Канон преподобному Павлу Обнорскому, Вологодскому чудотворцу


Канон, глас 4.

Тропарь, глас 1. Божественою любовию от юности распалаемь Павле преподобне, вся яже в мире красная возненавидев, Христа единаго возлюбил еси. И Сего ради во внутренюю пустыню вселися, со зверми живыи, весь Христови быв. От сюду же и Всевидящее Око твоя труды видев, даром чюдес и по преставлении обогатил тя есть. И Сего ради вопием ти, моли непрестанно от всех, иже честную память твою присно в песнех почитающих.

Песнь 1. Ирмос.

Моря Чермнаго пучину, немокрыми стопами древле шествовав Израиль. Крестообразно Моисеовыма рукама, Амаликову силу в пустыни победил есть.

Запев с поклоном: Преподобне отче Павле, моли Бога о нас.

Возлюбив Бога преподобне от всея души твоея. И Тому от юности послужил еси, в простоте сердца твоего. Тем же и прославил тя есть. Весть бо Господь, славящыя Его прославляти.

Запев. От юности преподобне Богови прилепился еси, и не возвратно последовал еси живоносным Его стопам. Удалився от мира, водворился еси в пустыни. Тем же почитаем память твою.

Слава. Ныне преподобне отче Павле, с лики пророк и апостол, мученик же и преподобных, во свете Святыя Троицы соводворяяся. Поминай нас чад своих, верою творящих память твою светоносную и спасеную.

И ныне. Без семене Отчею волею, от Божественаго Духа, Божия зачат Сына. И плотию родила еси, иже из Отца без матере, нас ради ис Тебе без отца.

Катавасия: Избави от бед рабы своя, преподобне отче Павле, яко вси по Бозе к тебе прибегаем, ты бо молиши о нас Христа, Бога нашего.

 

Песнь 3. Ирмос.

Веселится о Тебе, Церкви Твоя Христе зовущи. Ты ми Крепость Господи, и Прибежище и Утвержение.

Запев. От млада возраста преподобне, возлюбил еси пребывати в дому Господни, и зрети красоты Его. Темже избра тя Господь от мира, во еже служити ти пред Лицем Его в преподобии и правде.

Запев. Удалився от мира, трудное житие возлюбил еси преподобне, еже ко всем послушливу быти, и служити всем от крайняго смирения, и себе последнейша вменяти от всех. Темже и Господь прославил тя есть.

Слава. В безмолвии возлюбив жити, отче преподобне. Тем же удалился еси от человек, и водворился еси в пустыни, со зверми живыи. Того ради ныне во свете святых пребывая, поминай нас творящих память твою.

И ныне. Неоранная Бразда явилася еси, Клас Животныи рождьши. Еже всем причащающимся безсмертию Ходатая, иже во Святых Святаго, свято Почивающаго. Катавасия.

Седален, глас 8. Подобен. Премудрости.

Пожив преподобне во алчбе и жажди, и в прочих злостраданиих. Не дая покоя телу своему, за еже получити будущии покой. От нюду же и желания непогреши, но получил еси оноя радости, щадимыя любящим Бога. Темже поминай нас чад своих, и не забуди якоже обещася. Да вси вопием ти, отче наш Павле преподобне, моли Христа Бога, грехов оставление даровати, чтущим любовию святую память твою.

 

Песнь 4. Ирмос.

Воздвижена Тя видевши Церкви, на Кресте Солнца Праведнаго. Ста в чину своем, достойно взывающи. Слава Силе Твоей Господи.

Запев. Страхом Божиим ограждься от юности преподобне, и безмолвно Богови послужил еси, во уединении пребывая. Постом и жаждею смиряя тело, молитвою же чистою душу просвещая.

Запев. Худость ризную паче всех имел еси преподобне, не возлюбив мякьких и слабящих тело. Весть бо от сего и душа смирятися, и сообразоватися внутреняя внешнему устроению.

Слава. Безмолвие лобызав от юности, и многа лета в том потрудився. Всяким злостраданием друча тело свое, и не дая себе почивати телесне да получиши будущии покой.

И ныне. Неискусобрачно родила еси о Дево, и по Рожестве явися девьствующи паки. Темже немолчными гласы, еже радуися Владычице верою несуменною Тебе вопием. Катавасия.

 

Песнь 5. Ирмос.

Ты Господи ми Свет, в мир пришел еси, Свет Святыи. Обращая из мрачна неведения, верою воспевающая Тя.

Запев. Ты процвел еси преподобне в пустыни, Давыдски якоже финик, сияя добродетельми. Отнюду же и познан бысть, яко многим приходящим ревновати твоему, еже по Бозе житию.

Запев. Ты преподобне, явлен бысть от добродетелнаго жительства. От него же всем видящым созидоватися душями, и к ревности воздвизатися, еже отрещися мира, и твоему житию подобитися.

Слава. Ты преподобне смирився паче всех, и от сего приобрет умиление души, и слезам источник непрестающ. И сия вменив хлеб день и нощь, по пророческому речению.

И ныне. Тя оружие непобедимое, на враги предлагаем. Тя утвержение, и надежду нашему спасению, Богоневесто стяжахом. Катавасия.

 

Песнь 6. Ирмос.

Пожру Ти со гласом хваления Господи, Церкви вопиет Ти. От бесовския крови очишьшися, милостию от ребр изтекшею Ти кровию.

Запев. Познав Бога преподобне, по вместному человеком. Тем же и познан бысть от Бога, по имени прочих отец. И душам пастырь устроен бысть, сих наставляя к добродетелем, и приводя Богови спасаемы.

Запев. Возлюбив блаженне всенощное бдение, сим очищая ум свой. Душю же просвещая, и тело свое смиряя, и ко дневным трудом благопокорно устрояя.

Слава. Любовь к Богу и к ближнему стяжав, закона и пророк исполняя главизну. Ибо не любяи ближняго, ниже Бога возлюбити возможет. Ты же преподобне отче наш Павле, обоя исполнил еси.

И ныне. О чюдо, иже всех чюдес новейшее. Яко Девая во утробе, иже всяческая Содержащаго Словом, неискусомужно приемши, и нетесно вместивши. Катавасия.

Кондак, глас 8. Подобен. Взбранной воеводе.

Все свое умное желание к Богу вперив, и Тому невозвратно от души последовал еси, в пустыню вселився. И тамо ангельски пожив, многим путь быв ко спасению. Сего ради и Христос тебе прослави, и даром чюдес обогати. Тем же всивопием ти, радуися Павле преподобне, пустынныи жителю.

Икос. Удалився преподобне от человек, и безмолвно житие возлюбив. И пустыню достиг споспешну к сему, любящим Бога. И в той многа лета пожив, оскорбляемь от бесов, и от ненаказаных человек, и вся сия претерпел еси, Богу тя укрепляющу. И онех немощь обличил еси, терпениемь своимь. И от сюду устроен бысть пастырь душам, сих убо словесы уча, делы же показуя известне и разумне, темже и мы чада твоя, празднующе память твою вопием ти, радуися Павле преподобне, пустынныи жителю.

 

Песнь 7. Ирмос.

В пещи Авраамския си дети персстей, любовию благоверия паче, нежели пламенем опаляеми взываху. Благословен еси в Церкви Славы Твоея Господи.

Запев. Пощением оградився от юности, сим тело свое смиряя, и благопокорно души сотворяя. К сему же и страсти успивая, без стужения от сих пребыл еси. Поя Христови, благословен Бог отец наших.

Запев. Языка воздержание исправил еси отче преподобне, от многоглаголания сему возбраняя. На молитву же сего простирая, и еже точию нужная глаголати, к ползе слышащым. И пети Христови, благословен Бог отец наших.

Слава. Нищету самоволную Христа ради стяжав, и от всех житейских безименен был еси. Добродетельми же обогатился еси, и многих к ревности воздвигл еси. Научая пети Христови, благословен Бог отец наших.

И ныне. Иже Вышняго освященно Божественое Селение, радуися. Тебе бо ради дастся радость Богородице, вопиющим Ти, благословена Ты в женах, Всенепорочная Владычице. Катавасия.

 

Песнь 8. Ирмос.

Руце разпростер Даниил, лвова зияния в рове затче. Огненую же силу угасиша добродетелию поясавшеся, иже благочестия любители отроцы взывающе. Благословите вся дела Господня Господа.

Запев. Целомудрие стяжав попремногу, и чистоту телесную, якоже подобает святым. Истинное же смирение и сокрушение сердца велми удержал еси, и скорбных нанесение, радуяся приемляше. Поя Богови, благословите вся дела Господня Господа.

Запев. Страх Божии стяжав в себе, и сим наказав чювства своя. Еже непреходити своих устав, ни повреждатися от сих умному. И отсюду Богови угодил еси. Во смирении поя, благословите вся дела Господня Господа.

Слава. Зверие дивии преподобне, и кровоядцы суще, приходяще к тебе кротци бываху, от благодати Божия живущия в тебе, ничтоже ти скорбно показующе. Но и повелению твоему повиновахся поющу, благословите вся дела Господня Господа.

И ныне. Ты едина во всех родех, Дево Пречистая, Мати явися Богу. Ты Божеству бысть пребывание Всенепорочная, не опалившися огнем Неприступнаго Света. Темже Тя вси благословим, Марие Богоневестная. Катавасия.

 

Песнь 9. Ирмос.

Камень нерукосечныя горы, от несекомыя Тя Девицы краеуголныи отсечеся Христос, иже совокупив разстоящаяся естества. Тем веселящеся, Тя Богородице величаем.

Запев с поклоном. Пребывшу ти отче многа лета в пустыни в безмолвии и пощении, и всех скорбных в терпении, и попремногу Богу угодившу. Отнюдуже и Он тя прославляет, яко Своего угодника.

Запев. Пощением насажден быв, яко древо при водах блаженне воздержания, процвел еси добродетелми. И в меру достиг возраста исполнения Христова. И духовнаго совершения получил еси, якоже мощно человеку.

Слава. Ты убо преподобне хотя утаитися от человек, и един безмолвствовати. Но Бог не остави тебе неведома быти, но всем показа житие твое добродетелное, на ползу хотящым стопам твоим последовати.

И ныне. Яже всеми Владущая тварми, людем Своим даруй победное одоление. Непокориваго подложи под нозе, державе нашей, да Тя яко Богородицу величаем. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля