Канон святителю Ионе, митрополиту московскому


Канон святому отцу нашему Ионе, митрополиту Киевскому и всея Русии, глас 8.

Тропарь, глас 4. От юности своея весь сам себе Господеви возложив. В молитвах и трудех и постех, образ быв добродетели. Отнюду же Бог видев твое благое изволение, архиерея тя и пастыря Церкви своей устраяет. Темже и по преставлении, честное тело твое цело и нетленно соблюдеся, Ионо святителю, Христа Бога моли, спастися душам нашим.

 

Песнь 1. Ирмос.

Воду прошед, яко по суху, из Египетска зла избежав. Израильтянин вопияше: Избавителю Богу нашему поем.

Запев с поклоном: Святителю Христов Ионо, моли Бога о нас.

Иже от Бога дарования Божественаго наслаждаяся, коеждо прошение посещая чюдесы. Отнюду же отче и мне подаждь силу, во еже пети ти священное торжество.

Запев. Благодать Божественая излияся во устнах твоих, святителю Ионо. И был еси пастырь Христове Церкви. Украси бо тебе Бог, Его же житием своим прославил еси.

Запев. Благоухает честная рака мощей твоих, и истачает здравия. Недузи же присно от верных отгоняются, тя благочестно чтущих святителю.

Слава. Стену тверду, Христова Церкви стяжавши тя святителю, присно пребывает хвалящи своего Владыку, иже тебе прославльшаго.

И ныне. Церкви Божия бысть, Нескверная Отроковице всельшемуся паче ума в Тя Богородице, и лесть от душ человеческих отгнавшаго.

Катавасия: Избави от бед рабы своя, святителю Христов Ионо, яко вси по Бозе к тебе прибегаем, ты бо молиши о нас, Христа, Бога нашего.

 

Песнь 3. Ирмос.

Небесному кругу Верхотворче, Господи, Церкви Зиждителю, Ты мене утверди в любви Своей, желанием си край, и верным утвержение, едине Человеколюбче.

Запев. На высоту добродетелей возшел еси святителю, и приим священнопомазание высокаго своего жития. И на седалищи высоце послужил еси Богови, яко архиерей великии.

Запев. Церкви Христова, светилника тя стяжавши святителю, добродетелными твоими учении, премудре просвещается глаголющи, ты ми Господи крепость и утвержение.

Запев. Божественым желанием, все плотьское желание отринув, и совершеным житием просиял еси. Тем же отсюду преставися, к Невечернему Сиянию.

Слава. Яко архиереом приемник был еси святителю, потщался еси словесы и делы, и поучением правым подобник онем быти. Тем же почитаем тя яко Христова святителя.

И ныне. Угля Божественаго светозарная клеще, купина не опалившися Божества, сеновныя ми попали страсти, и огня исхити вечнующаго. Катавасия.

Седален, глас 4. Подобен. Скоро предвари. Светло житие твое всем явися, и всепраздньственая память твоя, чюдесы облистающи удивляет верныя. Тебе убо ныне радостию почитаем, архиереом похвало. Моли спастися душам нашим.

Слава и ныне. Богородичен. Поем Тя Богоневесто Мати Христа Бога, славяще Рожество Твое непостижимое. Им же избавихомся от льсти дияволи, и всякия беды, Владычице Богородице. И верно вопием, помилуй стадо свое, едина Всепетая.

 

Песнь 4. Ирмос.

Услышах Господи, смотрения Твоего таиньство, разумех дела Твоя, и прославих Твое Божество.

Запев. Великое светило сиянии твоих добродетелей, и светлостьми чюдес просвещая верных, иже искрено тебе поющих святителю.

Запев. Яко прекрасная маслина отче, насажден быв святителю в дому Господни, и во дворех дому Бога нашего процвете, подавая здравие душам и телесем.

Запев. Всечестное тело твое святителю Ионо, дом Пресвятаго Духа бысть. Во гробе бо лежа, духи лукавыя от человек прогоняя, силою иже в тебе Живущаго.

Слава. Словом и делы и простотою сердца, просиял еси Ионо святителю. Поминай нас, чтущих память твою преподобне.

И ныне. Иже всеми Невместимыи Пречистая, вмещается во утробу Твою, спасая мя благостию, погруженаго грехи. Катавасия.

 

Песнь 5. Ирмос.

Вскую мя отрину от лица Твоего Свете Незаходяи, покрыла мя есть чюжая тма окаяннаго. Но обрати мя, и к свету заповедей Ти пути моя направи молютися.

Запев. Чист ум свой к Богу имея святителю всегда, и добре управил еси Христово стадо. Тем же убо и Непреходящее Селение иже со ангелы, и архиереи наследуя преподобне. От онюду же сияеши чюдесы.

Запев. Умом чистейшим разсмотряя, Ума всех виновнаго. Сего ради прием дарования чюдес святителю, и верныя удивляеши. Иже любовию тебе почитающих премудре.

Запев. От юнаго возраста житие твое просия, добродетельми украшено, Ионо святителю. И чюдесы высокими удобрено блаженне. Иже и по преставлении прослави тя явлена.

Слава. Слава святителем, и верным людем заступник воистину отче был еси. Красота Церкви, и основание добродетелем. И благочестия утвержение достохвалне.

И ныне. Видевше Божественаго таиньства Богорадованная, непостижимую глубину честнии пророцы, чистаго Рожества Твоего Пречистая, различными образы, яко же вместиша. Катавасия.

 

Песнь 6. Ирмос.

Молитву пролию ко Господу, и Тому возвещу печаль мою, яко зол душа моя наполнися, и живот мой аду приближися. И молюся яко Иона: от тля Боже мой возведи мя.

Запев. Благолепия венцем украшен, сияеши ныне святителю. Яко истинныи архиерей, правдою воистину одеявся, предание Спасово соблюл еси. Тем же и званию Божественому вопиющу ти, вниди в радость Господа своего.

Запев. Кроток и незлобив, Владычним стопам воследуя преподобне. И преходя от тленных на вечная. Отнуду же и землю кротких, иже со святыми достигл еси. Сего ради тя собори благочестивых воспевают.

Запев. Твоего ради жития великаго и чистоты, сына тя Света и Дни Христос показа. И архиерея и пастыря, Церкви Своей содела. Идеже послужив, яко пастырь изряден. И к обителем Небесным восходиши.

Слава. Разсуждением ума, и желанием духовным распалаемь, жизнь свою святителю проходя. И несущая яко преходящая мимо текии. И к Божественым селением отче Ионо прилагаяся.

И ныне. Освяти душю мою Дево, Яже Святое рождьши Слово. Воистину во святых, яко пречисто почивающаго единаго Бога нашего. И даруй ми яко Милостива, умиления тучю Пренепорочная. Катавасия.

Кондак, глас 8. Подобен. Взбранной воеводе. Яко от младеньства Господеви поработив себе мудре, постом и бдением тело свое удручая. Тем же сосуд чист и дом Духу Пресвятому явися. Сего ради и Церкви Своей тебе архиерея и пастыря устрояет, юже добре упас ко Господу отходиши, Его же возлюби. Тем молим тя, поминай нас верою чтущих святую память твою, да вси зовем ти. Радуися отче Ионо святителю всечестныи.

Икос. Человек убо сыи естеством отче, но паче человека подвизася, в постех и бдениих, и молитвах и трудех. Яко образ быв добродетели многим. Сего ради тя Бог, архиерея и пастыря Церкви Своей устраяет. Отнюду же тя молим, молися Благодателю всех Богу, во еже верному царю чтущему тя, даровати победу на враги. И нам обрести благодать и милость в День Судныи. Да вси зовем ти, радуися отче Ионо святителю всечестныи.

 

Песнь 7. Ирмос.

Иже от Июдея дошедше отроцы в Вавилон древле, верою утвержении, пламень пещныи попраша глаголюще: отец наших Боже, благословен еси.

Запев. Видев твое благое произволение Христос Бог, яко не себе живеши, но действующему в тебе Господу. Тем украшает тебе, чюдес исцелением.

Запев. Чистыми делы, и исправленьми своими, просияв яко светило. И Богоданную ти Церковь добре упас, поя Христови. Отец наших Боже благословен еси.

Запев. Яко в законе Господни поучаяся день и нощь святителю. Задняя забывая, и напредняя простираяся. Творцу и Владыце вопия, благословен еси Господи Боже отец наших.

Слава. Изрядно житие твое святителю, всеми познано бысть. И по преставлении прославляет тебе, Ему же усердно послужив, Ионо отче наш. Христови поя, отец наших Боже благословен еси.

И ныне. Огнь никакоже Тя Божества не опали Дево. Тя бо иногда купина прообразоваше в горе, опаляема Пречистая, и никакоже сгораема. Катавасия.

 

Песнь 8. Ирмос.

Царя Небеснаго, Его же поют вои ангельстии, хвалите и превозносите Его во веки.

Запев. Ангельское житие пожил еси на земли святителю, смирен и кроток быв. Отнюду же и в земли кротких со святыми водворяяся. Христови же поя, хвалите и превозносите Его во веки.

Запев. Храм освящения, всечестная рака мощей твоих святителю. Из него же исцеление благодати почерпающе, Владыку всех Господа поем. Иже тебе целебника даровавшаго, и превозносим Его во веки.

Запев. Ум твой святителю мановением Божественым обожаемь, до конца плотьских страстей удалися, Христови поя, хвалите и превозносите Его во веки.

Слава. По достоиньству почитаем вернии, мощей твоих честную раку, Ионо святителю, яко миро почерпающе, верным благоухание, Владыце Христу вопиюще. Вся дела хвалите и превозносите Его во веки.

И ныне. Исцели страсти сердца моего, безстрастия Источник рождьшая. И к животу мя Божественому настави, да Тя славлю во вся веки. Катавасия.

 

Песнь 9. Ирмос.

Воистину Богородицу Тя исповедающе, иже Тобою спасении Дево Чистая, с Небесными вои Тя величаем.

Запев с поклоном. Чистым сердцем, и Божествеными возхождении, ум вперив. Единаго Бога зрети, доброту желая. И оттуду светолитием просвещаяся, Богомудре святителю.

Запев. Богопреданное стадо твое, пастыря тя имуще, тяжкия волки отгоняюща от всех верных. И стадо благодатию Христовою соблюдаемо сохранив, Ионо святителю.

Запев. Якоже первее целомудренаго Иосифа тело Израиль приносит. Тако и ныне раку мощей твоих Ионо святителю приемлюще, почитают любезне, Христа величающе.

Слава. Днесь светлая память твоя святителю восиявши, верных сердца просвещая. Тем же и пение произведшему, моли Христа Бога сохранитися от лукаваго ловления, и получити милость в день судныи.

И ныне. Светом покаяния, помраченнаго мя леностию, Всенепорочная просвети. Да пою и величаю, и славлю Тя Пренепорочную Владычицу. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля