Канон преподобному Михаилу Клопскому, Новгородскому чудотворцу


Канон святому преподобному отцу нашему Михаилу Клопскому, иже в Великом Новеграде, глас 2.

Тропарь преподобному, глас 8. Иже на земли Христа ради волею в буйство преложився, мира сего красоты отнюд возненавиде. Плотьская играния увядив постом и жаждею, и на земли леганием. От зноя и студени, от дождя и снега, и от прочия воздушныя тягости, никогда же уклонися. Душю же очистил еси, яко злато в горниле, отче преподобне богоносне Михаиле, на Небесех предстоя Престолу Пресвятей Троице. Но яко имея дерзновение много, моли Христа Бога спастися душям нашим.

 

Песнь 1. Ирмос.

Грядите людие, поем песнь Христу Богу, раздельшему море. И проведшу люди яже испусти из работы египетския, яко прославися.

Запев с поклоном: Преподобне отче Михаиле, моли Бога о нас.

От юности преподобне сосуд избранныи бысть Пресвятыя Троицы, чистоты ради жития твоего. Благородие оставив, и мнишескии чин восприят. Крест свой взем, Христу последовал еси. И Его ради во уродство преложися, и венцем от Него венчася богоносныи отче.

Запев. Иже вся умудряющему Богу, молися преподобне о рабе своем, да отверзет мне устне недостойнии, и да подвигнет ми язык недоуменныи. Тесноту же и худогласие отче разверзи, действом иже в тебе Святаго Духа, к пению чюдес твоих.

Слава. Иже богогласным пророк точен. И боговидцем апостолом, нравом уподобився. Иже до третияго Небесе вшедыи рече, мы уроди Христа ради. И ты преподобне сия услышав, урод на земли был еси Христа ради. Безчестие и досаждение претерпев, и чести в Царствии Небеснем сподобился еси.

И ныне. Моих прегрешении Владычице, пленицу растрогни, Своего Сына и Бога молящи. И томящии мя грех, Приснодево низложи. Яко да воспеваю Тя всегда, Всенепорочная Тобою спасемь.

Катавасия: Избави от бед рабы своя, преподобне отче Михаиле, яко вси по Бозе к тебе прибегаем, ты бо молиши о нас Христа, Бога нашего.

 

Песнь 3. Ирмос.

На камени мя веры утверди, разшири уста моя на враги моя. Возвесели бо ся дух мой воспевати, несть свята яко же Бог наш. И несть праведна, паче Тебе Господи.

Запев. Каменю веры Петру апостолу уподобился еси, распятся мирови во всей жизни своей преподобне Михаиле. И нозе свои не возвратно, к Небесному шествию управил еси. И горняго Иерусалима достигл, со святыми предстоя Святей Троице, моли о нас, Единаго Человеколюбца.

Запев. Илиину ревность восприем преподобне, тем же ни прещения, ни моления согрешающых возмогоша тебе увещати. Еже тех непреподобне содеянных не обличати. Ты же непрестал еси, дондеже конечнее онех исправил еси.

Слава. Хранитель буди великия Росии, христолюбивым людем, богосныи отче Михаиле. Избавляя враг нашествия, глада же и пагубы. Да твоими молитвами ко Христу Богу, избавльшеся, тебе вси яко заступника почитаем.

И ныне. Во инех женах мати, дондеже дева не познася, ни мати по рожестве, девьствовати сподобися. На Тебе же Дево обое сбысться. Тем веселием Духа воспеваю, несть непорочны паче Тебе Владычице. Катавасия.

Седален. Глас 8. Подобен. Премудрости Наставниче.

От земных на небесная помыслив, и делом свершив ко Христу любовь. И подобно молнии от востока до запада восходящи скоростию, яко другии Аввакум отче, несен бысть ангелом с пищею в Вавилон. Он бо прекорми Даниила пророка в рове затворена, ты же преподобне достиже обители Святыя Троицы. И алчющыя душа накормив инок множества, пищею не гиблющею в Царствии Небеснем. И тамо праведно, пресветлым венцем венчася блаженне, но егда бяше в жизни сей, печашеся промышляя нам полезная, тако и ныне отче Михаиле, моли Христа Бога согрешением оставление даровати, празднущим любовию святую память твою.

 

Песнь 4. Ирмос.

Пою Тя, слухом убо Господи услышах и дивихся. До мене бо прииде, мене ища заблуждьшаго. Тем многое Твое сшествие, еже на мя прославляю обновление.

Запев. Песнь воспел еси Богу безпрестани, и слух свой к Нему преклонил еси, яко имея дерзновение много и молитвами твоими отче, советующих на православие, мысли и советы разори. И благовернаго царя нашего вооружи, на варвары победою. И межеусобныя брани умири.

Запев. Яко Солнце от востока восиял еси, во обители Святыя Троицы, среди инок множества. И урод был еси Христа ради, хотя утаитися. Не укрыет бо ся рече град верху горы стоя, ни вжигают светилника и под спудом полагают. Ты же преподобне во тме неведения сущих, просветил еси.

Слава. Яко пресветлое светило, восиял еси, и яко финик в дому Святыя Троицы пророчески процвел еси, богоносныи Михаиле. И яко денница пред праведным Солнцем Христом провосиял еси. И живу жертву сам себе Владыце принесл еси, отче преблаженне.

И ныне. От добрых всех обнажихся, и лежю в злобе. Облекии всех, иже древле во тлю падших. И вторых избави Богоневесто. Катавасия.

 

Песнь 5. Ирмос.

Ходатай Богу и человеком бысть Христе Боже. Тобою бо Владыко, к Свету Началнику Отцу Ти, от нощи неведения, преведение обретохом.

Запев. Ходатай непрестанен отче буди о нас ко Пресвятей Троице. И подвигни с собою лики святых, их же ты житию поревновал еси. Молитеся молим вы о мире и о устроении всего мира, да тихо и безмолвно житие поживем в веце сем, и в будущем жизнь вечную получим.

Запев. Преподобне отче Михаиле, в постницех велик быв во обители, идеже иноческое житие проходил еси. Единою в седмицы вкушая хлеба и воды с воздержанием, и всю жизнь свою тако скончал еси.

Слава. И паки преподобне, волею преложився во уродство Христа ради. Скорби и беды терпев, поругания и поношения и досаждения. Мученицы бо в мале времени Христа ради пострадаша, ты же отче, всю жизнь свою мученически скончав. И того ради сугубу мзду на Небесех восприял еси.

И ныне. Управи ум мой Владычице, тружающиися в пучине скорбей, и потопляемь нашествием тлетворных страстей. Спаси Богородице к Тебе прибегающаго, иныя бо помощи Чистая разве Тебе незнаем. Катавасия.

 

Песнь 6. Ирмос.

В бездне греховней одержимь, не изследную милосердия Твоего призываю бездну. От тля Боже мой возведи мя.

Запев. Ныне честныя мощи твоя лежат, во обители Святыя Троицы. В ней же еще в жизни сей много потрудися, исцеления многа источают с верою приходящим. Тем же молим тя отче, и душевныя страсти и недуги исцели, тебе славящих.

Запев. Бездна, грехов исполнена, аз, и твоя молитва яко кадило благовонно исправися пред Богом. Ныне молю тя преподобне отче, бездну грехов моих истреби, и буяющее море злаго пияньства изсуши. И напоение гневное отжени, целомудреныи ум богоносныи Михаиле.

Слава. Даждь ми Христе разум терпения, еже не осужати согрешающих, с кичением фарисейским. Но яко мытарево покаяние приими. И яко блуднаго сына, Боже Вечери Твоей достойна мя яви, молитвами преподобнаго Михаила.

И ныне. Обетщавшыя ны горким древа прежде вкушением, и падшыяся поползением, Пречистая обновила еси. Зиждителя рождьши Слово Составное, Дево Мати Владычице. Катавасия.

Кондак. глас 8. Подобен. Взбранной.

Духа Святаго силою, уподобися богогласным древним пророком, сказав безвестная и тайная, и еже годе судбам Божиим в сбытие. И ина многа чюдеса о Христе сотворив, и люди удивив. И торжествовати устрои, вопиющих слава Богу, прославляющему святыя Своя.

Икос. Уподобися пророку Аввакуму отче, восхищен силою Божиею, яко на облаце от далече страны, и обретеся во обители Святыя Троицы. Он бо от Иерусалима ангелом несен бысть с пищею в Вавилон, и тамо прекорми Даниила пророка, и вселенную удиви. Ты же люди своя возвесели чюдес действом, и множество спасаемых инок, иже твоему житию удивишася. И последствующих тебе прекорми, ядию не гиблющею, но пребывающею в животе вечнем, и тамо со ангелы водворяяся преподобне. Мы же таковая глаголем, слава Богу прославляющему святыя Своя.

 

Песнь 7. Ирмос.

Богопротивно веление, беззаконнующа мучителя, высок пламень вознесло есть. Христос же простре богочестивым детем, хлад духовныи. Сыи Благословен и Препрославлен.

Запев. Богопротивнии людие, иже еретическая мудрствующии, разпыхахуся сердцы своими, видяще нас покланяющихся честным мощем твоим. Не ведением бо окаяннии помрачени, и от таковаго безчеловечества избави душа наша, молитвами твоими преподобне отче Михаиле. Да взываем Христу, Сыи Благословен и Препрославлен.

Запев. Свет трисиянен Пребожественыя Троицы, в сердцы твоем жилище Себе содела. И наполнився Духа Святаго богоносныи отче, просвети собор православных. Еретическое же ополчение омрачил еси. Мы же вернии поем Христу, Сыи Благословен и Препрославен.

Слава. Коваху бо врази мои на мя стрелы, и лук напрязаху, хотяще пострелити. Но ты преподобне, имея дерзновение велие к Богу, молитвами своими мышцы их сокруши, и стрелы притупи. Да возмогу пети, Сыи Благословен и Препрославен.

И ныне. Пещь прообразоваше Твое Рожество Всенепорочная, отроки бо не опали. Яко же бо ни ложесна Твоя, Огнь Непостоянныи. Тем же молим Тя, огня вечнаго избави нас. Катавасия.

 

Песнь 8. Ирмос.

Пещь огнена иногда в Вавилоне, детели разделяше, Божиим велением, халдея опаляющи, верныя же прохлаждающи, поюща, благословите вся дела Господня Господа.

Запев. Приносимое тебе моление преподобне отче, от множества спасаемых, иже твоему житию последствующих, преподобне Михаиле непрезри. Тем же молимтися, и всех нас спаси тобою Христови вопиющих, благословите вся дела Господня Господа.

Запев. Имея Дух Святыи в сердцы своем, и еже годе судбам Божиим быти сказал еси человеком, яко един от богогласных древних пророк, и о минувших известил еси. И в настоящее сие время, даруй благочестивому царю нашему, на варвары победу, богоносныи отче.

Слава. От земных к Небесным обителем преславно возшел еси, богоносныи отче Михаиле. И тамо преподобных чести сподобися, предстоя Святей Троице. И зриши не изреченных, их же око не виде и ухо не слыша, и на сердце человеку невзыде, яже уготова Бог любящим Его.

И ныне. Великому таиньству Рожества Твоего, кто не удивится Богородице. Или кии язык земных, или ум бесплотных изрещи возможет. Паче естества и смысла Богородице, Зиждителя породила еси. Катавасия.

 

Песнь 9. Ирмос.

Безначална Родителя Сын, Бог и Господь воплощься, от Девицы нам явися. Омраченыя просветити, собрати расточеныя. Тем всехвалную Богородицу величаем.

Запев с поклоном. Пахомия Великаго, чину ангельскому и житию подражав, равноангельно во обители Святыя Троицы пожил еси. Тем же и равноангельну почесть, от Бога сподобился еси прияти. Мы же вси благочестно тя ублажаем, богоносныи отче Михаиле.

Запев. Путем ходя ведущим в Царство Небесное, преподобно на земли житие пожив, и в буйство Христа ради волею преложися. Мразом и зноем, и на земли леганием, алканием и жаждею тело свое удручив, дух же возвеселил еси. Тем же тя вси, благочестно ублажаем.

Слава. Молбам и пением гласы услыши, богоносныи отче Михаиле. К вере же и любви вонми великую державу нашу и христолюбивых людей. И яко отечестволюбец, противися отче со гневом нас воюющим, и свыше покров твой даруй хвалящим тя.

И ныне. Исцелила еси сокрушение Всенепорочная, и ветхое страдание земным. Бога порождьши Царя Христа, понесшаго плотию недуги наша. Тем же Тя вси роди Дево Владычице, ублажающе Богоневесто величаем. Катавасия.

+

Авторизация

* *
*

Регистрация

*
*
*
*

Проверочный код


Восстановление пароля