Канон святому князю Всеволоду, Псковскому чудотворцу


Канон святому благоверному князю Всеволоду, нареченному во святом крещении Гавриилом, Псковскому чудотворцу. Глас 2.

Тропарь, глас 2. Из млада явился еси богомудре княже Гаврииле божественыи сосуд, избран Богови, благочестием воспитан. Веру непорочну соблюд. Многи святыя церкви устроив. Изгнание претерпел еси от своих, якоже и целомудрии прародители твои от брата убиение. С ними же предстоя Святей Троице молися, державы Русския началником сохраненом быти, и всем нам спастися.

Песнь 1. Ирмос.

Во глубине потопи древле, фараонистская вся воиньства преоружена сила. Воплощьжеся Слово, преспеющия грехи потребил есть. Преславныи Господь, яко прославися.

Запев с поклоном: Святый благоверный княже Всеволоде, моли Бога о нас.

Высоко житие имея, и восхождении божествеными, весь светел быв. Просвещение ми испроси, восхваляющу честныя твоя подвиги. Ими же добре пожив, улучил еси Всеволоде, их же надеялся еси.

Запев. Мироуханная любя учения, и во чтении Священных Писании упражняяся, сластей уклонился еси блаженне, смрадных и безчестных. И облаговонился еси, Божествеными добротами украшаемь.

Слава. Дремание очию от души блаженне отгнал еси. Бдя и Богови приединеваяся всенощными стоянии, непреклонен нуждами естества, тем же ко Дню Невечернему достигл еси.

И ныне. Яко чертог одушевлен Божии, и кадилницу Мысленаго и Светоноснаго Угля, Присноблагодатную ублажаем Богородицу. Зовуще, радуися Ходатаице спасенаго воскресения.

Катавасия: Избави от бед рабы своя, святый благоверный княже Всеволоде, яко вси по Бозе к тебе прибегаем, ты бо молиши о нас Христа, Бога нашего.

 

Песнь 3. Ирмос.

На камени мя веры утверди, разшири уста моя на враги моя. Возвеселибося дух мой воспевати Ти, несть свят яко же Бог наш, и несть праведен, паче Тебе Господи.

Запев. Глаголом животочным внимая, испил еси воду спасения, возгнушався горкаго греха. И поя глаголаше Богови Всеволоде, яко несть свята паче Тебе Господи.

Запев. Милование стяжал еси христоподражателно, раздал еси богатьство требующим, Небесное богатьство ходатайствующее тебе, еже и получил еси. Поя Всеволоде, яко несть свята паче Тебе Господи.

Слава. Присвоився Зиждителю, любовию Божественою прият Небесное наследие. И Древа Животнаго причастник еси, общением обожаемь. И поя славне, яко несть свята паче Тебе Господи.

И ныне. Сущи ангел честнейши, Зиждителя ангелом во утробе носила еси, и родила еси неизреченно. Ему же вси поем, Ты еси Бог наш, несть свята паче Тебе Господи. Катавасия.

Седален, глас 4. Благоволив благими деянии, искусися яко злато в пещи напастьми Всеволоде славне. Темже и по смерти источаеши богатно чюдеса яко воды, и недуги исцеляеши, о нас присно моляся, яко да согрешением прощение приимем.

Ин седален, глас 3. Подобен. Красоте.

Имущи Дух истинныи премудре, еже в тебе пожил есть, сосуд и жилище Пресвятей Троице содела, строити и соблюдати церквам благолепие и утвержение. Сего ради и мы сшедшеся в память твою богомудре княже Гаврииле молим тя, Христови молися даровати нам велию милость.

Слава и ныне. Богородичен. Красоте девьства Твоего, и пресветлей чистоте Твоей, Гавриил дивяся вопияше Ти Богородице, кую Ти похвалу принесу достойну. Что же нареку, недовем и чюждуся. Тем якоже повелено ми есть вопити, радуися Обрадованная Господь с Тобою.

 

Песнь 4. Ирмос.

Пришествовав от Девы, ни ходатай ни ангел, но Ты Сам Господи воплощься, и спасе всего мя человека. Тем зову Ти, слава силе Твоей.

Запев. Учения отеческая храня невредимо, православно мудрование. Ты от младенства имел еси житие нескверно, и милостивен нрав досточюдне.

Запев. Ни молва мирская, ни власти держание, ни слава тленная, твое еже к Богу желание уставиша Всеволоде. Но благоволил еси воистину Божествеными деянии.

Запев. Возвышаем Божествеными поучении всегда, врага смирил еси. И исцелением действо прият Всеволоде, судом праведным вся Управляющаго.

Слава. Искапающи сладость рака мощей твоих, богатых исцелении, страсти отгоняет Всеволоде верою чтущим тя. И попаляет бесом вся полки.

И ныне. Всепетая, иже воиньствы горними певаемаго Бога породила еси, Человека воистину бывша. Его же о рабех Своих молящи непрестай Приснодево. Катавасия.

 

Песнь 5. Ирмос.

Просвещение во тме лежащим, и спасение неначаемым Христе Спасе мой, к Тебе утренюю Царю мирныи, просвети мя сиянием Си, иного бо разве Тебе Бога не знаем.

Запев. Зарею честною Святыя Троицы просвещен, законом же Сея огражден, нощь жития непреткновенно ты преминул еси. Видении Божествеными окриляемь блаженне, и в Божественую жизнь вселился еси.

Запев. Ныне на тебе чюдо велие зрится, и ужаса исполнь, како по погребении воистину много лет соблюдеся нерушимо блаженне, твое тело во гробе лежаще, судбами имиже весть Сам Прославляяи тя.

Слава. Благо же твоему еже к Богу дерзновению. Благо же желанию еже в сердцы к Нему имел еси, благо пожив Гаврииле, просиял еси преславно Божествеными светлостьми, и уяснил еси верных совокупления.

И ныне. О нас из Тебе воплощеннаго Дево Мати всегда моли, благочестно Тя блажащих, избавитися бед, душетленных страстей и печалей, и вечнующаго пламене мучения. Катавасия.

 

Песнь 6. Ирмос.

В бездне греховней одержимь, неизследную милосердия Твоего призываю бездну, от тля Боже мой возведи мя.

Запев. Течения сладка искапаху блаженне, потове твои и радование, и исцелении сияние, в хвалу Христа Бога нашего.

Запев. Во дворех Божиих процвел еси, виноград многоплоден прозябшии, добродетелей гроздие, делателю душям обилие подав.

Слава. Царство Божие вжелел еси, и над страстьми царствовав Всеволоде, по благоволению лучшему, радость праведных получил еси.

И ныне. Избранна Богови бывши яко прекрасна, село пространно Сему, Дево, бысть, и Чертог и Свещник и Трапеза. Катавасия.

Кондак, глас 8. Подобен. Взбранной. Многомудрено преселився во град Псков, блаженне княже Гаврииле. Плод благии Богови в жизни сей был еси, присно цветущ добродетельми, и якоже Давыд незлобием. Того ради получил еси жизнь вечную на Небесех всегда зря Святую Троицу, моли избавитися нам от всяких бед, да зовем ти радуися утвержение граду нашему.

Икос. Всечестную память почтем, угодника Христова, великаго князя Всеволода, отеческою диадимою от юности украшена, храбраго воина на супостаты, и властеля благоутишна и радостныя глаголы, от сердца воззовем к нему сице вопиюще. Радуися яко из младых ногтей Бога возлюбив. Радуися яко заповедем Его неложныи хранитель. Радуися земли словеньстей украшение. Радуися церковныи строителю и обогатителю нескудныи. Радуися церквам украшение, и истинныи поборниче. Радуися неложныи правителю отеческих предании. Радуися благочестия столп непоколебим вражиими прилоги. Радуися яко во время великаго глада, преизобилыи нищим и сирым питателю. Радуися бедным утешение и заступник. Радуися и веселися яко сугубу мзду Небесную сугуба ради изгнания от Бога обрете. Радуися яко сподобися восприяти сугубыя благодати, венец пресветел и источник исцеления. Радуися преславныи княже Гаврииле, князем Русским похвала. Радуися утвержение граду нашему.

 

Песнь 7. Ирмос.

Богопротивно веление, беззаконнующа мучителя, высок пламень вознесло есть. Христос же простре Богочестивым детем хлад духовныи, Сыи благословен и препрославлен.

Запев. Крепостию вжилився Живодавца, плоти удержал еси желания пребогате. И ум вперил еси к Небесным, поя в крепости, благословен Бог отец наших.

Запев. Сам ся благороден сотвори, благородны образы стяжав ума целостию. Поучением же упражняяся Богодохновенных Писании, все свое желание на Бога Всевидца блаженне возложил еси.

Слава. Вышнему Царству, вышнему Граду, Божию раю, праведных Наслаждению, Пищи Нетленней, Богатьству некрадому, Свету Невечернему, сподобился еси блаженне Всеволоде.

И ныне. Егоже родила еси Владычице, присно моли, работы избавити мя страстей и осуждения, и одержащаго мя лютаго отчаяния, и оскорбляющих мя удержания Чистая Богорадованная. Катавасия.

 

Песнь 8. Ирмос.

В пещи отрочестей, прообразил еси иногда Свою Матерь Господи. Образ же сих огня избавляше, не опально вшедшим. Юже поем явльшуся Тобою концем днесь, и превозносим во вся веки.

Запев. Огнь помышляя страшныи, пред Престолом Христовем хотящь палити. Умилением сердца теплы изливаеши капли слез, погашая теми пещь страстей Всеволоде богомудре.

Запев. Все предложил еси к Богу мудре душевное око, и Тому прилепился еси вопия псаломски. Христе мой, кала мя избави смертоносных страстей во веки.

Запев. Терпением пождатель, и сердцем смирен, ты был еси милостив требующим. Обычай принося благ, и образы добродетелны всечестне. В них же добре пожив, чюдес точиши благодать.

Слава. Разум имея Божествен исполнитель Владычним явился еси словесем. Десныя любя стези, левыя же яве уклоняяся, яко благоумен и мудр. Темже тя почитаем богомудре во веки.

И ныне. Адамов Содетель от кровей Твоих чистых зиждится. И млеком питается, Питаяи всяко дыхание Дево Богородице. Темже яко Божию Тя славим Матерь. Катавасия.

 

Песнь 9. Ирмос.

Безначална Родителя Сын Бог и Господь, воплощься от Девицы нам явися, омраченыя просветити, и собрати расточенныя, тем Всехвальную Богородицу величаем.

Запев с поклоном. Видети желая славу Бога нашего, добродетелем благообразием, себе удобрил еси. И свещю нося вниде в светлыи чертог, со ангелы живыи яснее наслаждаешися Боговидения.

Запев. Яко утро, яко Солнце восия память твоя, сущая во мраце сердца просвещающи. Ты бо Света и Дне яко воистину сын явился еси, богомудре Всеволоде. Сего ради тя почитаем.

Запев. Мудростию украшен, и разумом просвещен смирением сердца лепотьствуя. Высотою жития сияя, к мысленым прейде двором, идеже нас поминаеши почитающих тя Всеволоде.

Слава. День празднественыи, и ползы ходатайственыи, честныи твой свершаем от земли преставления. Ты бо Господень угодник. И Того заповедем делатель явися непостыден, досточюдне Всеволоде.

И ныне. Света приятелище утроба Твоя бысть, Просвещьшаго мира Богорадованная. Темже молю Тя окаянныи, светлу зарю подаждь ми Богоневесто, мольбами Всеволода богомудраго. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля