Канон преподобному Варлааму Хутынскому

Канон преподобному отцу нашему Варлааму, новгородскому чудотворцу, игумену Хутыня монастыря.

Глас 2.

Тропарь, глас 3. Иже на земли леганием, пощением же и бдением тело свое изнуряя преподобне, вся плотьская мудрования умертвив. И исцелением струя независтная явися, верою притекающим к раце мощей твоих Варлааме отче наш. Христа Бога моли, спастися душям нашим.

Песнь 1. Ирмос.

Грядите людие, поем песнь Христу Богу, раздельшему море, и проведшему люди, яже испусти из работы египетския, яко прославися.

Запев с поклоном: Преподобне отче Варлааме, моли Бога о нас

От Света Свет Христе мой, от Отца прежде век рождеися, иже искони со Отцем и Духом, согрешении мрак души моея отгнав, озари ум мой молюся, да возмогу пети Варлаама Твоего угодника.

Запев. От корене благаго блажайшая отрасль прозябл еси. Земных маловременнаго жития избегл еси. Тем ныне чистоты венец приемля, со ангелы Христу воспеваеши, поем Господеви, яко прославися.

Слава. Земная и мимотекущая яко уметы вменив, Христа единого приобрел еси. Его же союзом любве уязвив душу свою, и того потщася обрести ненасыщаемыя доброты.

И ныне. Услыша Евва прамати в печалех родиши чада. Ты же Чистая Дево услыша Господь с Тобою радуися, и радованным гласом Богоневесто печаль праматере потребльши.

Катавасия: Избави от бед рабы своя, преподобне отче Варлааме, яко вси по Бозе к тебе прибегаем, ты бо молиши о нас Христа Бога нашего.

 

Песнь 3. Ирмос.

На камени мя веры утверди. Разшири уста моя на враги моя. Возвеселибося дух мой воспевати, несть Свят яко же Бог наш, и несть праведен паче Тебе Господи.

Запев. По апостолу отче вышняя ища, и мудрование имея еже к Богу, вся яже на земли оставил еси, и паче естества доброты сподобися.

Запев. Светом Божественым осияемь онем, и путь иже к жизни ведущь познал еси отче наш Варлааме. И равно ангельнаго ради жития, чудотворец исцелением наречеся.

Слава. Законы питаяся всех Творца и Владыки. Тем же и Невечерним блистая Светом, нелестное солнце явился еси, и премудрости сокровище, мир обогащая.

И ныне. Во иных женах мати дондеже дева не познася, ни мати по рожестве девьствовати сподобися. На Тебе же Дево Богомати обое сбысться. Тем веселием духа воспеваю, несть непорочны паче Тебе Владычице. Катавасия.

Седален, глас 8. Подобен. Премудрости.

Красоты мирския от младых ногтей преподобне возненавидев, единого же Христа от сердца возлюбил еси, и Тому всею душею прилепися, яко безплотен на земли поживе с плотию. Славу же мимотекущую и богатьство нивочто же вменив. Небесное богатьство восприял еси, и славу вечную. Тем же ублажаем святое твое успение, и в нем торжествующе вопием ти. Богогласе отче наш Варлааме, моли Христа Бога, грехов оставление даровати, чтущым любовию святую память твою.

Слава и ныне. Богородичен. Яко Всенепорочная Невеста Творцу, яко Неискусомужная Мати Избавителя, Приятелище сущи, Утешителя Препетая, беззаконию мя суща скверно жилище, и бесом игралище в разуме бывша, потщися сих злодействия мя избавити, светло жилище добродетелем соделавши. Светоприемнице Нетленная, отжени облак страстей, и вышняго причастия сподоби и Свету Невечернему молитвами Си.

 

Песнь 4. Ирмос.

Пою Тя, слухом бо Господи услышах и убояхся, до мене бо прииде, мне ища заблуждьшаго. Тем многое Твое сошествие еже на мя прославляю, обновление.

Запев. Яко в порфиру и виссон и в царскую багряницу одеяся тобою великая российская земля, днесь убо светло торжествуя веселится Варлааме, имея тя в себе яко неистощимое сокровище.

Запев. Мира любве отрекся достиже горняго Иеросалима идеже Христос со Отцем и Духом, и венцем от Него сподобися. Со безплотными лики поеши приемля Его сияние.

Слава. Аще убо отче тесныи и болезненыи путь шествовав в житии, но обаче нетленную жизнь наследова, от онудными светлостьми богатно просвещаяся, богоблаженне Варлааме.

И ныне. Истинно Тя Сень свидетельствова многоразличными образы, яве показующи воплощеннаго из Тебе Единого от Троицы Пречистая неизменно Богомати Владычице, и мир обновльша. Катавасия.

 

Песнь 5. Ирмос.

Света Подателю, и веком Творче Господи, во свете Твоих повелении настави нас. Разве бо Тебе иного Бога не знаем.

Запев. Ярем Господень от юности мудре взем, последова Христу скорбми и слезами преподобне, мысленое око к Нему имея, дондеже и святых селении достиже, обрет покоище Крайняго Града.

Запев. Страстей отгнав мглу яве, зарями отче добродетелей. Просвещение Духа в сердцы прием Варлааме, им же попалил еси вся бесовская ополчения. И постническим ликом причтеся.

Слава. Насажден во дворы Господня, и в дому Бога нашего процвел еси. Прием небесное семя богодохновенне сердечною браздою, клас сторичестующь принесл еси. Тем же и обогатися венцем чюдесы.

И ныне. Управи ум мой Владычице труждающься в пучине скорбей, и потопляемь нашествием тлетворных страстей. И спаси Богородице к Тебе прибегающыя, иныя бо помощницы Чистая разве Тебе не знаем. Катавасия.

 

Песнь 6. Ирмос.

В бездне греховней одержимь, не изследную милосердия Твоего призываю бездну, от тли Боже мя возведи.

Запев. Море житейское любомудрием испытав, и разумев суетно сущо, и яко вскоре погибающо отвергл еси, единому прилепися Христу. Его же ради и тяготу дневную понесл еси. О всех Тому восхождения в сердцы си полагаше.

Запев. Ветрилом окриляемь воздержания, и оттуду достиже в пристанище благоутишное. Пощением питая душу свою преподобне, и светлу всех Творцу представи ю. Тем же и Христос прият ю яко светозарную звезду, и Своей Славе причастну содела.

Слава. Ангельская воиньства иже во плоти житию твоему удивишася отче Варлааме. Бури бо страстей отбегл, и совершенаго ради жития, ветрилом воздержания достиже в благоутишное пристанище Христово.

И ныне. Обетшавшыя ны горким древле древа вкушением, и падшася поползновением Пречистая обновила еси, Зиждителя рождьши Слово составное Дево Мати Владычице. Катавасия.

Кондак, глас 8. Подобен. Возбранной воеводе.

Яко же другии Илия отче дождь с небесе сведе. Он бо огнь сведе, и царя удиви. Ты же люди своя возвесели, и торжествовати устрои. Великии бо Нов Град велми тобою хвалится, имея мощи твоя в себе, его же и сохрани от враг непоколебима. Да зовем ти, радуися преподобне Варлааме отче наш.

Икос. Аще и человек естеством бысть преподобне отче, но Вышняго Иерусалима явися согражданин. И человек убо естеством, безплотных чести сподобися. Тем же и сами зряще чюдеса похвалная удивляют нас, и научают звати тебе таковая, радуися благочестива отца отрасль, радуися матере благоговейныя ветвь. Радуися смирения высото, радуися яко к Божию разуму всех приводя. Радуися яко многа чюдеса о Христе сотворил еси, радуися целомудрия столпе, им же бесовская шатания искоренишася. Радуися светильниче многосветлыи, радуися яко увядил еси плотская мудрования. Радуися яко дождь молитвою сведе. И паки наводнению бывшу, молитвою водоточныя облаки востязуеши. Радуися великому Нову Граду похвала и утвержение, его же и сохрани от враг непоколебима до конца, да зовем ти, радуися преподобне Варлааме отче наш.

 

Песнь 7. Ирмос.

О теле злате на поли Деире служимем трие отроцы не радиша о безбожнем велении. Но посреди пламене ввержени, прохлажаеми пояху, благословен Бог отец наших.

Запев. Зелным пощением яко благовонною пищею питая душу свою преподобне Варлааме. Тем же и Трисолнечному Божеству предстоя со ангелы, поеши, благословен Бог отец наших.

Запев. Облистал еси яко же Невечернее Солнце, отечество си просвещая преподобне Варлааме, тмы избавляя страстей. И иже на нас наветующих советы разори, от враг непредткновенном быти нам, поющим, благословен Бог отец наших.

Запев. Яко на божественую добродетелей лествицу воздержанием отче возшед, смотреливыма очима Христа Царя видел еси, независтною десницею по числу добродетелей Варлааме, дарования дающа, от души вопиющым, благословен Бог отец наших.

Слава. Дремания отнюд и сна своима очима не дал еси, дондеже возмездие от Христа трудом обрете, наслаждение Небеснаго Царствия, иже уготова от веры поющым, благословен Бог отец наших.

И ныне. Обновляются в Тебе естества закони, выше естества бо Естеством Непостижимаго Дево Бога Еммануила преславно Чистая родила еси, в наше верных порождение. Катавасия.

 

Песнь 8. Ирмос.

В пещь огнену к детем еврейским сошедшаго, и пламень на хлад преложьшаго Бога, пойте вся дела Господа, и превозносите Его во веки.

Запев. Слезами своими отче Варлааме умываяся житие прошел еси, и теми множества бесов потопил еси, верных же мысли возвесели. Поющих, вся дела Господа пойте и превозносите Его во веки.

Запев. Уязвися Божественым желанием всеблаженне. Тем же и непорочно и праведно житие проходя, дондеже достиже Царскаго Престола. От онудными светлостьми осияя поющих, вся дела Господа пойте и превозносите Его во веки.

Слава. К Свету Незаходимому славне взятся. Наслаждение же земных вещей оплював вышняго ради наслаждения, паче воздержанию поревновал еси. И страстей пламень потщался еси угасити, слезами своих источник Варлааме. Вопия, вся дела Господа пойте и превозносите Его во веки.

И ныне. Распятие и Погребение иже от Тебе Небрачно Дево произыде, претерпев нас ради мучение. Его же Страстем ревнуя преподобныи Варлаам, крестовидно мучения пощением тому Чистая последова. Катавасия.

 

Песнь 9. Ирмос.

Иже прежде Солнца Светилника Бога восиявша, плотию к нам пришедша, из боку Девичу неизреченно вочеловечьшася, Благословеная Чистая Тя Богородице величаем.

Запев с поклоном. Пожив на земли равноангельно, тем же и равноангельну обрете светлость. Моли непрестанно Избавителя Варлааме, о творящих благочестно память твою о преблаженне, инокующим похвало.

Запев. Узкии и прискорбныи шествовав путь отче Варлааме. И телесне убо преставися, духом же жив предстоиши Богови. Но яко имея дерзновение Ему же в житии поработа, моли спасти душа наша.

Слава. Исцелении явися струя независтная, многомятежнаго пламене углие страстей угасил еси. Ум бо свой некрадом преподобне отче соблюде. И яко крепок Варлааме, побеждаеши искусителя.

И ныне. Едина преимущи дерзновение Владычице, за весь мир Сыну Своему молися, не поминая безчисленых соблазн наших. И покрый люди вопиющыя Ти умиленым гласом, спаси Чистая Богородице Тебе достойно величающих. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля