Канон преподобному Никону Радонежскому


Тропарь. Глас, 1
. Послушанию добрыи рачитель быв, преподобне Никоне приснопамятне. Церковь бо прекрасну Святыя Троицы, в похвалу отцу своему воздвиже. Тем же и мы чяда твоя любовию вопием ти, слава Давшему ти крепость, слава Венчавшему тя. Слава Деющему тобою всем исцеление.

 

Канон, глас 4. Творение Пахомия ермонаха, иже от святыя горы

Песнь 1. Ирмос.

Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся Тоя чюдеса.

Запев с поклоном: Преподобне отче Никоне, моли Бога о нас.

Премудростию разума украшаем преподобне Никоне, весь Христови поработився, к Нему же желание свое имыи. Его же моли спасти от бед поющих тя.

Запев. О всех Христа моли преподобне Никоне, иже память твою любовию поющих, избавитися вечнаго мучения. Да тебе вси яко тепла предстателя песньми величаем.

Запев. Христови весь поработився преподобне Никоне, и к Нему все желание имыи. И Того ради любве мира с желаньми его отрекся. Сего ради тя вси песньми ублажаем Никоне всеблаженне.

Запев. Все свое желание к Богу мужески вперив, в вышних селение сотвори преславно. Тем же тя песньми блаженне Никоне почитаем.

Слава. Аще и далече житием, но близ верою и любовию, духовнаго своего настоятеля. И с ним в купе преславно чюдеса твориши. Вкупе же и Богови предстоите, о всех нас молящеся.

И ныне. Богородичен. Премудрости вышемудростныя, приятелище бысть Всенепорочная. Свой бо храм от Твоих пречистых кровей Чистая, создати благоизволи, на спасение душам нашим.

Катавасия: Избави от бед рабы своя, преподобне отче Никоне, яко вси по Бозе к тебе прибегаем, ты бо молиши о нас Христа, Бога нашего.

 

Песнь 3. Ирмос.

Твоя певцы Богородице, живыи нетления Источниче, лик Себе совокупльши духовен утверди. И в божественей Ти славе, венцем славы сподоби.

Запев. Люди вся иже тебе ведущыя, и заступления твоего чающя не презри отче. Но елико мощно предстательствуй всем, полезная прося молитвами си.

Запев. Упование всем еси, блаженне Никоне и прибежище о всех нас молися, да тя любовию вси воспеваем приснопамятне.

Слава. Божественым желаниемь преподобне Никоне разжигаемь, мирскую красоту преобидел еси, иноческое житие возлюбив. Тем же бысть преподобным единожитель и праведным.

И ныне. Богородичен. Целении Тя источник в Твою утробу вшед показа. Мати Божия Пречистая мою убо душу исцели. Катавасия.

Седален. Глас 3.

Укрепляемь божественою силою преподобне Никоне, возмогл еси оскудение от безбожных агарян исполнити. Церковь бо нову и обитель краснейшю паче воздвиже. Тем же тя вси ублажаем.

Слава, и ныне. Божественное Селение бысть Слова, едина Пречистая Мати Дево, чистотою ангелы превосходящи. Иже паче всех мене персть бывша, осквернена плотьскими согрешенми, очисти молитв Своих божественными водами, подающи Чистая велию милость.

 

Песнь 4. Ирмос.

Седяи во славе на Престоле Божественем, на облаце легце прииде Исус Пребожественыи от Пречистыя Девы, и спасе вопиющыя, слава Христе силе Твоей.

Запев. Невозвратно шествова в водящии путь к Небесному Граду Никоне преподобне. Идеже настави тя Святыи Дух, обитель имея сердце твое.

Запев. Смирение возносящее Никоне блаженне в сердцы имел еси. Отсюдуже тя и мы молим ущедрити смирение наше.

Запев. Страстьми различными колеблемых, и верою притекающих, к твоему гробу блаженне Никоне, святым ти ходатайством всех посети милостивно к Человеколюбцу.

Слава. Мрак страстей от сердца своего, ты преподобне Никоне очистив, Христова повеление воистину свет прием, в посте просиял еси умертвив тело, духом же Никоне ожил еси.

И ныне. Богородичен. Очищение всем земным, верою молю и припадаю, Благословеная, молитвами Си Судию и Сына Твоего сотвори, яко да по долгу славлю Тя. Катавасия.

 

Песнь 5. Ирмос.

Удивишася всяческая, о Божественей славе Твоей, Ты бо браконеискусимая Девице, прият во утробе надо всеми Сущаго Бога, и родила еси Безлетнаго Сына, всем воспевающим Тя мир подавающа.

Запев. Узкии и прескорбныи путь шествовал еси преподобне Никоне, восхожденьми божествеными сердца своего, амо же отца твоего наставиша тя молитвы.

Запев. От греховных болезней мя облегчи скорбных. И сердца моего лютость утоли. И согрешением оставление испроси. Имаши бо послушающа Христа, чистыя ти молитвы.

Запев. Страсти телесныя воздержанием отче увядив. Яко древо многоплодовито, плод чюден приносиши Богови, своя чюдная исправления Никоне преподобне.

Слава. Всесветлыи светилник явися, озаряя поющыя тя, Никоне преподобне. И сего ради молим тя, вечнаго мучения избави нас поющих тя.

