Канон святителю Исаии Ростовскому


Канон иже во святых отцу нашему Исаии, епископу Ростовскому, чудотворцу

Тропарь. Глас 8. Православию наставниче, благочестия учителю и чистоте. Ростову светилниче пресветлыи. Святителем богодохновенное удобрение, Исаие премудре. Учением бо твоим вся Русския концы просветил еси. Благодатию духовною святителю блаженне, моли Христа Бога, да спасет душа наша.

 

Песнь 1. Ирмос.

Отверзу уста моя, и наполнятся Духа. И слово отрыгну Царице Матери, и явлюся светло торжествуя, и воспою радуяся Тоя чюдеса.

Запев с поклоном: Святителю Христов Исаие, моли Бога о нас.

Твоего Христе угодника блаженнаго Исаии, пети ми желающу, молитвами его яко Бог осияние Всесвятаго Духа даруй ми, и свет премудрости Твоея. Да достойно воспою того чюдеса.

Запев. Приидете вернии, Церковнаго светилника, и столпа непоколебима, и православию учителя, и благочестию проповедника, блаженнаго Исаию, достохвалными песньми почтем.

Слава. Яко святитель верен, и пастырь истинныи Ростовстей церкви быв. И словесному стаду Христову, новым людем, нелестныи учитель явился еси блаженне Исаие. Их же научил еси славити Божия величия.

И ныне. Марию Чистую, приидете вси воспоем, едину украсившую человечество, и рождьшую Бога Воплощенна. Девою же пребывшу невреждену.

Катавасия: Избави от бед рабы своя, святителю Христов Исаие, яко вси по Бозе к тебе прибегаем, ты бо молиши о нас, Христа, Бога нашего.

 

Песнь 3. Ирмос.

Твоя певцы Богородице, живыи нетления Источниче, лик Себе совокупльши духовен утверди. И в Божественей Ти славе, венцем славы сподоби.

Запев. Глаголы божествеными, делы же и учении преславными, по всему уподобися преславным апостолом. И обтече всю Русскую землю, идольскую лесть попирая. Просвещая же верных сердца благодатию.

Запев. От младенства Христови вожделев, и красная мира сего, вся уметы вменив по апостолу отче, вышних ища. Христовою же благодатию святительству сподобился еси. И Ростову пастырь новым людем посылаешися, их же и научил еси. И на Небесех венца славы восприял еси.

Слава. Святаго Духа благодатию, идольское из оставшее нечестие до конца потребил еси в Русстей земли. И поборник во истину православию явися крепкии. Тем просветил еси своими учении Русския концы.

И ныне. Поем Дево Богомати, паче естества Рожество Твое, и Твою Нетленную Чистоту. Ибо в Тебе во едино сочтася, девьство и рожество. Катавасия.

Седален, глас 8. Подобен. Премудрости.

От мирския молвы избежав, и Христово иго восприим и заповеди совершив, и пастырь, обители бываеши. Потом же и на святительском седалищи сед, богоугодно поживе, и люди православию научи. И на Небеса востече, у Престола Вседержителя со ангелы предстоя, святителю блаженне, молися о рабех своих.

Слава и ныне. Богородичен. О Тебе радуется Обрадованная вся тварь, архангельскии собор, и род человеческии. Освященная Церкви, и Раю Словесныи. Девьственая Похвало, из Нея же Бог воплотися, и Младенец бысть, прежде век Сыи Бог наш. Ложесна бо Твоя Престол сотвори, Твое же чрево пространнейше небес содела Девице. О Тебе радуется Обрадованная вся тварь, слава Тебе.

 

Песнь 4. Ирмос.

Седяи во славе на Престоле Божественем, на облаце легце, приде Исус Пребожественыи от Пречистыя Девы, и спасе вопиющыя, слава Христе Силе Твоей.

Запев. Седяща во славе Господа, пророк Исаия древле узрев, и от серафима клещами угль приим и очистися. Ты же святителю всегда Господеви предстоиши, со множеством безплотных, и серафимом подобяся, яко же клещами своими руками, Тело Христово приемлеши, и верным подаваеши, непрестанно вопия, слава Силе Твоей Господи.

Запев. Любовию Божиею паче огня распалаемь отче, обходя грады и веси, в Ростовстей, и Суздальстей области, идольския капищя разоряя, церкви же созидая, и люди научил еси пети, слава Силе Твоей Господи.

Слава. Преславныи и чюдныи Леонтии, яко благоцветущь сад насадив, ростовския люди, просветив их святым крещением. Ты же блаженне до конца сих напоил еси, своим учением. И ко Христови яко зрел плод принесе, с веселием вопия, слава Силе Твоей Господи.

И ныне. От матерних пелен, чисто житие имел еси блаженне. И сего ради Пречистыя Богородицы, изрядныи служитель был еси. И Ту возвеличил еси в Русских странах, и научил еси пети, слава Силе Твоей Пречистая. Катавасия.

 

Песнь 5. Ирмос.

Удивишася всяческая, о Божественней славе Твоей. Ты бо Неискусобрачная Дево, прият во утробе над всеми Бога. И родила еси Безлетнаго Сына, всем воспевающим Тя мир подавающа.

Запев. Удивляется святитель, князь же и вси людие, скорому твоему пришествию, ко освящению Пречистыя церкве. Ангелом бо зван бысть, и облаком носимь, яко же древле апостоли, на Успение Божия Матере. Тем же тя всем воспевающим, мир подаваеши.

Запев. Удивишася ангельстии чинове, преславному твоему житию. Како в бреннем телеси, безплотнаго врага победил еси блаженне. И воздушными темными князьми неудержан быв. И Престола Христова достигл еси к превышним силам, и оттуду, мир нам подаваеши.

Слава. Удивляются христоименитии людие, егда обретоша пречестное твое тело, иже многими леты землею покровено. И явися якоже златозарное Солнце, чюдес лучи испущая, и просвещая верных сердца. И воспевающым Господеви, мир подаваеши.

И ныне. Умилосердися Владычице, на непотребныя своя рабы, и непредаждь нас в руце поганых, грех ради наших, но молитв наших непрезри. Иже в Твою церковь притекающим и вопиющим Ти, мир подавающи. Катавасия.

 

Песнь 6. Ирмос.

Божественое се и всечестное совершающе празднество, богомудрении Божия Матере. Приидите руками восплещем, от Нея Рождьшагося верою славяще.

Запев. Божественою благодатию укрепляемь, апостолом ревнитель быв, русския вся концы научил еси благочестию, и вся нечестивая учения до конца потребил еси. Тем же твою память светло празднуем.

Запев. Гроб честнаго ти телесе, иногда в небрежении бысть. И от святителя иже твой престол держащаго, и к тебе любовь показующа, оттуду преносится, явствено ныне полагается, источающии исцеления всем.

Слава. Иже всегда к раце мощей твоих приступающе, любезно ту целуем, и от души вопием ти, святителю блаженне Исаие, молися прилежно за град и люди. И скорбь нашю в радость претвори, и грехом прощение испроси.

И ныне. Притецем вернии в церковь Божия Матере. И верно молящеся вопием Ей, помилуй Владычице, свое достояние, и от враг избави, угодника твоего Исаии молитвами. Катавасия.

Кондак. глас 3. Подобен. Девая днесь. Яко гром возгремел еси, божествеными ти учении, в Русстей земли, и явился еси светилник пресветел, осияя светом богоразумия Исаие блаженне. Тем же и вопием ти Христа Бога моли, непрестанно о всех нас.

Икос. Приидите богоизбраннии христоименитии собори, похвалим ныне, и песньми почтем, светоносную память пречюднаго отца блаженнаго Исаию, апостолом равнаго, благочестию проповедника, наставника же и учителя русскому языку. Яви бо ся яко светилник незаходимыи, во тме сущим неведения, и всех возводя к Божественей высоте. И на пажитех Закона Живоноснаго тех упасе, и исцелении лучами всех просвещая. Тем же молим тя ныне, облистай в сердца раб твоих незаходимыи свет разума, Христов угодниче. И моли непрестанно о всех нас.

 

Песнь 7. Ирмос.

Непослужиша твари, богомудрении паче Зиждителя. Но огненное прещение мужески поправше, радовахуся поюще. Препетыи иже отцем Господь и Бог благословен еси.

Запев. Не служат к тому русстии сынове тме прелести. Но тобою отче истинныи Богоразумия свет познаша. И непрестанно радующеся ныне Христу вопиют, благословен Бог отец наших.

Запев. Празднует Церкви честно твое преставление. житие бо благочестно на земли свершил еси чюдне, и плод сторичествующии Владыце своему принесл еси. И от Него приял еси венца Славы Неизреченныя, непрестанно вопия, благословен Бог отец наших.

Слава. Иже во искушениих и скорбех сущии, к раце мощей твоих притекающе, и приемлют честная исцеления, от яже в тебе Божественыя благодати. И непрестанно Христу вопиют, благословен Бог отец наших.

И ныне. Укрепи Владычице, славящаго Тя царя на противныя враги, яко Давыда на Голияда. Да веселящеся вопием Ти, радуися Покрове Святыи, и Заступнице граду нашему. Катавасия.

 

Песнь 8. Ирмос.

Отроки благочестивыя в пещи, Рожество Богородиче спасло есть. Тогда убо образуемо, ныне же действуемо, вселенную всю воздвиже пети. Господа воспевайте дела, и превозносите Его во веки.

Запев. Блаженную жизнь пожил еси в житии сыи, и со святительскими лики у престола Христова радуяся предстоиши. Божественое наследив наслаждение, непрестанно вопиеши, Господа воспевайте дела, и превозносите Его во веки.

Запев. Божественаго Духа благодать имея в души своей, блаженне Исаие. И обтече Русскую землю яко молния, разсевая Божие слово во всех странах, просвещая всех и научая. Господа воспевайте дела, и превозносите Его во веки.

Слава. Словесныя плоды Господеви принося, Исаие премудре. И озарил еси своей пастве свет Богоразумия. И нечестивая уста заградил еси, пращею Богодухновенных словес твоих. И ясно всем проповедал еси, Господа воспевайте дела, и превозносите Его во веки.

И ныне. На благодеяние человеком, Слово воплотитися изволи. Девьства бо врата пройде яко Господь, и Богородицу показа. Тем зовем, Господа воспевайте дела, и превозносите Его во веки. Катавасия.

 

Песнь 9. Ирмос.

Всяк земен да взыграется, Духом просвещаемь. Да ликоствует же безплотных умов естество, почитая святое торжество Божия Матере. И да поют, радуися Преблаженная Богородице Чистая Приснодево.

Запев с поклоном. Кто может блаженне по достоянию тя восхвалити, исцеления бо неоскудно подаваеши, приходящим ти с верою, и непрестанно вопиющим. Избави святителю от всяких искушений, и до конца невреждены нас соблюди.

Запев. Окрест стояще раки мощей твоих, и с любовию ту припадающе целуем, и верно ти вопием блаженне, помилуй святителя, иже престол твой ныне украшающаго, и до конца его сохрани невредима. Христолюбивому же нашему царю, на сопротивныя победы даруй, и на враги одоление.

Слава. Приими хвалу от раб недостойных, святителю Исаие. И жития сего непостоянную пучину, даруй нам немятежно преити. И молитву о нас к Богу сотвори, честно почитающих твою память. И одержащих зол и ждущих нас избави, да во веки тебе величаем.

И ныне. Приидете христоименитии людие, в честную церковь Божия Матере, и поклоньшеся пречюдному Ея образу, и руце воздевше от сердца возопием, помилуй нас Богородице, недостойных раб твоих, и град наш, в нем же великое Твое, и многославное имя величается, от всех злых свободи. Угодника твоего Исаии молитвами, да во веки Тебе величаем Чистая. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля