Канон святителю Иоанну Новгородскому


Глас 8.

Песнь 1. Ирмос.

Воду прошед, яко по суху, из Египетска зла избежав. Израильтянин вопияше, Избавителю Богу нашему поем.

Запев с поклоном: Святителю Христов Иоанне, моли Бога о нас.

Богозванне яко воистину милостив и кроток был еси отче. И воистину тих духом, и одесную престола Божия стояния сподобися блаженне. И ныне на небесех, тишину подаждь сердцу моему.

Запев. От младых ногтей святителю Иоанне, вперися умом к Богу, и страсти телесныя зельным воздержанием увядил еси, и всякими добродетельми украшаяся премудре.

Слава. Егда иерейскии сан восприят, и Господня оправдания внимая умом святителю Иоанне, и от среды молвы удаляяся премудре, и нечистоте не прикасашеся. Тако святителю, нечистая помышления отжени от сердца моего.

И ныне. Православия был еси учитель истинныи, и к Богородице велии молебник. Но и ныне святителю присно не престай посещая чад своих, христолюбивых людей, яко к Богу дерзновение имея велие.

Катавасия: Избави от бед рабы своя , святителю Христов Иоанне, яко вси по Бозе к тебе прибегаем, ты бо молиши о нас Христа Бога нашего.

 

Песнь 3. Ирмос.

Ты еси Утвержение, притекающим Ти Господи, Ты же Свет омраченым, и поет Тя дух мой.

Запев. Яко убо Солнце взыде на Востоце. Ты же святителю Иоанне на севере на престоле седя Великаго Нова Града, восия светлыми деяньми. И люди вся просветил еси учении. И еретиком уста истинным словом заградил еси.

Запев. Благообразен обычай имея, и ко всем любовь Божественую притяжа премудре Иоанне. Варваром остроту притупи святителю, и до конца их низложи под нозе православным людям.

Слава. Предочистив сердце свое молящутися Богу о пользе людьстей, слыша Глас Божественыи глаголющь ти еже о полезных. Молитва бо твоя услышана бысть, якоже великаго о стаде твоем к Богу молебника святителю Иоанне.

И ныне. Совокупи Пречистая вся православныя, еже прославити Тя Царице, Царя Христа рождьшую. Далече же от нас отжени варварское негодование. Рабу же своему подаждь слово, да возмогу воспети Твоя преславная чюдеса. Катавасия.

Седален, глас 4. Подобен. Скоро предвари.

Егда молящутися в велицей церкви Премудрости Божия, преблаженне Иоанне, преочистованныи душею и телом. Гласу же божественому явленно о тебе возгласившу, еже о чудеси Богородицы и о избавлении града, и о украшении Церкви Христовы. И прият от словес чюднаго оного Гласа истинных знамении, и чюдес дарования, и божественых учении изливающи всем. Тем же и с любовию отче празднуем святую память твою.

Слава и ныне. Девая Мария и Богородица воистину, яко Облак Света днесь восия нам. И от праведнику предгрядет днесь в славу нашу. Не к тому Адам осуждается, и Евва от уз свободися. И сего ради зовем вопиюще, со дерзновением, Единей Чистей, радость возвещает Рожество Твое всей вселенней.

 

Песнь 4. Ирмос.

Услышах Господи смотрения Твоего Таиньство, разумех дела Твоя, и прославих Твое Божество.

Запев. Законоположника велика, яко Моисея тя и Давыда, воистину стяжавше отче чада твоя. Яко чадолюбива отца, сынове Русстии ублажаем.

Запев. Многи убо церкви в Славу Божию воздвигшу ти святителю. Показася и сам храм Богу совершен и несквернен, чист душею и телом премудре. Тем же и нас сотвори храмы Духу Пресвятому преблаженне.

Слава. Дни сын явился еси. В нощи же молящутися Богу в просвещении словес Божиих, отче Иоанне. Враг же невидимыи хотяще пострашити тя, не терпя себе надолзе досаждаему. Но молитвою твоею связася вселукавыи.

И ныне. Владычице Богородице устави Церковное смущение, во благостоянии же учини во веки веком. И еретиком уста загради, возлюбившим огнь негасимыи. От него же избави нас раб своих, и послужити неблазнено сподоби, иже под летом бывша, и от Отца безлетно восиявшаго Богомати. Того бо нам родила еси. Катавасия.

 

Песнь 5. Ирмос.

Утренюет дух мой к Тебе Христе Боже, зане Свет повеления Твоего пришествия. Но в них озарив ума нашего Владыко, настави мя на стезю Животную.

Запев. Честное Воскресение, и Гроб Живоносныи искрено узрел еси во Иеросалиме. Дверем бо церковным о себе тебе отверзшимся, мановением Святаго Духа. И сподобися Боговидения почерпьсти святителю Иоанне, искусителя же всячески победил еси. И ныне молися Христу Богу, еже победити вся иноплеменныя и неверныя, православным христианом.

Запев. Великому Нову Граду настольник и архиепископ был еси. И в дому Премудрости Божия, яко финик процвел еси, словесы благоплодными и непорочным житием наслаждая сердца премудре и богодохновенне. И мы убо чада твоя молим тя блаженне, да молитвами твоими милость получим от Спаса Христа. И яко на чадолюбива отца надеемся.

Слава. Божия Церкви жива и одушевлена бысть святителю великии Иоанне. К Церкви Божии простираяся во дни и в нощи премудре, к Премудрости Божии прилежа. Служитель бо и собеседник Божии явьственеишии бысть, и Великому Нову Граду похвала, и всея Русския земли удобрение. Благочестивым людям молитвами твоими здравие даруй. И на поганыя победы и одоления.

И ныне. Церковь Тя Богу, и Полату Одушевленую. И Ручку в ней же Манна, и Жезл Прозябшии. И Гору Несекомую, и вся яже о Тебе сбывшаяся пророчества Богородице. Служитель Твой великии святитель Иоанн славословляше, и молит Тя Едину, человеческому роду отъемшую поношение. Катавасия.

 

Песнь 6. Ирмос.

К могущему спасти мя Богу, из глубины возопих из тля, возведи от тля живот мой, яко Человеколюбец.

Запев. К могущему Богу руце простирая иногда, и спасение обрете. Водам же послужившым тебе чрез естество Божиим повелением. Искуситель же посрамися, и возрыда, и до конца погибе, твоими молитвами Иоанне святителю.

Запев. Богу тя прославльшу яко же древле Моисея премудре Иоанне. Представи бо тя пастуха и вожда. Море житейское преводяща неблазнено люди. Их же Христос искупи Своею Кровию.

Слава. Самодержьца ума страстем сотвори, яве царствовал еси яко изрядныи победитель. И ратных дерзость покорил еси молением к Богу, и к Пречистей Богоматери. Ныне же способствуй православным людям на противныя, Иоанне великии святителю.

И ныне. Крепость верным и Стена и князем Держава Ты еси Пречистая, дадеся от праведнику Иоакима и Анны. И по Гавриилову Благовещению Бог родися от Тебе. Тобою Пречистая всем истекают лучшая, и на земли живущии к Небеси восходят. Катавасия.

Кондак. Возвеселися явленно честная Церкви Христова, в память днесь приснословущаго святителя Иоанна, от Великаго Нова Града восиявшаго, и всю тварь удивившаго преславными чюдодеянии, и всеми добродетельми украсившагося. Его же и по преставлении честное тело, обретеся нетленно, источая велия чюдеса святителю Иоанне, моли Христа Бога о всех нас.

Икос. Празднуем светло днесь к церкви текуще князи же и сановницы, и весь синклит, и священныи собор и иноцы, и множество народа, и все христоименитое стадо, в память отца нашего святителя Иоанна. Прославляем бо прославленаго от Бога. Его же житию ангели удивишася, и не наказаным в наказание бысть. И ограждение помышлением человеческим, и Церкви основание. Не падающии бо столп Премудрости Божии. И Великому Нову Граду стена и утвержение, и всея Русския земли удобрение. И вселенную удивившаго преславными чюдодеянии, и всеми добродетельми украсившагося. Тем же по достоянию блажим его, молит бо Христа о всех нас.

 

Песнь 7. Ирмос.

Иже Халдейския пещи, всепагубную силу угасше образом ангела сшедша Зиждителя, юноши взываху, благословен Бог отец наших.

Запев. Изнемогоше иногда людие, оружия сопротивных видяще. Ты же тогда Иоанне блаженне, ярость на грех вооружи. На молитву обратися к милостивому Богу. И услышана бысть молитва твоя, и люди научи взывати, благословен Бог отец наших.

Запев. Не сени убо послужил еси, но Новей Благодати, и Истине. Закон бо Богописанен внутрь скрижали сердца своего от Бога прием святителю Иоанне пребогате. Тем же Закон нам полагающему научил еси взывати, благословен Бог отец наших.

Слава. Яко высока и предивна знаменоносца почтем тя Иоанне, и еретиком посрамителя, иже четверицу чтущим, и хулящим Неразделимаго во Две Ипостаси.  Ты же святителю Единому от Троицы научи покланятися Богу. Ему же зовем, благословен Бог отец наших .

И ныне. Во Свете Господни ходяще, приидете воспоем Божественую Дверь,  Царя царьствующим Марию Чистую Богородицу, яко воистину Упование душам нашим зовущим, благословен Бог отец наших. Катавасия.

 

Песнь 8. Ирмос.

Проявленаго на горе святей, и в купине огненей Девическую Моисеови Тайну Явльшаго, Господа пойте и превозносите Его во веки.

Запев. С небесными чинми водворяяся во дворех Господних, во Граде Живаго Бога святителю Иоанне, равноангельныи. Всенощными стоянии, возопил еси во бдениих, хвалите и превозносите Его во веки.

Запев. Днесь светло празднует Великии Нов Град память твою, красуется житием твоим предивным Иоанне святителю. Не помяни согрешении чад своих отче. Но яко чадолюбивыи отец на милость обратися, моля милостиваго Бога. Ему же поем, хвалите и превозносите Его вовеки.

Слава. Храм, священная душа твоя показася Богу, в ней же Отец и Сын и Святыи Дух паче естества вселися. Ты же святителю поганых нахождения отжени от достояния твоего. Благочестивому людям, мир и здравие даруй зовущу, хвалите пойте и превозносите Его вовеки.

И ныне. По истине великим даром от Бога почтен быв святителю Иоанне, яко сподобися послужити чюдеси Святыя Богородицы, предивному Ея Знамению. Молитва бо твоя поспешествуема к Богу, и к Пречистей Его Богоматери. По истине бо молитва праведнаго поспешествуема. Катавасия.

 

Песнь 9. Ирмос.

Удивися убо о Сем небо, и земли ужасошася концы, яко Бог явися человеком Плотию. И чрево Твое бысть пространнее Небес. Тем Тя Богородице ангел и человек чиноначалия величаем.

Запев с поклоном. Удивил еси человеки в животе твоем предивныи Иоанне. И по преставлении твоем к Богу, выше обычая вся чюдеса совершишася о тебе. Христу тя тако прославльшу, яко истинна служителя Своего. Мы же тя яко крепка святе помощника во бранех, ублажаем.

Запев. Мир церквам подаждь святителю твоими молитвами, и хоругви православной помощь на враги вся противныя. И рог Русския земли возвыси блаженне. Предстоя престолу Святыя Троицы, и от нас неотступен буди, неотступныи к Богу молитвениче. Тем же тя ублажаем.

Слава. Малое сие и смиренное хваление, приими святителю от недостойных устен, и мерзскаго моего языка, и от сердьца нечиста. Ты бо великии святителю Иоанне, преочистованныи душею и телом, паче солнечных лучь облистал еси. Божия заповеди совершив. И к Свету Невечернему преставися. Верно тя чтущым, молися подати оставление грехов, Иоанне блаженне.

И ныне. Святая Блаженная Мати Божия, поющыя Тя любовию спаси. Искушений молву разоряющи милостивно, яко Бога рождьши. Вся елика хощеши творити, можеши Дево. Тем же Тя величаем. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля

В связи с обновлением сайта, просим Вас воспользоваться формой для восстановления пароля от личного кабинета.

Восстановить пароль Зачем мне это?