И ныне. Богородичен. Ума моего уврачюй изступление Всенепорочная, и исцели страсти душевныя, и уныния тму отжени. Яко да восхвалю Тя по достоянию Богородице Всепетая. Катавасия.

 

Песнь 6. Ирмос.

Божественое се и всечестное совершающе празднество, богомудрении Божия Матере, приидите руками восплещем, от Нея Рождьшагося верою славяще.

Запев. Свое сердце преподобне Никоне Святей Троице жилище и дом создал еси. Вси иже верою притекающии к честней ти раце, просвещение и освящение и очищение, всеблаженне Никоне приемлем.

Запев. Твоя всеблаженне Никоне священныя и всесвятыя мощи, во гробе лежаще недуги уврачюют. Бесовския же полки попаляют всегда. Верным же источают исцеления независтная, иже тебе по достоянию присно блажащим.

Слава. Яко весь иже Христови приближаяся яснейши, помяни всех, иже верою поминающих тя Никоне всечестне, грехом прощение у Христа прося, и Небеснаго Царствия восприятие.

И ныне. Богородичен. Едина всем поможение помози нам бедствующым. И руку подаждь, и к пристанищу введи спасения, Отроковице Благодатная. Катавасия.

Кондак. Глас 4. Духовному си настоятелю отче Никоне всячески прилепився, и от него наставляемь во всем Христови поработився. Иноком бысть чиноначальник, и преподобным сожитель. С ними же Христа Бога моли непрестанно о всех нас.

Икос. Како возмогу воспети твоя исправлениия, или изрещи труды твоя, ими же трудился еси по отце своем, аще не ты подаси ми слово недостойному рабу своему. Ты бо бысть по отце иноком начальник. С ними же Христа Бога моли непрестанно о всех нас.

 

Песнь 7. Ирмос.

Непослужиша твари богомудрении паче Зиждителя, но огненное прещение мужески поправше. Радовахуся поюще, препетыи иже отцем Господь и Бог благословен еси.

Запев. Всех текущих временных страстей преподобне Никоне отразив. Всю бо надежю к Богу стяжав, Его же ради действуеши преславная чюдеса.

Запев. Твоея души твердое и благостояние разума, преподобне Никоне, никако же лукавыи возможе совратити. Богу помогающу ти досточюдне.

Запев. Мирови умертвися, будущии живот наследуя отче, исцелением Божественую благодать источаеши, поющим, благословен Бог отец наших.

Слава. Нельстивно навык, прежде тебе бывших отец, постническому житию преподобне. Но тех житием пожив богоблаженне, воспевая, благословен Бог отец наших.

И ныне. Богородичен. Глаголом пророческим последующе Дево, Богородицу Тя исповедуем. Роди бо отроча всех древнейше, Еммануил нарицаемыи. Ему же зовем, благословен Бог отец наших. Катавасия.

 

Песнь 8. Ирмос.

Отроки благочестивыя в пещи, Рожество Богородичо спасло есть. Тогда убо образуемо, ныне же действуемо, вселенную всю воздвиже пети, Господа воспевайте дела, и превозносите Его во веки.

Запев. Мужествовав, победил еси страстная взыграния вся. Ум просвещен имея возмогл еси, яже виде отца творяща, сия детели исполнити. Тем же тя вси ублажаем, Никоне всеблаженне.

Запев. Мыслию очищенною, премудре Никоне Богу приближаяся, всем всяк быв, да Христа приобрящеши. Тем же в небесныя обители вселився преподобне, дерзновенно зриши Святую Троицу. Юже непрестанно моли, спасти всех, иже православно тя почитающих.

Запев. Серпом молитвеным отче Никоне страстная терния иссек, и возделав воздержания ралом душевную землю ввергл еси семена благочестия в ней. Тем же исцеления плоды пожинаеши.

Слава. Добродетелем тя приятелище, нарицаем преблаженне. Яко молчанию друга, и бдению делателя. И образ целомудрия, и молитве жилище некрадомо. И чюдесем сокровище. И молитвеника почитающым память твою Никоне блаженне.

И ныне. Богородичен. Мати Божия Всенепорочная, души моея, язвы исцели. Сласти утоли плоти моея. Омраченое сердце мое просвети, и умири ум мой, от всякаго вреда и вражиих мя избави напастей. Катавасия.

 

Песнь 9. Ирмос.

Всяк земен да взыграется, Духом просвещаемы, да ликовствует же безплотных умов естество, почитая святое торжество Божия Матере, и да поют, радуися Преблаженная, Богородице Чистая Приснодево.

Запев с поклоном. Слез твоих пролитием греховныи огнь погасил еси. Безстрастия же воду, и исцелении чистаго пива поющым источаеши, блаженне Никоне досточюдне. Рака идеже лежит святое тело твое преподобне Никоне. Чюдесем благодать источает, просвещающи наша душа и телеса. И обогащая предстателя тя тепла, и заступника имущих.

Запев. Днесь с нами собори ангел и преподобных веселятся, в память твою блаженне Никоне. С ними же поминай нас чтущих тя верно, досточюдне.

Слава. Устави священными ти молитвами, воздвизаемое на ны смущение, и человек  всех озлобление. Яко имыи дерзновение ко Владыце и Богу нашему Никоне досточюдне.

И ныне. Богородичен. О паче ума чюдес Твоих. Божие бо Слово воплотившееся Единаго родила еси, паче естества Мати Дево, всяческая Божественым Си хотением мудре держаща и окормляюща. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля