы. Глас 2.

Тропарь, глас 4. Избран от юности Богови быв, святителю Евфимие, и сего ради архиерейства саном почтен быв, упасл еси люди, иже тебе Богом врученыя. Темже и по преставлении чюдесем дарования от Господа приял еси, исцеляти различныя недуги. Того моли о нас, совершающих честную память твою. Да тебе непрестанно вси величаем.

 

Песнь 1. Ирмос.

Грядите людие, поем песнь Христу Богу, раздельшему море, и проведшему люди, яже испусти из работы Египетския, яко прославися.

Запев с поклоном: Святителю Христов Евфимие, моли Бога о нас.

Яко река премудрости и разума, святителю Евфимие был еси, каплю и мне даруй, да возмогу и аз малое руку моею хваление, твоему величеству принести блаженне.

Запев. Судом Божиим, и человеческим избранием, архиерейства мастию помазан быв святителю Евфимие, пастырь преизряден был еси, жертвы Богу всячески принося священне.

Слава. Источают премудрая учения, устне твои святителю, божественую сладость имуще. Еюже напитавшеся чада твоя, тебе любовию непрестанно почитаем.

И ныне. Иже нас ради ис Тебе, Дево, в человека премногою благостию облекиися, священных собори, иже Того возлюбльших прославил есть.

Катавасия: Избави от бед рабы своя, святителю Христов Евфимие, яко вси по Бозе к тебе прибегаем, ты бо молиши о нас, Христа, Бога нашего.

 

Песнь 3. Ирмос.

Утверди нас Собою Господи, иже древом умерщвеи прегрешения, и страх Твой всади в сердца наша, яко Человеколюбец.

Запев. Житие по Бозе стяжав святителю, в посте и молитве много время пребыл еси. Вериги тяжки нося на теле своем. Имже ныне покланяющеся, священие почерпаем.

Запев. Делы и словесы Божествеными, украшен быв святителю Евфимие. Церковь Христову благочестно упасл еси. Темже и радости сподобися Господа своего, нас поминай, иже тебе славящих.

Слава. Житие свое блаженне добродетелми уяснил еси. Темже твоя исправления, по многим странам проповедаются отче. И от земли прешед достигл еси, еже тамо со святыми пребывания.

И ныне. Полату красную не изреченнаго богатьства, Дево познание по долгу Тя славим, спасшиися Рожеством Ти Всенепорочная. Катавасия.

Седален, глас 8. Подобен. Премудрости.

Умнии очи святителю яко всегда имыи, ужем железным обложив себе блаженне, многажды всю нощь без сна пребыл еси, удручая плоть свою преблаженне. Вериги же яже на тебе не познани быша, даже до исхода еже от сюду. Темже и Христос, иже Того ради жестокое претерпевша, дарует тебе неболезненое, еже на Небесех житие. Того моли святителю Евфимие, согрешением оставление даровати, чтущим любовию священную память твою.

Слава и ныне. Богородичен. Яко Деву едину в женах Тя безсемене рождьшую Бога плотию вси блажим роди человечестии. Огнь бо вселися в Тя Божества, яко Младенца доиши Зиждителя и Господа. Темже ангельскии и человеческии род достойно славим Пресвятое Рожество Твое. И согласно вопием Ти, моли Христа Бога, согрешением оставление даровати, воспевающим достойно славу Твою.

 

Песнь 4. Ирмос.

Пришествовав от Девы, не ходатай, ни ангел. Но Ты Сам Господи воплощься, и спасе всего мя человека. Тем вопию Ти, слава Силе Твоей.

Запев. Хранитель буди отечеству своему и людем святителю, избавляя враг нашествия, глада же и пагубы. Да молитвами ти спасшеся, тебе вси яко заступника величаем.

Запев. Любомудрено душевнаго корабля наставляя святителю. И сего ради молитвам и милостыни прилежал еси. Тленное богатьство, в нетленное богоблаженне прелагая. Темже и прият Небесное богатьство.

Слава. Чисто око душевное имея, зрительно Небеснаго Восхода имущо. Темже иже на земли жизнь свою добре управил еси святителю. И отсюду церковь Бога Живаго, Евфимие, был еси.

И ныне. Бог ис Тебе родився Госпоже Всенепорочная, от обладающа врага мир, Тебе ради избавил есть. Святительскии же лик жертву Тому приносящий, возвеличил есть. Катавасия.

 

Песнь 5. Ирмос.

Света Подателю, и веком Творче, Господи, во свете Твоих повелении настави нас. Разве бо Тебе иного Бога не знаем.

Запев. Блаженную жизнь святителю Евфимие на земли пожил еси, и отсюду к Небесному житию славно прешел еси. Темже и по преставлении твоем раку твою обстояще, любезно покланяющеся, священие почерпаем.

Запев. Преосвященьствован душею и телом отче был еси. Светло Владычней Трапезе предстоиши, Жертву Тому бескровьную принося. Темже яко священнотаиник, прилежно о нас молися.

Слава. Древнему Корнилию молитве и милостыни подобяся, милостив к требующим отче был еси. Тем от Христа Бога достойно слышиши, молитвы твоя и милостыни взыдошя предо Мною. Сего гласа и нам услышати блаженне помолися.

И ныне. Священными гласы, Тя, доброту Ияковлю поем. Плотьски рождьшую мирови Свет Иже от Света, просвещающии архиерейския соборы. Катавасия.

 

Песнь 6. Ирмос.

В бездне греховней одержимь, не изследную милосердия Твоего призываю бездну, от тля Боже мой возведи мя.

Запев. Сын Света и Дне святителю был еси. Темже и вселился еси, идеже Свет Невечернии, и покоища праведных. Того Света моли получити всем, иже память твою празднующим.

Запев. Священныя и пречестныя храмы, в славу святых имел еси ходатая, промышляюща твоя полезная. Но яко с ними водворяяся, о нас молися.

Слава. Светло лице в жизни имея блаженне, потщался еси светлейшю и душю свою Христу представити, еже и получил еси Евфимие. Темже буди теплыи молитвеник яко святитель о чтущих тя.

И ныне. Во утробу Твою вселися, и все человеческое существо обожив. И святитель лик множество священно привлече славити Тя. Катавасия.

Кондак. глас 8. Подобен. Взбранной воеводе.

Яко архиереом сопрестолник, и святителем изрядныи поборник был еси, святителю Евфимие. Непрестай сохраняя отечество свое, град же и люди, и святую обитель сию. И иже тебе верою почитающих, и честным мощем твоим поклоняющихся. Да велегласно тебе вопием, радуися святителю Богомудре.

Икос. Евангельскому словеси внят преподобне, душевныи разум вперив к просвещению светолучныя заря, душетленныя страсти до конца потребил еси. Добродетелным же житием, ангелом и человеком предивен показася. И сего ради Великаго Новаграда архиерейства сподобися. Церковь украси, люди просвети, и до конца в православии утвердил еси. Да вси велегласно вопием ти, радуися Евфимие, святителю богомудре.

 

Песнь 7. Ирмос.

Телу златому премудрыя дети непослужиша, и в пламень сами поидоша, и благих их обругаша. Среди пламене возопиша, и оброси их ангел, услышася рече уже уст ваших молитва.

Запев. Великии Новград, иже в себе тебе стяжавыи, радостию радуется святителю Евфимие. Тебе бо яко стену имея тверду, и столп необорим, Христа воспевает, иже тебе сим даровавшаго.

Запев. Иже прежде тебе бывшим архиереом красота был еси блаженне, святителем удобрение, иноком образ. Христове же Церкви преизрядныи пастырь явился еси, богоблаженне отче Евфимие.

Слава. Илиину ревность восприим святителю. Темже ни прещения ни моления согрешающих возмогоша увещати тебе, еже тех о согрешениих не обличати. Ты же непрестал еси, дондеже конечнее онех исправил еси.

И ныне. Красную обрет, и добрую в женах Тя Пречистая, прекрасное Слово вселися в пречистое чрево Твое. Вся лики святитель освящь зовущыя, благословен Бог отец наших. Катавасия.

 

Песнь 8. Ирмос.

Иже в пещь огнену, к детем еврейским сошедшаго, и пламень на хлад преложьшаго Бога, пойте вся дела Господа, и превозносите Его во веки.

Запев. Судом Божиим и всенародным избранием, отнюду же призван бысть преподобне, на престол великия Церкве. Тамо паки отходиши, промышлением своего Владыки. Да отнюдуже сия приял еси, паки тамо чиста того с душею Богови предаси.

Запев. Пречестная рака богоблаженне, идеже положено бысть честное тело твое святителю, благовоние и освящение всем верою приходящим испущает, от души Христу вопиющим. Благословите вся дела Господа, и превозносите Его во веки.

Слава. Христос тя святителя избра, яко некое светило, могуща твердь Церковную просвещати. И своими ученьми люди иже тебе врученныя наставляти, Творцу вопити, благословите вся дела Господа, и превозносите Его во веки.

И ныне. Уныл имея помысл, и душю сластьми отягчену, к Тебе прибегаю Богородителнице Чистая. И вопию Ти, воздвигни и спаси мя окаяннаго и осуженнаго.

Катавасия.

 

Песнь 9. Ирмос.

Иже от Бога, Бога Слова, не изреченною мудростию пришедшаго обновити Адама, ядию тления падшаго зле, от Святыя же Девицы, неизреченно воплощаема нас ради, вернии единомудрено песньми величаем.

Запев с поклоном. Обитель в ней же сподобился еси ярем Христов прияти, тамо вся дни своя верою и духом кроме телесе, не разлучен отче пребыл еси. Темже и по преставлении тамо повелеваеши положитися. Идеже и чюдесем дарования от Господа святителю Евфимие приял еси.

Запев. Рукою моею недостойною, приносимое ти с трудом хваление, святителю Евфимие не презри. Но приими, и моли Творца своего и Владыку, тамошняго мя избавити вечнаго мучения, тебе верою почитающа.

Слава. Певец ти иже тебе искренно воспевающих, и твою память честную святителю Евфимие верою прославляющих, освяти и прослави. И от бед избавляй и напастей, и иже тамо вечнаго мучения. Да тебе всегда воспевают.

И ныне. Пощади мя Господи пощади, егда хощеши ми судити. И не осуди мене во огнь, да не яростию обличиши мене, молит Тя Девая Тебе рождьшая Христе, ангельстии собори, и святитель совокупления. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля