Канон святителю Игнатию Ростовскому

Канон иже во святых отцу нашему Игнатию, епископу Ростовскому, чудотворцу. Глас 8.

Тропарь. Глас 4.

Благоверия просвещься учением, святительства прием паству, апостолом наследитель быв. Тем прием от Бога дар чюдесем, святителю отче Игнатие, моли Христа Бога, да спасет душа наша.

 

Песнь 1. Ирмос.

Воду прошед яко по суху, из египетска зла избежав, израильтянин вопияше, Избавителю Богу нашему поем.

Запев с поклоном: Святителю Христов Игнатие, моли Бога о нас.

Воспоем вси священнаго святителя Игнатия, почтем заступника, и утвержение граду нашему Ростову, и хранителя необорима.
Запев. Отче богомудре святителю Игнатие, отверзи ми недостойному устне воспети тя. И приими яко кадило от убожества моего, еже ти принесох, недостойныи.

Слава. Во спасеныя Христовы заповеди воследовал еси, премудре святителю Игнатие. Вдовицам и сирым бысть заступник, и граду нашему великое защищение.

И ныне. Пречистая Богородице, Содетеля и Спаса порождьши всем поющим Тя, спаси от бед град свой Ростов, непрестанно молящи Сына Своего за ны, и Бога нашего.

Катавасия: Избави от бед рабы своя, святителю Христов Игнатие, яко вси по Бозе к тебе прибегаем, ты бо молиши о нас, Христа, Бога нашего.

 

Песнь 3. Ирмос.

Небесному кругу Верхотворче Господи, и Церкви Зиждителю, Ты мене утверди в любви Своей, желанием Сыи край, и верным утверждение, едине Человеколюбче.

Запев. Сокруши супостаты безбожныя преподобне, молением си ко Творцу и Богу, и силу их вооруженую на ны. Поганская нашествия покори под нозе, верному царю нашему.

Запев. Ты проявил еси, Владыко, последнему роду нашему, чудотворца святителя Игнатия. Граду Ростову утверждение, Церкви твоей истовое правило, иерейскому же чину наставника.

Слава. Прикоснувшуся, святе, пречистем теле твоем, исцеление получи. Персту убо ручному к длани прикорчившуся от рождения, Стефану архимандриту, Божиею благодатию дал еси простиратися.

И ныне. Буди ми Девице Прибежище, и Пристанище и Стена необорима, и Заступница, яже Бога порождьши плотию Пречистая, Избавителя всещедраго, и Спаса поющим Тя Богоневестная. Катавасия.

Седален. Глас 8. Подобен. Премудрости.

Украшаяся премудростию разума, гордыню низложил еси плотьския тяготы, и бысть обителище Духу Пресвятому, непременным простираяся разумом к Любящему тя. Тем ревностию Божественою разгараяся славне, сирым и убогим, и вдовицам бысть заступник, граду Ростову утверждение, явися ангелом собеседник святителю Игнатие. Моли Христа Бога, грехов оставление даровати, чтущим любовию святую память твою.

Слава, и ныне. Богородичен. Небесную Дверь, и Ковчег, Всесвятую Гору, Светлыи Облак воспоем, Неопалимую Купину, Словесныи Рай, Евжино Возвание, вселенней всей Великии Сосуд, яко спасение Тоя ради соделася миру, и оставление древним согрешением. Тем же и вопием Ей, моли Христа Бога, согрешением оставление даровати, иже благочестно поклоняющимся Пресвятому Ти Рожеству.

 

Песнь 4. Ирмос.

Услышах Господи смотрения Твоего таинство, разумех дела Твоя, и прославих Твое Божество.

Запев. Благодатию Богоносец, нарицаемь воистину Игнатие, во Христа облечеся, жития ради чистоты, и научил еси славити в Троице Единаго Бога.

Запев. Избави стадо свое, от греховныя бури, Игнатие святителю, бед же и скорбей. Приводя в пристанище Божественыя воли Его.

Слава. Явися воистину Христов угодник, отче Игнатие, моляся непрестай, от напастей и бед и скорбей, избавити стадо свое, от нужи и печали.

И ныне. Священно славят Тя святительстии собори, и всех преподобных лицы. Зиждителя бо их, яко Младенца на руку Своею понесла еси.
Катавасия.

 

Песнь 5. Ирмос.

Вскую мя отрину от лица Твоего Свете Незаходяи, покрыла мя есть чюжа тма окаяннаго. Но обрати мя, и к свету заповедей Ти пути моя направи молютися.

Запев. Окрест стояще раки твоея, святителю Игнатие, тя имеем к Богу ходатая, и заступление граду твоему Ростову, и утверждение необоримо.

Запев. Милостив бысть убогим, милость душевную испроси прехвалне. Милостыню стяжав отче Игнатие, свещю светлу устроил еси.

Слава. Жилище бысть Пресвятаго Духа, воистину блаженне Игнатие. Того явленных Божественых даров, добре разбогатил еси.

И ныне. Миро тайное, Тя именуем Пречистая, яко рождьши Бога плотию, источающаго Божественое Миро, всем притекающим под кров Твой.
Катавасия.

 

Песнь 6. Ирмос.

Очисти мя Спасе, многа бо беззакония моя, и из глубины зол возведи мя молюся. К Тебе бо возвах и услыша мя, Боже спасения моего.

Запев. Житие си целомудрено, священноявленне совершив, правдою украсився. И мужеством смысла, добродетели сочтав себе, преблаженне святителю Игнатие.

Запев. Сохрани град свой Ростов, преблаженне святителю Игнатие, от безбожных и чюжеверных нахождении, и усобныя рати, моляся непрестай Владыце Христу, о стаде своем.

Слава. Ты убо по смерти яко жив, на погребении своем прият свитки, своима рукама, их же священники в животе своем освятил еси Богови. Рече бо Господь, прославляющаго Мя прославлю.

И ныне. Превышьши бысть Вышних сил, Богоблагодатная, заченши Слово Божие неизреченно. Иже всяческая словом совершив, от Отца прежде век рождься, Того Чистая рождьши неизреченно. Катавасия.

Кондак. глас 4. Подобен. Явися днесь. Явися днесь пресветлая память твоя, святителю преблаженне Игнатие, в мире светло сияющи, и являющи всем Божественое сияние.

Икос. Из чрева матерня освященнаго святителя Господня похвалим ныне вси, преподобнаго Игнатия, граду Ростову утверждение, благодатныя дары приимша, Божественыя славы. И в чюдесех славнаго. Вси верою теплою притекающе, к раце мощей его. Тем и аз недостойныи и грешныи, надеюся молитвами его, ко Владыце и Пречистей Его Матери, милость прияти в День Судныи, содеянных мною зол, и прощение получити, являющи всем Божественое Сияние.

 

Песнь 7. Ирмос.

Иже от Июдея дошедше отроцы в Вавилон древле, верою утверждени, пламень пещныи попраша глаголюще, отец наших Боже благословен еси.

Запев. Отверзи ми дверь покаяния, святителю Игнатие, да омыю скверну окаянныя ми души, и тела моего вся чювства. Да приношю песнь Господеви светло зовя, отец наших Боже благословен еси.

Запев. Имуще тя твои раби заступника тепла, и стену необориму, граду Ростову утверждение, не убоимся супостатных враг. Но побеждаем силою Христовою, взывающе, отец наших Боже благословен еси.

Слава. Уставы отческими утвердил еси мудре, церковь Пречистыя Матере Божии, священства лепотою преукрашено сохранил еси. И ученьми своими наказал еси взывати, отец наших Боже благословен еси.

И ныне. Спасеное пристанище Богородице Дево Тя имуще ныне, житейских бед и бури избегаем, ко пристанищу тишины Твоея приходяще. И Сыну Ти вопиюще, отец наших Боже благословен еси. Катавасия.

 

Песнь 8. Ирмос.

Проявленаго на горе святей, и в купине огненей, Приснодевыя Моисеови тайну явльшаго Господа, пойте, и превозносите Его во веки.

Запев. Побежден бых врагом прегрешении многих молв житейских. Но верою прихожю, яко Манасия вопию Ти Христе, святителя молением спасаемь. Господа пойте, и превозносите Его во веки.

Запев. Вооружаются на ны смиреныя люди твоя, святителю пречестныи Игнатие, сынове Агаряни. Но сокруши их невидимою силою, молением си ко Владыце за присныя рабы, поющыя, Господа пойте, и превозносите Его во веки.

Слава. Молитвы преблаженне и моления творя, ты прилежно к Богу присно за рабы своя. В печалех заступника и поборника, имуще тя к Богу, от всех бед спасаемся. Господа поюще, и превозносяще Его во веки.

И ныне. Владычице Дево Чистая Препрославленая, со святителем к Сыну Своему Цареви молися прилежно, от всякия нужды и беды, избавитися граду Твоему Ростову, Тебе Госпоже верою блажащу, и поющу и превозносящу во вся веки.
Катавасия.

 

Песнь 9. Ирмос.

Удивися убо о сем Небо, и земли ужасошася концы, яко Бог явися человеком плотию, и чрево Твое бысть пространнее небес. Тем Тя Богородице, ангел и человек чиноначалия величаем.

Запев с поклоном. Вельми радуется о тебе честныи отче святителю Игнатие, присныи твой град Ростов. Имея тя на всяко время помощника и заступника. И ныне не отходи от нас, молитвы творя за ны к Богу, яко да от безбожных варвар нас избавиши, тя величающих.

Запев. Яко блудница и мытарь и разбойник вопию ти от сердца, согреших прости мя Владыко, многих ми злых прегрешении. И избави от всякаго зла, святителя молением Игнатия, яко да твою милость непрестанно величаем.

Слава. Приидете соберитеся вси ростовьстии народи, ко блаженней раце преподобнаго Игнатия, со слезами взовите к Богу, избави Господи люди Своя, не даждь достояния твоего роду измаильтескому, яко да возвеличим милость Твою во веки.

И ныне. Марие Пречистая Владычице, омраченое ми сердце с душею, мольбами Си просвети, и жизни вечней сподоби мя Госпоже, не поминай моих безчисленых зол, Сына и Бога Си молящи за мя окаяннаго, певцы Своя сохрани Пречистая. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля