Канон святителю Ионе, архиепископу Новгородскому


Канон, Глас 4.

Тропарь, глас 4. Исправление вере, образ кротости, и якоже сад посреде Рая, преподобными делы мир просвещая. Сего ради к честней раце твоей любовию прикасаемся, и верно вопием. Предстани Христу Богу с восхваляющими память твою светоносную, отче Ионо, и моли спастися душам нашим.

 

Песнь 1. Ирмос.

Тристаты Крепкии, Рождеися от Девы, безстрастия во глубине, души тричастное потопи молюся. Да Ти яко в тимпане, во умерщвеннем телеси, победное пою воспевание.

Запев с поклоном: Святителю Христов Ионо, моли Бога о нас.

Избра тя Благодать отче от утробы матере твоея, поставити тя пророка людем Своим. Ходатайствовати ко Господу о спасении мира, и оставлении невеждьственых Им блаженне.

Запев. Рукою великаго архиерея Ионы. Сий же о нем собора священных мужей судом, приемлеши помазание архиерейства, духом воздвизаемь Ионо. И пастырь Великому Граду священне полагаем.

Слава. Блаженнаго Михаила збысться на тебе проречение, не внешнюю бо на тебе нищету зряще, но внутреннее преспевание души твоея, духовныма очима сматряя, аще и еще отрочищу ти блаженне.

И ныне. Пресветлая Свеще Солнца Славы, души моея огнь угашеныи присно унынием возжи, божественых дел маслом Пречистая напояющи. Да верою и любовию присно Тя славлю Богородителнице.

Катавасия: Избави от бед рабы своя, святителю Христов Ионо, яко вси по Бозе к тебе прибегаем, ты бо молиши о нас Христа Бога нашего.

 

Песнь 3. Ирмос.

С Высоты сниде волею на землю превыше всякия власти, и смиреное вознес, из рова преисподняго рода человеча. Несть бо Пресвята паче Тебе Господи.

Запев. От юности твоея, Божественое просвещение, Ионо на тебе сияше, якоже преподобныи провиде. Иже мирови урод, Богови же премудр, яко Богу избран еси, из чрева матере твоея священне.

Запев. Мир умирися, молитвами твоими, святителю во твоем епископьстве. Но яко тогда, и ныне Божие человеколюбие умоли прилежно в мире утвердитися мирови Ионо.

Слава. Плоды Господеви начаток дел своих принесл еси, плоды же земли, молитвами си, умножил еси. И ныне моли блаженне на земли нашей, плодоносие присно подавати, яко благопослушна тя имеем.

И ныне. Еввину древнюю клятву, Христа рождьши Мати Чистая, пресветло разрешила еси, иже всех венчевающаго Благословеньми. Несть бо Пречистая паче Тебе ина помощница. Катавасия.

Седален, глас 4. Добродетелми светяся пасти Христовы овца поставление преподобному Сергию, красен храм внутрь епископии воздвигл еси. Яко душею любя того подвиги его почитая. И сего молитвеника себе о стаде своем ко Господу полагая ныне радуешися ему отче священне. Моли спастися душам нашим.

Слава и ныне. Богородичен. Обновила еси Чистая Божественым Рожеством Своим, истлевшее, в страстех земнородных мертвеное существо. И воздвигла еси вся от смерти, к Животу Нетления. Тем же Тя по долгу блажим вси Дево Преславная, яко же прорекла еси.

 

Песнь 4. Ирмос.

Любве ради Щедре, Своего Си Образа на Кресте Своем стяжа и разстоящаяся языцы. Ты бо еси Бог мой, Крепость моя и Похвала.

Запев. Божественому Предотечи, великому Иоанну храм священныи воздвигл еси, яко верен душю, тому и тело в снабдение возлагая отче священне.

Запев. Яко рачитель и верник тепл Крестителю Господню показася. Тем же в храме его, его же ему создал еси, тело свое полагаеши. И во дворы его приятися желая.

Слава. Возлюбил еси святителю священных мужей песньми восхваляти, священныя их памяти, яко рачитель доброте их, и подражатель деянием боголюбезным.

И ныне. Имею Тя Помощницу, от кого ся убою когда, или устрашю. Кто же хотя скорбная навести рабу Твоему, и не устрашится Тебе Пречистая и не падати под нозе. Катавасия.

 

Песнь 5. Ирмос.

Нечестивии не узрят славы Твоея Христе, но мы Тя Единочаде, Отчо Зарение Славы Божия от нощи утреннююще, воспеваем Тя Милосерде.

Запев. Приносимое яко честно возложение Богови, и освященно первопрестолником русским Ионою твое священное пастырьства возведение. Яко пасущю ти Господня люди Ионо святителю преподобием и кротостию.

Запев. Аще наставлением митрополичим Ионо зовом самем погрести его, отречеся старости ради приити Ионо святителю. Обаче обещался еси ему, видети того в своем преставлении во свете Христове.

Слава. Песньми почел еси, память святителя Ионы митрополита, и хвалами яко достойно, ублажил еси того. Сам ныне, святителю Ионо, причаствуеши похвалам его, и по сотворению своему к ближнему восприемлеши.

И ныне. Низложи Владычице враг моих шатание Пренепорочная Тя бо имам и Предстательницу и Надежю, и Помощь крепкую. Ты мя соблюди Чистая навета вражия, избавляющи мя лаяния тех. Катавасия.

 

Песнь 6. Ирмос.

В пучине житейстей деянии моими снидох в глубину. Но яко Иона от кита вопию Ти, из глубины зол моих возведи мя молюся, Сыне Божии Слове.

Запев. Прилпе любве душа твоя к Господню Крестителю, святителю богоблаженне. Тем же тело твое честное, в честнем храме его нетленно, во многа лета соблюдаемо являшеся.

Запев. Красота говения твоего еже к Господу привлече благодать, благолепию души твоея священне. И возведе тя Великому Нову Граду отца и первопрестольника, Господня священьства преподобна показа.

Слава. Прослави Тя Господь Ионо, тело твое соблюде во многа лета нетленно. Являя тя общника раб Своих, их же подражатель в житии был еси. Сим и по смерти достойно, соублажаешися блаженне.

И ныне. Всесвятая Дево, Предстательнице и Покрове всем верным. Предстани, и избави нас враг наших нападения и от всякия скорби, и Страшнаго Суда испытания. Да верою присно пою Тя. Катавасия.

Кондак, глас 4.

Свыше прият Божественую Благодать, ходатайствовати Богови и человеком. Яко святитель возношение вознося, и мир людем своим снося, и обилие плодом Ионо священне. Ты бо еси Великому Нову Граду похвала, и сущым о нем радость.

Икос. Похвалим достойно ныне святителя. Яко от чрева матере своея избран Богови во освящение. И отрочищь еще сыи пронаречен во архиерество граду своему от Бога. Тем же не от человек произведен святитель, но свыше пронаречен, и Духом помазан, священнодействуя богоприятно. И смирение и тишину молитвами своими дарует, и обилие плодом. Той бо Великому Нову Граду слава, и всем иже о нем радование.

 

Песнь 7. Ирмос.

Авраамстии древле в Вавилоне отроцы, в пещи пламень попраша, хвалами вопиюще, отец наших Боже благословен еси.

Запев. Зиждеши Божественому Имени, богатною рукою в пустынях удалено Ионо священныя храмы. Великих богоугодник божественых архиерей с преподобными.

Запев. Нову обитель составляеши великих триех иерарх, и мнишестей чести, благоутишно пристанище отче. Местным же удалением, обручая им безмолвие.

Слава. Виноград насаждая Богови ограду священную, вино износя веселящее, в священных храмех божественое пение. Иже в Троице Единому хвалиму и благословиму Богу отец наших.

И ныне. Едину Всесвятую, яже Единому Богови Вселение, Едино Пречисто, от Иоакима и Анны раждаемую, священным храмом почитая. Яко в нем воспевати Препетое Девыя Рожество. Катавасия.

 

Песнь 8. Ирмос.

Отроки благочестивыя в пещи, Рожество Богородиче спасло есть, тогда убо образуемо, ныне же действуемо, вселенную всю воздвиже пети. Господа воспевайте дела, и превозносите Его во веки.

Запев. Кроткое и молчаливое нрава твоего восприем Господь блаженне, постави тя пастыря людем Своим. На кого бо призрит, но на кроткаго и молчаща трепещуща словес Его.

Запев. Уста вдовыя благословиша тя, заступления от тебе сподобльшеся святителю блаженне. Благоугожая Богови по непорочному Иову. И обидимыя от насилия изимая.

Слава. Людие твои святителю преподобне сетоваху сиротства своего, в твоем к Богу отшествии, добраго пастыря своего. Ныне же священною памятию твоею возрадовашася всяческая.

И ныне. На Тя всю надежду спасения моего возложих, Богомати Неискусобрачная. И Тя призываю присно на помощь. Спаси мя от напастей и печали врага. Разреши пленицу зол моих, и суда мя исхити. Катавасия.

 

Песнь 9. Ирмос.

Сотвори державу мышцею Своею. Низложи бо сильныя со престол, и вознес смиренныя Бог Израилев. В них же посети нас Восток Свыше. И направил ны есть на путь мирен.

Запев с поклоном. Блаженнаго Евфимия, престол наследова священне Ионо, яко подражатель добродетелем его был еси, и песньми сего ублажив память изрядно. Сам ныне обществуешися хвалам его, яко соводрояешися ему во Свете Незаходимем.

Запев. В землю кротких со святители достойно вселися еси святителю Ионо, Кроткаго Учителя учениче. Тому предстани о нас поющих память твою. И испроси нам соблазном оставление, и шуяя части в день Суда избавление, и лютыя геены, блаженне.

Слава. Не изнеможет всяк глагол иже от Бога. Убога тя и сира, иже отец сирых приемлет Бог, иже на престоле со князи посади. Тя людем своим, яко достойна пастыря производя, отца сирым, и заступника вдовицам тепла положи тя, Ионо блаженне.

И ныне. Просвети Чистая иже любовию чтущих Тя и величающих, разреши страсти наша. Тем Дево устави бурю, лукаваго соблазны от среды отжени. Варвары покори державе нашей молитвами Си. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля